ខណៈដែលពិភពលោកបន្តបាត់បង់គម្របព្រៃឈើបៃតងនោះ រូបភាពផ្គុំគ្នាមួយសន្លឹកដែលបង្ហាញរូបថតនៃតំបន់ភ្នំសឹករីករិលបាត់បង់គម្របព្រៃឈើ និងរូបថតនៃតំបន់ភ្នំដដែលគ្របដណ្ដប់ទៅដោយព្រៃឈើបៃតងនោះ ត្រូវបានបង្ហោះនៅលើបណ្ដាញសង្គម។ រូបភាពមួយសន្លឹកនេះ បង្ហាញនូវអត្ថន័យថា តំបន់ភ្នំដែលគ្របដណ្ដប់ទៅដោយព្រៃឈើបៃតងនៅឆ្នាំ២០០៩ បានក្លាយជាភ្នំសឹករីករិលនៅឆ្នាំ២០២៣នេះ។ រូបភាពមួយសន្លឹកនេះ ត្រូវបានចែកចាយ និងបញ្ចេញមតិចម្រុះពីសំណាក់អ្នកប្រើប្រាស់ជាច្រើន។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា រូបភាពភ្ជាប់ជាមួយខ្លឹមសារបែបនេះ មិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី២៥ ខែកុម្ភៈ ឆ្នាំ២០២៣កន្លងទៅថ្មីៗនេះ ទំព័រហ្វេសប៊ុកមួយឈ្មោះថា «Sharon» បានបង្ហោះរូបថតប្រៀបធៀបមួយសន្លឹកបង្ហាញតំបន់ភ្នំដូចគ្នាមួយកន្លែង ដែលគ្របដណ្ដប់ដោយព្រៃឈើបៃតងនៅឆ្នាំ២០០៩ និងទីវាលស្រឡះគ្មានព្រៃឈើនៅឆ្នាំ២០២៣។
រូបភាពដែលភ្ជាប់ជាមួយខ្លឹមសារបែបនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមចេញពីរូបភាពដែលត្រូវបានបង្ហោះលើបណ្ដាញសង្គមកាលពីថ្ងៃទី២៥ ខែកុម្ភៈ ឆ្នាំ២០២៣។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបភាព និងការអះអាងខាងលើនេះតាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតមួយសន្លឹក ដែលមានទម្រង់ និងសណ្ឋានដូចគ្នាទាំងស្រុង គឺត្រូវបានរកឃើញនៅលើគេហទំព័រសារព័ត៌មាន The Sun ផ្សព្វផ្សាយកាលពីថ្ងៃទី០៥ ខែឧសភា ឆ្នាំ២០១៩កន្លងទៅ។
បើតាមអត្ថបទរបស់សារព័ត៌មានអង់គ្លេសមួយនេះ រូបថតមួយសន្លឹកនេះ បង្ហាញឱ្យឃើញថា តំបន់ព្រៃភ្នំមួយកន្លែងរបស់គ្រួសារប្រេស៊ីលមួយ ត្រូវបានគេបំផ្លិចបំផ្លាញកាលពីឆ្នាំ២០០១កន្លងមក។
The Sun News Report | Archived Link
ចំណែកឯរូបថតមួយសន្លឹកទៀតដែលបង្ហាញតំបន់គ្របដណ្ដប់ទៅដោយគម្របព្រៃឈើបៃតងនោះ ត្រូវបានរកឃើញនៅលើទំព័រហ្វេសប៊ុកមួយ Instituto Terra ដែលបង្ហោះលើបណ្ដាញសង្គមកាលពីខែមករា ឆ្នាំ២០១៩កន្លងមក។
ខ្លឹមសារបង្ហោះដោយទំព័រហ្វេសប៊ុកនេះ បានឱ្យដឹងថា តំបន់ភ្នំដែលបានបាត់បង់គម្របព្រៃឈើបៃតងកាលពីឆ្នាំ២០០១នោះ បានទទួលគម្របព្រៃឈើបៃតងវិញកាលពីឆ្នាំ២០០៩កន្លងមក បន្ទាប់ពីប្ដីប្រពន្ធជនជាតិប្រេស៊ីលមួយគូ បានព្យាយាមដាំដើមឈើឡើងវិញ។
ព័ត៌មាននិយាយពីការដាំដើមឈើឡើងវិញរបស់ប្ដីប្រពន្ធប្រេស៊ីលមួយគូនេះ ក៏ត្រូវបានរកឃើញចុះផ្សាយដោយសារព័ត៌មាន Daily Mail កាលពីខែមិថុនា ឆ្នាំ២០១៩កន្លងមកផងដែរ។
សារព័ត៌មានដដែលនេះ បានរៀបរាប់ថា ប្តីប្រពន្ធប្រេស៊ីល បានធ្វើឲ្យពិភពលោកមានការកោតសរសើរជាខ្លាំង ក្រោយពីពួកគាត់បានចំណាយពេល ២០ឆ្នាំ ដើម្បីដាំដើមឈើប្រមាណជា ២លានដើម នៅក្នុងតំបន់ភ្នំដែលធ្លាប់រងនូវការកាប់បំផ្លាញស្ទើរតែហិនហោចអស់។ សូមមើលខ្លឹមសារលម្អិតនៅទីនេះ ឬតំណភ្ជាប់ត្រូវបានរក្សាទុកនៅទីនេះ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថា រូបថតដូចដែលត្រូវបានរៀបរាប់ខាងលើនេះ ត្រូវបានបង្ហោះជាមួយខ្លឹមសារមិនត្រឹមត្រូវ។ ការពិត រូបថតទាំង ២សន្លឹកនេះ បង្ហាញតំបន់ភ្នំមួយក្នុងប្រទេសប្រេស៊ីលដែលបានបាត់បង់គម្របព្រៃឈើបៃតងទាំងស្រុងនៅឆ្នាំ២០០១ ហើយត្រូវបានប្ដីប្រពន្ធជនជាតិប្រេស៊ីលមួយគូដាំដើមឈើឡើងវិញ ប្រែក្លាយតំបន់ភ្នំនោះគ្របដណ្ដប់ទៅដោយព្រៃឈើបៃតងនៅឆ្នាំ២០១៩។
Title:គូស្នេហ៍ប្រេស៊ីលមួយគូចំណាយពេល២០ឆ្នាំស្ដារគម្របព្រៃឈើនៅតំបន់ភ្នំមួយកន្លែង
Fact Check By: Kakada SimResult: Misleading
