បន្ទាប់ពីប្រទេសតួកគីរងគ្រោះរញ្ជួយដីកាលពីខែមុនដែលបណ្ដាលឱ្យមនុស្សរាប់ពាន់នាក់ស្លាប់ របួស និងបាត់ខ្លួនជាច្រើននាក់នោះ រូបថតមួយសន្លឹកដែលបង្ហាញសត្វឆ្កែមួយក្បាល ត្រូវបានបង្ហោះនៅលើបណ្ដាញសង្គមជាមួយការអះអាងថា សត្វសុនខមួយក្បាលនេះ បានជួយសង្គ្រោះជីវិតមនុស្សរហូតដល់ ១០នាក់ក្រោយហេតុការណ៍រញ្ជួយដី។ ការអះអាងបែបនេះ ត្រូវបានចែកចាយ និងប្រតិកម្មជាច្រើនដងពីសំណាក់អ្នកប្រើប្រាស់បណ្ដាញសង្គមហ្វេសប៊ុកនិយាយភាសាខ្មែរយ៉ាងផុសផុលនាពេលថ្មីៗនេះ។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា ការអះអាងដែលទំព័រហ្វេសប៊ុកបង្ហោះនៅលើបណ្តាញសង្គមនោះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី១៣ ខែកុម្ភៈ ឆ្នាំ២០២៣កន្លងទៅថ្មីៗនេះ ទំព័រហ្វេសប៊ុកមួយឈ្មោះថា «កំសាន្ដ» បានបង្ហោះរូបថតមួយសន្លឹកដែលបង្ហាញសត្វឆ្កែមួយក្បាល ដែលសម្បុរពណ៍ស និងមានសភាពប្រឡាក់ដាមទៅដោយភក់។
រូបថតបង្ហោះខាងលើនេះ ត្រូវបានភ្ជាប់ទៅនឹងការលើកឡើងថា សត្វឆ្កែមួយក្បាលនេះ បានជួយសង្គ្រោះរងគ្រោះនៅក្នុងហេតុការណ៍រញ្ជួយដីនៅក្នុងប្រទេសតួកគីដល់ទៅ១០នាក់។
ការអះអាងទៅលើរូបថតមួយសន្លឹកនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដែលបានសរសេររៀបរាប់ជាភាសាអង់គ្លេសថា «This is how a dog that after one shift of work searching through the ruins in Turkey found 10 people and saved their lives» ឬប្រែសម្រួលជាភាសាខ្មែរមានអត្ថន័យថា «នេះគឺជាទិដ្ឋភាពសត្វឆ្កែ ដែលបានសង្គ្រោះនៅគំនរបាក់បែក ក្នុងប្រទេសតួកកី និងបានរកឃើញជនរងគ្រោះជាង១០នាក់»។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបថត និងការអះអាងខាងលើនេះតាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតសុនខមួយក្បាលនេះ ត្រូវបានរកឃើញចុះផ្សាយដោយទីភ្នាក់ងារព័ត៌មាន Reuters កាលឆ្នាំ២០១៤កន្លងមក។ ខ្លឹមសារសរសេរដោយទីភ្នាក់ងារព័ត៌មានមួយនេះ បានឱ្យដឹងថា សុនកមួយក្បាលនេះឈ្មោះ Tryon រង់ចាំនៅកន្លែងកម្ចាត់មេរោគ នៅកន្លែងរអិលបាក់ដី បន្ទាប់ពីស្វែងរកជនរងគ្រោះនៅតំបន់ Oso ស្ថិតក្នុងរដ្ឋវ៉ាស៊ីងតោន កាលពីថ្ងៃទី៣០ ខែមីនា ឆ្នាំ២០១៤កន្លងមក។
ករណីខាងលើ ក៏ត្រូវបានផ្ទៀងផ្ទាត់ និងត្រួតពិនិត្យការពិតផងដែរដោយទីភ្នាក់ងារព័ត៌មាន AP កាលពីថ្ងៃទី០៩ ខែកុម្ភៈ ឆ្នាំ២០២៣ថ្មីៗកន្លងទៅ។ សូមមើលខ្លឹមសារទាំងស្រុងនៅទីនេះ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia រកឃើញថា ការអះអាងទៅលើរូបថដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ សត្វសុនខមួយក្បាលឈ្មោះ Tryon រង់ចាំឆ្លងកាត់កន្លែងកម្ចាត់មេរោគ នៅតំបន់ដែលមានការរអិលបាក់ដីមួយកន្លែង បន្ទាប់ពីស្វែងរកជនរងគ្រោះនៅតំបន់ Oso រដ្ឋវ៉ាស៊ីងតោន កាលពីថ្ងៃទី៣០ ខែមីនា ឆ្នាំ២០១៤កន្លងទៅ។
Title:សុនខសង្គ្រោះមួយក្បាលនៅអាមេរិកមិនជាប់ពាក់ព័ន្ធនឹងគ្រោះរញ្ជួយដីនៅតួកគីថ្មីៗនេះទេ
Fact Check By: Kakada SimResult: False
