- >>
- Social
រូបថតបង្ហាញលោក ហ៊ុន ម៉ាណែត ក្នុងឈុតនគរបាលវៀតណាមជារូបថតកាត់ត
លោកនាយករដ្ឋមន្ត្រី ហ៊ុន ម៉ាណែត តែងតែក្លាយជាផ្ទាំងស៊ីបនៃពាក្យចរចាមអារ៉ាម និងការចោទប្រកាន់ផ្សេងៗនៅក្នុងឆាកនយោបាយរបស់លោកជាច្រើនឆ្នាំមកហើយ។ ក្នុងចំណោមនោះ រូបថតមួយសន្លឹកដែលបង្ហាញរបស់លោកនៅក្នុងឈុតសម្លៀកបំពាក់ជានគរបាលវៀតណាម ត្រូវបានបង្ហោះដោយអ្នកប្រើប្រាស់ម្នាក់។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia រកឃើញថា រូបថតបង្ហោះនៅលើបណ្ដាញសង្គមហ្វេសប៊ុកនោះ គឺមិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី០១ ខែមីនា ឆ្នាំ២០២៤កន្លងទៅនេះ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹកដែលបង្ហាញលោកនាយករដ្ឋមន្ត្រី ហ៊ុន ម៉ាណែត នៅក្នុងឈុតសម្លៀកបំពាក់ឯកសណ្ឋាននគរបាលវៀតណាម។
រូបថតខាងលើនេះ ត្រូវបានចែករំលែកបន្តជាច្រើន ហើយអាចត្រូវបានអ្នកប្រើប្រាស់ហ្វេសប៊ុកមួយចំនួនជឿថាជារូបថតពិតប្រាដក។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់អ្នកប្រើប្រាស់ ដែលបានសរសេរថា «The real Hun Manet» ឬប្រែសម្រួលជាភាសាខ្មែរមានន័យថា «ការពិតរបស់លោក ហ៊ុន ម៉ាណែត»។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះ តាមរយៈការដំណើរការកម្មវិធី Google Reverse Image Search ដែលនាំយើងរកឃើញការពិតដូចខាងក្រោម។
រូបថតដែលមានទម្រង់ និងសណ្ឋានដូចគ្នាមួយនេះ ត្រូវបានរកឃើញនៅលើគេហទំព័រសារព័ត៌មានវៀតណាម VTC News។ គេហទំព័រដដែលនេះ ពុំបានបង្ហាញទិដ្ឋភាពនាយករដ្ឋមន្ត្រីកម្ពុជាលោក ហ៊ុន ម៉ាណែត បានស្លៀកពាក់នៅក្នុងឈុតជាកងនគរបាលវៀតណាមនោះឡើយ។
ផ្ទុយទៅវិញ រូបថតដើមផ្សព្វផ្សាយនៅលើគេហទំព័រសារព័ត៌មានខាងលើ បានបង្ហាញទិដ្ឋភាពកងនិស្សិតនគរបាលបុរស និងកងនិស្សិតនារីនៅឯបណ្ឌិត្យសភានគរបាលវៀតណាម។
ខាងក្រោមនេះ គឺជារូបភាពផ្ដាម ចេញពីគេហទំព័រសារព័ត៌មានខាងលើ ដែលបានសរសេរជាភាសាវៀតណាម «Trường công an tuyển sinh» ឬប្រែសម្រួលជាភាសាខ្មែរ តាមរយៈកម្មវិធី Google Translate មានន័យថា «ការជ្រើសរើសនិស្សិតនៅបណ្ឌិត្យសភានគរបាលវៀតណាម»។
ដូចគ្នានេះ រូបថតដែលមានទម្រង់ និងសណ្ឋានដូចគ្នាមួយនេះ ក៏ត្រូវបានរកឃើញនៅលើគេហទំព័រវៀតណាម PHUNUTODAY ផងដែរ ដោយបានបញ្ជាក់ថា នេះគឺជាទិដ្ឋភាពនិសិ្សតនៅបណ្ឌិត្យសភានគរបាលប្រជាជនវៀតណាម (Vietnam People's Police Academy)។
PHUNUTODAY News Report | Archived Link
ដោយឡែក គេហទំព័រសារព័ត៌មានរបស់វៀតណាមមួយផ្សេងទៀត ដែលមានឈ្មោះថា Báo Điện tử Chính phủ ផ្សព្វផ្សាយកាលពីថ្ងៃទី១៦ ខែសីហា ឆ្នាំ២០២២កន្លងទៅ ក៏មិនបានបង្ហាញទិដ្ឋភាពរបស់លោក ហ៊ុន ម៉ាណែត នាយករដ្ឋមន្ត្រីកម្ពុជា ក្នុងឈុតសម្លៀកបំពាក់ជាប៉ូលីសនគរបាលវៀតណាមផងដែរ។
ខាងក្រោមនេះ គឺជារូបភាពផ្ដាមចេញពីគេហទំព័រខាងលើ ដែលបានរៀបរាប់អំពីវិធានទូទៅនៃការប្រព្រឹត្តិ និងក្រមសីលធម៌របស់ប៉ូលីសនគរបាលវៀតណាម។
Báo Điện tử Chính phủ Link | Archived Link
ខាងក្រោមនេះ គឺជាការប្រៀបធៀបគ្នារវាងរូបថតដែលត្រូវបានកាត់ត និងរូបថតច្បាប់ដើមដែលត្រូវបានរកឃើញផ្សព្វផ្សាយនៅលើបណ្ដាញសង្គម។
ករណីនៃការភ្ជាប់ និងអះអាងថាលោក ហ៊ុន ម៉ាណែត ទៅនឹងប្រទេសវៀតណាម និងមានឈាមជ័រជាជនជាតិវៀតណាមនោះ តែងតែត្រូវបានផ្ទៀងផ្ទាត់ជារឿយៗផងដែរ ដោយក្រុមការងារត្រួតពិនិត្យការពិត Fact Crescendo Cambodia នាពេលកន្លងមកនេះ។ សូមអានព័ត៌មានលម្អិតនៅខាងក្រោមនេះ៖
- រូបថតភរិយាលោក ហ៊ុន សែន ត្រូវបានកាត់តជាមួយមេដឹកនាំវៀតណាម ឡេ ឌឹកថូ (archived link)
- តើលោក ហ៊ុន ម៉ាណែត គឺជាកូនវៀតណាមដូចការអះអាងមែនដែរឬទេ? (archived link)
- រូបថតលោក ហ៊ុន ម៉ាណែត ត្រូវបានកាត់តភ្ជាប់ជាមួយមេដឹកនាំវៀតណាមលោក ឡេ ឌឹកថូ (archived link)
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok WhatsApp
សន្និដ្ឋាន
Fact Crescendo Cambodia បានរកឃើញថា រូបថតដែលបានបង្ហោះ និងអះអាងដោយអ្នកប្រើប្រាស់ខាងលើនេះ គឺពិតជាមិនត្រឹមត្រូវនោះឡើយ។ ច្បាប់ដើមនៃរូបថតនេះ គឺជាទិដ្ឋភាពនិស្សិតនៃបណ្ឌិត្យសភានគរបាលប្រជាជនវៀតណាម ដោយពុំបានបង្ហាញនាយករដ្ឋមន្ត្រីកម្ពុជាលោក ហ៊ុន ម៉ាណែត នោះឡើយ។
Title:រូបថតបង្ហាញលោក ហ៊ុន ម៉ាណែត ក្នុងឈុតនគរបាលវៀតណាមជារូបថតកាត់ត
Written By: Kakada SimResult: Altered
