កាលពី២សប្ដាហ៍មុននេះ ក្រុមតាលីបង់បានចូលទៅកាន់កាប់រដ្ឋធានីកាប៊ុលនៃប្រទេសអាហ្វហ្គានីស្ថាន ដោយបានធ្វើដំណើរសម្រុកទៅកាន់គោលដៅសំខាន់ៗចំនួន ២កន្លែង គឺទីស្នាក់ការកណ្ដាលនៃនាយកដ្ឋានសន្តិសុខជាតិ និងក្រសួងទំនាក់ទំនង។
ការវាយដណ្តើម និងគ្រប់គ្រងរដ្ឋធានីនៃប្រទេសមួយនេះ ក៏បានធ្វើឲ្យអ្នកប្រើប្រាស់បណ្តាញសង្គមហ្វេសប៊ុកម្នាក់ បានបង្ហោះវីដេអូឃ្លីបមួយបង្ហាញអំពីទិដ្ឋភាពមនុស្សកាន់កាំភ្លើងមួយក្រុមកំពុងតែរាំសប្បាយនៅក្នុងកម្មវិធីមួយ។ វីដេអូនេះត្រូវបានគេចែកចាយ និងអះអាងថា គឺជាក្រុមតាលីបង់ក្រោយពីបានដណ្តើមរដ្ឋធានីកាប៊ុល។
ទោះជាយ៉ាងណា ការត្រួតពិនិត្យ និងផ្ទៀងផ្ទាត់ការពិតរបស់ក្រុមការងារ Fact Crescendo Cambodia បានរកឃើញថា ការអះអាងរបស់អ្នកប្រើប្រាស់ហ្វេសប៊ុកនៅលើបណ្តាញសង្គមនោះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី២០ ខែសីហា ឆ្នាំ២០២១ថ្មីៗនេះ អ្នកប្រើប្រាស់ហ្វេសប៊ុកម្នាក់ បង្ហោះវីដេអូឃ្លីបមួយ ដែលមានរយៈពេលប្រមាណជាង៤នាទី ដោយបានបង្ហាញអំពីទិដ្ឋភាពក្រុមមនុស្សកំពុងតែរាំលេងសប្បាយ។ អ្នកប្រើប្រាស់ដដែលនេះ ក៏បានសរសេរសំណេរអះអាងផងដែរថា ក្រុមមនុស្សទាំងនោះ គឺជាក្រុមតាលីបង់ដែលទើបតែដណ្តើមបានទីក្រុងកាប៊ុលនាពេលថ្មីៗនេះ។
វីដេអូភ្ជាប់ជាមួយនឹងការអះអាងនេះ ត្រូវបានបញ្ចេញមតិចម្រុះ និងចែកចាយតៗគ្នាជាច្រើនដងផងដែរ នៅលើបណ្តាញសង្គមហ្វេសប៊ុកនិយាយភាសាខ្មែរ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍អ្នកប្រើប្រាស់ហ្វេសប៊ុកបានសរសេររៀបរាប់ថា «ក្រោយពួកគេដណ្ដើមបានក្រុងកាប៊ុល ពួកតាលីបង់បានរាំលេងយ៉ាងសប្បាយ»។
ដូចគ្នានេះផងដែរ កាលពីថ្ងៃទី២១ ខែសីហា ឆ្នាំ២០២១ថ្មីៗកន្លងទៅនេះ ទំព័រហ្វេសប៊ុកមួយដែលមានឈ្មោះថា Spean Newstv ក៏បានបង្ហោះនូវវីដេអូឃ្លីបមួយនេះផងដែរ ដោយបានបញ្ជាក់ថាក្រុមមនុស្សដែលកំពុងតែរាំនោះគឺជា ក្រុមតាលីបង់ដែលទើបតែដណ្តើមបានទីក្រុងកាប៊ុល ប្រទេសអាហ្វហ្គានីស្ថាន។ វីដេអូមួយនេះត្រូវបានចែកចាយ តៗគ្នាជាច្រើនដងនៅលើបណ្តាញសង្គមហ្វេសប៊ុកនិយាយភាសាខ្មែរ។
រូបភាពផ្តាមចេញពីទំព័រហ្វេសប៊ុកខាងលើដែលបានអះអាងថា «រាំឡើងម៉ាអែម ចាក់ក្បាច់ឡើងម៉ាហំ !ក្រុមតាលីបង់សប្បាយអស់ទាស់ ពេលដណ្តើមបានអាហ្វហ្គានីស្ថាន!»។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាល់លើករណីនេះតាមរយៈការដំណើរការកម្មវិធីស្វែងរករូបថតរបស់ក្រុមហ៊ុន Google ដែលនាំឱ្យយើងជួបប្រទះនូវប្រភព និងខ្លឹមសារវីដេអូនៃច្បាប់ដើមមួយចំនួន។
តាមរយៈគេហទំព័រវីដេអូ Youtube ដែលបានបង្ហោះនូវវីដេអូឃ្លីបមួយកាលពីថ្ងៃទី២៥ ខែមីនា ឆ្នាំ២០២១កន្លងទៅនេះ បានបង្ហាញនូវទម្រង់ និងភិនភាគដូចគ្នាទាំងស្រុងទៅនឹងវីដេអូឃ្លីបដែលអ្នកប្រើប្រាស់យកមកអះអាងខាងលើ។ វីដេអូនេះត្រូវបានបញ្ចូលទៅក្នុងគេហទំព័រខាងលើតាំងពីខែមីនា ៥ខែមុននៃព្រឹត្តិការណ៍ក្រុមតាលីបង់ចូលមកកាន់កាប់ទីក្រុងកាប៊ុលមកម្ល៉េះ។
ករណីខាងលើនេះ ក៏ត្រូវបានត្រួតពិនិត្យ និងផ្ទៀងផ្ទាត់ផងដែរដោយក្រុមការងារ Fact Crescendo របស់យើងជាភាសាអង់គ្លេសកាលពីថ្ងៃទី១៨ ខែសីហា ឆ្នាំ២០២១ថ្មីៗនេះ។
សេចក្តីរាយការណ៍មួយនេះក៏បានសរសេររៀបរាប់ជាភាសាអង់គ្លេសថា “The viral video is actually from a wedding in Pakistan and does not show Taliban Militants celebrating after capturing Kabul. The video was recorded in March this year and has absolutely no connection with the current situation in Afghanistan.” ឬប្រែជាភាសាខ្មែរថា «វីដេអូដែលផ្សព្វផ្សាយនៅតាមបណ្តាញសង្គមមួយនេះការពិត គឺត្រូវបានរកឃើញឡើងនៅក្នុងពិធីមង្គលការមួយក្នុងប្រទេសប៉ាគីស្ថាន ហើយវាមិនបានបង្ហាញ និងអះអាងថាជាក្រុមតាលីបង់ទេ។ វីដេអូនេះត្រូវបានថតនៅខែមីនាដែលគ្មានទំនាក់ទំនងជាមួយនឹងស្ថានភាពបច្ចុប្បន្ននៅក្នុងប្រទេសអាហ្វហ្គានីស្ថាននោះឡើយ»។
ក្រុមការងាររបស់យើងក៏បានផ្ទៀងផ្ទាល់នូវរូបថតមួយសន្លឹករបស់លោក វ៉ាហាប់ (Wahab) ដែលត្រូវបានគេស្គាល់ថា គឺជាមនុស្សមួយរូបដែលមានវត្តមាននៅក្នុងវីដេអូឃ្លីបនោះផងដែរ។
Fact Crescendo’s Report | Archived Link
បើតាមទីភ្នាក់ងារព័ត៌មាន Reuters ដែលបានធ្វើការផ្ទៀងផ្ទាល់នូវវីដេអូឃ្លីបមួយនេះកាលពីថ្ងៃទី២០ ខែសីហា ឆ្នាំ២០២១ បានរៀបរាប់ជាភាសាអង់គ្លេសថា «Miscaptioned. The video appeared online at least as early as March 2021, almost five months before the Taliban takeover in August 2021.» ឬប្រែសម្រួលជាភាសាខ្មែរមានន័យថា «វីដេអូមួយនេះត្រូវបានរកឃើញ និងបង្ហោះនៅតាមគេហទំព័រវីដេអូ Youtube ដំបូងឡើយនាដើមខែមីនា ឆ្នាំ២០២១ ពោលគឺជិតប្រាំខែមុនពេលក្រុមតាលីបង់ដណ្តើមបានទីក្រុងកាប៊ុលកាលពីខែសីហា ឆ្នាំ២០២១ថ្មីៗនេះ»។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News
សន្និដ្ឋាន
Fact Crescendo Cambodia រកឃើញថា ការអះអាងដូចបានរៀបរាប់ខាងលើនេះ គឺមិនត្រឹមត្រូវនោះឡើយ។ វីដេអូឃ្លីបនេះ មិនមែនជាទិដ្ឋភាពក្រុមតាលីបង់រាំលេងសប្បាយនៅពេលដែលវាយបាន និងគ្រប់គ្រងទីក្រុងកាប៊ុលនោះទេ។ ការពិតវីដេអូឃ្លីបនេះ គឺត្រូវបានរកឃើញឡើងតាំងពីខែមីនាមកម្ល៉េះ ពោលគឺជិត ៥ខែ មុនពេលក្រុមតាលីបង់ដណ្តើមបានទីក្រុងកាប៊ុល។ វីដេអូនេះបានបង្ហាញអំពីទិដ្ឋភាពពិធីមង្គលការមួយ នៅក្នុងប្រទេសប៉ាគីស្ថាន ដែលពុំបានទាក់ទងទៅនឹងក្រុមតាលីបង់នោះឡើយ។
Title:តើក្រុមតាលីបង់ពិតជាបានរាំលេងសប្បាយ ក្រោយពីបានដណ្តើមទីក្រុងកាប៊ុលមែនឬ?
Fact Check By: Kakada SimResult: False
