តើក្រុមតារាចម្រៀងប្រុស Stray Kids នឹងមានវត្តមាននៅកម្ពុជាមែនឬ?

Stray Kids គឺជាក្រុមតារាចម្រៀងកូរ៉េដ៏ល្បីល្បាញមួយ ហើយមានការអះអាងមួយនៅលើបណ្ដាញសង្គម និយាយថា ក្រុមតារាចម្រៀងកូរ៉េមួយនេះ នឹងមកប្រគុំតន្ដ្រីនៅកម្ពុជា។ ការអះអាងមួយនេះ ត្រូវបានចែកចាយ និងប្រតិកម្មជាច្រើនដងពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរនាពេលថ្មីៗនេះ។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា ការអះអាងនេះ មិនត្រឹមត្រូវនោះឡើយ។

ការអះអាងលើបណ្តាញសង្គម

កាលពីថ្ងៃទី១១ ខែតុលា ឆ្នាំ២០២២កន្លងទៅថ្មីៗនេះ អ្នកប្រើប្រាស់ហ្វេសប៊ុកម្នាក់ បង្ហោះផ្ទាំងខិតប័ណ្ណមួយដែលសរសេរថា ក្រុមតារាចម្រៀងប្រុសកូរ៉េ Stray Kids នឹងមានវត្តមាននៅប្រទេសកម្ពុជានាពេលខាងមុខឆាប់ៗនេះ។ ការអះអាងមួយនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។

ខាងក្រោមនេះ គឺជារូបភាពផ្ដាមចេញពីប៉ុស្ដិ៍របស់អ្នកប្រើប្រាស់ខាងលើ ដែលរៀបរាប់ថា ក្រុមតារាចម្រៀងកូរ៉េ នឹងមកប្រគុំតន្រី្តនៅប្រទេសកម្ពុជា។

Facebook Post | Archived Link

ការត្រួតពិនិត្យការពិត

Fact Crescendo Cambodia ចាប់ផ្ដើមត្រួតពិនិត្យទៅលើរូបថត និងការអះអាងខាងលើនេះតាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។

ផ្ទាំងខិតប័ណ្ណព័ត៌មានមួយផ្ទាំងនេះ ត្រូវបានរកឃើញនៅលើទំព័រហ្វេសប៊ុកផ្លូវការរបស់ក្រុមតារាចម្រៀងប្រុសកូរ៉េ Stray Kids ដែលត្រូវបានបង្ហោះកាលពីថ្ងៃទី១០ ខែតុលា ឆ្នាំ២០២២កន្លងទៅនេះ។ ផ្ទាំងខិតប័ណ្ណនេះ បានបង្ហាញនូវគម្រោងប្រគុំតន្ត្រីនៅទីក្រុងបាងកក ប្រទេសថៃ នៅថ្ងៃទី០២-០៣ ខែកុម្ភៈ ឆ្នាំ២០២៣ខាងមុខនេះ។

ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដោយពុំមានគម្រោងមកប្រទេសកម្ពុជានោះឡើយ។

Facebook Post | Archived Link

ខាងក្រោមនេះ គឺជាការប្រៀបធៀបគ្នារវាងរូបថតដែលត្រូវបានកាត់ត និងរូបថតច្បាប់ដើមដែលត្រូវបានរកឃើញផ្សព្វផ្សាយនៅលើបណ្តាញសង្គម។

ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖

Facebook Twitter Telegram Google News TikTok

សន្និដ្ឋាន

Fact Crescendo Cambodia រកឃើញថារូបថត និងការលើកឡើងដោយអ្នកប្រើប្រាស់ហ្វេសប៊ុកខាងលើនោះ គឺពិតជាមិនត្រឹមត្រូវនោះឡើយ។ ក្រុមតារាចម្រៀងប្រុសកូរ៉េ Stray Kids នឹងមកប្រគុំតន្ត្រីនៅទីក្រុងបាងកក ប្រទេសថៃនៅថ្ងៃទី០២-០៣ ខែកុម្ភៈ ឆ្នាំ២០២៣ខាងមុខនេះ ដោយពុំមានគម្រោងមកប្រទេសកម្ពុជានោះឡើយ។