- >>
- FALSE
វេបសាយមួយផ្សាយព័ត៌មានក្លែងក្លាយថា អ្នកនាង អែនជែលីណា ជូលី ទទួលមរណភាព
អ្នកស្រី អែនជែលីណា ជូលី (Angelina Jolie) គឺជាតារាសម្ដែងភាពយន្តហូលីវូដអាមេរិកដ៏ល្បីឈ្មោះម្នាក់។ ថ្មីៗនេះ ការអះអាងមួយនៅតាមគេហទំព័រ និងបណ្ដាញសង្គមនានា បានលើកឡើងថា តារាសម្ដែងរូបនេះ បានទទួលមរណភាពហើយ។ ការអះអាងខាងលើ ត្រូវបានចែករំលែកយ៉ាងផុសផុលនៅលើបណ្ដាញសង្គម។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា ការអះអាងខាងលើ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
គេហទំព័រមួយ បានផ្សាយព័ត៌មានកាលពីសប្ដាហ៍មុនថា តារាសម្ដែងអ្នកស្រី អែនជែលីណា ជូលី បានទទួលមរណភាព ដោយមានរូបថតបង្ហាញមនុស្សយំសោកនៅនឹងមឈូសផងដែរ។
ព័ត៌មាននេះ ត្រូវបានចែករំលែកនៅលើបណ្ដាញសង្គម ហើយត្រូវបានអ្នកប្រើប្រាស់ហ្វេសប៊ុកចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែប។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដែលបានផ្សាយកាលពីថ្ងៃអាទិត្យសប្ដាហ៍មុនជាភាសាអង់គ្លេស ឬប្រែសម្រួលជាភាសាខ្មែរថា «ហូលីវូដរាយការណ៍ព័ត៌មានដ៏សោកសៅអំពី Angelina Julie នាងត្រូវបានបញ្ជាក់ថា... មើលច្រើនទៀត»។
ការអះអាងដូចគ្នានេះ ក៏ត្រូវបានរកឃើញ និងផ្សព្វផ្សាយដោយគេហទំព័រ News 44 Zone កាលពីថ្ងៃទី១៩ ខែមីនា ឆ្នាំ២០២៣កន្លងទៅនេះផងដែរ។
News 44 Zone Link | Archived Link
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបថត និងការអះអាងខាងលើនេះ តាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតដែលមានទម្រង់ និងសណ្ឋានដូចគ្នាទាំងស្រុងនេះ ត្រូវបានរកឃើញ និងផ្សព្វផ្សាយនៅលើគេហទំព័រសារព័ត៌មាន China Daily កាលពីថ្ងៃទី០៧ ខែកញ្ញា ឆ្នាំ២០០៤កន្លងទៅ ដោយមិនបានបង្ហាញទិដ្ឋភាពរូបរបស់តារាសម្ដែងស្រី អែនជែលីណា ជូលី នោះឡើយ។
អត្ថបទដដែលខាងលើនេះ បានបញ្ជាក់ជាភាសាអង់គ្លេស ឬប្រែសម្រួលជាភាសាខ្មែរថា «រូបថតមិត្តភ័ក្តិ ដែលបានយំនៅលើមឈូសរបស់ចំណាប់ខ្មាំង Alana Katsanova អាយុ ១៥ឆ្នាំ ដោយត្រូវបានគេសម្លាប់។ ទិដ្ឋភាពនេះ ត្រូវបានថតនៅក្នុងអំឡុងពេលពិធីបុណ្យសពនៅទីក្រុង Beslan កាលពីថ្ងៃទី ០៦ ខែកញ្ញា ឆ្នាំ២០០៤កន្លងទៅ»។
China Daily News Report | Archived Link
ខាងក្រោមនេះ គឺជាការប្រៀបធៀបគ្នារវាងរូបថតដែលត្រូវបានកាត់ត និងរូបថតច្បាប់ដើមដែលត្រូវបានរកឃើញផ្សព្វផ្សាយនៅលើបណ្តាញសង្គម។
ករណីនៃការអះអាងខាងលើ ក៏ត្រូវបានត្រួតពិនិត្យការពិត និងផ្ទៀងផ្ទាត់ដោយ PolitiFact ផងដែរ កាលពីថ្ងៃទី១៨ ខែមីនា ឆ្នាំ២០២៣កន្លងទៅនេះ ដោយបានបញ្ជាក់ថា តារាសម្ដែងអ្នកស្រី អែនជែលីណា ជូលី (Angelina Jolie) នៅរស់រានមានជីវិតធម្មតា ដោយពុំទទួលមរណភាពដូចការលើកឡើងនោះឡើយ។ សូមអានខ្លឹមសារទាំងស្រុងនៅទីនេះ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថា ព័ត៌មានដូចដែលត្រូវបានរៀបរាប់ខាងលើនេះ មិនត្រឹមត្រូវទេ។ ការពិតតារាសម្ដែងអ្នកស្រី អែនជែលីណា ជូលី (Angelina Jolie) នៅរស់រានមានជីវិតធម្មតា ដោយពុំទទួលមរណភាពដូចការលើកឡើងនោះឡើយ។
Title:វេបសាយមួយផ្សាយព័ត៌មានក្លែងក្លាយថា អ្នកនាង អែនជែលីណា ជូលី ទទួលមរណភាព
Fact Check By: Kakada SimResult: False
