ក្រដាសប្រាក់ ៣០០០០រៀល ត្រូវបានបោះពុម្ពជាផ្លូវការដើម្បីអបអរសាទរខួប ៣០ឆ្នាំនៃសន្ធិសញ្ញាទីក្រុងប៉ារីសកាលពីឆ្នាំមុន។ ទន្ទឹមគ្នានោះ រូបថតក្រដាសប្រាក់ប្រភេទនេះ ត្រូវបានបោះពុម្ពមកជាមួយរូបថតលោកនាយករដ្ឋមន្ត្រី ហ៊ុន សែន និងរូបថតនៃការបង្ក្រាបរបស់កងកម្លាំងប្រដាប់អាវុធទៅលើក្រុមអ្នកតវ៉ា ត្រូវបានផ្សព្វផ្សាយ និងចែករំលែកយ៉ាងព្រោងព្រាតនៅលើបណ្ដាញសង្គម។ ១ឆ្នាំក្រោយមក រូបថតដដែលនេះ ក៏ត្រូវបានចែករំលែកនៅលើបណ្ដាញសង្គមឡើងវិញ។ ទោះជាយ៉ាងណា ការផ្ទៀងផ្ទាត់របស់ Fact Crescendo Cambodia រកឃើញថា រូបថតនេះ ត្រូវបានកាត់ត។
ការអះអាងលើបណ្ដាញសង្គម
រូបថតក្រដាសប្រាក់ ៣០០០០រៀលមួយសន្លឹក ដែលមានបោះពុម្ពមកជាមួយរូបថតលោកនាយករដ្ឋមន្ត្រី ហ៊ុន សែន និងទាហានប្រដាប់ដោយអាវុធបង្ក្រាបទៅលើក្រុមប្រជាជន ត្រូវបានចែករំលែកឡើងវិញនៅលើបណ្ដាញសង្គមកាលពីថ្ងៃទី២៣ ខែតុលាកន្លងមកនេះ។
រូបថតក្រដាសប្រាក់មួយប្រភេទនេះ ត្រូវបានបង្ហោះលើបណ្ដាញសង្គមហ្វេសប៊ុកតាំងពីថ្ងៃទី២៣ ខែតុលា ឆ្នាំ២០២១កន្លងមកម៉្លេះ នៅចំទិវាសន្ធិសញ្ញាសន្តិភាពទីក្រុងប៉ារីស ប៉ុន្តែ វាត្រូវបានចែករំលែកឡើងវិញ ១ឆ្នាំក្រោយមក។
រូបថតក្រដាសប្រាក់នេះ ត្រូវបានអ្នកប្រើប្រាស់បណ្ដាញសង្គមចែករំលែកបន្តយ៉ាងផុសផុល រួមជាមួយការបញ្ចេញមតិចម្រុះបែប និងការបញ្ចេញប្រតិកម្មផ្សេងៗផងដែរ។
ខាងក្រោមនេះ គឺជារូបភាពផ្ដាមចេញពីការបង្ហោះនៅលើបណ្ដាញសង្គមដែលបង្ហាញរូបថតក្រដាសប្រាក់ ៣០០០០រៀលមានរូបថតលោក ហ៊ុន សែន និងកម្លាំងប្រដាប់អាវុធបង្ក្រាបទៅលើក្រុមអ្នកតវ៉ា។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើរូបថតនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតក្រដាសប្រាក់ ៣០០០០រៀលនេះ ត្រូវបានរកឃើញចុះផ្សាយដោយសារព័ត៌មានខ្មែរ ថាមស៍ កាលពីថ្ងៃទី១៨ ខែតុលា ឆ្នាំ២០២១កន្លងមកនេះ នៅក្នុងអត្ថបទមួយដែលនិយាយអំពីការបោះពុម្ពក្រដាសប្រាក់រៀលមួយប្រភេទនេះ ដើម្បីអបអរខួប ៣០ឆ្នាំនៃសន្ធិសញ្ញាសន្តិភាពទីក្រុងប៉ារីស ២៣ តុលា។
រូបថតដែលចុះផ្សាយដោយសារព័ត៌មានមួយនេះ បង្ហាញឱ្យឃើញថា ក្រដាសប្រាក់ ៣០០០០រៀល ត្រូវបានបោះពុម្ពជាមួយព្រះឆាយាលក្ខណ៍របស់អតីតព្រះមហាក្សត្រ សម្ដេចព្រះ នរោត្ដម សីហនុ ស្ថិតនៅផ្នែកខាងមុខនៃក្រដាសប្រាក់នេះ និងរូបភាពនៃការយាងព្រះរាជដំណើររបស់សម្ដេចព្រះ នរោត្ដម សីហនុ និងលោក ហ៊ុន សែន កាលពី ៣០ឆ្នាំមុន។
ច្បាប់ដើមនៃរូបថតនេះ ពុំមានរូបភាពលោក ហ៊ុន សែន នៅផ្នែកខាងមុខនៃក្រដាសប្រាក់ និងរូបភាពកងកម្លាំងប្រដាប់អាវុធបង្ក្រាបការតវ៉ារបស់ប្រជាពលរដ្ឋនោះឡើយ។
ខាងក្រោមនេះ គឺជារូបភាពបង្ហាញការប្រៀបធៀបរវាងរូបថតក្រដាសប្រាក់ដែលត្រូវបានកាត់តដាក់រូបថតលោក ហ៊ុន សែន និងរូបថតក្រដាសប្រាក់ច្បាប់ដើម ដែលបោះពុម្ពជាផ្លូវការដោយធនាគារជាតិនៃកម្ពុជាកាលពីឆ្នាំមុន។
សន្និដ្ឋាន
Fact Crescendo Cambodia រកឃើញថា រូបថតដូចដែលត្រូវបានរៀបរាប់ខាងលើនេះ ត្រូវបានកាត់ត។ រូបថតច្បាប់ដើម មិនមានការបោះពុម្ពក្រដាសប្រាក់ជាមួយរូបថតលោក ហ៊ុន សែន និងកងកម្លាំងប្រដាប់អាវុធបង្ក្រាបទៅលើការតវ៉ានោះឡើយ។ ក្រដាសប្រាក់ ៣០០០០រៀលនេះ ត្រូវបានបោះពុម្ពជាមួយព្រះឆាយាលក្ខណ៍អតីតព្រះមហាក្សត្រ នរោត្ដម សីហនុ នៅផ្នែកខាងមុខ និងរូបភាពលោក ហ៊ុន សែន អមព្រះរាជដំណើរយាងត្រឡប់របស់អតីតព្រះមហាក្សត្រកាលពីឆ្នាំ១៩៩១ ស្ថិតនៅផ្នែកខាងក្រោយ។
Title: ក្រដាសប្រាក់រៀលមួយប្រភេទត្រូវបានកាត់តរូបថតលោក ហ៊ុន សែន និងកម្លាំងប្រដាប់អាវុធ
Fact Check By: Jay UdomResult: Altered
