រូបថតលោកនាយករដ្ឋមន្ត្រី ហ៊ុន សែន និងក្រុមគ្រួសារលោក ត្រូវបានកាត់តជារឿយៗ និងចែកចាយនៅលើបណ្ដាញសង្គម។ ក្នុងចំណោមនោះ មានរូបថតមួយសន្លឹក ដែលបង្ហាញលោក ហ៊ុន សែន និងភរិយារបស់លោកស្ថិតក្នុងឈុតពណ៌ខ្មៅសម័យខ្មែរក្រហម ត្រូវបានចែកចាយលើបណ្ដាញសង្គមកាលពីថ្ងៃចន្ទកន្លងមកនេះ។ រូបថតនោះ ត្រូវបានចែករំលែកបន្តជាច្រើនដង រួមទាំងមានការបញ្ចេញមតិផ្សេងៗ និងប្រតិកម្មចម្រុះបែបផងដែរ។ ទោះជាយ៉ាងណា បន្ទាប់ពីផ្ទៀងផ្ទាត់រួចហើយ យើងបានរកឃើញថា រូបថតនោះ ត្រូវបានកាត់ត។
ការអះអាងលើបណ្ដាញសង្គម
កាលពីថ្ងៃម្សិលមិញនេះ អ្នកប្រើប្រាស់ហ្វេសប៊ុកម្នាក់ឈ្មោះថា នារី ឦសាន បានចែករំលែករូបថតមួយសន្លឹកចូលទៅក្នុងក្រុមបណ្ដាញសង្គមមួយ ដែលរូបថតនោះបង្ហាញលោកនាយករដ្ឋមន្ត្រី ហ៊ុន សែន ស្ថិតក្នុងឯកសណ្ឋានពណ៌ខ្មៅនាសម័យខ្មែរក្រហម ហើយភរិយារបស់លោកក៏ស្ថិតក្នុងឈុតខ្មៅនាសម័យនោះផងដែរ ព្រមទាំងស្ពាយកាំភ្លើង AK-49 មួយដើមផងដែរ។
រូបថតនេះ ត្រូវបានអ្នកប្រើប្រាស់ហ្វេសប៊ុកចែករំលែកបន្តជាច្រើនដង ព្រមជាមួយការបញ្ចេញមតិយោបល់ផ្សេងៗ និងប្រតិកម្មផងដែរ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់អ្នកប្រើប្រាស់ហ្វេសប៊ុក ដែលសរសេររៀបរាប់ថា «ក្រុមខ្មែរក្រហមប៉ែកបូរព៌ា គឺជាក្រុមដែលយួនបង្កើតឡើងដើម្បីប្រល័យពូជសាសន៍ខ្មែរ ឈ្លានពានខ្មែរ បំផ្លាញខ្មែរ បំបែកបំបាក់ខ្មែរ និងស៊ីរូងផ្ទៃក្នុងខ្មែរគ្រប់រូបភាពគ្រប់ជំនាន់រហូតមក ឥឡូវក្រុមអាយ៉ង់យួននេះ កំពុងបណ្ដុះកូនចៅវាបន្តទៀត ក្នុងមហិច្ឆតាលេបត្របាក់កម្ពុជាអោយបានទាំងស្រុងក្នុងពេលឆាប់ៗនេះ»។
ការត្រួតពិនិត្យការពិត
Fact Crescendo Cambodia បានចាប់ផ្ដើមផ្ទៀងផ្ទាត់ទៅលើរូបថតមួយសន្លឹកនេះតាមរយៈការដំណើរការកម្មវិធីស្វែងរករូបថត Google Reverse Image ដែលនាំឱ្យយើងបានជួបរូបថតច្បាប់ដើម និងព័ត៌មានលម្អិតអំពីរូបថតទាំងពីរនេះផងដែរ។
មុននឹងស្វែងរករូបថតច្បាប់ដើម យើងបានបំបែករូបថតខាងលើនេះ ជាពីរផ្នែក ដែលមួយផ្នែកមានតែរូបថតលោក ហ៊ុន សែន ហើយមួយផ្នែកទៀតមានតែរូបថតភរិយារបស់លោក ដើម្បីស្វែងរកតាម Google Reverse Image។
ជាលទ្ធផល រូបថតលោក ហ៊ុន សែន ស្ថិតក្នុងឈុតខ្មៅ បង់កក្រមា និងដៃកាន់បារីមួយដើមនោះ ត្រូវបានរកឃើញនៅក្នុងវេបសាយ Panos Pictures ដែលបានបោះពុម្ពផ្សាយនូវសៀវភៅមួយក្បាលមានចំណងជើងថា «The Lost Executioner»។
The Lost Executioner | Archived Link
ខាងក្រោមនេះ គឺជាការប្រៀបធៀបរវាងរូបថតដែលត្រូវបានចែកចាយដោយអ្នកប្រើប្រាស់បណ្ដាញសង្គមហ្វេសប៊ុក និងរូបថតច្បាប់ដើមដែលត្រូវបានបោះពុម្ពផ្សាយនៅក្នុងសៀវភៅ «The Lost Executioner» របស់អ្នកថតរូបថត និងជាអ្នកនិពន្ធជនជាតិអៀរឡង់ កាលពីឆ្នាំ២០០៥។
ចំណែកឯរូបថតដែលបង្ហាញអ្នកស្រី ប៊ុន រ៉ានី ភរិយារបស់លោក ហ៊ុន សែន ស្ថិតក្នុងឈុតខ្មៅស្ពាយកាំភ្លើងនោះ ត្រូវបានរកឃើញនៅក្នុងគេហទំព័រ Getty Images ដែលផ្ដល់នូវព័ត៌មានលម្អិតអំពីរូបថតមួយសន្លឹកនេះផងដែរ។
ព័ត៌មានរូបថតនេះ រៀបរាប់ថា នារីស្ពាយកាំភ្លើង AK-49 ស្ថិតក្នុងឈុតទាហានរបស់ខ្មែរក្រហម ត្រូវបានខ្មែរក្រហមហៅថា «មិត្តនារី»។ រូបថតមួយសន្លឹកនេះ ត្រូវបានថតនៅក្នុងព្រៃភាគខាងលិចប្រទេសកម្ពុជា។ រូបថតនេះ ថតដោយលោក Alex Bowie កាលពីថ្ងៃទី១៥ ខែកុម្ភៈ ឆ្នាំ១៩៨១។
ខាងក្រោមនេះ គឺជាការប្រៀបធៀបរវាងរូបថតដែលត្រូវបានចែកចាយដោយអ្នកប្រើប្រាស់បណ្ដាញសង្គមហ្វេសប៊ុក និងរូបថតច្បាប់ដើមដែលត្រូវបានរកឃើញនៅក្នុងគេហទំព័រ Getty Images។
សន្និដ្ឋាន
Fact Crescendo Cambodia រកឃើញថា រូបថតដូចដែលបានរៀបរាប់ខាងលើនេះ ត្រូវបានកាត់ត។ រូបថតច្បាប់ដើម មិនបានបង្ហាញលោកនាយករដ្ឋមន្ត្រី ហ៊ុន សែន និងភរិយារបស់លោក ស្ថិតក្នុងសម្លៀកបំពាក់ឈុតខ្មៅនាសម័យខ្មែរក្រហមនោះឡើយ។ រូបថតច្បាប់ដើម បង្ហាញបុរសម្នាក់ស្ថិតក្នុងសម្លៀកបំពាក់ទាហានខ្មែរក្រហម និងទាហានខ្មែរក្រហមជាស្ត្រីកាន់កាំភ្លើង AK-49 មួយដើមកាលពីឆ្នាំ១៩៨៥។
Title:រូបថតលោក ហ៊ុន សែន និងភរិយា ត្រូវបានកាត់តឱ្យស្ថិតក្នុងឈុតពណ៌ខ្មៅរបស់ខ្មែរក្រហម
Fact Check By: Jay UdomResult: Altered
