ជាច្រើនឆ្នាំមកហើយ បំណុលដែលកម្ពុជាជំពាក់បរទេស គឺជាប្រធានបទដ៏ក្ដៅគគុកមួយ ដែលត្រូវបានលើកយកមកជជែក ឬចោទសួរទៅកាន់រាជរដ្ឋាភិបាល។ បញ្ហាបំណុលនេះ ក៏ត្រូវបានលើកឡើងនៅលើបណ្ដាញសង្គមដែលអះអាងថា កម្ពុជាជាប់បំណុលបរទេសសរុបជាង ១៥ពាន់លានដុល្លារ។ ការអះអាងមួយនេះ ត្រូវបានចែករំលែកតៗគ្នា និងប្រតិកម្មចម្រុះផងដែរ។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្តាញសង្គម
ការអះអាងមួយនៅលើបណ្ដាញសង្គមកាលពីពាក់កណ្ដាលខែកក្កដាកន្លងមកនេះ បានលើកឡើងថា កម្ពុជាជាប់បំណុលបរទេសរហូតដល់ជាង ១៥,០០០លានដុល្លារ ឬជាង ១៥ពាន់លានដុល្លារអាមេរិក ក្នុងនោះបំណុលដែលកម្ពុជាជំពាក់ចិនមានរហូតដល់ ៤៨ភាគរយឯណោះ។
ការអះអាងបែបនេះនៅលើបណ្ដាញសង្គម ទទួលបានការចែករំលែកជាច្រើនដង និងមានការបញ្ចេញមតិចម្រុះបែបពីសំណាក់អ្នកប្រើប្រាស់បណ្ដាញសង្គមហ្វេសប៊ុកនិយាយភាសាខ្មែរផងដែរ។
ខាងក្រោមនេះ គឺជារូបភាពផ្ដាមចេញពីការអះអាងនៅលើបណ្ដាញសង្គមហ្វេសប៊ុកកាលពីថ្ងៃទី១៦ ខែកក្កដាកន្លងមកនេះ ដែលបានរៀបរាប់ថា «កម្ពុជាមានបំណុលសរុបជាង ១៥,០០០លានដុល្លារ។ (របាយការណ៍ក្រសួងសេដ្ឋកិច្ច) ក្នុងនោះជំពាក់ចិន ៤៨%។ អបអរសាទរ!»។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើការអះអាងខាងលើនេះតាមរយៈការផ្ទៀងផ្ទាត់ជាមួយនឹងសេចក្ដីរាយការណ៍ព័ត៌មានរបស់បណ្ដាសារព័ត៌មាននានា និងរបាយការណ៍ចេញដោយរាជរដ្ឋាភិបាលកម្ពុជា ដែលនាំឱ្យយើងរកឃើញការពិតដូចខាងក្រោមនេះ។
បំណុលដែលកម្ពុជាជំពាក់បរទេស ត្រូវបានចុះផ្សាយដោយសារព័ត៌មាននានានៅកម្ពុជា។ សារព័ត៌មានកម្ពុជាថ្មី បានផ្សាយនៅដើមខែសីហានេះថា កម្ពុជាជំពាក់បំណុលបរទេសសរុបចំនួន ៩.៨១ពាន់លានដុល្លារអាមេរិក ហើយថា តួលេខនេះស្ថិតនៅក្រោមអនុបាតគោល ឬកម្រិតហានិភ័យដែលកំណត់ដោយមូលនិធិរូបិយវត្ថុអន្តរជាតិ (IMF)។
Kampuchea Thmey | Archived Link
កាសែតភ្នំពេញ ប៉ុស្តិ៍ ក៏បានចុះផ្សាយព័ត៌មានអំពីបំណុលដែលកម្ពុជាជំពាក់បរទេសផងដែរ។ សារព័ត៌មានមួយចុះផ្សាយថា កម្ពុជាជំពាក់បំណុលបរទេសសរុប ៩.៨១ពាន់លានដុល្លារគិតត្រឹមដំណាច់ត្រីមាសទី១ក្នុងឆ្នាំនេះ។
Phnom Penh Post | Archived Link
សារព័ត៌មានទាំងនេះ បានចុះផ្សាយបែបនេះដោយផ្អែកតាមសម្ដីរបស់អ្នកនាំពាក្យក្រសួងសេដ្ឋកិច្ច និងហិរញ្ញវត្ថុ លោក មាស សុខសេនសាន ដែលបានបកស្រាយបញ្ហាបំណុលកម្ពុជាជំពាក់បរទេសនេះនៅក្នុងសន្និសីទសារព័ត៌មានមួយកាលពីថ្ងៃទី០២ ខែសីហា។
ព្រឹត្តិបត្រស្ថិតិបំណុលសាធារណៈកម្ពុជាដែលចេញផ្សាយដោយក្រសួងសេដ្ឋកិច្ច និងហិរញ្ញវត្ថុកាលពីដើមខែមិថុនាកន្លងមកនេះ បានបង្ហាញថា ត្រឹមដំណាច់ត្រីមាសទី១ ឆ្នាំ២០២២នេះ កម្ពុជាជំពាក់បំណុលសាធារណៈសរុបចំនួន ៩.៨១ពាន់លានដុល្លារអាមេរិក ដែលសុទ្ធសឹងជាបំណុលសាធារណៈក្រៅប្រទេស។
Ministry of Economy and Finance | Archived Link
ប៉ុន្តែ ព្រឹត្តិបត្របំណុលសាធារណៈកម្ពុជាចេញកាលពីខែកុម្ភៈកន្លងមកនេះ បង្ហាញថា កម្ពុជាបានខ្ចីលុយពីដៃគូអភិវឌ្ឍន៍នានាមានទំហំសរុបរហូតដល់ ១៥,៥៥ពាន់លានដុល្លារអាមេរិកនៅចន្លោះឆ្នាំ១៩៩៣រហូតដល់ឆ្នាំ២០២១កន្លងមកនេះ។
Ministry of Economy and Finance | Archived Link
លោក មាស សុខសេនសាន មិនបានឆ្លើយតបនឹង Fact Crescendo Cambodia ដែលស្នើឱ្យបកស្រាយពីតួលេខនៃទំហំកម្ចីខាងលើនេះឡើយ ប៉ុន្តែ លោកចង្អុលបង្ហាញទៅរបាយការណ៍បច្ចុប្បន្នភាពសេដ្ឋកិច្ចកម្ពុជា ដែលចេញដោយធនាគារពិភពលោកកាលពីខែមិថុនាកន្លងមកនេះ។
ក្នុងរបាយការណ៍ «Cambodia Economic Update – Weathering the Oil Price Shock : Special Focus – Post-Pandemic Supply Chain Disruptions : Strategies to Reduce Logistics Costs»បានបញ្ជាក់ថា កម្ពុជាជាប់ជំពាក់បំណុលសាធារណៈប្រមាណ ៣៥ភាគរយ ធៀបនឹងផលិតផលក្នុងស្រុកសរុប។
World Bank Report | Archived Link
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថាការបង្ហោះសំណេរខាងលើនេះ គឺធ្វើឲ្យមានការយល់ច្រឡំ។ ប្រទេសកម្ពុជា គិតត្រឹមត្រីមាសទី១ ឆ្នាំ២០២២នេះ ជាប់ជំពាក់បំណុលសាធារណៈសរុបប្រមាណ ៩.៨១ពាន់លានដុល្លារអាមេរិក ដែលស្មើនឹង ២៤ភាគរយ ធៀបនឹងផលិតផលក្នុងស្រុកសរុប។
Title:មកដល់ឆ្នាំនេះ តើកម្ពុជាជាប់បំណុលបរទេសសរុបចំនួនប៉ុន្មានហើយ?
Fact Check By: Kakada SimResult: Misleading
