- >>
- Political
វីដេអូអាជ្ញាធរប៉ូលិសប្រើហិង្សាទៅលើព្រះសង្ឃ មិនមែនកើតឡើងនៅកម្ពុជានោះឡើយ
កាលពីប៉ុន្មានថ្ងៃថ្មីៗចុងក្រោយនេះ មានវីដេអូឃ្លីបមួយដែលបង្ហាញទិដ្ឋភាពព្រះសង្ឃមួយអង្គ រងអំពើហិង្សាវាយប្រហារពីសំណាក់កម្លាំងប្រដាប់អាវុធនោះ ត្រូវបានបង្ហោះនៅលើបណ្ដាញសង្គមម្នាក់។ ដែលនាំឱ្យមានការយល់ថា ហេតុការណ៍នេះកើតឡើងនៅក្នុងប្រទេសកម្ពុជា។ វីដេអូនេះ ទទួលបានការចែករំលែកបន្ត និងប្រតិកម្មបញ្ចេញមតិចម្រុះជាច្រើនពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរយ៉ាងផុសផុល។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា ការសរសេរដោយភ្ជាប់ទៅនឹងវីដេអូឃ្លីបខាងលើនោះ គឺធ្វើឲ្យមានការយល់ច្រឡំ។
ការអះអាងលើបណ្តាញសង្គម
កាលពីថ្ងៃទី១២ ខែមករា ឆ្នាំ២០២៣ អ្នកប្រើប្រាស់ហ្វេសប៊ុកម្នាក់ បានបង្ហោះវីដេអូឃ្លីបមួយ បង្ហាញអំពីទិដ្ឋភាពនៃការប្រើអំពើហិង្សា ដេញវាយព្រះសង្ឃមួយអង្គ។ អ្នកប្រើប្រាស់ដដែលខាងលើនេះ ពុំបានបញ្ជាក់ព័ត៌មានលម្អិតនៃហេតុការណ៍ និងទីតាំងដែលបានកើតឡើងនោះឡើយ។
ការបង្ហោះបែបនេះ ធ្វើឲ្យអ្នកប្រើប្រាស់នៅតាមបណ្ដាញសង្គមហ្វេសប៊ុកនានា បានចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជាវីដេអូឃ្លីបទាំងស្រុង ដែលបានបង្ហោះដោយអ្នកប្រើប្រាស់ខាងលើ ដែលបានសរសេរថា «កុំធ្វើបាបលោកអី»។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើវីដេអូឃ្លីបខាងលើនេះ តាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
វីដេអូឃ្លីបដូចគ្នាទាំងស្រុងនេះ ត្រូវបានរកឃើញ និងបង្ហោះនៅលើគេហទំព័រ Reddit កាលពីថ្ងៃទី១៩ ខែវិច្ឆិកា ឆ្នាំ២០២២កន្លងទៅ ដែលបានសរសេរបញ្ជាក់ជាភាសាអង់គ្លេសថា «Thai Police using police brutality against a monk (18th November)» ឬប្រែសម្រួលជាភាសាខ្មែរមានន័យថា «ប៉ូលិសថៃប្រើអំពើឃោរឃៅទៅលើព្រះសង្ឃកាលពីថ្ងៃទី១៨ ខែវិច្ឆិកា»។
ខាងក្រោមនេះ គឺជាវីដេអូឃ្លីបទាំងស្រុង ដែលបានដកស្រង់ចេញពីគេហទំព័រខាងលើ។
ទិដ្ឋភាពនៃការប្រើអំពើហិង្សាទៅលើព្រះសង្ឃថៃមួយអង្គខាងលើនេះ ក៏ត្រូវបានផ្សព្វផ្សាយផងដែរ នៅលើគេហទំព័រសារព័ត៌មាន Bangkok Post កាលពីថ្ងៃទី១៨ ខែវិចិ្ឆកា ឆ្នាំ២០២២កន្លងទៅ។ គេហទំព័រដដែលខាងលើនេះ បានសរសេរបញ្ជាក់នៅក្នុងអត្ថបទរបស់ខ្លួនជាភាសាអង់គ្លេស ឬប្រែសម្រួលជាភាសាខ្មែរថា «ប៉ូលិសបាញ់គ្រាប់កៅស៊ូទៅលើបាតុករ ដោយក្នុងនោះក៏មានការប្រើអំពើហិង្សាទៅលើព្រះសង្ឃផងដែរ»។
Bangkok Post Link | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia រកឃើញថាវីដេអូឃ្លីប និងការលើកឡើងដោយអ្នកប្រើប្រាស់ហ្វេសប៊ុកខាងលើនោះ គឺធ្វើឲ្យមានការយល់ច្រឡំ។ ច្បាប់ដើមនៃវីដេអូឃ្លីបនេះ គឺជាទិដ្ឋភាពការប្រើអំពើហិង្សាទៅលើព្រះសង្ឃមួយអង្គ ពីសំណាក់អាជ្ញាធរប៉ូលិសថៃ នៅក្នុងទីក្រុងបាងកក កាលពីថ្ងៃទី១៨ ខែវិច្ឆិកា ឆ្នាំ២០២២កន្លងទៅ។
Title:វីដេអូអាជ្ញាធរប៉ូលិសប្រើហិង្សាទៅលើព្រះសង្ឃ មិនមែនកើតឡើងនៅកម្ពុជានោះឡើយ
Fact Check By: Kakada SimResult: Misleading
