បន្ទាប់ពីអតីតកីឡាករឆ្នើមរបស់ប្រេស៊ីល លោក Pelé បានទទួលមរណភាពកាលពីថ្ងៃទី២៩ ខែធ្នូកន្លងមកនេះ ការអះអាងដ៏ផុសផុលមួយនៅលើបណ្ដាញសង្គម បានលើកឡើងថា ជើងទាំងគូរបស់វីរៈបុរសបាល់ទាត់ប្រេស៊ីលរូបនេះ នឹងត្រូវបានស្ថាប័ន FIFA រក្សាទុកនៅសារមន្ទីរ ហើយការសម្រេចបែបនេះក៏ទទួលបានការអនុញ្ញាតពីគ្រួសារលោក Pelé ផងដែរ។ បន្ទាប់ពីការស្រាវជ្រាវ និងត្រួតពិនិត្យ យើងរកឃើញថា ការអះអាងននេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ការអះអាងដ៏ផុសផុលមួយនៅលើបណ្ដាញសង្គម បានលើកឡើងថា សហព័ន្ធបាល់ទាត់ពិភពលោក (FIFA) នឹងរក្សាទុកជើងទាំងគូរបស់វីរៈកីឡាករបាល់ទាត់ប្រេស៊ីល លោក Pelé នៅឯសារមន្ទីរ ហើយគ្រួសាររបស់អតីតកីឡាករឆ្នើមរូបនេះ ក៏បានអនុញ្ញាតឱ្យ FIFA ធ្វើដូច្នេះដែរ។
ការអះអាងនេះ ត្រូវបានគេចែករំលែកបន្តយ៉ាងព្រោងព្រាតនៅលើបណ្ដាញសង្គម ហើយក៏មានការបញ្ចេញមតិជាច្រើន និងប្រតិកម្មចម្រុះបែបផងដែរ បន្ទាប់ពីការអះអាងនេះ ត្រូវបានបង្ហោះនៅលើបណ្ដាញសង្គម។
ខាងក្រោមនេះ គឺជារូបភាពផ្ដាមចេញពីការអះអាងជាភាសាអង់គ្លេស «BREAKING: FIFA WILL KEEP PELÉ’S FEET IN THE MUSEUM. PELÉ’S FAMILY HAS GIVEN THE PERMISSION» ឬអាចប្រែសម្រួលជាភាសាខ្មែរថា «សហព័ន្ធបាល់ទាត់ពិភពលោក FIFA នឹងរក្សាទុកជើងទាំងគូរបស់លោក Pelé នៅសារមន្ទីរ។ គ្រួសារលោក Pelé បានផ្ដល់ការអនុញ្ញាតរួចហើយ»។
ការអះអាងដដែលនេះ ក៏ត្រូវបានបង្ហោះដោយអ្នកប្រើប្រាស់បណ្ដាញសង្គមដទៃទៀត ដែលគេអាចរកមើលបានតាមរយៈតំណភ្ជាប់មាននៅទីនេះ ឬតំណភ្ជាប់មួយទៀតមាននៅទីនេះ ឬតំណភ្ជាប់មួយទៀតមាននៅទីនេះផងដែរ។
ការអះអាងដូចគ្នានេះ ត្រូវបានគេរកឃើញបង្ហោះយ៉ាងព្រោងព្រាតនៅលើបណ្ដាញសង្គមហ្វេបស៊ុកនៅក្នុងរយៈពេលប៉ុន្មានថ្ងៃចុងក្រោយនេះចាប់តាំងពីវីរកីឡាករបាល់ទាត់ប្រេស៊ីល លោក Pelé បានទទួលមរណភាពកាលពីថ្ងៃទី២៩ ខែធ្នូឆ្នាំកន្លងមកនេះ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងនេះតាមរយៈពាក្យគន្លឹះ ព័ត៌មានចេញផ្សាយដោយសារព័ត៌មានអន្តរជាតិដែលគួរឱ្យជឿជាក់ និងសេចក្ដីប្រកាសព័ត៌មានផ្លូវការចេញដោយសហព័ន្ធបាល់ទាត់ពិភពលោក (FIFA) ដែលនាំឱ្យយើងរកឃើញការពិតដូចខាងក្រោមនេះ។
ជាដំបូង យើងស្វែងរកសេចក្ដីប្រកាសព័ត៌មានផ្លូវការរបស់ FIFA នៅលើគេហទំព័រផ្លូវការរបស់ស្ថាប័នគ្រប់គ្រងបាល់ទាត់ពិភពលោកមួយនេះ ហើយយើងបានឃើញសេចក្ដីប្រកាសព័ត៌មានចំនួន ៣ ដែលនិយាយអំពីមរណភាពរបស់វីរៈកីឡាករប្រេស៊ីលរូបនេះ។
ប៉ុន្តែ ខ្លឹមសារនៃសេចក្ដីប្រកាសព័ត៌មានទាំង៣របស់ FIFA គ្មាននិយាយអ្វីសោះឡើយអំពីការរក្សាទុកជើងទាំងគូរបស់លោក Pelé នៅឯសារមន្ទីរ បន្ទាប់ពីលោកទទួលមរណភាព។
ក្នុងសេចក្ដីប្រកាសព័ត៌មានមួយរបស់ខ្លួនចេញកាលពីថ្ងៃទី២៩ ខែធ្នូ ស្ថាប័ន FIFA បានប្រកាសពីការបាត់បង់អតីតកីឡាករឆ្នើមរូបនេះ ហើយក៏បានរំលឹកឡើងវិញពីទេពកោសល្យ និងស្នាដៃដ៏អស្ចារ្យរបស់លោកនៅក្នុងវិស័យបាល់ទាត់ប្រេស៊ីល ក៏ដូចវិស័យបាល់ទាត់ជាទូទៅផងដែរ។
នៅក្នុងសេចក្ដីប្រកាសព័ត៌មានមួយទៀតចេញនៅថ្ងៃទី៣០ ខែធ្នូ ស្ថាប័ន FIFA លើកយកទស្សនៈរបស់ប្រធានស្ថាប័ន FIFA លោក Gianni Infantino ដែលរៀបរាប់អំពីទេពកោសល្យជាអមតៈរបស់លោក Pelé ។
ចំណែកឯសេចក្ដីប្រកាសព័ត៌មានចុងក្រោយបំផុតចេញថ្ងៃទី០២ ខែមករា ឆ្នាំ២០២៣ ស្ថាប័ន FIFA បានផ្សព្វផ្សាយពីដំណើររបស់ប្រធាន FIFA លោក Gianni Infantino ចូលរួមគោរពវិញ្ញាណក្ខន្ធរបស់លោក ដែលរៀបចំធ្វើឡើងនៅឯកីឡដ្ឋានរបស់ក្លឹបបាល់ទាត់ Santos នៅក្នុងប្រទេសប្រេស៊ីល។
បន្ទាប់មកទៀត យើងបានស្វែងរកព័ត៌មានអំពីការរក្សាទុកជើងទាំងគូរបស់និមិត្តរូបបាល់ទាត់ពិភពលោករូបនេះតាមរយៈពាក្យគន្លឹះ ហើយយើងរកមិនឃើញព័ត៌មានគួរឱ្យជឿជាក់ណាមួយ ដែលនិយាយអំពីរឿងនេះនោះឡើយ។
ផ្ទុយទៅវិញ យើងក៏បានឃើញស្ថាប័នត្រួតពិនិត្យការពិតមួយឈ្មោះ PRNigeria ដែលបានផ្ទៀងផ្ទាត់ទៅលើការអះអាងខាងលើផងដែរ។ ជាលទ្ធផល ស្ថាប័នត្រួតពិនិត្យការពិត PRNigeria ដែលមានមូលដ្ឋាននៅរដ្ឋធានី Abuja ប្រទេសនីហ្សេរីយ៉ា បានបញ្ជាក់ថា គ្មានការបញ្ជាក់ជាផ្លូវការណាមួយពីស្ថាប័ន FIFA អំពីរឿងនេះឡើយ។ សូមអានអត្ថបទទាំងស្រុងនៅទីនេះ។
លោក Pelé បានទទួលមរណភាពកាលពីថ្ងៃទី២៩ ខែធ្នូកន្លងមកនេះក្នុងអាយុ ៨២ឆ្នាំ បន្ទាប់ពីលោកប្រយុទ្ធនឹងជំងឺមហារីក។ ដោយសារតែលោកមានស្នាដៃធំធេងសម្រាប់វិស័យបាល់ទាត់ប្រេស៊ីល ស្នាមជើងរបស់លោកត្រូវបានគេផ្ដាមទុកនៅឯសាលកិត្តិយសនៅក្នុងកីឡដ្ឋាន Maracana ស្ថិតក្នុងទីក្រុង RIO DE JANEIRO ប្រទេសប្រេស៊ីល។
ខាងក្រោមនេះ គឺជារូបថតស្នាមបាតជើងលោក Pelé ដែលត្រូវបានគេផ្ដាមទុកនៅសាលកិត្តិយសនៅកីឡដ្ឋាន Maracana ក្នុងប្រទេសប្រេស៊ីល។ សូមមើលរូបនេះនៅក្នុងគេហទំព័ររូបថត Alamy។
សាលកិត្តិយស Maracana គឺជាទីកន្លែងរក្សាទុកស្នាមបាតជើងរបស់កីឡាករល្បីៗរបស់ប្រេស៊ីល ក្នុងនោះមានទាំងស្នាមបាតជើងរបស់អតីតកីឡាករឆ្នើម Ronaldo Nazario អតីតកីឡាករ Kaka អតីតកីឡាករ Ronaldinho និងអតីតកីឡាករបាល់ទាត់ល្បីៗដទៃទៀតរបស់ប្រេស៊ីល។
សេចក្ដីរាយការណ៍របស់់សារព័ត៌មាន BBC អង់គ្លេស បានឱ្យដឹងថា សពអតីតកីឡាករបាល់ទាត់ដ៏ឆ្នើមរបស់ពិភពលោក លោក Pelé ត្រូវបានបញ្ចុះនៅកីឡដ្ឋានរបស់ក្លឹប Santos ដែលជាក្លឹបលោកធ្លាប់លេងអស់រយៈពេល ១៩ឆ្នាំ។
សន្និដ្ឋាន
Fact Crescendo Cambodia រកឃើញថា ការអះអាងដូចដែលត្រូវបានរៀបរាប់ខាងលើនេះ មិនមែនជាការពិតនោះឡើយ។ ការអះអាងនេះ គ្រាន់តែជាពាក្យចចាមអារ៉ាមនៅលើបណ្ដាញសង្គមតែប៉ុណ្ណោះ។ គ្មានសេចក្ដីប្រកាសព័ត៌មានផ្លូវការពីស្ថាប័ន FIFA និងសេចក្ដីរាយការណ៍ដ៏គួរឱ្យជឿជាក់ណា បញ្ជាក់អំពីការរក្សាទុកជើងទាំងគូរបស់វីរៈបុរសបាល់ទាត់ប្រេស៊ីល លោក Pelé នោះឡើយ។
Title:ការអះអាងមិនត្រឹមត្រូវមួយថា FIFA នឹងរក្សាទុកជើងទាំងគូរបស់ Pelé នៅសារមន្ទី
Fact Check By: Jay UdomResult: False
