- >>
- Political
ការអះអាងមិនត្រឹមត្រូវថា វត្តភ្នំសេរីបាត់បង់ការគាំទ្រពីពុទ្ធបរិស័ទខ្មែរនៅអាមេរិក
ក្រុមអ្នកគាំទ្របក្សកាន់អំណាចបានអះអាងថា វត្តភ្នំសេរីគ្រប់គ្រងដោយព្រះតេជគុណ ប៊ុត ប៊ុនតិញ បាត់បង់ការគាំទ្រពីពុទ្ធបរិស័ទខ្មែរហើយ ដោយថា មានមនុស្សដ៏តិចតួចប៉ុណ្ណោះចូលរួមកាន់បិណ្ឌនៅវត្តមួយនេះ។ ការអះអាងនេះ ត្រូវបានចែករំលែកជាច្រើនដងរួមជាមួយប្រតិកម្ម និងការបញ្ចេញមតិផ្សេងៗជាច្រើន។ ទោះជាយ៉ាងណា យើងរកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
រូបថតមួយសន្លឹកដែលបង្ហាញពុទ្ធបរិស័ទ ៣នាក់ចូលរួមក្នុងពិធីកាន់បិណ្ឌនៅវត្តភ្នំសេរីនៅសហរដ្ឋអាមេរិក ត្រូវបានគេបង្ហោះនៅលើបណ្ដាញសង្គមជាមួយសំណេរក្នុងន័យថា វត្តខ្មែរមួយនេះដែលដឹកនាំដោយព្រះសង្ឃ ប៊ុត ប៊ុនតិញ មិនទទួលបានការគាំទ្រពីពុទ្ធបរិស័ទខ្មែរនោះឡើយ។
ព័ត៌មាននេះ ត្រូវបានផ្សព្វផ្សាយ និងចែករំលែកបន្តព្រោងព្រាតនៅលើបណ្ដាញសង្គម និងទាក់ទាញបានការគាំទ្រផ្នែកមតិយោបល់ពីអ្នកប្រើប្រាស់បណ្ដាញសង្គមកម្ពុជា។
ខាងក្រោមនេះ គឺជារូបភាពផ្ដាមចេញពីព័ត៌មានផ្សព្វផ្សាយលើបណ្ដាញសង្គមហ្វេសប៊ុកកាលពីថ្ងៃទី២២ ខែសីហា ឆ្នាំ២០២៤ ដែលរៀបរាប់ថា “ចប់! បិណ្ឌទី៣ វត្តប៊ុត ប៊ុនតិញ សរុប ៧អង្គនាក់ វត្តនៅអាមេរិកពេញៗ ចម្លែកតែវត្តប៊ុនតិញមួយ”។
ការបង្ហោះព័ត៌មានបែបនេះ បាននាំឱ្យមានការចោទសួរថា តើវាពិតជាអ៊ីចឹងមែន ឬយ៉ាងណា? ស្ថាប័នផ្ទៀងផ្ទាត់ព័ត៌មានក្លែងក្លាយ Fact Crescendo បានត្រួតពិនិត្យរកការពិតអំពីរឿងនេះដូចខាងក្រោម។
Fact Crescendo បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការសម្ភាសផ្ទាល់ជាមួយព្រះសង្ឃ ប៊ុត ប៊ុនតិញ ព្រះចៅអធិការវត្តភ្នំសេរី ដែលនាំឱ្យយើងរកឃើញការពិតដូចខាងក្រោមនេះ។
ស្ថាប័នត្រួតពិនិត្យព័ត៌មានក្លែងក្លាយ Fact Crescendo បានទាក់ទងសម្ភាសព្រះចៅអធិការវត្តភ្នំសេរី ព្រះតេជគុណ ប៊ុត ប៊ុនតិញ តាមទូរស័ព្ទកាលពីថ្ងៃម្សិលមិញនេះ ហើយព្រះអង្គបានបកស្រាយដូចខាងក្រោមនេះ។
ព្រះតេជគុណ ប៊ុត ប៊ុនតិញ បានបញ្ជាក់ថា រូបថតដែលបង្ហាញពុទ្ធបរិស័ទ ៣នាក់ចូលរួមពិធីកាន់បិណ្ឌទី៣នៅវត្តភ្នំសេរី គឺជាការពិត ប៉ុន្តែ ព្រះអង្គបញ្ជាក់ថា រូបថតមួយសន្លឹកនេះ មិនឆ្លុះបញ្ចាំងពីការពិតទាំងស្រុងនោះឡើយ។
ជាព្រះសង្ឃឈានមុខមួយអង្គដែលតែងតែរិះគន់ការដឹកនាំរបស់រដ្ឋាភិបាលអតីតនាយករដ្ឋមន្ត្រី ហ៊ុន សែន និងរដ្ឋាភិបាលដឹកនាំដោយលោក ហ៊ុន ម៉ាណែត នាពេលបច្ចុប្បន្ននេះ ព្រះតេជគុណ ប៊ុត ប៊ុនតិញ បានបញ្ជាក់ថា បិណ្ឌទី៣ ត្រូវបានប្រារព្ធធ្វើឡើងនៅចំថ្ងៃព្រហស្បតិ៍ (ត្រូវនឹងថ្ងៃសុក្រនៅកម្ពុជា) ដែលជាថ្ងៃបំពេញការងារដូចធម្មតា ទើបធ្វើឱ្យមានចំនួនពុទ្ធបរិស័ទខ្មែរតិចតួចទៅចូលរួមពិធីបុណ្យកាន់បិណ្ឌវេនទី៣នោះ។
ព្រះអង្គបញ្ជាក់បន្ថែមថា ពិធីបុណ្យកាន់បិណ្ឌ ឬភ្ជុំបិណ្ឌ គ្រាន់តែជាប្រពៃណីសហគមន៍ខ្មែរ មិនមែនជាពិធីផ្លូវការដែលទទួលបានការឈប់សម្រាកផ្លូវការណាមួយនៅសហរដ្ឋអាមេរិកនោះឡើយ ដែលនេះគឺជាបរិបទ និងស្ថានភាពដាច់ដោយឡែកនៅទីនោះ ដែលមិនដូចនៅក្នុងប្រទេសកម្ពុជាទេ។
សូមស្ដាប់សង្ឃដីកាព្រះតេជគុណ ប៊ុត ប៊ុនតិញ ពន្យល់ពីមូលហេតុដែលមានពុទ្ធបរិស័ទខ្មែរចំនួនតិចចូលរួមកាន់បិណ្ឌនៅវត្តភ្នំសេរី នៅសហរដ្ឋអាមេរិក។
ទោះជាយ៉ាងណា ព្រះតេជគុណ ប៊ុត ប៊ុនតិញ អះអាងថា ពុទ្ធបរិស័ទខ្មែរក្នុងចំនួនដ៏ច្រើនរហូតដល់ខ្ទង់រយនាក់ បានចូលរួមពិធីបុណ្យកាន់បិណ្ឌដែលត្រូវចំថ្ងៃសៅរ៍ និងថ្ងៃអាទិត្យ។ ដើម្បីបញ្ជាក់ការពិតចំពោះរឿងនេះ ព្រះតេជគុណ ប៊ុត ប៊ុនតិញ បានប្រាប់ឱ្យមើលវីដេអូផ្សាយផ្ទាល់នៅលើទំព័រហ្វេសប៊ុក វត្តភ្នំសេរី Watt Phnom Serei INC។
ដោយបានចូលទៅមើលវីដេអូផ្សាយដោយទំព័រហ្វេសប៊ុក Watt Phnom Serei INC យើងបានរកឃើញថា មានពុទ្ធបរិស័ទខ្មែរជាច្រើននាក់ បានចូលរួមពិធីកាន់បិណ្ឌវេនទី៤ ដែលត្រូវនឹងថ្ងៃសៅរ៍ ទី២១ ខែកញ្ញា ឆ្នាំ២០២៤ ដែលជាថ្ងៃសម្រាកចុងសប្ដាហ៍។
បើតាមព្រះតេជគុណ ប៊ុត ប៊ុនតិញ មានពុទ្ធបរិស័ទរហូតដល់ខ្ទង់រយនាក់បានចូលរួមពិធីបុណ្យកាន់បិណ្ឌវេនទី៤ និងវេនទី៥នៅវត្តភ្នំសេរី នៅថ្ងៃឈប់សម្រាកចុងសប្ដាហ៍ ឬត្រូវនឹងថ្ងៃសៅរ៍ និងថ្ងៃអាទិត្យកន្លងមកនេះ។
ខាងក្រោមនេះ គឺជាវីដេអូផ្សាយដោយទំព័រហ្វេសប៊ុកវត្តភ្នំសេរីនៅថ្ងៃទី២១ ខែកញ្ញា ឆ្នាំ២០២៤ ដែលបង្ហាញពុទ្ធបរិស័ទខ្មែរជាច្រើននាក់បានចូលរួមពិធីបុណ្យកាន់បិណ្ឌវេនទី៤ ចំថ្ងៃសៅរ៍ ទី២១ ខែកញ្ញា នៅវត្តភ្នំសេរី។
ខាងក្រោមនេះ គឺជាវីដេអូមួយទៀតផ្សាយដោយទំព័រហ្វេសប៊ុកវត្តភ្នំសេរីថ្ងៃអាទិត្យ ទី២២ ខែកញ្ញា ឆ្នាំ២០២៤ ដែលបង្ហាញពុទ្ធបរិស័ទខ្មែរជាច្រើនចូលរួមពិធីបុណ្យកាន់បិណ្ឌវេនទី៥នៅវត្តភ្នំសេរី។
ព្រះតេជគុណ ប៊ុត ប៊ុនតិញ មានសង្ឃដីកាថា ក្រុមអ្នកគាំទ្រគណបក្សកាន់អំណាចនៅកម្ពុជា មិនមែនមិនយល់ពីស្ថានភាព និងបរិបទនៃការគោរពប្រនិប័ត្តព្រះពុទ្ធសាសនារបស់ពលរដ្ឋដើមកំណើតខ្មែរនៅអាមេរិកនោះឡើយ ប៉ុន្តែ ព្រះអង្គថា ពួកគេព្យាយាមបង្កើតព័ត៌មានអវិជ្ជមានអំពីព្រះអង្គ ដើម្បីបន្សាបឥទ្ធិពលរបស់ព្រះអង្គ។
វត្តភ្នំសេរី ដែលមានទីតាំងស្ថិតនៅទីក្រុង Ayer ក្នុងរដ្ឋ Massachusett ត្រូវបានផ្ដួចផ្ដើមកសាងដោយព្រះតេជគុណ ប៊ុត ប៊ុនតិញ និងពុទ្ធបរិស័ទខ្មែរនៅសហរដ្ឋអាមេរិក កាលពីខែសីហា ឆ្នាំ២០២០កន្លងមក។
ព្រះតេជគុណ ប៊ុត ប៊ុនតិញ ត្រូវបានគេដឹងថា ជាព្រះសង្ឃដ៏លេចធ្លោមួយអង្គដែលថ្លែងរិះគន់រដ្ឋាភិបាលដឹកនាំដោយអតីតនាយករដ្ឋមន្ត្រី ហ៊ុន សែន និងរដ្ឋាភិបាលបច្ចុប្បន្នដឹកនាំដោយលោក ហ៊ុន ម៉ាណែត និងសកម្មនៅក្នុងសកម្មភាពជំរុញការគោរពសិទ្ធិមនុស្ស និងការពារបរិស្ថាន។
ព្រះសង្ឃអង្គនេះដែលប្រឈមមុខនឹងការចោទប្រកាន់ថាបានកិបកេងថវិកាបុណ្យសពបណ្ឌិត កែម ឡី នោះ បានចាកចេញពីប្រទេសកម្ពុជាកាលពីឆ្នាំ២០១៦ បន្ទាប់ពីស្ថានភាពនយោបាយនៅកម្ពុជា បានធ្លាក់ចុះក្រោយការរំលាយគណបក្សសង្គ្រោះជាតិ។ (លម្អិត)
មេដឹកនាំជាន់ខ្ពស់មួយរូបរបស់គណបក្សសង្គ្រោះជាតិ អ្នកស្រី មូរ សុខហួរ ដែលមានសញ្ជាតិអាមេរិកដែរនោះ បានឱ្យដឹងថា ពិធីបុណ្យកាន់បិណ្ឌនៅតាមវត្តអារមខ្មែរនៅសហរដ្ឋអាមេរិក មានការចូលរួមពីពុទ្ធបរិស័ទខ្មែរក្នុងចំនួនតិចតួចនៅពេលពិធីបុណ្យនោះ ត្រូវបានរៀបរាប់ឡើងចំថ្ងៃធ្វើការ។
អ្នកស្រីបញ្ជាក់ថា ស្ថានភាពបែបនេះ កើតឡើងនៅតាមវត្តអារាមខ្មែរនានានៅសហរដ្ឋអាមេរិក និងនៅតាមបណ្ដាប្រទេសដទៃទៀតផងដែរ ដូចជា អូស្ត្រាលី និងនៅតំបន់អឺរ៉ុប។
សន្និដ្ឋាន
Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ព្រះសង្ឃ ប៊ុត ប៊ុនតិញ ព្រះចៅអធិការវត្តភ្នំសេរី បានបញ្ជាក់ថា ពិធីបុណ្យកាន់បិណ្ឌនៅវត្តមួយនេះ ទទួលបានពុទ្ធបរិស័ទខ្មែរចូលរួមច្រើននៅថ្ងៃសម្រាកចុងសប្ដាហ៍ ប៉ុន្តែ នៅថ្ងៃបំពេញការងារធម្មតា មានពុទ្ធបរិស័ទខ្មែរចូលរួមតិច ដែលស្ថានភាពនេះមានជាទូទៅសម្រាប់វត្តអារាមខ្មែរដទៃទៀតនៅសហរដ្ឋអាមេរិក។