សំឡេងស៊ីរ៉ែនប្រកាសអាសន្ននៅខេត្ត Fujian នាំឱ្យអ្នកប្រើប្រាស់បណ្ដាញសង្គមយល់ច្រឡំ
ខណៈដែលប្រធានសភាអាមេរិក លោកស្រី ណាន់ស៊ី ប៉េឡូស៊ី (Nancy Pelosi)ធ្វើដំណើរទៅទស្សនកិច្ចនៅដែនដីកោះតៃវ៉ាន់នោះ វីដេអូឃ្លីបមួយដែលបង្ហាញនូវសំឡេងស៊ីរ៉ែនប្រកាសអាសន្នខាងយោធា ត្រូវបានបង្ហោះនៅលើបណ្ដាញសង្គមហ្វេសប៊ុក។ វីដេអូនេះ បានភ្ជាប់ជាមួយសំណេរថា វាជាស្ថានភាពនៅដែនដីកោះតៃវ៉ាន់ នៅមុនពេលយន្តហោះដឹកលោកស្រី ប៉េឡូស៊ី ចុះចតនៅទីក្រុងតៃប៉ិ។ វីដេអូនេះ ត្រូវបានចែកចាយយ៉ាងផុសផុល និងប្រតិកម្មបញ្ចេញមតិជាច្រើនពីសំណាក់អ្នកប្រើប្រាស់ហ្វេសប៊ុក។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា វីដេអូភ្ជាប់ដោយសំណេរខាងលើនេះ ធ្វើឱ្យមានការយល់ច្រឡំ។
ការអះអាងលើបណ្តាញសង្គម
កាលពីថ្ងៃទី០២ ខែសីហា ឆ្នាំ២០២២កន្លងទៅថ្មីនេះ ទំព័រហ្វេសប៊ុកមួយឈ្មោះថា «Ebook Cambodia» បានបង្ហោះវីដេអូឃ្លីប ដែលបង្ហាញទិដ្ឋភាពទីក្រុងនាពេលរាត្រី ដោយមានសំឡេងស៊ីរ៉ែនប្រកាសអាសន្នបន្លឺឡើង។ ការបង្ហោះនេះ ត្រូវបានភ្ជាប់ជាមួយការសរសេរថា ជាទិដ្ឋភាពទីក្រុងតៃប៉ិ មុនពេលលោកស្រី ប៉េឡូស៊ី ចុះចត។
សំណេរភ្ជាប់ជាមួយនឹងវីដេអូឃ្លីបមួយនេះ ត្រូវបានចែកចាយ និងប្រតិកម្មចម្រុះតៗគ្នាជាច្រើនពាន់ដងពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ។
ខាងក្រោមនេះ គឺជាវីដេអូឃ្លីបខាងលើ បានរៀបរាប់ថា «BREAKING❗️ មុនពេលយន្តហោះលោកស្រី Pelosi ចុះចតនៅតៃប៉ិ»។
ខាងក្រោមនេះ គឺជារូបភាពផ្ដាម បង្ហាញនូវការបញ្ចេញមតិចម្រុះពីសំណាក់អ្នកប្រើប្រាស់មួយចំនួន។
ដូចគ្នានេះ វីដេអូឃ្លីបភ្ជាប់ដោយសំណេរខាងលើ ក៏ត្រូវបានរកឃើញ និងចែកចាយដោយអ្នកប្រើប្រាស់ដទៃទៀតនៅទីនេះ និងទីនេះផងដែរ។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបភាពផ្ដាម និងការអះអាងខាងលើនេះ តាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោម។
តាមរយៈគេហទំព័រសារព័ត៌មាន Express ផ្សព្វផ្សាយកាលពីថ្ងៃទី០២ ខែសីហា ឆ្នាំ២០២២ បានបញ្ជាក់នៅក្នុងសេចក្ដីរាយការណ៍របស់ខ្លួនថា ទិដ្ឋភាពនៃការបើកបន្លឺសំឡេងស៊ីរ៉ែននោះ ការពិត គឺជាទិដ្ឋភាពស៊ីរ៉ែនយោធា ដែលបានបន្លឺឡើងនៅក្នុងខេត្ត Fujian ប្រទេសចិន ពុំមែនជាទិដ្ឋភាពនៅក្នុងទីក្រុងតៃប៉ិនោះឡើយ។
ខាងក្រោមនេះ គឺជារូបភាពផ្ដាមចេញពីគេហទំព័រខាងលើ ដែលបានសរសេររៀបរាប់ជាភាសាអង់គ្លេសថា «Military sirens sound in Chinese province» ឬប្រែសម្រួលជាភាសាខ្មែរថា «សំឡេងស៊ីរ៉ែនយោធានៅខេត្តមួយរបស់ប្រទេសចិន»។
Express News Report | Archived Link
ដូចគ្នានេះ តាមរយៈគេហទំព័រ Sustellers ផ្សព្វផ្សាយកាលពីថ្ងៃ០២ ខែសីហា ឆ្នាំ២០២២ បានបញ្ជាក់ឲ្យដឹងថា វីដេអូឃ្លីបមួយនេះ គឺជាទិដ្ឋភាពការបន្លឺសំឡេងស៊ីរ៉ែន ឬសំឡេងប្រកាសអាសន្នដែលបានបន្លឺឡើងនៅក្នុងខេត្ត Fujian ប្រទេសចិនកាលពីថ្ងៃទី០២ ខែសីហា ឆ្នាំ២០២២កន្លងទៅនេះ មិនមែនជាទិដ្ឋភាពសំឡេងប្រកាសអាសន្នក្នុងទីក្រុងតៃប៉ិនោះឡើយ។
Sustellers News Report | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថាវីដេអូឃ្លីបភ្ជាប់ដោយសំណេរខាងលើ គឺធ្វើឲ្យមានការយល់ច្រឡំ។ វីដេអូឃ្លីបមួយនេះ មិនមែនជាទិដ្ឋភាពដែលត្រូវបានថតនៅក្នុងទីក្រុងតៃប៉ិ កោះតៃវ៉ាន់ នោះឡើយ។ ការពិត វីដេអូនេះ គឺជាសំឡេងស៊ីរ៉ែនប្រកាសអាសន្ននៅក្នុងខេត្ត Fujian ប្រទេសចិនកាលពីថ្ងៃទី០២ ខែសីហា ឆ្នាំ២០២២កន្លងទៅនេះ។
Title:សំឡេងស៊ីរ៉ែនប្រកាសអាសន្ននៅខេត្ត Fujian នាំឱ្យអ្នកប្រើប្រាស់បណ្ដាញសង្គមយល់ច្រឡំ
Fact Check By: Kakada SimResult: Misleading
