គិតត្រឹមថ្ងៃទី២៤ ខែមីនានេះ យុទ្ធនាការចាក់វ៉ាក់សាំងបង្ការមេរោគកូវីដ១៩នៅទូទាំងប្រទេសកម្ពុជា បានកើតឡើងអស់រយៈពេល ៤២ថ្ងៃមកហើយ ក្នុងនោះមានទាំងចាក់វ៉ាក់សាំងស៊ីណូហ្វាមដែលជាជំនួយរបស់ចិន និងវ៉ាក់សាំង Covishield ដែលត្រូវបានផលិតឡើងនៅប្រទេសឥណ្ឌាក្រោមការអនុញ្ញាតពីក្រុមហ៊ុន AstraZeneca ហើយដែលត្រូវបានផ្ដល់មកកម្ពុជាតាមរយៈយន្តការនៃអង្គការសុខភាពពិភពលោក។
ទន្ទឹមគ្នានេះដែរ ករណីឆ្លងមេរោគកូវីដ១៩នៅក្នុងប្រទេសកម្ពុជា ត្រូវបានរាយការណ៍ថា បានកើនឡើងដល់ចំនួន ១ ៨១៧ករណីហើយគិតត្រឹមថ្ងៃទី២៤ ខែមីនានេះ ក្នុងនោះកម្ពុជាមានមនុស្ស ៥នាក់បានស្លាប់ដោយសារជំងឺផ្លូវដង្ហើមមួយនេះ ដែលការស្លាប់នោះបានកើតឡើងនាពេលថ្មីៗនេះ។
ការស្លាប់មនុស្ស ៥ករណីដោយសារតែជំងឺកូវីដ១៩នេះ ត្រូវបានអ្នកប្រើប្រាស់បណ្ដាញសង្គមមួយចំនួនអះអាងថា គឺបណ្ដាលមកពីការចាក់វ៉ាក់សាំងចិន ព្រោះមនុស្សដែលបានស្លាប់សុទ្ធតែបានចាក់វ៉ាក់សាំងរួចហើយ។
ទោះជាយ៉ាងណា ការផ្ទៀងផ្ទាត់ការធ្វើឡើងដោយ Fact Crescendo Cambodia រកឃើញថា ការអះអាងលើបណ្ដាញសង្គមនេះ មិនត្រឹមត្រូវនោះទេ។
ការអះអាងលើបណ្តាញសង្គម
កាលពីថ្ងៃទី២២ ខែមីនាកន្លងទៅនេះ អ្នកប្រើប្រាស់ហ្វេសប៊ុកម្នាក់ អះអាងថា ករណីស្លាប់ដោយសារជំងឺកូវីដ១៩នាពេលថ្មីៗនេះ បានកើតឡើងតែលើពលរដ្ឋកម្ពុជា ដែលបានចាក់វ៉ាក់សាំងចិនរួចហើយ។ ការអះអាងនេះ ត្រូវបានចែករំលែកបន្តជាច្រើនដង និងលាយឡំទៅដោយការបញ្ចេញមតិចម្រុះបែបពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ។
រូបភាពផ្ដាមចេញពីប៉ុស្តិ៍របស់អ្នកប្រើប្រាស់ហ្វេសប៊ុកនោះ រៀបរាប់ថា «ការស្លាប់របស់អ្នកដែលមានជំងឺកូវីត១៩នៅខ្មែរកន្លងមកនេះ ជាទូទៅកើតមានលើអ្នកដែលបានចាក់វ៉ាក់សាំងចិនទាំងអស់»។
(ខាងក្រោមនេះគឺជាខ្លឹមសារទាំងស្រុងដែលបានបង្ហោះដោយអ្នកប្រើប្រាស់បណ្តាញសង្គម)
កាលពីថ្ងៃទី២៣ ខែមីនា អ្នកប្រើប្រាស់ហ្វេសប៊ុកម្នាក់ទៀត អះអាងនៅក្នុងគ្រុបហ្វេសប៊ុកមួយថា កម្ពុជាមិនមានការឆ្លងរីករាលដាលនៃមេរោគកូវីដ១៩ដូចប្រទេសដទៃទៀតលើពិភពលោកទេ ហើយអះអាងថា មនុស្សប៉ុន្មាននាក់ដែលក្រសួងសុខាភិបាលប្រកាសថាស្លាប់ដោយសារជំងឺកូវីដ១៩នោះ គឺស្លាប់ដោយសារការចាក់វ៉ាក់សាំង និងជំងឺផ្សេងៗ។
រូបភាពផ្ដាមចេញពីប៉ុស្តិ៍របស់អ្នកប្រើប្រាស់ហ្វេសប៊ុក រៀបរាប់ថា «ច្បាស់ហើយ កម្ពុជាមិនមានកូវីដ១៩ ឬ Coronavirus ពិតប្រាកដដូចពិភពលោកនោះទេ។ អ្នកដែលស្លាប់ជាង ១០នាក់ គឺដោយសារចាក់វ៉ាក់សាំង និងស្លាប់ដោយសារជំងឺផ្សេង២ ហើយតួលេខអ្នកឆ្លងទាំងប៉ុន្មាន គឺជាការសម្ដែង ការចោទ និងការចាប់បង្ខំ ការបំប៉ោង និងជាជំងឺផ្សេងប៉ុណ្ណោះ។ វាគ្មានការពិនិត្យ ឬការធ្វើតេស្តណាមួយដោយសុក្រឹតភាពនោះឡើយ»។
កាលពីថ្ងៃទី២៥ ខែមីនា អ្នកប្រើប្រាស់ហ្វេសប៊ុកម្នាក់ទៀត បានអះអាងថា បុរសកម្ពុជាម្នាក់ទៀតអាយុ ៣៨ឆ្នាំ បានស្លាប់បាត់បង់ជីវិតដោយសារជំងឺកូវីដ១៩ បន្ទាប់ពីចាក់វ៉ាក់សាំងកាលពីថ្ងៃទី២ ខែមីនា។
រូបភាពផ្ដាមចេញពីប៉ុស្តិ៍របស់អ្នកប្រើប្រាស់ហ្វេសប៊ុកនោះ រៀបរាប់ថា «គាត់ចាក់វ៉ាក់សាំងថ្ងៃទី២ ខែមីនា ឆ្នាំ២០២១ ស្លាប់ថ្ងៃនេះ[២៥ មីនា]។ ក្រសួងថា ដោយសារកូវីដ។ ហេតុអ្វីភាគច្រើនស្លាប់តែអ្នកចាក់វ៉ាក់សាំង?»។
ការពិនិត្យការពិត
Fact Crescendo Cambodia បានចាប់ផ្ដើមផ្ទៀងផ្ទាត់ការពិតជុំវិញការអះអាងនេះតាមរយៈការពិនិត្យមើលការបកស្រាយពីស្ថាប័ន ពាក់ព័ន្ធនៅក្នុងប្រទេសកម្ពុជាជុំវិញមរណភាពទាំង ៥ករណីនោះ។
បើតាមសេចក្ដីរាយការណ៍របស់ទីភ្នាក់ងារព័ត៌មាន AP រាជរដ្ឋាភិបាលកម្ពុជាបានកំណត់ថា ពលរដ្ឋកម្ពុជាវ័យចាប់ពី ៦០ឆ្នាំឡើងទៅ នឹងទទួលបានវ៉ាក់សាំង Covishield ដែលត្រូវបានផលិតឡើងនៅក្នុងប្រទេសឥណ្ឌាក្រោមការអនុញ្ញាតពីក្រុមហ៊ុន AstraZeneca ហើយដែលត្រូវបានដឹកជញ្ជូនមកដល់កម្ពុជាកាលពីដើមខែមីនា បន្ទាប់ពីទទួលបានការជួយគាំទ្រដោយមជ្ឈមណ្ឌលសម្របសម្រួលរបស់អង្គការសុខភាពលោក។ ចំណែកពលរដ្ឋកម្ពុជាអាយុចន្លោះពី ១៨ ទៅ ៥៩ឆ្នាំ នឹងទទួលបានវ៉ាក់សាំងស៊ីណូហ្វាមជាជំនួយរបស់ប្រទេសចិន ដែលត្រូវបានដឹកជញ្ជូនមកដល់កម្ពុជាលើកដំបូងនៅថ្ងៃទី៧ ខែកុម្ភៈ។
បើផ្អែកតាមសេចក្ដីណែនាំរបស់រាជរដ្ឋាភិបាល បុរសវ័យ៧៥ឆ្នាំខាងលើនេះ ស្ថិតនៅក្នុងចំណោមក្រុមពលរដ្ឋដែលត្រូវបានកំណត់ឱ្យចាក់វ៉ាក់សាំង Covishield មិនមែនវ៉ាក់សាំងចិនស៊ីណូហ្វាមដូចទៅនឹងការអះអាងលើបណ្ដាញសង្គមទេ។
បើតាមសេចក្ដីប្រកាសព័ត៌មានរបស់ក្រសួងសុខាភិបាល មូលហេតុនៃការស្លាប់របស់វេជ្ជបណ្ឌិតវ័យ៧៥ឆ្នាំខាងលើនេះ គឺបណ្ដាលមកពីមេរោគកូវីដ១៩ ដែលបានវាយប្រហារយ៉ាងធ្ងន់ធ្ងរទៅលើសួតទាំងសងខាងរបស់គាត់។
(សេចក្ដីប្រកាសព័ត៌មានរបស់ក្រសួងសុខាភិបាលពាក់ព័ន្ធនឹងការស្លាប់របស់បុរស៧៥ឆ្នាំ)
សម្រាប់ស្ត្រីម្នាក់មានអាយុ ៦២ឆ្នាំ ដែលជាម្ដាយរបស់តារាចម្រៀងស្រី កញ្ញា វី ឌីណែត និងជាភរិយារបស់តារាចម្រៀងជើងចាស់ លោក ហួរ ឡាវី នោះ ក្រសួងសុខាភិបាលបានបញ្ជាក់ក្នុងសេចក្ដីប្រកាសព័ត៌មានរបស់ខ្លួនថា បានស្លាប់នៅថ្ងៃទី១៩ ខែមីនា ដោយសារការវាយលុកយ៉ាងរហ័សនៃមេរោគកូវីដ១៩ ដែលបណ្ដាលឱ្យរលាកសួងទាំងសងខាងយ៉ាងធ្ងន់ធ្ងរ។
បើតាមអាយុរបស់ស្ត្រីរូបនេះ គាត់ក៏ត្រូវស្ថិតនៅក្នុងចំណោមក្រុមពលរដ្ឋដែលត្រូវចាក់វ៉ាក់សាំង Covishield ផងដែរ មិនមែនវ៉ាក់សាំងស៊ីណូហ្វាមដែលផលិតឡើងដោយប្រទេសចិននោះទេ។
ក្នុងកិច្ចសម្ភាសជាមួយ Fact Crescendo Cambodia តារាចម្រៀង លោក ហួរ ឡាវី បានបញ្ជាក់ថា ភរិយារបស់លោក រូបលោកផ្ទាល់ និងសមាជិកដទៃទៀតនៅក្នុងក្រុមគ្រួសាររបស់លោក មិនទាន់បានចាក់វ៉ាក់សាំងនៅឡើយទេរហូតមកដល់ថ្ងៃទី២៧ ខែមីនា។
សម្រាប់ករណីស្លាប់បុរសវ័យ ៣៨ឆ្នាំកាលពីថ្ងៃទី២៥ ខែមីនា ក្រសួងសុខាភិបាលក៏បានបញ្ជាក់ក្នុងសេចក្ដីប្រកាសព័ត៌មានរបស់ខ្លួនផងដែរថា បណ្ដាលមកពីមេរោគកូវីដ១៩ ដែលបានវាយប្រហារសួតទាំងសងខាងរបស់អ្នកជំងឺ។
ក្នុងកិច្ចសម្ភាសជាមួយ Fact Crescendo Cambodia លោក ជុំ ផានិត ដែលហៅថា នាយកណ្ដុរ ដែលជាមិត្តភក្តិជិតស្និទ្ធនឹងបុរសវ័យ៣៨ឆ្នាំខាងលើនេះ បានប្រាប់ថា មិត្តភក្តិរួមអាជីពសិល្បៈរបស់លោករូបនេះ មិនទាន់ចាក់វ៉ាក់សាំងនៅឡើយទេ ហើយរូបថតជាមួយការរៀបរាប់ថា លោករង់ចាំចាក់វ៉ាក់សាំងនៅព្រះវិហារនោះ គឺគ្រាន់តែបុរសវ័យ ៣៨ឆ្នាំខាងលើបានជូនមន្ត្រីនគរបាលម្នាក់ជាមិត្តភក្តិទៅចាក់វ៉ាក់សាំងតែប៉ុណ្ណោះ។
ប្រាប់ក្រុមអ្នកសារព័ត៌មានតាមគ្រុបតេឡេក្រាមនៅថ្ងៃទី២៦ ខែមីនា អ្នកស្រី ឱ វណ្ណឌីន អ្នកនាំពាក្យក្រសួងសុខាភិបាល បានច្រានចោលនូវការអះអាងនេះផងដែរ ដោយចាត់ទុកការអះអាងបែបនេះជា«ការប្រឌិត»។
សន្និដ្ឋាន
Fact Crescendo Cambodia រកឃើញថា ការអះអាងថា អ្នកជំងឺកូវីដ១៩ចំនួន ៥នាក់ បានស្លាប់ដោយសារការចាក់វ៉ាក់សាំងចិននោះ គឺមិនត្រឹមត្រូវនោះទេ។ រហូតមដល់ថ្ងៃទី២៦ ខែមីននេះ គ្មានសេចក្ដីរាយការណ៍ផ្លូវការណាមួយអំពីករណីស្លាប់ដោយសារការចាក់វ៉ាក់សាំងចិននោះឡើយ ហើយសមាជិកក្រុមគ្រួសាររបស់អ្នកស្លាប់ទាំងនោះ បញ្ជាក់ថា មនុស្សជាទីស្រឡាញ់របស់ពួកគេ មិនទាន់បានចាក់វ៉ាក់សាំងនៅឡើយ។ ការស្លាប់របស់មនុស្ស ៥នាក់នាពេលថ្មីៗនេះ ត្រូវបានក្រសួងសុខាភិបាលប្រកាសថា គឺបណ្ដាលមកពីការវាយប្រហារដោយមេរោគកូវីដ១៩។
Title:មនុស្ស៥នាក់ស្លាប់ដោយសារកូវីដ១៩ថ្មីៗនេះមិនជាប់ពាក់ព័ន្ធនឹងវ៉ាក់សាំងចិននោះឡើយ
Fact Check By: Jay Udom and Kakada SimResult: Misleading
