- >>
- FALSE
វីដេអូឧទ្ធម្ភាគចក្រធ្លាក់កាលពីពីរឆ្នាំមុន ត្រូវបានភ្ជាប់ថាជាហេតុការណ៍កើតនៅអ៊ីរ៉ង់
បន្ទាប់ពីហេតុការណ៍ធ្លាក់ឧទ្ធម្ភាគចក្រដែលបានសម្លាប់មេដឹកនាំអ៊ីរ៉ង់កាលពីចុងសប្ដាហ៍កន្លងមកនេះ វីដេអូមួយត្រូវបានគេបង្ហោះលើបណ្ដាញសង្គមជាមួយការអះអាងថា វាជាហេតុការណ៍ធ្លាក់ឧទ្ធម្ភាគចក្រដែលបានសម្លាប់មេដឹកនាំអ៊ីរ៉ង់។ វីដេអូឃ្លីបនេះ ត្រូវបានចែករំលែកតៗគ្នាជាច្រើនដងនៅក្នុងរយៈពេលប៉ុន្មានថ្ងៃមកនេះ។ ទោះជាយ៉ាងណា យើងបានរកឃើញថា ការផ្សព្វផ្សាយនេះមិនត្រឹមត្រូវនោះឡើយ។
ការអះអាងលើបណ្ដាញសង្គម
វីដេអូឃ្លីបមួយមានរយៈពេល ២៣វិនាទី ត្រូវបានគេបង្ហោះនៅលើបណ្ដាញសង្គមជាមួយការអះអាងថា វាជាវីដេអូនៃការធ្លាក់ឧទ្ធម្ភាគចក្ររបស់ប្រធានាធិបតីអ៊ីរ៉ង់ លោក អ៊ីប្រាហ៊ីម រ៉ៃស៊ី (Ebrahim Raisi) កាលពីចុងសប្ដាហ៍កន្លងមកនេះ។
វីដេអូនេះជាមួយព័ត៌មានបែបនេះ ត្រូវបានចែករំលែកបន្តជាច្រើនដងពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ បន្ទាប់ពីវាត្រូវបានបង្ហោះនៅលើបណ្ដាញសង្គម។
ខាងក្រោមនេះ គឺជាវីដេអូបង្ហោះនៅលើបណ្ដាញសង្គមហ្វេសប៊ុកកាលពីថ្ងៃទី២២ ខែឧសភា ឆ្នាំ២០២៤ ជាមួយសំណេររៀបរាប់ថា “ឧទ្ធម្ភាគចក្រដែលប្រធានាធិបតីអ៊ីរ៉ង់ជិះនៅក្នុងនោះធ្លាក់ឆេះស្លាប់ទាំងអស់”។
វីដេអូនេះក៏ត្រូវបានអ្នកប្រើប្រាស់បណ្ដាញសង្គមដទៃទៀតបង្ហោះនៅលើបណ្ដាញសង្គមផងដែរ ដោយរៀបរាប់ថា វាវីដេអូជាក់ស្ដែងនៃការហេតុការណ៍ធ្លាក់ឧទ្ធម្ភាគចក្រដែលមេដឹកនាំអ៊ីរ៉ង់ស្ថិតនៅក្នុងនោះកាលពីថ្ងៃទី១៩ ខែឧសភា ឆ្នាំ២០២៤។
វីដេអូនេះ ត្រូវបានចែករំលែកបន្តជាច្រើនដងផងដែរ ជាពិសេសត្រូវបានចែករំលែកទៅកាន់ក្រុមបណ្ដាញសង្គមនានា បន្ទាប់ពីវាត្រូវបានបង្ហោះនៅលើបណ្ដាញសង្គមហ្វេសប៊ុកកាលពីថ្ងៃទី២២ ខែឧសភា ឆ្នាំ២០២៤។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការដំណើរការកម្មវិធីផ្ទៀងផ្ទាត់រូបថតនៅលើប្រព័ន្ធអ៊ិនធឹណិត ដែលនាំឱ្យយើងរកឃើញការពិតដូចខាងក្រោមនេះ។
តាមរយៈការដំណើរការផ្ទៀងផ្ទាត់រូបថតនៃវីដេអូនេះដោយ Google Reverse Image Search យើងបានរកឃើញថា វីដេអូឃ្លីបដូចគ្នា ដែលត្រូវបានបង្ហោះនៅលើបណ្ដាញសង្គមដោយគណនី Twitter មួយកាលពី ២ឆ្នាំមុន។
សំណេររបស់គណនី Twitter នេះ បានឱ្យដឹងថា វីដេអូនេះ គឺជាហេតុការណ៍នៃការធ្លាក់ឧទ្ធម្ភាគចក្រប៉ូលិសព្រំដែននៅតំបន់ Gauduri ភាគខាងជើងប្រទេសហ្សកហ្ស៊ី ដែលបានសម្លាប់មនុស្ស ៨នាក់នៅក្នុងឧទ្ធម្ភាគចក្រនោះ។
ហេតុការណ៍ធ្លាក់ឧទ្ធម្ភាគចក្រមួយនេះ ត្រូវបានផ្សព្វផ្សាយដោយគេហទំព័រព័ត៌មានរដ្ឋាភិបាលប្រទេសហ្សកហ្ស៊ីផងដែរនាពេលនោះ ដោយនិយាយថា ឧទ្ធម្ភាគចក្រ Mi-8 លែងស្ថិតនៅក្រោមការបញ្ជាទៀតអំឡុងពេលធ្វើប្រតិបត្តិការជួយសង្គ្រោះនៅតំបន់ Gauduri។ អត្ថបទទាំងស្រុងនៅទីនេះ
ឧទ្ធម្ភាគចក្រដែលដឹកប្រធានាធិបតីអ៊ីរ៉ង់ លោក អ៊ីប្រាហ៊ីម រ៉ៃស៊ី និងមន្ត្រីជាន់ខ្ពស់អ៊ីរ៉ង់មួយចំនួនទៀត បានធ្លាក់កាលពីថ្ងៃទី១៩ ខែឧសភា ឆ្នាំ២០២៤ ដែលបណ្ដាលឱ្យមនុស្សស្ថិតក្នុងឧទ្ធម្ភាគចក្រនោះ ស្លាប់ទាំងអស់។
ទីភ្នាក់ងារព័ត៌មាន AP ដែលបានដកស្រង់ព័ត៌មានពីប្រព័ន្ធផ្សព្វផ្សាយរដ្ឋអ៊ីរ៉ង់ បានរាយការណ៍ថា ឧទ្ធម្ភាគចក្រដែលដឹកនាំមេដឹកនាំអ៊ីរ៉ង់រូបនោះ បានឆាបឆេះភ្លាមៗ បន្ទាប់ពីវាធ្លាក់ទៅលើភ្នំមួយ ហើយថា គ្មានសញ្ញាណាមួយបង្ហាញពីការវាយប្រហារនោះឡើយ។
គ្រោះធ្លាក់ឧទ្ធម្ភាគចក្រនេះ ដែលបានសម្លាប់រដ្ឋមន្ត្រីការបរទេសអ៊ីរ៉ង់ លោក Hossein Amirabdollahian ផងនោះ បានកើតឡើងបន្ទាប់ពីមេដឹកនាំអ៊ីរ៉ង់រូបវិលត្រឡប់ពីការចូលរួមក្នុងកម្មវិធីសម្ពោធដាក់ឱ្យប្រើប្រាស់នូវទំនប់វារីអគ្គិសនីមួយស្ថិតនៅប្រទេសអាហ៊្សែបៃហ្សង់ តំបន់ព្រំដែនភាគខាងជើងជាមួយអ៊ីរ៉ង់។ អត្ថបទទាំងស្រុងនៅទីនេះ
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូឃ្លីបមួយនេះ មិនមែនជាវីដេអូនៃហេតុការណ៍ធ្លាក់ឧទ្ធម្ភាគចក្រដឹកនាំប្រធានាធិបតីអ៊ីរ៉ង់ លោក អ៊ីប្រាហ៊ីម រ៉ៃស៊ី កាលពីចុងសប្ដាហ៍មុននោះឡើយ។ វីដេអូនេះ គឺជាហេតុការណ៍ធ្លាក់ឧទ្ធម្ភាគចក្រមួយគ្រឿងនៅប្រទេសហ្សកហ្ស៊ី កាលពីឆ្នាំ២០២២កន្លងមក ដែលបានសម្លាប់មនុស្សទាំងអស់នៅក្នុងឧទ្ធម្ភាគចក្រនោះ។
Title: វីដេអូឧទ្ធម្ភាគចក្រធ្លាក់កាលពីពីរឆ្នាំមុន ត្រូវបានភ្ជាប់ថាជាហេតុការណ៍កើតនៅអ៊ីរ៉ង់
Fact Check By: Jay UdomResult: False
