វីដេអូក្រាហ្វិកមួយត្រូវបានចែករំលែកមិនត្រឹមត្រូវថាជាទិដ្ឋភាពរញ្ជួយដីនៅកាណាដា
បន្ទាប់ពីរញ្ជួយដីមួយបានវាយប្រហារប្រទេសកាណាដាកាលពីថ្មីៗនេះ វីដេអូឃ្លីបមួយដែលបង្ហាញអគារញ័រ និងបានដួលរលំ ត្រូវបានបង្ហោះនៅលើបណ្ដាញសង្គមជាមួយសំណេរថា វាជាហេតុការណ៍រញ្ជួយដីនៅកាណាដា។ ការអះអាងភ្ជាប់ដោយវីដេអូខាងលើ ត្រូវបានចែករំលែកបន្ដជាច្រើនដង និងមានការបញ្ចេញមតិ និងប្រតិកម្មចម្រុះបែបផងដែរ។ ទោះជាយ៉ាងណា យើងរកឃើញថា វីដេអូនេះត្រូវបានភ្ជាប់ជាមួយព័ត៌មានមិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីពេលថ្មីៗនេះ វីដេអូយ៉ាងផុសផុលមួយនៅលើបណ្ដាញសង្គមហ្វេសប៊ុក បានបង្ហាញទិដ្ឋភាពនៃការរងខូចខាត និងផលប៉ះពាល់ទៅលើអគារ ជាមួយនឹងការអះអាងថា នោះគឺជាទិដ្ឋភាពនៃគ្រោះរញ្ជួយដីនៅកាណាដាម្សិលមិញ។
ការបង្ហោះដោយភ្ជាប់ទៅនឹងវីដេអូឃ្លីបខាងលើ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជាវីដេអូឃ្លីបទាំងស្រុង ត្រូវបានបង្ហោះនៅលើបណ្ដាញសង្គមហ្វេសប៊ុក ជាមួយសំណេររៀបរាប់ថា «គ្មានស្រុកណាស្រួលរស់នៅ ជាងស្រុកកំណើតយើងទេ»។
ដូចគ្នានេះ វីដេអូមួយដែលបង្ហាញនូវអគារ CN ស្ថិតនៅក្នុងទីក្រុងតូរ៉ុនតូ (Toronto) ប្រទេសកាណាដា បានដួលរលំ ក៏ត្រូវបានរកឃើញ និងបង្ហោះដោយអ្នកប្រើប្រាស់បណ្ដាញសង្គម TikTok ដទៃទៀតផងដែរ។
វីដេអូឃ្លីបដូចគ្នាខាងលើ ក៏ត្រូវបានរកឃើញ និងចែកចាយយ៉ាងផុសផុលនៅលើគេហទំព័រវីដេអូ YouTube ផងដែរ កាលពីពេលថ្មីៗនេះ ជាមួយសំណេររៀបរាប់ថា “ការរញ្ជួយដីខ្លាំងនៅកាណាដា ៩.៥”។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះ តាមរយៈការដំណើរការកម្មវិធី Google Reverse Image Search ដែលនាំយើងរកឃើញការពិតដូចខាងក្រោម។
តាមរយៈ Google Reverse Image Search យើងបានរកឃើញវីដេអូដើម និងមានរយៈពេលវែងនៅលើបណ្ដាញសង្គម TikTok ដែលបានបង្ហោះដោយអ្នកប្រើប្រាស់ដែលមានឈ្មោះថា Nemya Begloo កាលពីខែតុលា ឆ្នាំ២០២៣មកម្ល៉េះ។
លោក Nemya Begloo ត្រូវបានគេស្គាល់ថា គឺជាអ្នករចនាក្រាហ្វិច (Graphic Designer) និងជាអ្នកគ្រប់គ្រងច្នៃប្រឌិត (Creative Manager) ដែលវីដេអូរបស់លោកតែងតែបង្ហាញទិដ្ឋភាពនៃការកាត់តដោយភ្ជាប់ទៅនឹងអគារ CN នៅក្នុងប្រទេសកាណាដា។
ដូចគ្នានេះ នៅក្នុងគណនីបណ្ដាញសង្គម TikTok របស់លោក Nemya Begloo បានបង្ហាញវីដេអូឃ្លីបជាច្រើន ដែលមានសណ្ឋាន និងទម្រង់នៃការកាត់តស្រដៀងៗគ្នា ដោយបានបង្ហាញទិដ្ឋភាពអគារ CN នៅក្នុងទីក្រុងតូរ៉ុនតូ ប្រទេសកាណាដា បានញ័រ ដួលរលំ និងគ្របដោយក្រណាត់នៃបុណ្យណូអែលជាដើម។
ខាងក្រោមនេះ គឺជារូបភាពផ្ដាមចេញទាំងស្រុងពីគណនីបណ្ដាញសង្គម TikTok ខាងលើ។
TikTok Profile | Archived Link
តាមរយៈគេហទំព័រសារព័ត៌មាន USA Today ផ្សព្វផ្សាយកាលពីថ្ងៃទី០៥ ខែមេសា ឆ្នាំ២០២៤កន្លងទៅ បានបង្ហាញទិដ្ឋភាពផ្នែកមួយនៃដែកសន្ទួចសំណង់នៅក្នុងការដ្ឋានមួយ បានធ្លាក់លើស្ពាន ដែលបានកើតឡើងនៅទីក្រុង Fort Lauderdale រដ្ឋ Florida សហរដ្ឋអាមេរិក បានសម្លាប់មនុស្សម្នាក់ និងរងរបួសចំនួនបីនាក់ទៀត។
ហេតុការណ៍ខាងលើនេះ ពុំបានពាក់ព័ន្ធទៅនឹងការរញ្ជួយដីនៅក្នុងប្រទេសកាណាដានាពេលថ្មីៗនោះឡើយ។
USA Today News Report | Archived Link
វីដេអូឃ្លីបខាងលើនេះ ក៏ត្រូវបានផ្ទៀងផ្ទាត់ដោយគេហទំព័រ The Quint ផងដែរ កាលពីថ្ងៃទី០២ ខែឧសភា ឆ្នាំ២០២៤កន្លងទៅ ដែលបានបញ្ជាក់ថា វីដេអូឃ្លីប បង្ហាញអគារ CN ក្នុងប្រទេសកាណាដា បានញ័រ និងដួលរលំនោះ គឺត្រូវបានកាត់តដោយរចនាក្រាហ្វិច VFX (Visual Effects) លោក Nemya Begloo។
ចំណែកទិដ្ឋភាពផ្សេងទៀត គឺជាវីដេអូឃ្លីបចាស់ៗ ដែលបានកើតឡើងទីតាំងប្រទេសដទៃ និងមិនបានពាក់ព័ន្ធទៅនឹងការរញ្ជួយដីនៅក្នុងប្រទេសកាណាដានោះឡើយ។
The Quint News Report | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok WhatsApp
សន្និដ្ឋាន
Fact Crescendo Cambodia
បានរកឃើញ ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូឃ្លីបនេះ គឺជាការប្រមូលផ្ដុំនៃវីដេអូឃ្លីបកាត់ត និងចាស់ៗ ដែលបានកើតឡើងទីតាំងប្រទេសដទៃ និងមិនបានពាក់ព័ន្ធទៅនឹងការរញ្ជួយដីនៅក្នុងប្រទេសកាណាដានោះឡើយ។
Title:វីដេអូក្រាហ្វិកមួយត្រូវបានចែករំលែកមិនត្រឹមត្រូវថាជាទិដ្ឋភាពរញ្ជួយដីនៅកាណាដា
Written By: Kakada SimResult: Misleading
