- >>
- FALSE
លោក ហ៊ុន សែន ទៅជប៉ុនដើម្បីប្ដូរកែវភ្នែកសិប្បនិម្មិត មិនមែនទៅលាងឈាមដូចការអះអាងទេ
ខណៈដែលអតីតនាយករដ្ឋមន្ត្រីកម្ពុជា លោក ហ៊ុន សែន និងកូនៗរបស់លោកធ្វើដំណើរទៅកាន់ប្រទេសជប៉ុននៅដើមសប្ដាហ៍នេះនោះ ការអះអាងមួយបានលើកឡើងនៅលើបណ្ដាញសង្គមថា មេបក្សកាន់អំណាចរូបនេះនាំកូនៗទៅប្រទេសជប៉ុន ដើម្បីលាងឈាមនៅទីនោះ ដោយសារតែសុខភាពលោកស្ថិតក្នុងស្ថានភាពធ្ងន់ធ្ងរ។ ការអះអាងនេះ ត្រូវបានចែករំលែកជាច្រើនដង និងមានការបញ្ចេញមតិជាច្រើនពីសំណាក់អ្នកប្រើប្រាស់បណ្ដាញសង្គម។ ទោះជាយ៉ាងណា យើងរកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ការអះអាងមួយនៅលើបណ្ដាញសង្គម បានលើកឡើងថា សុខភាពរបស់លោក ហ៊ុន សែន អតីតនាយករដ្ឋមន្ត្រីកម្ពុជា បានប្រមូលកូនៗធ្វើដំណើរទៅប្រទេសជប៉ុន ដើម្បីលាងឈាម ដោយសារតែគាត់កំពុងមានជំងឺធ្ងន់ធ្ងររហូតក្ដោបដៃលែងកើតហើយ។
ការអះអាងនេះ ត្រូវបានចែករំលែកបន្តជាច្រើនដង និងមានប្រតិកម្មចម្រុះ ព្រមទាំងការបញ្ចេញមតិយោបល់ផ្សេងៗផងដែរពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមនៅថ្ងៃទី១០ ខែមករា ឆ្នាំ២០២៤ ដែលរៀបរាប់ថា «តើមូលហេតុអ្វីបានជា ហ៊ុន សែន ប្រមូលកូនៗទៅប្រទេសជប៉ុនទាំងអស់? គឺដើម្បីឱ្យកូនៗប្ដូរឈាមឱ្យ ហ៊ុន សែន ព្រោះ ហ៊ុន សែន ជំងឺគាត់កាន់តែធ្ងន់ធ្ងរទៅហើយ សូម្បីតែដៃរបស់គាត់ក៏ក្ដោបលែងកើតហើយ។ ហ៊ុន សែន មិនដឹងថាមានជីវិតទៅស្រុកខ្មែរវិញដែរឬទេ?»។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការពិនិត្យមើលឡើងវិញនូវដំណើររបស់អតីតនាយករដ្ឋកម្ត្រីកម្ពុជារូបនេះទៅកាន់ប្រទេសជប៉ុន ដែលនាំឱ្យយើងរកឃើញការពិតដូចខាងក្រោមនេះ។
លោក ហ៊ុន សែន ដែលសព្វថ្ងៃនេះជាប្រធានក្រុមឧត្ដមប្រឹក្សាផ្ទាល់ព្រះមហាក្សត្រកម្ពុជា និងជាប្រធានគណបក្សប្រជាជនកម្ពុជាកំពុងកាន់អំណាចផងនោះ បានចាកចេញពីប្រទេសកម្ពុជាទៅកាន់ប្រទេសជប៉ុនកាលពីព្រឹកថ្ងៃអង្គារសប្ដាហ៍នេះ ដើម្បីផលិតកែវភ្នែកសិប្បនិម្មិត។
អតីតនាយករដ្ឋមន្ត្រីកម្ពុជារូបនេះ បានបញ្ជាក់ដូច្នេះនៅលើទំព័រហ្វេសប៊ុកផ្លូវការរបស់លោកកាលពីថ្ងៃទី០៩ ខែមករា ឆ្នាំ២០២៤ ដោយលោកបានបង្ហោះជាមួយរូបថត ៤សន្លឹកធ្វើដំណើរចាកចេញពីរថយន្ត និងរូបលោកជាមួយកូនៗ និងចៅៗរបស់លោក ស្ថិតនៅក្នុងយន្តហោះមួយគ្រឿង។
ខាងក្រោមនេះ គឺជារូបភាពផ្ដាមចេញពីសារបង្ហោះនៅលើទំព័រហ្វេសប៊ុករបស់លោក ហ៊ុន សែន កាលពីថ្ងៃទី០៩ ខែមករា ឆ្នាំ២០២៤ ដែលសរសេររៀបរាប់ថា “កំពុងធ្វើដំណើរទៅតូក្យូប្រទេសជប៉ុន ដើម្បីផលិតកែវភ្នែកសិប្បនិម្មិតដែលខ្ញុំបានប្រើប្រាស់អស់រយៈពេល ៣៤ឆ្នាំមកហើយ(១៩៩០-២០២៤)។ ៣៤ឆ្នាំនៃការប្រើកែវភ្នែកផលិតនៅជប៉ុន ខ្ញុំមិនដែលឈឺក្បាលឬឈឺភ្នែកនោះឡើយ ខុសពីកែវភ្នែកដែលខ្ញុំប្រើពីឆ្នាំ១៩៧៥ដល់ឆ្នាំ១៩៩០ ដែលតែងតែធ្វើឱ្យខ្ញុំឈឺភ្នែក និងឈឺក្បាល។ កាលពីឆ្នាំ២០១៧ រដ្ឋាភិបាលជប៉ុនជួយផលិតជាជំនួយចំនួន៥គ្រាប់ លើកនេះភាគីជប៉ុននឹងជួយផលិតចំនួន៥គ្រាប់ទៀតដែលអាចប្រើបានរយៈពេល១០ឆ្នាំទៀត គឺ១ឆ្នាំប្រើមួយគ្រាប់។ នេះជាលទ្ធផលនៃប្រទេសដែលមានសង្គ្រាមដូចនេះហើយបានជាខ្ញុំដឹកនាំស្វែងរកសន្តិភាព និងរក្សាសន្តិភាព។ សូមអរគុណរដ្ឋាភិបាលជប៉ុន និងគ្រូពេទ្យជប៉ុនដែលជួយមើលថែទាំភ្នែកខ្ញុំរយៈពេល៣៤ឆ្នាំកន្លងមក”។
រូបថត ៣សន្លឹកនៅក្នុងរូបថត៤សន្លឹកដែលបង្ហោះជាមួយសារខាងលើនេះ បង្ហាញដៃទាំងពីររបស់លោក ហ៊ុន សែន ធ្វើចលនាផ្សេងៗដូចជាចលនាដៃពេលចាកចេញពីរថយន្ត ចលនាដៃក្រសោបចៅស្រី និងចលនាដៃធ្វើជាសញ្ញាអក្សរ V និងខាងឆ្វេងកាន់ទូរស័ព្ទ។
ពីរថ្ងៃបន្ទាប់មកទៀត ទំព័រហ្វេសប៊ុកផ្លូវការរបស់មេដឹកនាំបក្សកាន់អំណាចរូបនេះ បានបង្ហោះព័ត៌មាននិយាយថា លោក ហ៊ុន សែន បានជួបពិភាក្សាជាមួយលោក អ៊ីម៉ាមួរ៉ា ម៉ាសាហ៊ីរ៉ូ (Imamura Masahiro) ប្រធានសម្ព័ន្ធមិត្តភាពសភាជប៉ុន-កម្ពុជា នៅថ្ងៃទី១០ ខែមករា។
រូបថត ៣សន្លឹកដែលបង្ហោះជាមួយព័ត៌មាននោះ បង្ហាញដៃទាំងពីររបស់លោក ហ៊ុន សែន ធ្វើចលនាផ្សេងៗនៅក្នុងកិច្ចពិភាក្សានោះ ដូចជា ម្រាមដៃខាងស្ដាំចង្អុលទៅកាន់នរណាម្នាក់ ឬអ្វីមួយ ដៃខាងឆ្វេងលើកឡើងលើស្មើនឹងមុខ និងដៃទាំងពីរកាន់ទូរស័ព្ទបង្ហាញទៅដៃគូសន្ទនារបស់លោក។
ខាងក្រោមនេះ គឺជាសារទាំងស្រុង និងរូបថត ៣សន្លឹកដែលបង្ហោះនៅលើទំព័រហ្វេសប៊ុកលោក ហ៊ុន សែន ថ្ងៃទី១១ ខែមករា ឆ្នាំ២០២៤។
នៅថ្ងៃព្រហស្បតិ៍នេះដែរ ទំព័រហ្វេសប៊ុកផ្លូវការរបស់លោក ក៏បានបង្ហោះរូបថតមេដឹកនាំបក្សកាន់អំណាចកម្ពុជារូបនេះជួបពិភាក្សាជាមួយអតីតរដ្ឋមន្ត្រីការបរទេសជប៉ុន លោក កូមួរ៉ា ម៉ាសាហ៊ិកូ (Komura Masahiko)កាលពីថ្ងៃពុធ ដោយបង្ហាញលោក ហ៊ុន សែន ធ្វើចលនាដៃរបស់លោកផ្សេងៗដូចជា ចាប់ដៃរលាកជាកិច្ចស្វាគមន៍ទៅវិញទៅមកជាមួយដៃគូសន្ទនា។
ខាងក្រោមនេះ គឺជាសារទាំងស្រុង និងរូបថតដែលបង្ហោះលើទំព័រហ្វេសប៊ុកផ្លូវការរបស់លោក ហ៊ុន សែន នៅថ្ងៃទី១១ ខែមករា ឆ្នាំ២០២៤។
នៅថ្ងៃព្រហស្បតិ៍ដដែល ទំព័រហ្វេសប៊ុករបស់លោក ហ៊ុន សែន ក៏បានបង្ហោះព័ត៌មាន និងរូបថតរបស់លោកជួបពិភាក្សាជាមួយលោក អាកាស៊ី យ៉ាស៊ូស៊ី (Akashi Yasushi) អតីតប្រមុខអាជ្ញាធរបណ្ដោះអាសន្នរបស់អង្គការសហប្រជាជាតិប្រចាំនៅកម្ពុជា ឬនៅហៅកាត់ថា អ៊ុនតាក់ (UNTAC)។
រូបថត ៧សន្លឹកដែលបង្ហោះភ្ជាប់នឹងព័ត៌មាននេះ បង្ហាញលោក ហ៊ុន សែន ធ្វើសកម្មភាពនានាទៅកាន់ដៃគូសន្ទនារបស់លោក ដូចជា ចាប់ដៃរលាក់ជាកិច្ចស្វាគមន៍ ដៃទាំងពីរឱបក្រសោបលោក អាកាស៊ី យ៉ាស៊ូស៊ី និងដៃឆ្វេងកាន់សៀវភៅមួយក្បាលបង្ហាញទៅកាន់ដៃគូសន្ទនាផងដែរ។
ជាពិសេសទៅទៀតនោះ ទំព័រហ្វេសប៊ុកលោក ហ៊ុន សែន ក៏បានបង្ហោះព័ត៌មាន និងរូបថតនិយាយពីជំនួបពិភាក្សារវាងលោកជាមួយនាយករដ្ឋមន្ត្រីជប៉ុន លោក គីស៊ីដា ហ៊្វុមីអូ (Kishida Fumio)នៅឯវិមានរដ្ឋាភិបាលជប៉ុន នៅល្ងាចថ្ងៃព្រហស្បតិ៍ម្សិលមិញនេះ។
រូបថតដែលបង្ហោះភ្ជាប់ជាមួយព័ត៌មាននេះ បង្ហាញលោក ហ៊ុន សែន ចាប់ដៃជាមួយលោក គីស៊ីដា ជាកិច្ចស្វាគមន៍ទៅកាន់គ្នាទៅវិញទៅមក។
នៅក្នុងសំណេរបង្ហោះនៅលើទំព័រហ្វេសប៊ុកដដែលនេះ លោក ហ៊ុន សែន បញ្ជាក់ថា “សុខភាព ហ៊ុន សែន បន្តរស់រហូតកម្ចាត់ចោលពួកជ្រុលនិយមអស់ពីកម្ពុជាទើប ហ៊ុន សែន លាចាកលោកនេះទៅ។ យើងសូមផ្ដល់យោបល់ឱ្យពួកអ្នកការពារសុខភាពខ្លួនប្រសើរជាងគិតពីសុខភាព ហ៊ុន សែន។ ក្រោយម៉ោង ២ល្ងាចថ្ងៃស្អែកទី១២ មករា ២០២៤ ខ្ញុំនឹងមានវត្តមាននៅកម្ពុជាវិញ សូមពួកជ្រុលនិយមកុំបារម្ភពីខ្ញុំធ្វើអីគិតខ្លួនឯងទៅល្អជាង”។
សូមមើលព័ត៌មានទាំងស្រុង និងរូបថតដែលបង្ហោះនៅលើទំព័រហ្វេសប៊ុករបស់លោក ហ៊ុន សែន នៅថ្ងៃទី១១ ខែមករា ឆ្នាំ២០២៤។
នៅរសៀលថ្ងៃនេះ លោក ហ៊ុន សែន បានធ្វើដំណើរវិលត្រឡប់មកដល់ប្រទេសកម្ពុជាវិញ ហើយវីដេអូមួយមានរយៈពេល ២៧វិនាទី បានបង្ហាញមេបក្សកាន់អំណាចរូបនេះធ្វើដំណើរដូចធម្មតាទៅកាន់រថយន្ត ក្រោយពីចាកចេញពីយន្តហោះ។
ខាងក្រោមនេះ គឺជាវីដេអូទាំងស្រុងនៃការវិលត្រឡប់មកដល់ប្រទេសកម្ពុជាវិញរបស់លោក ហ៊ុន សែន នៅរសៀលថ្ងៃទី១២ ខែមករា ឆ្នាំ២០២៤ ដែលវីដេអូនេះត្រូវបានចែកចាយនៅក្នុងបណ្ដាញសង្គមតេឡេក្រាមរបស់លោក។
ទោះជាយ៉ាងណា Fact Crescendo Cambodia ពុំមានលទ្ធភាពស្វែងរកការបញ្ជាក់តាមលក្ខណៈវេជ្ជសាស្ត្រអំពីស្ថានភាពសុខភាពរបស់លោក ហ៊ុន សែន នាពេលសព្វថ្ងៃនេះទេ។
សន្និដ្ឋានFact Crescendo Cambodia
បានរកឃើញថា ការអះអាងដូចរៀបរាប់ខាងលើនេះ មិនត្រឹមត្រូវនោះឡើយ។ ទំព័រហ្វេសប៊ុកផ្លូវការរបស់អតីតនាយករដ្ឋមន្ត្រី ហ៊ុន សែន បានបញ្ជាក់ថា មេបក្សកាន់អំណាចរូបនេះធ្វើដំណើរទៅជប៉ុនដើម្បីផ្លាស់ប្ដូរកែវភ្នែកសិប្បនិម្មិត មិនមែនទៅប្ដូរឈាមដូចការអះអាងលើបណ្ដាញសង្គមទេ។
Title:លោក ហ៊ុន សែន ទៅជប៉ុនដើម្បីប្ដូរកែវភ្នែកសិប្បនិម្មិត មិនមែនទៅលាងឈាមដូចការអះអាងទេ
Written By: Jay UdomResult: False
