បន្ទាប់ពីកម្ពុជាបានប្រកាសប្រគល់ដីទំហំ ៤០ហិកតានៅក្នុងខេត្តកំពង់ឆ្នាំងដល់ជនអន្តោប្រវេសន៍វៀតណាមរួចមក ការអះអាងជាច្រើន ត្រូវបានបង្ហោះនៅលើបណ្ដាញសង្គម។ ក្នុងនោះ រូបភាពផ្គុំមួយសន្លឹក ត្រូវបានគេបង្ហោះនៅលើបណ្ដាញសង្គមជាមួយសំណេរថា «ផ្ទះយួនស្អាតៗ»។ រូបភាពមួយផ្ទាំងនេះ ត្រូវបានចែករំលែកបន្តរាប់ពាន់ដង និងទទួលបានការបញ្ចេញមតិយ៉ាងច្រើនពីសំណាក់អ្នកប្រើប្រាស់បណ្ដាញសង្គម។ ទោះជាយ៉ាងណា ការត្រួតពិនិត្យរបស់ Fact Crescendo Cambodia រកឃើញថា ការអះអាងទៅលើរូបថតមួយសន្លឹកនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
រូបភាពមួយផ្ទាំងដែលកើតចេញពីការផ្គុំចូលគ្នានៃរូបថត២សន្លឹក ត្រូវបានបង្ហោះនៅលើបណ្ដាញសង្គមហ្វេសប៊ុកកាលពីសប្ដាហ៍មុន។ រូបភាពមួយផ្ទាំងនេះ ត្រូវបានផ្គុំទៅដោយរូបថតមួយដែលបង្ហាញឱ្យឃើញផ្ទះដែលត្រូវបានសាងសង់ឡើងពីថ្ម និងរូបថតមួយទៀត ដែលបង្ហាញឱ្យសំណល់បាក់ផ្ទះបាក់បែករាបនៅលើដី។
រូបភាពមួយផ្ទាំងនេះ បានភ្ជាប់មកជាមួយសំណេរថា «ផ្ទះយួនស្អាតៗ» ដែលចង់សំដៅដល់ផ្ទះថ្មដែលត្រូវបានរាជរដ្ឋាភិបាលកម្ពុជាសាងសង់សម្រាប់ជនជាតិវៀតណាមដែលត្រូវបានជម្លៀសឱ្យចាកចេញពីផ្ទៃបឹងទន្លេសាប និងសំណេរមួយទៀតថា «ផ្ទះខ្មែរក៏អស់ស្អាតៗដែរ»។
រូបភាពមួយផ្ទាំងនេះ ទទួលបានការចែករំលែកបន្តដល់ទៅរាប់ពាន់ដង រួមជាមួយការបញ្ចេញមតិយ៉ាងច្រើន និងប្រតិកម្មចម្រុះបែបផងដែរ បន្ទាប់ពីវាត្រូវបានបង្ហោះនៅលើបណ្ដាញសង្គមបែបនេះ។
ខាងក្រោមនេះ គឺជារូបភាពផ្ដាមចេញពីការបង្ហោះនៅលើបណ្ដាញសង្គមដោយទំព័រហ្វេសប៊ុក Politically of Cambodia កាលពីថ្ងៃទី១១ ខែតុលា ដោយមានសំណេរលើរូបថតផងដែរ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើរូបភាពខាងលើនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតសំណង់ផ្ទះដូចៗគ្នានេះ ត្រូវបានរកឃើញចុះផ្សាយជាមួយនឹងសេចក្ដីរាយការណ៍មួយរបស់សារព័ត៌មាន Cambodia Property Report កាលពីខែវិច្ឆិកា ឆ្នាំ២០១៩កន្លងមក ដោយនិយាយថា ផ្ទះនេះ ត្រូវបានសាងសង់សម្រាប់ផ្ដល់ឱ្យយុទ្ធជនពិការ គ្រួសារយោធាពលី ពលរដ្ឋក្រីក្រគ្មានដីធ្លីជាកម្មសិទ្ធិ និងអតីតយោធិននៅតាមបណ្ដាខេត្តនានាទូទាំងប្រទេសកម្ពុជា។
Cambodia Property Report | Archived Link
រូបថតដដែលនេះ ក៏ត្រូវបានរកឃើញចុះផ្សាយផងដែរនៅលើគេហទំព័ររបស់ក្រសួងរៀបចំដែនដី នគរូបនីយកម្ម និងសំណង់ កាលពីខែធ្នូ ឆ្នាំ២០១៩កន្លងមកនេះ ដែលនិយាយអំពីការសាងសង់ផ្ទះសម្បែងជូនអតីតយោធិន គ្រួសារយោធាដែលបានពលី យុទ្ធជនពិការ និងពលរដ្ឋក្រីក្រ នៅក្នុងផែនការសង្គមកិច្ចរបស់រាជរដ្ឋាភិបាលនៅតាមខេត្តនានា។
សូមមើលព័ត៌មានលម្អិតអំពីដំណើរវិវត្តន៍នៃគម្រោងសម្បទានសង្គមកិច្ចរបស់កម្ពុជា ដែលផ្សព្វផ្សាយដោយក្រសួងរៀបចំដែនដី នគរូបនីយកម្ម និងសំណង់ តាមរយៈតំណភ្ជាប់នៅទីនេះ ឬតាមរយៈតំណភ្ជាប់ដែលត្រូវបានរក្សាទុក។
ខាងក្រោមនេះ គឺជារូបភាពផ្ដាមចេញពីការផ្សព្វផ្សាយដោយក្រសួងរៀបចំដែនដី នគរូបនីយកម្ម និងសំណង់ ដែលបង្ហាញឱ្យឃើញសំណង់ផ្ទះមានរចនាបថដូចៗគ្នា ដែលត្រូវបានសាងសង់នៅក្នុងគម្រោងសម្បទានសង្គមកិច្ចរបស់រាជរដ្ឋាភិបាលកម្ពុជា។
សន្និដ្ឋាន
Fact Crescendo Cambodia រកឃើញថា រូបភាពមួយផ្ទាំងដូចដែលត្រូវបានរៀបរាប់ខាងលើនេះ ត្រូវបានអះអាងដោយមិនត្រឹមថាជាផ្ទះដែលត្រូវបានសាងសង់សម្រាប់ជនអន្តោប្រវេសន៍វៀតណាម។ រូបថតសំណង់ផ្ទះមានរចនាបថដូចៗគ្នានេះ គឺជាផ្ទះសម្បែងដែលត្រូវបានរាជរដ្ឋាភិបាលកម្ពុជាសាងសង់សម្រាប់អតីតយោធិន យុទ្ធជនពិការ គ្រួសារយោធាពលីជីវិត ពលរដ្ឋក្រីក្រនៅតាមបណ្ដាខេត្តនានា នៅក្នុងគម្រោងសម្បទានសង្គមកិច្ច។
Title:សំណង់ផ្ទះផ្ដល់ឱ្យអតីតយោធិនកម្ពុជាត្រូវបានអះអាងថាជាផ្ទះសម្រាប់ជនជាតិវៀតណាម
Fact Check By: Jay UdomResult: False
