តើនេះគឺជាទិដ្ឋភាពតាំងបង្ហាញបេះដូងក្រដាសនៅប្រាសាទអង្គរវត្តមែនដែរឬទេ?

បន្ទាប់ពីបេះដូងក្រដាសច្រើនបំផុត ត្រូវបានដាក់បង្ហាញនៅប្រាសាទអង្គរវត្តដែលបំបែកកំណត់ត្រាពិភពលោកកាលពីថ្ងៃអង្គារកន្លងមកនេះ រូបថតដែលបង្ហាញប្រាសាទអង្គរវត្តជាមួយនឹងសួនបេះដូងក្រដាសចម្រុះពណ៌ ត្រូវបានបង្ហោះព្រោងព្រាតនៅលើបណ្ដាញសង្គម។ ការបង្ហោះនេះ ត្រូវបានចែកចាយ និងបញ្ចេញមតិជាច្រើនយ៉ាងផុសផុលពីសំណាក់អ្នកប្រើប្រាស់បណ្ដាញសង្គមនាពេលថ្មីៗនេះ។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា រូបថតភ្ជាប់ដោយសំណេរខាងលើ គឺមិនត្រឹមត្រូវនោះឡើយ។

ការអះអាងលើបណ្តាញសង្គម

កាលពីថ្ងៃទី១១ ខែមេសា ឆ្នាំ២០២៣កន្លងទៅថ្មីៗនេះ ទំព័រហ្វេសប៊ុកមួយ ដែលមានឈ្មោះថា «Cam News Center» បានបង្ហោះរូបថតចំនួន ៦សន្លឹក បង្ហាញទិដ្ឋភាពប្រាសាទអង្គរវត្ត (ថតពីលើផ្ទៃអាកាស) ជាមួយនឹងសួនបេះដូងក្រដាស ចម្រុះពណ៌ជាច្រើន។ ការបង្ហោះនេះ បានកើតឡើងក្រោយពីកម្ពុជាបានបំបែកកំណត់ត្រាឯតទគ្គកម្មពិភពលោក “បេះដូងច្រើនជាងគេលើពិភពលោក” នៅបរិវេណប្រាសាទអង្គរវត្ត ក្នុងខេត្តសៀមរាប។

រូបថតខាងលើនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។

ខាងក្រោមនេះ គឺជារូបភាពផ្ដាមចេញពីប៉ុស្ដិ៍របស់ទំព័រហ្វេសប៊ុកខាងលើ ដែលបានសរសេរថា «សួនបេះដូងបំបែកកំណត់ត្រាពិភពលោក #ខ្មែរធ្វើបាន 🇰🇭»។

Facebook Post | Archived Link

ការត្រួតពិនិត្យការពិត

Fact Crescendo Cambodia ចាប់ផ្ដើមត្រួតពិនិត្យទៅលើរូបភាពផ្ដាម តាមរយៈ Google Reverse Image Search និងប្រភពព័ត៌មាននានា ដែលនាំឱ្យយើងរកឃើញការពិតដូចខាងក្រោមនេះ។

ទំព័រហ្វេសប៊ុកផ្លូវការរបស់លោកនាយករដ្ឋមន្ដ្រី ហ៊ុន សែន បង្ហោះកាលពីថ្ងៃទី១១ ខែមេសា ឆ្នាំ២០២៣កន្លងទៅនេះ បានអបអរសាទរដែលកម្ពុជា បានបំបែកកំណត់ត្រាឯតទគ្គកម្មពិភពលោក “បេះដូងច្រើនជាងគេលើពិភពលោក” ជាផ្លូវការពីស្ថាប័នកំណត់ត្រាពិភពលោកហ្គីណេស (Guinness World Record) ដែលមានចំនួនប្រមាណជាង ៣លាន៩សែន បេះដូង។

ខាងក្រោមនេះ គឺជាទិដ្ឋភាពថតពីលើ ដែលបានបង្ហាញទម្រង់ និងសណ្ឋានជារូប «បេះដូង» និងពាក្យជាភាសាខ្មែរថា «ខ្មែរ»។

Facebook Post | Archived Link

ទិដ្ឋភាពបេះដូងក្រដាសទាំងអស់ ដែលប្រមូលពីបណ្ដារាជធានី ខេត្តនានា មកប្រាសាទអង្គរវត្ត និងរៀបចំជាសួន «បេះដូង» និងពាក្យថា «ខ្មែរ» ក៏ត្រូវបានផ្សព្វផ្សាយ និងបង្ហោះនៅលើគេហទំព័រសារព័ត៌មាន Khmer Times ផងដែរ កាលពីថ្ងៃទី១២ ខែមេសា ឆ្នាំ២០២៣កន្លងទៅ ដោយដាក់បង្ហាញនៅក្នុងព្រឹត្តិការណ៍អង្គរសង្រ្កាន្ត ដើម្បីបង្ហាញពីភាពជាខ្មែរ ក្តីស្រឡាញ់ និងការលើកតម្កើង វប្បធម៌ អរិយធម៌របស់ខ្មែរ។

ខាងក្រោមនេះ គឺជាទិដ្ឋភាពថតពីលើផ្ទៃអាកាស បង្ហាញបេះដូងក្រដាសរាប់លាន ដែលត្រូវបានរៀបចំជាសួន នៅបរិវេណប្រាសាទអង្គរវត្ត។

Khmer Times Link | Archived Link

ការបំបែកកំណត់ត្រាឯតទគ្គកម្មពិភពលោក “បេះដូងច្រើនជាងគេលើពិភពលោក” នៅប្រាសាទអង្គរវត្ត របស់កម្ពុជា នាពេលថ្មីៗនេះ ក៏ត្រូវបានផ្សព្វផ្សាយជាសាធារណៈនៅលើគេហទំព័ររបស់ Guinness World Records ផងដែរ។

Guinness World Records Link | Archived Link

ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖

Facebook Twitter Telegram Google News TikTok

សន្និដ្ឋាន

Fact Crescendo Cambodia បានរកឃើញថារូបថតបង្ហោះដោយទំព័រហ្វេសប៊ុកខាងលើ គឺមិនត្រឹមត្រូវនោះឡើយ។ ការពិត បេះដូងក្រដាសទាំងអស់ ដែលត្រូវបានប្រមូលពីបណ្ដារាជធានី ខេត្តនានា មកតាំងបង្ហាញនៅបរិវេណប្រាសាទអង្គរវត្ត ក្នុងខេត្តសៀមរាបនោះ បានរៀបចំជាសួនដែលមានទម្រង់ «បេះដូង» និងពាក្យថា «ខ្មែរ»។