តើនេះគឺជានាវាមុជទឹកដែលប្រទេសថៃទើបទិញមែនឬ?

បន្ទាប់ពីប្រទេសកម្ពុជា និងថៃមានគំនិតមិនស្របគ្នាជុំវិញកីឡាករគុនខ្មែរ ឬមួយថៃនោះមក រូបថតមួយសន្លឹកដែលបង្ហាញនាវាមុជទឹកមួយគ្រឿងនោះ ត្រូវបានគេបង្ហោះលើបណ្ដាញសង្គមជាមួយការអះអាងថា វាគឺជានាវាមុជទឹកដែលប្រទេសថៃទើបតែទិញមកបង្អួតខ្មែរ។ ការអះអាងនេះ ត្រូវបានចែករំលែកព្រោងព្រាតពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ។ ទោះជាយ៉ាងណា Fact Crescendo Cambodia រកឃើញថា រូបថតភ្ជាប់នឹងការអះអាងនេះ មិនត្រឹមត្រូវនោះឡើយ។

ការអះអាងលើបណ្តាញសង្គម

កាលពីថ្ងៃទី២៣ ខែមេសា ឆ្នាំ២០២៣ថ្មីៗនេះ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតសន្លឹកដែលបង្ហាញនាវាមុជទឹកមួយគ្រឿង និងបានលើកឡើងថា នោះគឺជានាវាមុជទឹក ដែលប្រទេសថៃ ទើបតែទិញមក ក្រោយពីខឹងប្រទេសកម្ពុជាអំពីរឿងកីឡាគុនខ្មែរ។

ការអះអាងបែបនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។

ខាងក្រោមនេះ គឺជារូបភាពផ្ដាមចេញពីប៉ុស្ដិ៍របស់អ្នកប្រើប្រាស់ហ្វេកប៊ុកខាងលើ ដែលបានសរសេររៀបរាប់ជាភាសាខ្មែរថា «តាំងពីខឹងខ្មែររឿងគុនខ្មែរមក សុទ្ធតែទិញនាវាមុជទឹក មកបង្អួត»។

ខាងក្រោមនេះ គឺជារូបភាពផ្ដាម ដែលបង្ហាញទិដ្ឋភាពនាវាមុជទឹកមួយគ្រឿង ដោយមានទង់ជាតិប្រទេសថៃភ្ជាប់ជាមួយ។

Facebook Post | Archived Link

ការត្រួតពិនិត្យការពិត

Fact Crescendo Cambodia ចាប់ផ្ដើមត្រួតពិនិត្យទៅលើរូបភាពផ្ដាម និងការអះអាងនេះ តាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។

រូបថតមួយសន្លឹក ដែលមានទម្រង់ និងសណ្ឋានដូចគ្នាទាំងស្រុង គឺត្រូវបានរកឃើញ និងផ្សព្វផ្សាយនៅលើគេហទំព័រសារព័ត៌មាន The Diplomat កាលពីថ្ងៃទី០៥ ខែវិច្ឆិកា ឆ្នាំ២០១៩កន្លងទៅ។

នៅក្នុងអត្ថបទសារព័ត៌មានខាងលើនេះ បានបញ្ជាក់ថា កងទ័ពជើងទឹកកូរ៉េខាងត្បូង ទទួលបាននាវាមុជទឹក Chang Bogo-class ពីក្រុមហ៊ុនសាង់សង់នាវាក្នុងស្រុកមួយ។

ខាងក្រោមនេះ គឺជារូបភាពផ្ដាមចេញពីគេហទំព័រខាងលើ ដែលពុំបានបញ្ជាក់ថា នាវាមុជទឹកនេះ គឺជានាវាមុជទឹក ដែលប្រទេសថៃ ទើបតែទិញនោះឡើយ។

The Diplomat Link | Archived Link

ដូចគ្នានេះ តាមរយៈគេហទំព័រ Bemil Chosun ចុះផ្សព្វផ្សាយកាលពីថ្ងៃទី០១ ខែវិច្ឆិកា ឆ្នាំ២០១៩កន្លងទៅផងដែរ ដោយបានសរសេរជាភាសាកូរ៉េ ឬប្រែសម្រួលជាភាសាខ្មែរតាមរយៈកម្មវិធីបកប្រែ Google Translate ថា «ទិដ្ឋភាពនាវាមុជទឹក Chang Bogo-class ដែលត្រូវបានប្រគល់ដោយ ក្រុមហ៊ុនសាងសង់នាវាកូរ៉េខាងត្បូង Daewoo Shipbuilding & Marine ទៅកាន់កងទ័ពជើងទឹកកូរ៉េខាងត្បូង»។

Bemil Chosun Link | Archived Link

ទិដ្ឋភាពរូបថតនាវាមុជទឹកខាងលើ ក៏ត្រូវបានផ្សព្វផ្សាយ នៅលើគេហទំព័ររបស់ក្រសួងការពារជាតិ របស់ប្រទេសកូរ៉េខាងត្បូងផងដែរ ដោយបានបញ្ជាក់ថា ទិដ្ឋភាពនោះ គឺជានាវាមុជទឹក Chang Bogo-class ដែលក្រុមហ៊ុនសាងសង់នាវាកូរ៉េខាងត្បូង Daewoo Shipbuilding & Marine បានប្រគល់ជូនកងទ័ពជើងទឹកកូរ៉េខាងត្បូង កាលពីថ្ងៃទី៣១ ខែតុលា ឆ្នាំ២០១៩កន្លងទៅ។

Ministry of National Defense Link | Archived Link

ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖

Facebook Twitter Telegram Google News TikTok

សន្និដ្ឋាន

Fact Crescendo Cambodia បានរកឃើញថារូបថតបង្ហោះភ្ជាប់ជាមួយនឹងការអះអាងខាងលើ គឺមិនត្រឹមត្រូវទេ។ ការពិត រូបថតនេះ គឺជានាវាមុជទឹកមួយគ្រឿង ដែលក្រុមហ៊ុនសាងសង់នាវាកូរ៉េខាងត្បូង Daewoo Shipbuilding & Marine បានប្រគល់ជូនកងទ័ពជើងទឹកកូរ៉េខាងត្បូង កាលពីថ្ងៃទី៣១ ខែតុលា ឆ្នាំ២០១៩កន្លងទៅ។