ខណៈដែលរស់នៅនិរទេសខ្លួននៅក្រៅប្រទេសអស់រយៈពេលជាច្រើនឆ្នាំហើយនោះ ការអះអាងមួយនៅលើបណ្ដាញសង្គម បាននិយាយថា មេដឹកនាំបក្សប្រឆាំងចាស់វស្សា លោក សម រង្ស៊ី និងភរិយា បានទទួលមរណភាពនៅក្នុងគ្រោះថ្នាក់ចរាចរណ៍មួយ នៅក្នុងប្រទេសថៃ កាលពីឆ្នាំមុន។ ការអះអាងនេះ ត្រូវបានចែករំលែកជាច្រើនដងនៅលើបណ្ដាញសង្គម ខណៈអ្នកប្រើប្រាស់ហ្វេសប៊ុកមួយចំនួន បានបញ្ចេញប្រតិកម្មទៅនឹងការអះអាងនេះផងដែរ។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ទំព័រហ្វេសប៊ុកមួយឈ្មោះ ព័ត៌មាន ចម្រុះ បានអះអាងថា មេដឹកនាំបក្សប្រឆាំងកម្ពុជា លោក សម រង្ស៊ី និងភរិយារបស់លោក បានទទួលមរណភាពនៅក្នុងគ្រោះថ្នាក់ចរាចរណ៍មួយ នៅក្នុងប្រទេសថៃ កាលពីថ្ងៃទី១៩ ខែសីហា ឆ្នាំ២០២១កន្លងមក។ ទំព័រហ្វេសប៊ុកដដែលនេះ ក៏បានបង្ហោះរូបថតលោក សម រង្ស៊ី និងភរិយារបស់លោក ដោយមានសំណេរពាក្យ «RIP» ដែលជាពាក្យសម្ដែងមរណទុក្ខ។
ការអះអាងនេះ ត្រូវបានចែករំលែកជាច្រើនដងពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ ហើយអ្នកប្រើប្រាស់បណ្ដាញសង្គមមួយចំនួន បានបញ្ចេញមតិចម្រុះបែបទៅនឹងការអះអាងបែបនេះ។
ខាងក្រោមនេះ គឺជារូបភាពផ្ដាមចេញពីការអះអាងនៅលើបណ្ដាញសង្គម ដែលសរសេររៀបរាប់ថា «ដំណឹងក្ដៅៗ សម រង្ស៊ី និងភរិយាបានស្លាប់បាត់ហើយ RIP
ថ្ងៃព្រហស្បតិ៍ ទី១៩ ខែសីហា ឆ្នាំ២០២១ លោក សម រង្ស៊ី និងភរិយា កាលពេលកន្លងទៅ ទទួលដំណឹងថា៖ មៀនប្រជាពលរដ្ឋនៅខេត្តបាត់ដំបង ដែលលក់មិនចេញព្រោះថាថៃមិនទទួលទិញ ប្រជាពលរដ្ឋនឹងរងការខាតខ្លាំង ពោលគឺបិទច្រកព្រំដែនកម្ពុជាថៃតែម្ដង បន្ទាប់មក លោក សម រង្ស៊ី និងភរិយា ឮដំណឹងនេះក៏ស្រូតមកប្រទេសថៃ ដើម្បីទិញមៀនពីប្រជាពលរដ្ឋខ្មែរដែលនៅខេត្តបាត់ដំបងច្រកព្រំដែនឡែម ដើម្បីទិញយកទៅប្រទេសបារាំង តែចង្រៃអី ក៏ជួបឧបហេតុគ្រោះថ្នាក់ចរាចរណ៍នៅប្រទេសស្លាប់ទាំងពីរទៅ…។ ប្រភពពីប្រទេសថៃ…»។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងនេះតាមរយៈការពិនិត្យទៅលើព័ត៌មាន ដែលចុះផ្សាយអំពីមរណភាពរបស់មេដឹកនាំបក្សប្រឆាំង លោក សម រង្ស៊ី និងភរិយារបស់លោក និងដំណឹងចុងក្រោយរបស់មេដឹកនាំបក្សប្រឆាំងរូបនេះ ដែលនាំឱ្យយើងរកឃើញការពិតដូចខាងក្រោមនេះ។
ព័ត៌មានមរណភាពរបស់មេដឹកនាំបក្សប្រឆាំងកម្ពុជារូបនេះ គួរតែត្រូវបានចុះផ្សាយព្រោងព្រាតនៅលើបណ្ដាញសារព័ត៌មានថៃ និងសារព័ត៌មានកម្ពុជា ប៉ុន្តែ យើងរកពុំឃើញការចុះផ្សាយបែបនេះនោះឡើយនៅក្នុងខែសីហាឆ្នាំមុន។
ខាងក្រោមនេះ គឺជាវីដេអូបង្ហាញពីការស្វែងរកព័ត៌មានមរណភាពរបស់លោក សម រង្ស៊ី នៅលើគេហទំព័រសារព័ត៌មានបាងកក ប៉ុស្តិ៍ ដែលបង្ហាញឱ្យឃើញថា គ្មានព័ត៌មានបែបនេះចុះផ្សាយនោះឡើយនាពេលនោះ។
ក្រៅពីសារព័ត៌មានបាងកក ប៉ុស្តិ៍ យើងក៏បានស្វែងរកព័ត៌មានបែបនេះនៅលើគេហទំព័រសារព័ត៌មាន The Nation របស់ថៃផងដែរ ប៉ុន្តែ គ្មានព័ត៌មានអំពីមរណភាពលោក សម រង្ស៊ី ត្រូវបានចុះផ្សាយនៅក្នុងខែសីហា ឆ្នាំ២០២១នោះឡើយ។ ព័ត៌មានចុងក្រោយពាក់ព័ន្ធនឹងមេបក្សប្រឆាំងរូបនេះ ត្រូវបានចុះផ្សាយដោយសារព័ត៌មាន The Nation កាលពីខែមិថុនាកន្លងមកនេះ និងនៅឆ្នាំ២០១៩កន្លងមក។
ខាងក្រោមនេះ គឺជាវីដេអូបង្ហាញពីការស្វែងរកព័ត៌មានអំពីមរណភាពរបស់លោក សម រង្ស៊ី និងភរិយារបស់លោក បន្ទាប់ពីការអះអាងនៅលើបណ្ដាញសង្គម និយាយថា មរណភាពរបស់មេបក្សប្រឆាំងរូបនេះ ត្រូវបានចុះផ្សាយដោយសារព័ត៌មានថៃ។
នៅលើទំព័រហ្វេសប៊ុកផ្លូវការរបស់លោកកាលពីថ្ងៃទី១៩ ខែសីហា ឆ្នាំ២០២១កន្លងមក លោក សម រង្ស៊ី បានសរសេររៀបរាប់ថា លោកបានធ្វើដំណើរទៅដល់សហរដ្ឋអាមេរិក ដែលផ្ទុយទៅនឹងការអះអាងខាងលើដែលលើកឡើងថា លោកធ្វើដំណើរទៅប្រទេសថៃ។
ខាងក្រោមនេះ គឺជាសំណេររបស់លោក សម រង្ស៊ី នៅលើទំព័រហ្វេសប៊ុកផ្លូវការរបស់លោកកាលពីថ្ងៃទី១៩ ខែសីហា ឆ្នាំ២០២១កន្លងមក ដែលរៀបរាប់ថា «លោក សម រង្ស៊ី បានមកដល់សហរដ្ឋអាមេរិក ថ្ងៃ១៨ សីហានេះ។ Ram Rainsy arrived today in the U.S. / Sam Rainsy est arrivé aujourd’hui aux Etats-Unis.»។
លោក សម រង្ស៊ី អាយុ ៧៣ឆ្នាំ មេដឹកនាំបក្សប្រឆាំងដ៏ចាស់វស្សា ពុំបានបង្ហាញវត្តមាននៅក្នុងប្រទេសកម្ពុជាចាប់តាំងពីឆ្នាំ២០១៥មក បន្ទាប់ពីលោកត្រូវបានកាត់ទោសក្រោមការចោទប្រកាន់ពីបទបរិហារកេរ្តិ៍ទៅតាមបណ្ដឹងរបស់ថ្នាក់ដឹកនាំជាន់ខ្ពស់គណបក្សប្រជាជនកម្ពុជា។
ប៉ុន្តែ ទំព័រហ្វេសប៊ុកផ្លូវការរបស់លោក តែងតែបង្ហាញវត្តមានរបស់លោក សម រង្ស៊ី ចូលរួមក្នុងកម្មវិធីជួបជុំជាមួយក្រុមអ្នកគាំទ្រនៅឯក្រៅប្រទេស និងក្រុមអ្នកនយោបាយអន្តរជាតិ។
នៅក្នុងសំណេរបង្ហោះលើទំព័រហ្វេសប៊ុកផ្លូវការរបស់លោកកាលពីថ្ងៃសៅរ៍សប្ដាហ៍មុន រូបថតមួយសន្លឹក បានបង្ហាញលោក សម រង្ស៊ី ថតរូបរួមគ្នាជាមួយក្រុមមេដឹកនាំអ្នកសេរីនិយមអន្តរជាតិ នៅឯទីក្រុងសូហ្វីយ៉ា(Sofia) ប្រទេសប៊ុលហ្គារី។
លោក សម រង្ស៊ី ត្រូវបានហាមឃាត់សិទ្ធិធ្វើនយោបាយចាប់តាំងពីដើមឆ្នាំ២០១៧ បន្ទាប់ពីលោកត្រូវបានកាត់ទោសដោយតុលាការកម្ពុជាក្រោមការចោទប្រកាន់ពីបទ«បរិហារកេរ្តិ៍»ថ្នាក់ដឹកនាំជាន់ខ្ពស់គណបក្សកាន់អំណាច ក្នុងនោះមានទាំងលោកនាយករដ្ឋមន្ត្រី ហ៊ុន សែន ផងដែរ។
សន្និដ្ឋាន
Fact Crescendo Cambodia រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ មេដឹកនាំបក្សប្រឆាំង លោក សម រង្ស៊ី និងភរិយា មិនបានទទួលមរណភាពនៅក្នុងគ្រោះថ្នាក់ចរាចរណ៍កើតឡើងក្នុងប្រទេសថៃនោះឡើយ។ លោក សម រង្ស៊ី ទើបតែបង្ហាញវត្តមានជាមួយប្រតិភូអន្តរជាតិនៃវេទិកាអ្នកសេរីនិយមអន្តរជាតិ នៅឯទីក្រុងសូហ្វីយ៉ា ប្រទេសប៊ុលហ្គារី កាលពីថ្ងៃទី០២ កក្កដា។
Title:ការអះអាងមិនត្រឹមត្រូវថា មេបក្សប្រឆាំង និងភរិយា ស្លាប់ក្នុងគ្រោះថ្នាក់ចរាចរណ៍នៅថៃ
Fact Check By: Jay UdomResult: False
