តារាកំប្លែងជនជាតិអង់គ្លេសដ៏មានប្រជាប្រិយភាពភ្លូកទឹកភ្លូកដី និងល្បីសុះសាយលោក រ៉ូវេន អាធិ្ឋសុន (Rowan Atkinson) ត្រូវបានស្គាល់តាមរយៈកម្មវិធីកំប្លែងរបស់ទូរទស្សន៍ដែលមានចំណងជើងថា «Mr. Bean»។ កាលពីថ្មីៗនេះ ព័ត៌មានមួយដែលបានអះអាងថាតារាកំប្លែងលោកប៊ីន ទទួលមរណៈភាពត្រូវបានបង្ហោះ និងផ្សព្វផ្សាយនៅតាមបណ្តាញសង្គមយ៉ាងផុសផុល។ ការអះអាងមួយនេះ ត្រូវបានប្រតិកម្មចម្រុះពីសំណាក់អ្នកប្រើប្រាស់ជាច្រើននៅជុំវិញសកលលោក។
ទោះជាយ៉ាងណា ការត្រួតពិនិត្យ និងផ្ទៀងផ្ទាត់ការពិតរបស់ក្រុមការងារ Fact Crescendo Cambodia បានរកឃើញថា រូបថត និងការអះអាងដែលអ្នកប្រើប្រាស់បានបង្ហោះនៅលើបណ្តាញសង្គមនោះ គឺជាមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី២២ ខែវិច្ឆិកា ឆ្នាំ២០២១កន្លងទៅនេះ មានអត្ថបទសារព័ត៌មានមួយដែលមានចំណងជើងថា «ពិតជាគួរអោយសោកស្តាយតារាកំប្លែងលោកប៊ីន (Mr. Bean) ដ៏ល្បីម្នាក់បានស្លាប់ទាំងដែល…» ត្រូវបានចុះផ្សព្វផ្សាយដោយគេហទំព័រសារព័ត៌មានមួយដែលមានឈ្មោះថា WeShare News។
ខាងក្រោមនេះ គឺជារូបភាពផ្តាមចេញពីគេហទំព័រសារព័ត៌មានខាងលើ បង្ហាញនូវរូបថតរបស់លោកប៊ីន (Mr. Bean) ភ្ជាប់នឹងពាក្យជាភាសាអង់គ្លេសថា «RIP [Rest In Peace]» ឬប្រែសម្រួលជាភាសាខ្មែរមានន័យថា «សូមដួងវិញ្ញាណលោកបានដល់ទីស្ងប់សុខ»។
WeShare News Report | Archived Link
ដូចគ្នានេះកាលពីថ្ងៃទី២៧ ខែមេសា ឆ្នាំ២០២០កន្លងទៅ ទំព័រហ្វេសប៊ុកមួយដែលមានឈ្មោះថា Top MV ក៏ធ្លាប់បានបង្ហោះនូវអត្ថបទដោយបានភ្ជាប់រូបថតលោកប៊ីន ជាមួយនឹងការរៀបរាប់ថា លោកបានទទួលមរណៈភាពបាត់ទៅហើយ។
រូបភាពផ្តាមចេញពីប៉ុស្តិ៍របស់អ្នកប្រើប្រាស់ដោយបានសរសេររៀបរាប់ថា «សូមដួងវិញ្ញាណលោក បានដល់ទីស្ងប់សុខ(RIP Mr Bean)
ការត្រួតពិនិត្យការពិត
Fact Crescendo Cambodia បានចាប់ផ្តើមត្រួតពិនិត្យ និងផ្ទៀតផ្ទាត់លើការអះអាងមួយនេះ តាមរយៈការសាកសួរបំភ្លឺទៅកាន់ទីភ្នាក់ងារផ្ទាល់របស់តារាកំប្លែងលោកប៊ីន (Mr. Bean) និងសេចក្តីរាយការណ៍បណ្តាសារព័ត៌មានអន្តរជាតិ ដែលនាំឲ្យយើងទទួលបានខ្លឹមសារនៃការពិតដូចខាងក្រោម។
ដំណឹងមរណភាពរបស់តារាកំប្លែងអង់គ្លេសកំពូលម្នាក់នេះ គួរតែត្រូវបានប្រកាសជាផ្លូវការ និងផ្សព្វផ្សាយដោយប្រព័ន្ធផ្សព្វផ្សាយព័ត៌មាននានា ឬតាមរយៈក្រុមគ្រួសាររបស់ខ្លួនផ្ទាល់។
តាមរយៈការបំភ្លឺរបស់ទីភ្នាក់ងារផ្ទាល់របស់តារាកំប្លែងលោកប៊ីន “PBJ Management” បញ្ជាក់តាមសារអេឡិចត្រូនិកជាភាសាអង់គ្លេសថា «We can safely say that Mr Atkinson is absolutely fine» ឬប្រែជាភាសាខ្មែរមានន័យថា «យើងអាចនិយាយបានដោយសុវត្ថិភាពថាលោក អាធិ្ឋសុន (Atkinson) គឺពិតជាមានសុខភាពល្អណាស់»។ ការបញ្ជាក់នេះ បានធ្វើឡើងក្រោយពីក្រុមការងាររបស់យើង នៅក្នុងប្រទេសស្រីលង្កា បានធ្វើការទាក់ទងសាកសួរកាលពីថ្ងៃទី២៣ ខែវិច្ឆិកា ឆ្នាំ២០២១នេះ។
ដូចគ្នានេះ គេហទំព័រសារព័ត៌មាន India News ចុះផ្សាយកាលពីថ្ងៃទី២២ ខែវិច្ឆិកា ឆ្នាំ២០២១នេះ បានបង្ហាញ និងរៀបរាប់ជាភាសាអង់គ្លេសថា “British actor Rowan Atkinson, who is widely known for his roles in the comedy show Mr. Bean and the film Johnny English, is not dead. There are no credible reports about the news of his death and no such information was provided by his family. An old hoax about Rowan Atkinson’s demise surfaced on social media once again and shocked fans who rushed to Twitter as they couldn’t believe that their beloved Mr. Bean was dead” ឬប្រែសម្រួលជាភាសាខ្មែរមានន័យថា «តារាសម្តែងជនជាតិអង់គ្លេសលោក រ៉ូវេន អាធិ្ឋសុន ដែលត្រូវបានគេស្គាល់យ៉ាងទូលំទូលាយក្នុងតួនាទីរបស់គាត់នៅក្នុងកម្មវិធីកំប្លែង Mr. Bean និងខ្សែភាពយន្ត Johnny English មិនទាន់ស្លាប់នោះទេ។ មិនមានរបាយការណ៍ដែលអាចជឿទុកចិត្តបាន អំពីដំណឹងនៃការស្លាប់របស់គាត់ និងមិនមានព័ត៌មានបែបនេះត្រូវបានផ្តល់ដោយគ្រួសាររបស់គាត់ទេ»។
ខាងក្រោមនេះ គឺជារូបភាពផ្តាមដែលផ្តិតចេញពីគេហទំព័រសារព័ត៌មានខាងលើ ដោយបានបញ្ជាក់ថាលោកប៊ីនពុំបានស្លាប់ដូចការអះអាងនោះឡើយ។
India News Report | Archived Link
ករណីខាងលើមួយនេះ ក៏ត្រូវបានផ្ទៀតផ្ទាត់ដោយក្រុមការងាររបស់យើងនៅក្នុងប្រទេសស្រីលង្កា (Fact Crescendo Sri Lanka) ផងដែរ កាលពីថ្ងៃទី២៣ ខែវិច្ឆិកា ឆ្នាំ២០២១កន្លងទៅថ្មីៗនេះ។ ខាងក្រោមនេះ គឺជារូបភាពផ្តាមចេញពីគេហទំព័រដែលបានសរសេររៀបរាប់ជាភាសារបស់ស្រីលង្កា (Sinhala) ថា «මියගිය බවට පළවන පුවත් අසත්යයි!» ឬប្រែសម្រួលជាភាសាខ្មែរតាមរយៈកម្មវិធី Google Translate ដែលមានន័យថា «ព័ត៌មានអះអាងថាលោក Mr. Bean ស្លាប់ជាព័ត៌មានមិនពិត»។
Fact Crescendo Report | Archived Link
លោក រ៉ូវេន អាធិ្ឋសុន (Rowan Atkinson) ដែលត្រូវបានគេស្គាល់ជាទូទៅថាលោកប៊ីន (Mr. Bean) ធ្លាប់បានគេអះអាងថា លោកទទួលមរណៈភាពបែបនេះជាច្រើនដង ជាច្រើនសារមកហើយ ដែលចុងក្រោយនេះ គឺធ្វើឡើងនៅចុងខែឧសភា ឆ្នាំ២០២១នេះ។
ខាងក្រោមនេះ គឺជារូបភាពផ្តាមចេញពីគេហទំព័រ AFP ដែលបានបង្ហាញនូវសារបង្ហោះ និងការអះអាងស្រដៀងគ្នាដែលបានធ្វើឡើងនៅថ្ងៃទី២៩ ខែឧសភា ឆ្នាំ២០២១កន្លងទៅ។
AFP Fact Check | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News
សន្និដ្ឋាន
Fact Crescendo Cambodia បានរកឃើញថា រូបថត និងការអះអាងដោយអ្នកប្រើប្រាស់ខាងលើនោះ គឺពិតជាមិនត្រឹមត្រូវនោះឡើយ។ តារាកំប្លែងអង់គ្លេសលោក រ៉ូវេន អាធិ្ឋសុន (Rowan Atkinson) ឬលោកប៊ីន គឺនៅរស់រានមានជីវិតនៅឡើយទេ នេះបើតាមការបញ្ជាក់តាមរយៈសារអេឡិចត្រូនិករបស់ទីភ្នាក់ងារ “PBJ Management” ដែលបានធ្វើឡើងកាលពីថ្ងៃទី២៣ ខែវិច្ឆិកា ឆ្នាំ២០២១ថ្មីៗនេះ។
Title:តើតារាកំប្លែងអង់គ្លេសលោក Mr. Bean ពិតជាស្លាប់មែនឬ?
Fact Check By: Kakada SimResult: False
