Fact-Check: តើ​អតីត​ប្រមុខ​ការទូត​អាមេរិក​ លោក ចន ឃឺរី កាន់​អាវ​យឺត​​មាន​​រូប​សញ្ញា​បក្ស​ប្រឆាំង​មែន​ទេ?

False Political

ខណៈ​ដែល​ការ​បោះ​ឆ្នោត​សំខាន់ៗ​កាន់​តែ​ខិត​ចូល​មក​ដល់​នោះ រូបភាព រូបថត និង​វីដេអូ​ជាច្រើន​ដែល​បង្ហាញ​ពី​គណបក្ស​សង្គ្រោះ​ជាតិ (CNRP) ត្រូវ​បាន​បង្ហោះ និង​ចែក​រំលែក​នៅ​លើ​បណ្ដាញ​សង្គម​ហ្វេសប៊ុក។ ក្នុង​ចំណោម​នោះ រូបថត​អតីត​ប្រមុខ​ការទូត​អាមេរិក លោក John Kerry ត្រូវបាន​​បង្ហោះ​នៅ​លើ​បណ្ដាញ​សង្គម​ផង​ដែរ ដោយ​បង្ហាញ​រូប​លោក​កាន់​អាវ​យឺត​ស​មួយ​ដែល​មាន​បោះពុម្ព​អក្សរ​ «I love Cambodia» ហើយ​នៅ​ក្រោម​សំណេរ​នោះ​មាន​រូប​សញ្ញា​របស់​គណបក្ស​សង្គ្រោះ​ជាតិ ដែល​ជា​បក្ស​ប្រឆាំង​ធំ​ជាង​គេ​នៅ​កម្ពុជា​មុន​បក្ស​នេះ​ត្រូវ​បាន​រំលាយ​ចោល​នៅ​ចុង​ឆ្នាំ​២០១៧​កន្លង​មក។ ទោះជាយ៉ាងណា ការ​ផ្ទៀង​ផ្ទាត់​ បញ្ជាក់​ថា រូបថត​មួយ​សន្លឹក​នេះ ត្រូវ​បាន​កាត់​ត​ខុស​ពី​រូថត​ដើម។

ការ​អះ​អាង​លើ​បណ្ដាញ​សង្គម

កាល​ពី​ថ្ងៃ​ទី​០២ ខែ​ឧសភា ឆ្នាំ​២០២១​នេះ អ្នក​ប្រើ​ហ្វេសប៊ុក​ម្នាក់ បាន​បង្ហោះ​រូបថត​មួយ​សន្លឹក​ភ្ជាប់​នឹង​ប៉ុស្តិ៍​នៃ​វីដេអូ​មួយ។ រូបថត​នោះ បង្ហាញ​អតីត​រដ្ឋ​មន្ត្រី​ការបរទេស​អាមេរិក លោក ចន ឃឺរី (John Kerry) កាន់​អាវ​យឺត​ពណ៌​ស​មួយ ដែល​មាន​សំណេរ​ជា​ភាសា​អង់គ្លេស​ថា «I love Cambodia» ឬ​មាន​ន័យ​ជា​ភាសា​ខ្មែរ​ថា «ខ្ញុំ​ស្រឡាញ់​ប្រទេស​កម្ពុជា» ហើយ​នៅ​ក្រោម​សំណេរ​នោះ មាន​រូប​សញ្ញា​គណបក្ស​សង្គ្រោះ​ជាតិ (CNRP) ជា​បក្ស​ប្រឆាំង​ធំ​ជាង​គេ​នៅ​កម្ពុជា​នៅ​មុន​បក្ស​នេះ​ត្រូវ​បាន​រំលាយ​ចោល​កាល​ពី​ឆ្នាំ​២០១៧​កន្លង​មក។

Facebook Post | Archived Link

ការ​ពិនិត្យ​ការ​ពិត

Fact Crescendo Cambodia បាន​ចាប់​ផ្ដើម​ផ្ទៀង​ផ្ទាត់​នូវ​រូបថត​នេះ​តាម​រយៈ​ការ​ដំណើរការ​កម្មវិធី​ស្រាវជ្រាវ​រក​រូបថត​របស់ Google ដែលនាំ​ឱ្យ​យើង​ជួប​ប្រទះ​រូបថត​ច្បាប់​ដើម និង​ព័ត៌មាន​ជុំ​វិញ​រូបថត​នេះ​។

រូបថត​ដើម​ បង្ហាញ​លោក ចន ឃឺរី កាន់​អាវ​យឺត​ពណ៌​ស​មាន​សំណេរ​បោះ​ពុម្ព​លើ​អាវ​ថា «I Love Cambodia» ប៉ុន្តែ ផ្នែក​ខាង​ក្រោម​នៃ​សំណេរ​នោះ មិន​មាន​រូបសញ្ញា​គណបក្ស​សង្គ្រោះ​ជាតិ​នោះ​ឡើយ។

រូបថត​នេះ ត្រូវ​បាន​ថត​ដោយលោក Jacquelyn Martin ​អ្នក​សារព័ត៌មាន​រូបថត​នៃ​ទីភ្នាក់ងារ​ព័ត៌មាន​បារាំង AFP នៅ​ពេល​លោក ឃឺរី ទិញ​អាវ​យឺត​នេះ​សម្រាប់​ចៅ​របស់​គាត់​នៅ​ហាង​លក់​វត្ថុ​អនុស្សាវរីយ៍​ភ្នំពេញ ស្ថិត​នៅ​លើ​ផ្លូវ​២៤០ ក្នុង​រាជ​ធានី​ភ្នំពេញ នៅ​ថ្ងៃ​ទី​២៦ ខែ​មករា ឆ្នាំ​២០១៦។ រូបថត​ដែល​បង្ហាញ​លោក ឃឺរី កាន់​អាវ​យឺត​ស​នេះ មាន ៣​សន្លឹក។

សំណេរ​លើ​រូបថត​រៀបរាប់​ថា «រដ្ឋ​មន្ត្រី​ការ​បរទេស លោក ចន ឃឺរី កាន់​អាវ​យឺត​បោះ​ពុម្ព​ជាមួយ​សំណេរ​ថា I Love Cambodia ដែល​លោក​ផ្ញើ​ចៅ​របស់​លោក នៅ​ពេល​លោក​ដើរ​ចេញ​ពី​ហាង​លក់​វត្ថុ​អនុស្សាវរីយ៍​ភ្នំពេញ នៅ​ផ្លូវ​លេខ​២៤០ ក្នុង​រាជ​ធានី​ភ្នំពេញ នៅ​ថ្ងៃ​ទី​២៦ ខែ​មករា ឆ្នាំ​២០១៦។ លោក ឃឺរី បាន​ជួប​ជាមួយ​មេដឹកនាំ​កម្ពុជា លោក ហ៊ុន សែន នៅ​ថ្ងៃ​ទី​២៦ មករា ដោយ​បាន​លើក​សរសើរ​ពី​ការ​រស់​រាន​ឡើង​វិញ​គួរ​ឱ្យ​កត់​សម្គាល់​នៃ​សេដ្ឋកិច្ច​កម្ពុជា ប៉ុន្តែ បាន​ជំរុញ​ឱ្យ​មាន​សេរីភាព​នយោបាយ​កាន់​តែ​ទូលាយ​ជាង​មុន ខណៈ​ដែល​បុរស​ខ្លាំង លោក ហ៊ុន សែន ព្យាយាម​បន្ត​ក្ដោប​ក្ដាប់​អំណាច​របស់​លោក​អស់​រយៈ​ពេល​៣​ទសវត្សរ៍​មក​ហើយ​នោះ»។

Getty Image | Archived Link

លោក ចន ឃឺរី​ (John Kerry) អតីត​រដ្ឋ​មន្ត្រី​ការបរទេស​សហរដ្ឋ​អាមេរិក​នៅ​ក្រោម​រដ្ឋការ​ដឹកនាំ​ដោយអតីត​ប្រធានាធិបតី​អាមេរិក លោក បារ៉ាក់ អូបាម៉ា (Barack Obama) នៅ​ចន្លោះ​ឆ្នាំ​២០១៣ ដល់​ឆ្នាំ​២០១៧។ អំឡុង​អាណត្តិ​ដឹកនាំ​របស់​លោក អតីត​ប្រមុខ​ការទូត​អាមេរិក​រូប​នេះ បាន​​ធ្វើ​ដំណើរ​មក​បំពេញ​ទស្សនកិច្ច​នៅ​កម្ពុជា​នៅ​ដើម​ឆ្នាំ​២០១៦។

ក្នុង​ដំណើរ​ទស្សនកិច្ច​​រយៈ​ពេល​ពីរ​ថ្ងៃ​នោះ លោក ចន ឃឺរី បាន​ជួប​ពិភាក្សា​ជាមួយ​មេដឹកនាំ​កម្ពុជា លោក​នាយករដ្ឋ​មន្ត្រី ហ៊ុន សែន មេដឹកនាំ​គណបក្ស​ប្រឆាំង និង​មេដឹកនាំ​អង្គការ​ស៊ីវិល​ផង​ដែរ។

សន្និដ្ឋាន

Fact Crescendo Cambodia រក​ឃើញ​ថា រូបថត​បង្ហាញ​រូប​លោក ចន ឃឺរី កាន់​អាវ​យឺត​ដែល​មាន​សំណេរ «I love Cambodia» និង​មាន​រូប​សញ្ញា​គណបក្ស​សង្គ្រោះ​ជាតិ​នោះ គឺ​ជា​រូបភាព​ត្រូវ​បាន​កាត់​ត។ រូបថត​ច្បាប់​ដើម បង្ហាញ​លោក ចន ឃឺរី កាន់​អាវ​យឺត​ពណ៌​ស​ដែល​មាន​បោះ​ពុម្ព​សំណេរ​ថា «I love Cambodia» និង​មិន​មាន​ភ្ជាប់​មក​ជាមួយ​រូប​សញ្ញា​គណបក្ស​សង្គ្រោះ​ជាតិ​ទេ។

Avatar

Title:Fact-Check: តើ​អតីត​ប្រមុខ​ការទូត​អាមេរិក​ លោក ចន ឃឺរី កាន់​អាវ​យឺត​​មាន​​រូប​សញ្ញា​បក្ស​ប្រឆាំង​មែន​ទេ?

Fact Check By: Jay Udom 

Result: False

Leave a Reply

Your email address will not be published. Required fields are marked *