ព័ត៌មានមិនត្រឹមត្រូវផ្សាយថា ក្រុមហ៊ុនអាមេរិកមួយលាបថ្នាំយន្តហោះរបស់ខ្លួនតាមពណ៌ទង់ខ្មែរកម្ពុជាក្រោម
បន្ទាប់ពីពលរដ្ឋខ្មែរក្រោមមួយចំនួន ត្រូវបានអាជ្ញាធរវៀតណាមចាប់ដាក់ឃុំដោយគ្រាន់តែពួកគេពាក់អាវអបអរទិវាអន្តរជាតិនារីនោះមក ព័ត៌មានមួយដែលផុសផុលនៅលើបណ្ដាញសង្គម បានលើកឡើងថា ក្រុមហ៊ុនអាកាសចរណ៍អាមេរិកមួយ បានយល់ព្រមលាបពណ៌យន្តហោះរបស់ពួកគេដូចទៅនឹងពណ៌ទង់តំណាងពលរដ្ឋខ្មែរកម្ពុជាក្រោម។ ព័ត៌មាននេះ ត្រូវបានចែករំលែកបន្តព្រោងព្រាតលើបណ្ដាញសង្គម។ ទោះជាយ៉ាងណា Fact Crescendo Cambodia បានរកឃើញថា ព័ត៌មាននេះមិនត្រឹមត្រូវនោះឡើយ។
ការអះអាងលើបណ្ដាញសង្គម
ការអះអាងដែលកំពុងផុលផុសនៅលើបណ្ដាញសង្គម បានលើកឡើងថា ក្រុមហ៊ុនអាកាសចរណ៍អាមេរិក Southwest Airlines យល់ព្រមលាបពណ៌យន្តហោះរបស់ខ្លួនតាមពណ៌នៃទង់តំណាងឱ្យជនជាតិខ្មែរកម្ពុជាស្ថិតនៅក្រោមការគ្រប់គ្រងរបស់វៀតណាម។
ការអះអាងនេះក៏បានបង្ហោះមកជាមួយនូវរូបថតយន្តហោះរបស់ក្រុមហ៊ុនអាកាសចរណ៍អាមេរិកមួយនេះផងដែរ ដែលលាបខៀវនៅផ្នែកខាងមុខ និងពណ៌លឿង និងក្រហមនៅផ្នែកខាងកន្ទុយរបស់យន្តហោះទាំងនោះ ដែលពណ៌ទាំងបីនេះដូចទៅនឹងពណ៌នៃទង់តំណាងពលរដ្ឋខ្មែរកម្ពុជាក្រោមផងដែរ។
ការអះអាងនេះ ត្រូវបានចែករំលែកបន្តរហូតដល់ទៅរាប់ពាន់ និងមានអ្នកប្រើប្រាស់ហ្វេសប៊ុកនិយាយភាសាខ្មែរយ៉ាងច្រើន បានបញ្ចេញប្រតិកម្មចម្រុះបែប និងមតិយោបល់ជាច្រើនទៅនឹងព័ត៌មាននេះ។
ខាងក្រោមនេះ គឺជារូបភាពផ្ដាមចេញពីព័ត៌មានត្រូវបានផ្សព្វផ្សាយនៅលើបណ្ដាញសង្គមហ្វេសប៊ុកកាលពីថ្ងៃទី១៤ ខែមីនា ឆ្នាំ២០២៤ ដែលសរសេរថា “ខ្មែរកម្ពុជាក្រោមអាចធ្វើបាន! កម្ពុជាក្រោមបានស្នើសុំឱ្យក្រុមហ៊ុនយន្តហោះដឹកអ្នកដំណើរអាមេរិកលាបពណ៌ទង់ខ្មែរកម្ពុជា ឥឡូវគេយល់ព្រមតាមសំណើហើយ”។
ព័ត៌មានដូចគ្នានេះ ក៏ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកមួយទៀតដែរ ហើយក៏ទទួលបានប្រតិកម្ម និងមតិយោបល់ចម្រុះបែបពីអ្នកប្រើប្រាស់ហ្វេសប៊ុកដូចគ្នា។
ខាងក្រោមនេះ គឺជារូបភាពផ្ដាមចេញពីព័ត៌មានផ្សព្វផ្សាយលើបណ្ដាញសង្គមហ្វេសប៊ុកកាលពីថ្ងៃទី១៤ ខែមីនា ឆ្នាំ២០២៤ ដែលបានរក្សាសំណេរដូចគ្នាទាំងស្រុង។
ខាងក្រោមនេះ គឺជារូបភាពផ្ដាមចេញពីការអះអាងដូចគ្នានេះដែលត្រូវបានបង្ហោះនៅលើបណ្ដាញសង្គមហ្វេសប៊ុកកាលពីព្រឹកថ្ងៃទី១៧ ខែមីនា ឆ្នាំ២០២៤នេះ ហើយទទួលបានការចែករំលែកបន្តដល់ទៅជាង ៧០០ដង។
ព័ត៌មាននេះ ត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់បណ្ដាញសង្គមដទៃទៀតដែរនៅក្នុងរយៈពេលប៉ុន្មានថ្ងៃមកនេះ។ គេអាចមើលព័ត៌មានដូចគ្នានេះតាមរយៈតំណភ្ជាប់នៅទីនេះ ១ (archived), ២ (archived), ៣ (archived), ៤ (archived)។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈការដំណើរការ Google Reverse Image Search និងការចូលពិនិត្យមើលប្រវត្តិរបស់ក្រុមហ៊ុនអាកាសចរណ៍អាមេរិកមួយនេះ ដែលនាំឱ្យយើងរកឃើញការពិតដូចខាងក្រោមនេះ។
ដោយបានចូលទៅកាន់វេបសាយរបស់ក្រុមហ៊ុន Southwest Airlines ដើម្បីពិនិត្យមើលប្រវត្តិក្រុមហ៊ុនអាកាសចរណ៍អាមេរិកមួយនេះ យើងបានរកឃើញនូវប្រវត្តិរបស់ក្រុមហ៊ុន និងការវិវត្តជាបន្តបន្ទាប់របស់ក្រុមហ៊ុនមួយនេះចាប់តាំងពីចាប់កំណើតនៅក្នុងឆ្នាំ១៩៦៧។
ក្នុងអត្ថបទមួយអំពីរបត់នៃការវិវត្តរបស់ខ្លួនចំខួប ៥០ឆ្នាំរបស់ក្រុមហ៊ុនកាលពីឆ្នាំ២០១៤កន្លងមកនោះ ក្រុមហ៊ុនអាកាសចរណ៍ Southwest Airlines បានកែប្រែពណ៌របស់ខ្លួននៅលើខ្លួនយន្តហោះរបស់ខ្លួនដោយបានជ្រើសរើសពណ៌ខៀវ ពណ៌ទឹកប្រាក់ ពណ៌លឿង និងពណ៌ក្រហម។
ក្រុមហ៊ុនអាកាសចរណ៍មួយនេះ បានពន្យល់ពីអត្ថន័យនៃពណ៌នីមួយៗដោយថា ពណ៌ខៀវតំណាងឱ្យការប្ដេជ្ញារបស់ក្រុមហ៊ុនចំពោះស្មារតីរុករក និងដំណើរលូតលាស់ទៅរកកម្រិតខ្ពស់ថ្មីមួយទៀត។ ចំពោះពណ៌ប្រាក់វិញ ក្រុមហ៊ុនពន្យល់ថា វាជាពណ៌តំណាងនូវប្រតិបត្តិការអាជីវកម្មរបស់ក្រុមហ៊ុន និងអតិថិជនដ៏យូរអង្វែង។
សម្រាប់ពណ៌ក្រហម ក្រុមហ៊ុនបានពន្យល់បន្តថា វាតំណាងឱ្យស្មារតីអ្នកប្រយុទ្ធរបស់ក្រុមហ៊ុន និងការផ្ដោតសំខាន់ទៅលើផ្ដល់សេវាកម្មអតិថិជិន។ ចំពោះពណ៌លឿងភ្លឺច្បាស់ដូចពន្លឺថ្ងៃរះនោះ ក្រុមហ៊ុនបញ្ជាក់ថា វាមានន័យស្មើនឹងការចាប់ផ្ដើមជំពូកថ្មីមួយនៅក្នុងប្រវត្តិសាស្ត្ររបស់ក្រុមហ៊ុននេះ។
សូមមើលសេចក្ដីពន្យល់អំពីអត្ថន័យនៃពណ៌នីមួយៗរបស់ក្រុមហ៊ុន Southwest នៅក្នុងអត្ថបទទាំងស្រុងខាងក្រោមនេះ ដែលត្រូវបានបង្ហោះនៅលើវេបសាយផ្លូវការរបស់ក្រុមហ៊ុនអាកាសចរណ៍មួយនេះចំខួប ៥០ឆ្នាំរបស់ក្រុមហ៊ុនកាលពីឆ្នាំ២០១៤កន្លងមក។
Southwest 50 Years | Archived Link
ក្រុមហ៊ុនអាកាសចរណ៍ Southwest Airlines ត្រូវបានបង្កើតឡើង និងចាប់ផ្ដើមធ្វើប្រតិបត្តិការហោះហើរនៅក្នុងឆ្នាំ១៩៦៧ ឬក៏កាលពី ៥៧ឆ្នាំមុន ហើយយន្តហោះដំបូងៗដែលដាក់ឱ្យប្រតិបត្តិការហោះហើរដោយក្រុមហ៊ុននេះ ត្រូវបានផាត់ពណ៌ខុសពីពណ៌ដែលក្រុមហ៊ុនប្រើប្រាស់សព្វថ្ងៃនេះ។
ខាងក្រោមនេះ គឺជាយន្តហោះមួយគ្រឿងរបស់ក្រុមហ៊ុនអាកាសចរណ៍ Southwest Airlines ដែលផាត់ពណ៌ទៅតាមពណ៌ដើមដំបូងនៃយន្តហោះរបស់ក្រុមហ៊ុននេះដែលធ្វើប្រតិបត្តិការហោះហើរនៅចន្លោះទសវត្សរ៍ ១៩៧០ រហូតដល់ ១៩៨០។
Southwest Airlines’ Instagram Post
ក្រុមហ៊ុនអាកាសចរណ៍ Southwest Airlines បានពន្យល់ថា ការសម្រេចផ្លាស់ប្ដូរពណ៌នៅលើយន្តហោះរបស់ខ្លួន គឺដើម្បីធ្វើឱ្យមានពណ៌រស់រវើក និងលេចធ្លោពីគេក្នុងនាមជាក្រុមហ៊ុនដឹកជញ្ជូនអ្នកដំណើរក្នុងស្រុកធំបំផុតនៅសហរដ្ឋអាមេរិក។ សូមមើលសេចក្ដីពន្យល់របស់ក្រុមហ៊ុននៅទីនេះ។
ក្នុងអត្ថបទនោះ ក្រុមហ៊ុន Southwest Airlines គ្មាននិយាយដល់ទាល់តែសោះអំពីព័ត៌មានពាក់ព័ន្ធទៅនឹងទង់ជាតិខ្មែរកម្ពុជាក្រោម ឬក៏ពលរដ្ឋខ្មែរកម្ពុជាក្រោម។
ខាងក្រោមនេះ គឺជារូបថតយន្តហោះមួយគ្រឿងរបស់ក្រុមហ៊ុនអាកាសចរណ៍ Southwest Airlines ដែលត្រូវបានផាត់ពណ៌ខៀវ ឆ្នូតពណ៌ប្រាក់ ពណ៌លឿងដូចថ្ងៃរះ និងពណ៌ក្រហម។
Southwest Airlines’ Instagram Post
ក្រៅពីពណ៌ដូចដែលត្រូវបានរៀបរាប់ខាងលើនេះ យន្តហោះមួយចំនួនទៀតរបស់ក្រុមហ៊ុនអាកាសចរណ៍ Southwest Airlines ក៏ត្រូវបានលាបពណ៌ទៅរដូវកាលពិសេសណាមួយ ឬក៏ពណ៌ផ្សេងទៀតដែលឆ្លុះបញ្ចាំងនូវស្មារតីអ្វីមួយ ឬតំបន់ណាមួយនៃសហរដ្ឋអាមេរិក។
ប៉ុន្តែ ក្រុមហ៊ុននេះនៅរក្សាពណ៌ជាអត្តសញ្ញាណរបស់ខ្លួននៅផ្នែកកន្ទុយនៃយន្តហោះ បើទោះបីជាផ្នែកក្បាល និងដងខ្លួននៃយន្តហោះមួយចំនួន ត្រូវបានលាបពណ៌ផ្សេងក៏ដោយ។
ខាងក្រោមនេះ គឺជារូបថតយន្តហោះមួយគ្រឿងរបស់ក្រុមហ៊ុន Southwest Airlines ដែលលាបពណ៌ទង់ជាតិសហរដ្ឋអាមេរិកចាប់ពីផ្នែកខាងមុខរហូតដល់ពោះខាងក្រោមរបស់យន្តហោះនេះ ដើម្បីអបអរទិវាបុណ្យឯករាជ្យជាតិរបស់សហរដ្ឋអាមេរិកកាលពីខែកក្កដាឆ្នាំមុន។
Southwest Airlines’ Facebook Post
សន្និដ្ឋាន
Fact Crescendo Cambodia បានរកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ក្រុមហ៊ុនអាកាសចរណ៍អាមេរិក Southwest Airlines បានផ្លាស់ប្ដូរពណ៌នៅលើយន្តហោះរបស់ខ្លាំងតាំងពីឆ្នាំ២០១៤ ដែលវាមិនពាក់ព័ន្ធអ្វីនឹងពណ៌ទង់តំណាងក្រុមខ្មែរកម្ពុជាក្រោមនោះឡើយ។
Title:ព័ត៌មានមិនត្រឹមត្រូវផ្សាយថា ក្រុមហ៊ុនអាមេរិកមួយលាបថ្នាំយន្តហោះរបស់ខ្លួនតាមពណ៌ទង់ខ្មែរក្រោម
Written By: Jay UdomResult: False