តើនេះជាទិដ្ឋភាពមនុស្សឈរតម្រង់ជួរដើម្បីទិញម៉ាស៊ីនត្រជាក់ខ្នាតតូចមែនដែរឬទេ?

រូបថតចំនួន២សន្លឹក ក្នុងចំណោម៣សន្លឹក បង្ហាញឱ្យឃើញមនុស្សឈរតម្រង់ជួរ នៅក្នុងផ្សារទំនើបមួយកន្លែង និងមនុស្សដេកសន្លប់ជាច្រើន ត្រូវបានបង្ហោះដោយទំព័រហ្វេសប៊ុកមួយ។ ការបង្ហោះនេះ ត្រូវបានភ្ជាប់អះអាងថា បានកើតឡើងនៅផ្សារទំនើបអ៊ីអនម៉ល ដើម្បីទិញម៉ាស៊ីនត្រជាក់ខ្នាតតូច។

ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា ការអះអាងដែលទំព័រហ្វេសប៊ុកបង្ហោះនៅលើបណ្តាញសង្គមហ្វេសប៊ុកនោះ គឺជាមិនត្រឹមត្រូវនោះឡើយ។

ការអះអាងលើបណ្តាញសង្គម

កាលពីថ្ងៃទី២២ ខែវិច្ឆិកា ឆ្នាំ២០២២ ទំព័រហ្វេសប៊ុកមួយដែលមានឈ្មោះថា «China Nolove» បានបង្ហោះរូបថតចំនួន ៣សន្លឹក ដែលក្នុងនោះ ២សន្លឹកបានបង្ហាញទិដ្ឋភាពមនុស្សកកកុញ តម្រង់ជួរនៅក្នុងផ្សារទំនើប និងទិដ្ឋភាពមនុស្សជាច្រើនបានដួលសន្លប់។ រូបថតទាំងឡាយនេះ ត្រូវបានភ្ជាប់ទៅនឹងសំណេរអះអាងថា នោះគឺជាទិដ្ឋភាព និងហេតុការណ៍ដែលបានកើតឡើងនៅក្នុងផ្សារទំនើបអ៊ីអនម៉ល ក្នុងរាជធានីភ្នំពេញ។

ទំព័រហ្វេសប៊ុកដដែលនេះ ក៏បានបន្ថែមផងដែរថា មូលហេតុគឺបណ្ដាលមកពីការតម្រង់ជួរជាច្រើនម៉ោង ដើម្បីទិញម៉ាស៊ីនត្រជាក់ខ្នាតតូច។ ការអះអាងមួយនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។

ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដែលបានសរសេររៀបរាប់ថា «មនុស្សជាច្រើនបានដួលសន្លប់ដោយសារការតម្រង់ជួរគ្នា ដើម្បីទិញម៉ាស៊ីនត្រជាក់ខ្នាតតូចរបស់ជប៉ុននៅ AEON Mall កាលពីម្សិលមិញនេះ»។

Facebook Post | Archived Link

ការត្រួតពិនិត្យការពិត

Fact Crescendo Cambodia ចាប់ផ្ដើមត្រួតពិនិត្យទៅលើរូបថត និងការអះអាងខាងលើនេះតាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។

រូបថតដែលបង្ហាញឱ្យឃើញមនុស្សច្រើនកុះករនោះ ត្រូវបានរកឃើញ និងបង្ហោះនៅលើទំព័រហ្វេសប៊ុកផ្លូវការរបស់ផ្សារទំនើបអ៊ីអន Tan Phu Celadon ក្នុងប្រទេសវៀតណាម ដែលបានផ្សព្វផ្សាយកាលពីថ្ងៃទី២២ ខែសីហា ឆ្នាំ២០១៩កន្លងទៅ។

សារបង្ហោះនេះ បានបញ្ជាក់ថា ទិដ្ឋភាពនេះ គឺជាទិដ្ឋភាពមនុស្សឈរតម្រង់ជួរក្នុងអំឡុងពេលចាប់ផ្តើមបើកដំណើរការជាផ្លូវការរបស់ហាងលក់សម្លៀកបំពាក់ H&M។

ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកខាងលើ ដែលបានសរសេររៀបរាប់ជាភាសាវៀតណាម ឬប្រែសម្រួលជាភាសាខ្មែរ ដោយមានន័យថា «ទិដ្ឋភាពទូទៅនៃការបើកសម្ពោធផ្លូវការរបស់ហាងសម្លៀកបំពាក់ H&M»។

Facebook Post | Archived Link

ខាងក្រោមនេះ គឺជារូបភាពមួយទៀត ផ្ដាមចេញពីទំព័រហ្វេសប៊ុករបស់ H&M ដែលបានបង្ហាញទិដ្ឋភាពមនុស្សជាច្រើននាក់ បានឈរតម្រង់ជួរគ្នា ក្នុងថ្ងៃបើកសម្ពោធហាងសម្លៀកបំពាក់ H&M នៅក្នុងបរិវេណផ្សារទំនើបអ៊ីអន Tan Phu Celadon ក្នុងប្រទេសវៀតណាម ដែលមិនបានជាប់ពាក់ព័ន្ធទៅនឹងការដួលសន្លប់ និងការទិញម៉ាស៊ីនត្រជាក់ខ្នាតតូចនោះឡើយ។

Facebook Post | Archived Link

ករណីស្រដៀងគ្នាខាងលើនេះ ក៏ត្រូវបានផ្ទៀងផ្ទាត់ និងត្រួតពិនិត្យដោយក្រុមការងារ Fact Crescendo Cambodia ផងដែរកាលពីខែកញ្ញា ឆ្នាំ២០២២កន្លងទៅ។ សូមមើលខ្លឹមសារអត្ថបទលម្អិត «រូបថតបង្ហាញទិដ្ឋភាពមនុស្សកកកុញនេះ មិនមែនស្ថិតនៅកម្ពុជានោះឡើយ» និង «រូបថតប៉ុន្មានសន្លឹកនេះមិនមែនជាស្ថានភាពមនុស្សម្នាកកកុញនៅផ្សារទំនើបអ៊ីអនភ្នំពេញទេ»។

ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖

Facebook Twitter Telegram Google News TikTok

សន្និដ្ឋាន

Fact Crescendo Cambodia រកឃើញថារូបថត និងការលើកឡើងដោយទំព័រហ្វេសប៊ុកខាងលើនោះ គឺពិតជាមិនត្រឹមត្រូវនោះឡើយ។ ការពិតរូបថតបង្ហាញទិដ្ឋភាពមនុស្សឈរតម្រង់ជួរនោះ គឺសិ្ថតនៅផ្សារទំនើបអ៊ីអន Tan Phu Celadon ក្នុងប្រទេសវៀតណាម អំឡុងពេលនៃការចាប់ផ្តើមបើកដំណើរការហាងលក់សម្លៀកបំពាក់ H&M។