ស្របពេលស៊ូដង់គឺជាប្រទេសអាហ្វ្រិកខាងកើតមួយ ដែលក្រីក្របំផុត និងបានឆ្លងកាត់របបផ្តាច់ការលោក Omar el Béchir អស់ប្រមាណ៣០ឆ្នាំមកហើយ រូបថតមួយសន្លឹកបង្ហាញទិដ្ឋភាពបុរសចំណាស់ម្នាក់ ត្រូវបានបង្ហោះឡើងដោយអ្នកប្រើប្រាស់ហ្វេសប៊ុកម្នាក់ ដែលបានអះអាងថាជាអតីតមេដឹកនាំនៃប្រទេសអាហ្វ្រិកខាងកើត នៅពេលលោកអស់អំណាច។ ការបង្ហោះ និងអះអាងបែបនេះ ត្រូវបានអ្នកប្រើប្រាស់ជាច្រើន បានចែកចាយ និងបញ្ជេញមតិប្រតិកម្មយ៉ាងផុសផុល។
ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា ការអះអាងដែលអ្នកប្រើប្រាស់ហ្វេសប៊ុកបង្ហោះនៅលើបណ្តាញសង្គមនោះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី២១ ខែវិច្ឆិកា ឆ្នាំ២០២២ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតផ្ដាមមួយសន្លឹក បង្ហាញទិដ្ឋភាពបុរសចំណាស់ម្នាក់ ក្នុងសភាពស្គមស្គាំង។ អ្នកប្រើប្រាស់ដដែលខាងលើនេះ បានភ្ជាប់ និងអះអាងបុរសចំណាស់ម្នាក់នោះ ថាគឺជាទិដ្ឋភាពអតីតប្រធានាធិបតីអាហ្វ្រិកខាងកើត នៅពេលលោកអស់តំណែងកាលពីឆ្នាំ២០១៨។ រូបថតបង្ហោះដោយភ្ជាប់ទៅនឹងការអះអាងខាងលើនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់អ្នកប្រើប្រាស់ខាងលើ ដែលបានសរសេររៀបរាប់ថា «វាសនាមនុស្ស មើលមិនឃើញ ស្មានមិនត្រូវ»។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបថត និងការអះអាងខាងលើនេះ តាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតដែលមានទម្រង់ និងសណ្ឋានដូចគ្នាទាំងស្រុងនេះ ត្រូវបានរកឃើញ និងបង្ហោះដោយគណនីអ្នកប្រើប្រាស់បណ្ដាញសង្គម Twitter ម្នាក់ ដែលមានឈ្មោះថា «Roncliffe Odit» កាលពីថ្ងៃទី១៩ ខែមីនា ឆ្នាំ២០១៩កន្លងទៅ។ លោក Roncliffe Odit ត្រូវបានគេស្គាល់ជាទូទៅថា គឺជាអ្នករាយការណ៍ និងយកព័ត៌មានម្នាក់ នៅក្នុងស្ថាប័នសារព័ត៌មាន BBC។ លោកបានបញ្ជាក់ និងសរសេរនៅក្នុងអត្ថបទរបស់លោកជាភាសាអង់គ្លេសថា «Turkana Drought, Kenya Drought» ឬប្រែសម្រួលជាភាសាខ្មែរមានន័យថា «ទិដ្ឋភាពគ្រោះរាំងស្ងួតនៅ Turkana ប្រទេសកេនយ៉ា»។
ដូចគ្នានេះ តាមរយៈគេហទំព័រ The Observer ចុះផ្សព្វផ្សាយកាលពីថ្ងៃទី០៦ ខែឧសភា ឆ្នាំ២០១៩កន្លងទៅផងដែរ ដែលបានសរសេរជាភាសាអង់គ្លេស ឬប្រែសម្រួលជាភាសាខ្មែរមានន័យថា «របាយការណ៍ក្លែងក្លាយអំពីបុរសម្នាក់ដែលត្រូវបានបណ្តេញចេញពីប្រទេសស៊ូដង់លោក al-Bashir ផ្សព្វផ្សាយនៅតាមបណ្ដាញសង្គម»។
The Observer Link | Archived Link
ការអះអាងខាងលើ ក៏ត្រូវបានផ្ទៀងផ្ទាត់ និងត្រួតពិនិត្យផងដែរ ដោយទីភ្នាក់ងារព័ត៌មាន AFP កាលពីថ្ងៃទី០៧ ខែឧសភា ឆ្នាំ២០១៩កន្លងទៅនេះ ដោយបានបញ្ជាក់នៅក្នុងអត្ថបទរបស់ខ្លួនថា ទិដ្ឋភាពបុរសចំណាស់ ដែលមានសណ្ឋានស្គមស្គាំង មិនមែនជា ទិដ្ឋភាពអតីតមេដឹកនាំនៃប្រទេសអាហ្វ្រិកនោះឡើយ។ បុរសចំណាស់ម្នាក់នោះ ការពិតគឺជាប្រជាជនកេនយ៉ា រងគ្រោះ និងប៉ះពាល់ដោយគ្រោះរាំងស្ងួត នៅក្នុងតំបន់ Turkana ដែលអ្នករាយការណ៍សារព័ត៌មាន BBC លោក Roncliffe Odit បានថត និងបង្ហោះនៅក្នុងបណ្ដាញសង្គម Twitter កន្លងទៅ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia រកឃើញថារូបថត និងការលើកឡើងដោយអ្នកប្រើប្រាស់ហ្វេសប៊ុកខាងលើនោះ គឺពិតជាមិនត្រឹមត្រូវនោះឡើយ។ ការពិតរូបថតនេះ គឺជាទិដ្ឋភាពបុរសចំណាស់ស្គមស្គាំង ជនជាតិកេនយ៉ាម្នាក់ ដែលបានរងគ្រោះដោយគ្រោះរាំងស្ងួត នៅក្នុងតំបន់ Turkana ប្រទេសកេនយ៉ា និងត្រូវបានថតដោយលោក Roncliffe Odit កាលពីឆ្នាំ២០១៩កន្លងទៅ។
Title:បុរសចំណាស់ជនជាតិកេនយ៉ាម្នាក់ ត្រូវបានភ្ជាប់មិនត្រឹមត្រូវ ថាជាអតីតប្រធានាធិបតីអាហ្វ្រិកខាងកើត
Fact Check By: Kakada SimResult: False
