បន្ទាប់ពីកម្ពុជាបានបើកឱ្យដំណើរការសាកល្បងនូវផ្លូវល្បឿនលឿនដំបូងគេរបស់ខ្លួនកាលពីដើមខែតុលានេះ ព័ត៌មានជាច្រើនបានចុះផ្សាយអំពីផ្លូវល្បឿនលឿនមួយខ្សែនេះ។ ទន្ទឹមគ្នានេះ មានរូបថតមួយសន្លឹកដែលបង្ហាញទិដ្ឋភាពកកស្ទះចរាចរណ៍នៅលើផ្លូវល្បឿនលឿនមួយកន្លែង ត្រូវបានបង្ហោះនៅលើបណ្ដាញសង្គមជាមួយសំណេររៀបរាប់ថា «ផ្លូងល្បឿនលឿន»។ រូបថតមួយសន្លឹកនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង ហើយអ្នកប្រើប្រាស់ហ្វេសប៊ុកមួយចំនួន បានបញ្ចេញមតិដោយជឿជាក់ថា វាជាទិដ្ឋភាពកកស្ទះចរាចរណ៍នៅលើផ្លូវល្បឿនលឿននៅកម្ពុជា។ ទោះជាយ៉ាងណា ការផ្ទៀងផ្ទាត់របស់ Fact Crescendo Cambodia រកឃើញថា រូបថតនេះ ត្រូវបានបង្ហោះជាមួយសំណេរមិនត្រឹមត្រូវ។
ការអះអាងលើបណ្ដាញសង្គម
រូបថតមួយសន្លឹកដែលបង្ហាញយានយន្តជាច្រើនគ្រឿងស្ថិតលើផ្លូវដ៏ធំមួយ ត្រូវបានបង្ហោះនៅលើបណ្ដាញសង្គមហ្វេសប៊ុកនាពេលថ្មីៗនេះ ដោយមានសំណេររៀបរាប់ថា «ផ្លូវល្បឿនលឿន»។
រូបថតមួយសន្លឹកនេះ ត្រូវបានអ្នកប្រើប្រាស់បណ្ដាញសង្គមចែករំលែកបន្តជាច្រើនដង រួមជាមួយការបញ្ចេញមតិជាច្រើន និងប្រតិកម្មចម្រុះបែបផងដែរ។
ទន្ទឹមគ្នានេះអ្នកប្រើប្រាស់ហ្វេសប៊ុកនិយាយភាសាខ្មែរមួយចំនួន បានចោទសួរថា តើរូបថតមួយសន្លឹកនេះ គឺជាទិដ្ឋភាពនៃចរាចរណ៍នៅលើផ្លូវល្បឿនលឿនភ្នំពេញទៅកាន់ខេត្តព្រះសីហនុមែនឬយ៉ាងណា។
ការត្រួតពិនិត្យការពិត
Fact Crescendo Cambodia បានចាប់ផ្ដើមផ្ទៀងផ្ទាត់ទៅលើរូបថតមួយសន្លឹកនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតមួយសន្លឹកនេះ ត្រូវបានរកឃើញនៅក្នុងអត្ថបទសារព័ត៌មាន Independent របស់អង់គ្លេស និងសារព័ត៌មានអាមេរិក Bloomberg កាលពីឆ្នាំ២០១៥កន្លងមកនេះ។
សេចក្ដីរាយការណ៍របស់សារព័ត៌មាន Independent បានឱ្យដឹងថា រូបថតមួយសន្លឹកនេះ ត្រូវបានចម្លងពីវីដេអូមួយដែលបង្ហាញឱ្យឃើញការកកស្ទះចរាចរណ៍នៅលើមហាវិថីមួយ ដែលតភ្ជាប់ទីក្រុងសំខាន់ៗបីរបស់ចិន មានទីក្រុងហុងកុង ទីក្រុងម៉ាកាវ និងទីក្រុងប៉េកាំង។
បើតាមសារព័ត៌មានអង់គ្លេសដដែលនេះ ការកកស្ទះចរាចរណ៍នេះ បានកើតឡើងនៅលើមហាវិថីមាន ៥០គន្លង នៅត្រង់ស្ថានីយ៍ត្រួតពិនិត្យមួយនៅទីក្រុងប៉េកាំង ដែលរួមតូចមកនៅត្រឹមតែ ២០គន្លងវិញ។
ខាងក្រោមនេះ គឺជារូបភាពផ្ដាមចេញពីសេចក្ដីរាយការណ៍របស់សារព័ត៌មាន Independent ចុះផ្សាយកាលពីថ្ងៃទី០៨ ខែតុលា ឆ្នាំ២០១៥កន្លងមក។ សេចក្ដីរាយការណ៍នេះ បានសរសេរខ្លឹមសាររូបថតថា យានយន្តជាច្រើនគ្រឿងកកស្ទះនៅឯស្ថានីយ៍ត្រួតពិនិត្យមួយកន្លែង ខណៈដែលប្រជាជនចិនត្រឡប់ទៅផ្ទះសម្បែងរបស់ពួកគេវិញថ្ងៃចុងក្រោយនៃការឈប់សម្រាកនៅថ្ងៃបុណ្យជាតិមានរយៈពេល ១សប្ដាហ៍។
Independent Report | Archived Link
រូបថតមួយសន្លឹកនេះ ក៏ត្រូវបានចុះផ្សាយដោយសារព័ត៌មាន Bloomberg ផងដែរកាលពីខែតុលា ឆ្នាំ២០១៥កន្លងមកនេះ។ សារព័ត៌មានអាមេរិកមួយនេះ បានឱ្យដឹងថា បញ្ហាកកស្ទះយានយន្តដ៏ច្រើនបែបនេះ បានកើតឡើងនៅថ្ងៃទី០៦ ខែតុលា ឆ្នាំ២០១៥កន្លងមក ដោយសារតែមហាវិថីដែលមាន ២០គន្លង បានរួមតូចមកនៅត្រឹម ២០គន្លងវិញ។
សូមអានអត្ថបទទាំងមូលចុះផ្សាយដោយសារព័ត៌មាន Bloomberg តាមរយៈតំណភ្ជាប់នៅទីនេះ ឬតាមរយៈតំណភ្ជាប់ដែលត្រូវបានរក្សាទុកនៅទីនេះផងដែរ។
ទិដ្ឋភាពកកស្ទះចរាចរណ៍នៅលើមហាវិថីនៅក្នុងប្រទេសចិននេះ ក៏ត្រូវបានចុះផ្សាយជាមួយវីដេអូដោយសារព័ត៌មានដទៃទៀតផងដែរកាលពី ៧ឆ្នាំមុន។
សូមមើលវីដេអូខាងក្រោមនេះ ដែលចុះផ្សាយដោយសារព័ត៌មាន The Quint នៅលើបណ្ដាញ YouTube កាលពីថ្ងៃទី០៩ ខែតុលា ឆ្នាំ២០១៥កន្លងមក។
សន្និដ្ឋាន
Fact Crescendo Cambodia បានរកឃើញថា ការអះអាងទៅលើរូបថតមួយសន្លឹកដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ រូបថតមួយសន្លឹកនេះ មិនមែនជាទិដ្ឋភាពកកស្ទះនៅលើផ្លូវល្បឿនលឿនភ្នំពេញ-ព្រះសីហនុរបស់ប្រទេសកម្ពុជានោះឡើយ។ តាមការពិត រូបថតមួយសន្លឹកនេះ គឺជាទិដ្ឋភាពកកស្ទះយានយន្តនៅត្រង់ស្ថានីយ៍ត្រួតពិនិត្យមួយកន្លែងនៃផ្លូវល្បឿនលឿនទីក្រុងប៉េកាំង-ម៉ាកាវ-ហុងកុង កាលពីខែតុលា ឆ្នាំ២០១៥កន្លងមក។
Title:តើរូបថតនេះជាទិដ្ឋភាពកកស្ទះចរាចរណ៍លើផ្លូវល្បឿនលឿនភ្នំពេញ-ក្រុងព្រះសីហនុមែនឬទេ?
Fact Check By: Jay UdomResult: Missing Context
