រូបថតលោក មីង អ៊ុងឡាំង ពាក់គ្រឿងឥស្សរិយយសយ៉ាងច្រើន ជារូបថតកាត់ត
ការតវ៉ាប្រឆាំង និងរិះគន់ទៅនឹងរដ្ឋាភិបាលយោធាមីយ៉ាន់ម៉ាដែលដឹកនាំដោយឧត្ដមសេនីយ៍ មីង អ៊ុងឡាំង ក្រោយទម្លាក់អ្នកស្រី អ៊ុងសាន ស៊ូជី កន្លងមកនោះ នៅតែត្រូវបានជជែក និងចែករំលែកនៅលើបណ្ដាញសង្គមពីសំណាក់អ្នកប្រើបណ្ដាញសង្គមនិយាយភាសាខ្មែរ។ ក្នុងចំណោមនោះ រូបថតមួយសន្លឹកបង្ហាញអំពីទិដ្ឋភាពរបស់លោក មីង អ៊ុងឡាំង ពាក់គ្រឿងឥស្សរិយយស ត្រូវបានបង្ហោះដោយអ្នកប្រើប្រាស់ហ្វេសប៊ុកម្នាក់។ រូបថតនេះ ត្រូវបានចែកចាយ និងប្រតិកម្មចម្រុះយ៉ាងផុសផុល។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា រូបថតបង្ហោះនៅលើបណ្តាញសង្គមហ្វេសប៊ុកនោះ គឺមិនត្រឹមត្រូវនោះឡើយ។
ការអះអាងលើបណ្តាញសង្គម
កាលពីថ្ងៃទី១៩ ខែកក្កដា ឆ្នាំ២០២២ថ្មីៗនេះ អ្នកប្រើប្រាស់ហ្វេសប៊ុកម្នាក់ បានចែករំលែកនូវរូបថតមួយសន្លឹក បង្ហាញទិដ្ឋភាពមេដឹកនាំយោធាមីយ៉ាន់ម៉ាលោក មីង អ៊ុងឡាំង ក្នុងឈុតសម្លៀកបំពាក់យោធា ដោយមានគ្រឿងឥស្សរិយយសជាច្រើន។ រូបថតនេះ ត្រូវបានភ្ជាប់ដោយការសរសេរថា ចង់ពាក់ផ្កាយមួយរយក៏បាន។ រូបថតភ្ជាប់ដោយសំណេរអះអាងមួយនេះត្រូវបានប្រតិកម្មចម្រុះពីសំណាក់ អ្នកប្រើប្រាស់ និងចែកចាយតៗគ្នាជាច្រើនដង នៅលើបណ្តាញសង្គមហ្វេសប៊ុកនិយាយភាសាខ្មែរ។
ខាងក្រោមនេះ គឺជារូបភាពផ្ដាមចេញពីប៉ុស្ដិ៍របស់អ្នកប្រើប្រាស់ខាងលើ បានសរសេររៀបរាប់ថា «ចង់ពាក់ផ្កាយ១រយក៏បាន»។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបថត និងការអះអាងខាងលើនេះ តាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតដែលបង្ហាញមេដឹកនាំយោធាភូមា លោក មីន អ៊ុងឡាំង ស្ថិតក្នុងលក្ខណៈធ្វើដំណើរនោះ ត្រូវបានរកឃើញនៅលើគេហទំព័រសារព័ត៌មាន Myanmar Times កាលពីជាង ៣ឆ្នាំមុន។ រូបថតមួយសន្លឹកនេះ បង្ហាញឱ្យឃើញថា មេដឹកនាំរដ្ឋប្រហាររូបនេះ ស្លៀកពាក់ឯកសណ្ឋានយោធាដោយមិនមានភ្ជាប់ជាមួយគ្រឿងឥស្សរិយយសដ៏ច្រើននោះឡើយ។
បើតាមសារព័ត៌មានដដែលនេះ រូបថតមួយសន្លឹកនេះបង្ហាញលោក មិន អ៊ុងឡាំង ចុះពិនិត្យមើលការខូចខាតនៅតាមបណ្ដោយផ្លូវ Yangon-Mandalay កាលពីខែមេសា ឆ្នាំ២០១៩កន្លងមក។
Myanmar Times News Report | Archived Link
ខាងក្រោមនេះ គឺជាការប្រៀបធៀបគ្នារវាងរូបថតដែលត្រូវបានកាត់ត និងរូបថតច្បាប់ដើមដែលត្រូវបានរកឃើញផ្សព្វផ្សាយនៅលើបណ្តាញសង្គម។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថា រូបថតដែលបានបង្ហោះដោយទំព័រហ្វេសប៊ុកខាងលើ គឺពិតជាមិនត្រឹមត្រូវទេ។ រូបថតមួយសន្លឹកនេះ ត្រូវបានកាត់តមុននឹងបង្ហោះនៅលើបណ្តាញសង្គម។ រូបថតច្បាប់ដើម បង្ហាញមេដឹកនាំរបបសឹកភូមា លោក មីន អ៊ុងឡាំង ស្លៀកពាក់ឯកសណ្ឋានយោធាដែលមិនមានតែគ្រឿងឥស្សរិយយសច្រើននោះឡើយ។
Title:រូបថតលោក មីង អ៊ុងឡាំង ពាក់គ្រឿងឥស្សរិយយសយ៉ាងច្រើន ជារូបថតកាត់ត
Fact Check By: Kakada SimResult: Altered
