រូបភាពព្រះសង្ឃពីរអង្គថើបគ្នាគឺជារូបភាពផ្គុំឡើងដោយបច្ចេកវិទ្យាបញ្ញាសិប្បនិម្មិត
ប៉ុន្មានសប្ដាហ៍ថ្មីៗនេះ ប្រទេសថៃបានស្នើនូវច្បាប់អនុញ្ញាតឱ្យក្រុមមនុស្សស្រឡាញ់ភេទដូចគ្នាអាចរៀបការបាន។ បន្ទាប់មក ក៏មានរូបភាពបីសន្លឹកដែលបង្ហាញព្រះសង្ឃពីរអង្គថើបគ្នានៅក្នុងបរិវេណវត្តអារាម ត្រូវបានបង្ហោះនៅលើបណ្ដាញសង្គមដែលនាំឱ្យអ្នកប្រើប្រាស់បណ្ដាញសង្គមជឿថាជារូបថតពិតជាក់ស្ដែង។ រូបភាពទាំងពីរសន្លឹកនេះ ត្រូវបានចែករំលែកព្រោងព្រាតលើបណ្ដាញសង្គម ហើយក៏ទទួលរងការរិះគន់ពីអ្នកគោរពប្រតិបត្តិព្រះពុទ្ធសាសនាផងដែរ។ ទោះជាយ៉ាងណា យើងរកឃើញថា ការបង្ហោះរូបភាពទាំងនេះលើបណ្ដាញសង្គម មិនត្រឹមត្រូវនោះឡើយ។
ការអះអាងលើបណ្ដាញសង្គម
រូបថត ៣សន្លឹកដែលបង្ហាញព្រះសង្ឃពីរអង្គថើបគ្នានៅក្នុងបរិវេណវត្តអារាមមួយកន្លែង ត្រូវបានបង្ហោះព្រោងព្រាតនៅលើបណ្ដាញសង្គមជាមួយសំណេរផ្សេងៗក្នុងន័យថា រូបថតទាំងនោះ គឺជាហេតុការណ៍ពិតប្រាកដ។
រូបថតទាំង ៣សន្លឹកនោះ ត្រូវបានចែករំលែកបន្តយ៉ាងផុសផុលនៅលើបណ្ដាញសង្គម ហើយមានអ្នកប្រើប្រាស់ហ្វេសប៊ុកមួយចំនួន ជឿជាក់ថាជារូបថតពិតប្រាកដ និងបានបន្ទោសទៅលើព្រះសង្ឃទាំងពីរអង្គ។
ខាងក្រោមនេះ គឺជារូបភាពផ្ដាមចេញពីការបង្ហោះរូបថតពីរក្នុងចំណោមរូបថតទាំងបីសន្លឹកដោយអ្នកប្រើប្រាស់បណ្ដាញសង្គមកម្ពុជាកាលពីថ្ងៃទី១៦ ខែមីនា ឆ្នាំ២០២៤ ដែលរៀបរាប់ថា “ក្នុងលោកមានគ្រប់រសជាតិ”។
ខាងក្រោមនេះ គឺជារូបភាពផ្ដាមចេញពីការបង្ហោះនៅលើបណ្ដាញសង្គមដោយទំព័រហ្វេសប៊ុកមួយកាលពីថ្ងៃទី២២ ខែមីនា ឆ្នាំ២០២៤ ដែលសរសេររៀបរាប់ថា “Excellent week-end à tous”។
រូបថតទាំងបីសន្លឹកនេះ ក៏ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកនិយាយភាសាភូមាផងដែរកាលពីថ្ងៃទី១២ ខែមីនា ឆ្នាំ២០២៤។
រូបថតដូចគ្នានេះ ក៏ត្រូវបានបង្ហោះលើបណ្ដាញសង្គមដោយអ្នកប្រើប្រាស់បណ្ដាញសង្គមនិយាយភាសាថៃផងដែរ ដោយរៀបរាប់ថា “คำว่าฮัก เกิดขึ้นที่ใดห์” ឬអាចប្រែសម្រួលជាភាសាខ្មែរថា “ពាក្យថាស្រឡាញ់ទីណាក៏អាចកើតឡើងបានដែរ”។
មិនថារូបថតទាំងនេះត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកកម្ពុជា ឬថៃ ឬភូមានោះទេ រូបថតទាំងបីសន្លឹកនេះ ត្រូវបានអ្នកប្រើប្រាស់បណ្ដាញសង្គមជឿថាជារូបថតនៃហេតុការណ៍ពិតប្រាកដ។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈ Google Reverse Image Search យើងបានរកឃើញរូបថតទាំងបីសន្លឹកនេះ ត្រូវបានចុះផ្សាយនៅក្នុងអត្ថបទសារព័ត៌មានថៃ The Thaiger កាលពីថ្ងៃទី១២ ខែមីនា ឆ្នាំ២០២៤។
បើតាមខ្លឹមសារនៃអត្ថបទព័ត៌មាននេះ វាបញ្ជាក់ថា រូបថតទាំងបីសន្លឹកនេះ មិនមែនជារូបថតនៃហេតុការណ៍កើតមានពិតប្រាកដនៅក្នុងវត្តណាមួយនោះឡើយ។ ផ្ទុយទៅវិញ រូបភាពទាំងនេះកើតចេញពីការផ្គុំដោយបច្ចេកវិទ្យាបញ្ញាសិប្បនិម្មិត (artificial intelligence) ឬហៅកាត់ថា AI។
ដោយសារតែរូបភាពដ៏ច្បាស់បែបនេះ សារព័ត៌មាននេះនិយាយថា រូបភាពទាំងនេះបានធ្វើឱ្យមនុស្សជាច្រើនយល់ច្រឡំ និងគិតថា ជារូបថតជាក់ស្ដែងផងដែរ។
រូបភាពទាំងនេះ ក៏ត្រូវបានចុះផ្សាយដោយប្រព័ន្ធផ្សព្វផ្សាយថៃ One 31 ផងដែរកាលពីថ្ងៃទី១២ ខែមីនា ឆ្នាំ២០២៤ ដោយបញ្ជាក់ថា រូបភាពព្រះសង្ឃថើបគ្នានៅមុខព្រះវិហារនេះ គឺជារូបភាពសាងដោយ AI។
បើតាមការចុះផ្សាយរបស់សារព័ត៌មានថៃទាំងពីរនេះ រូបភាពព្រះសង្ឃជញ្ជក់មាត់គ្នានេះ ត្រូវបានបង្កើតឡើង និងបង្ហោះនៅលើបណ្ដាញសង្គម បន្ទាប់ពីប្រទេសថៃបានលើកឡើងនូវសំណើច្បាប់ដែលនឹងបើកផ្លូវឱ្យអ្នកស្រឡាញ់ភេទដូចគ្នាអាចរៀបការជាមួយគ្នាបាន។
ដោយសារតែរូបភាពនេះទទួលរងការរិះគន់ច្រើនពីមហាជនក្រោយពីត្រូវបានបង្ហោះលើបណ្ដាញសង្គមនោះ សារព័ត៌មានកម្ពុជាក៏បានចុះផ្សាយអំពីរឿងនេះផងដែរ ដោយបញ្ជាក់ថា រូបភាពទាំងបីសន្លឹកនោះគឺជារូបភាពផ្គុំដោយបច្ចេកវិទ្យា AI។
Popular Magazine | Archived Link
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ រូបភាពព្រះសង្ឃថើបគ្នានេះ មិនមែនជាហេតុការណ៍ជាក់ស្ដែងពិតប្រាកដនោះឡើយ។ រូបភាពទាំងបីសន្លឹកនេះ ត្រូវបានផ្គុំឡើងដោយបច្ចេកវិទ្យាបញ្ញាសិប្បនិម្មិត (AI)។
Title:រូបភាពព្រះសង្ឃពីរអង្គថើបគ្នាគឺជារូបភាពផ្គុំឡើងដោយបច្ចេកវិទ្យាបញ្ញាសិប្បនិម្មិត
Written By: Jay UdomResult: Misleading
