តើលោក ហ៊ុន សែន ត្រូវបានចាប់ខ្លួនមែនដែរឬទេ?

ខណៈរដ្ឋាភិបាលកម្ពុជាដឹកនាំដោយលោកនាយករដ្ឋមន្ត្រី ហ៊ុន សែន ត្រូវបានរងការរិះគន់អំពីការធ្លាក់ចុះលទ្ធិប្រជាធិបតេយ្យ និងការគោរពសិទ្ធិមនុស្សក្នុងប្រទេសរាប់ឆ្នាំមកហើយនោះ រូបថតមួយសន្លឹក ដែលបង្ហាញទិដ្ឋភាពលោក ហ៊ុន សែន ត្រូវបានប៉ូលិសអន្តរជាតិចាប់ខ្លួននោះ ត្រូវបានបង្ហោះនៅលើបណ្ដាញសង្គម។ រូបថតនេះ ត្រូវបានចែកចាយ និងមានការបញ្ចេញមតិចម្រុះជាច្រើនពីសំណាក់អ្នកប្រើប្រាស់ថ្មីៗនេះ។

ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា រូបថត និងការអះអាងដែលអ្នកប្រើប្រាស់ហ្វេសប៊ុក បង្ហោះនៅលើបណ្តាញសង្គមហ្វេសប៊ុកនោះ គឺមិនត្រឹមត្រូវនោះឡើយ។

ការអះអាងលើបណ្តាញសង្គម

កាលពីថ្ងៃទី២៨ ខែមិថុនា ឆ្នាំ២០២២កន្លងទៅថ្មីៗនេះ អ្នកប្រើប្រាស់ហ្វេសប៊ុកម្នាក់ បានចែករំលែកនូវរូបថតមួយសន្លឹក បង្ហាញទិដ្ឋភាពលោកនាយករដ្ឋមន្រ្តី ហ៊ុន សែន ត្រូវបានក្រុមប៉ូលិសចាប់ និងឃាត់ខ្លួន។ រូបថតនេះ ត្រូវបានភ្ជាប់ជាមួយនឹងសំណេរថា «ថាមែនៗ ICC»។

រូបភាពមួយសន្លឹកនេះ ត្រូវបានចែករំលែកជាច្រើនពីសំណាក់អ្នកប្រើប្រាស់ហ្វេសប៊ុក ខណៈអ្នកប្រើប្រាស់ហ្វេសប៊ុកជាច្រើនទៀត បានបញ្ចេញមតិ និងប្រតិកម្មចម្រុះផងដែរ។

ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់អ្នកប្រើប្រាស់ខាងលើ ដែលបានសរសេរថា «ពួកយើងតាមរកតាំងពីនៅក្នុងព្រៃម៉ាកគី ទួលស្លែង ក៥ តាមជំរុំទល់ដែន រកមិនឃើញ»។

Facebook Post | Archived Link

ការត្រួតពិនិត្យការពិត

Fact Crescendo Cambodia ចាប់ផ្ដើមត្រួតពិនិត្យទៅលើរូបថតខាងលើនេះ តាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។

រូបថតមានទម្រង់ និងសណ្ឋានដូចគ្នានេះ ត្រូវបានរកឃើញនៅលើគេហទំព័រសារព័ត៌មាន Daily Mail ចុះផ្សាយកាលពីថ្ងៃទី១៧ ខែកញ្ញា ឆ្នាំ២០១៣កន្លងទៅ។ គេហទំព័រដដែលនេះ បានធ្វើសេចក្តីរាយការណ៍ និងបានបញ្ជាក់ជាភាសាអង់គ្លេស ឬប្រែសម្រួលជាភាសាខ្មែរមានន័យថា «បុរសម្នាក់ត្រូវបានចាប់ខ្លួនពីបទបានគប់ផាវចូលទៅក្នុងសេតវិមានកាលពីថ្ងៃចន្ទនេះ»។

រូបភាពខាងក្រោម ក៏បានបង្ហាញទិដ្ឋភាពក្រុមប៉ូលិសបាននាំខ្លួនបុរសគប់ផាវចូលក្នុងបរិវេណសេតវិមាននារដ្ឋធានីវ៉ាស៊ីនតោនផងដែរ។

Daily Mail News Report | Archived Link

តាមរយៈគេហទំព័រសារព័ត៌មាន USA Today ផ្សព្វផ្សាយកាលពីថ្ងៃទី១៦ ខែកញ្ញា ឆ្នាំ២០១៣កន្លងទៅ ក៏បានបង្ហាញទិដ្ឋភាពនៃការចាប់ខ្លួនបុរសម្នាក់ពីសំណាក់ក្រុមប៉ូលិសអាមេរិកផងដែរ។

ខាងក្រោមនេះ គឺជារូបភាពផ្ដាមចេញពីទំព័រសារព័ត៌មានខាងលើ មានចំណងជើងជាភាសាអង់គ្លេសថា «Man arrested for throwing firecrackers at White House» ឬប្រែសម្រួលជាភាសាខ្មែរមានន័យថា «បុរសម្នាក់ត្រូវបានចាប់ខ្លួនពីបទគប់ផាវនៅសេតវិមាន»។

USA Today News Report | Archived Link

ដូចគ្នានេះ តាមរយៈគេហទំព័រ Buzz Feed News ចេញផ្សាយកាលពីថ្ងៃទី១៧ ខែកញ្ញា ឆ្នាំ២០១៣កន្លងទៅនេះ ពុំបានបង្ហាញទិដ្ឋភាពនៃការចាប់ខ្លួនលោកនាយករដ្ឋមន្ត្រី ហ៊ុន សែន ដូចបានបង្ហោះខាងលើនោះឡើយ។

គេហទំព័រនេះ បានបញ្ជាក់ថា បុរសម្នាក់ត្រូវបានចាប់ខ្លួនដោយប៉ូលិសនៅផ្លូវ Pennsylvania ខាងក្រៅសេតវិមានកាលពីថ្ងៃចន្ទ ទី១៦ ខែកញ្ញា ឆ្នាំ២០១៣កន្លងទៅក្នុងរដ្ឋធានីវ៉ាស៊ីនតោន។

Buzz Feed News Report | Archived Link

ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖

Facebook Twitter Telegram Google News

សន្និដ្ឋាន

Fact Crescendo Cambodia រកឃើញថា រូបថតភ្ជាប់នឹងការអះអាងដូចដែលរៀបរាប់ខាងលើ គឺមិនត្រឹមត្រូវនោះឡើយ។ រូបថតនេះ គឺជាការចាប់ខ្លួនបុរសម្នាក់ដែលបានគប់ផាវចូលទៅក្នុងបរិវេណសេតវិមាននារដ្ឋធានីវ៉ាស៊ីនតោន ដោយប៉ូលិសអាមេរិកកាលពីឆ្នាំ២០១៣ និងពុំបានបង្ហាញទិដ្ឋភាពនៃការចាប់ខ្លួនលោក ហ៊ុន សែន នោះឡើយ។