ព័ត៌មានមិនពិតថា Chris Rock ឈ្នះក្ដី Will Smith ក្នុងសំណុំរឿងទះកំផ្លៀង
ហេតុការណ៍តារាកំប្លែងអាមេរិក លោក Chris Rock ត្រូវបានតារាសម្ដែងអាមេរិក លោក Will Smith ទះកំផ្លៀ់ងនៅលើឆាកនៃកម្មវិធី Academy Awards បានកន្លងផុតមកជាង ២ឆ្នាំហើយ។ ទោះជាបែបនេះក្ដី ថ្មីៗនេះ មានការផ្សព្វផ្សាយព័ត៌មាននៅលើបណ្ដាញសង្គមថា លោក Chris Rock បានឈ្នះក្ដីសម្រាប់ករណីនេះ ហើយទទួលបានសំណង ៤០លានដុល្លារពីលោក Will Smith។ ព័ត៌មាននេះ ត្រូវបានផ្សព្វផ្សាយផុសផុលនៅលើបណ្ដាញសង្គមនានា។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ព័ត៌មាននេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
ការអះអាងកំពុងតែផុលផុសនៅលើបណ្ដាញសង្គម បានលើកឡើងថា តារាកំប្លែងអាមេរិក លោក Chris Rock ឈ្នះក្ដីនៅក្នុងបណ្ដឹងប្រឆាំងនឹងតារាសម្ដែងអាមេរិក លោក Will Smith ដែលបានទះកំផ្លៀងទៅលើលោក Chris Rock នៅក្នុងកម្មវិធី Academy Award ឆ្នាំ២០២២។
ការអះអាងដដែលនេះ បានបន្តថា លោក Chris Rock ក៏ទទួលបានសំណងរហូតដល់ ៤០លានដុល្លារផងដែរពីលោក Will Smith ដែលនេះគឺជាតម្លៃថ្លៃបំផុតសម្រាប់ការទះកំផ្លៀងមួយនេះ។
ព័ត៌មានជាភាសាខ្មែរមួយនេះ ត្រូវបានចែករំលែកបន្តរហូតដល់ទៅ ២០០ដងពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ ហើយក៏មានការបញ្ចេញមតិយោបល់ជាច្រើនផងដែរ ដោយជឿថា ព័ត៌មាននេះជាការពិត។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមកាលពីថ្ងៃទី០៨ ខែតុលា ឆ្នាំ២០២៤ ដែលរៀបរាប់ថា “Chris Rock បានឈ្នះក្ដីហើយបានទទួលសំណង $៤០លានពី Will Smith ដែលបានទះកំផ្លៀងគាត់នៅលើឆាក។ ១កំផ្លៀង ៤០លានដុល្លារ ចុះបើ ៣កំផ្លៀង?”។ព័ត៌មានជាភាសាខ្មែរខាងលើនេះ ត្រូវបានបង្ហោះនៅលើបណ្ដាញសង្គមមិនដល់ ១សប្ដាហ៍ផង បន្ទាប់ពីបង្ហោះចែករំលែកព្រោងព្រាតនូវការអះអាងជាភាសាអង់គ្លេសក្នុងន័យថា លោក Chris Rock បានឈ្នះក្ដីលើលោក Will Smith ដោយទទួលបានសំណង ៤០លានដុល្លារសម្រាប់ការទះកំផ្លៀងកាលពី ២ឆ្នាំមុន។
ខាងក្រោមនេះ គឺជារូបភាពផ្ដាមចេញពីការអះអាងជាភាសាអង់គ្លេសនៅលើបណ្ដាញសង្គមហ្វេសប៊ុកកាលពីថ្ងៃទី០៣ ខែតុលា ឆ្នាំ២០២៤ ដែលរៀបរាប់ថា “Chris Rock wins lawsuit against Will Smith for that famous slap getting a whooping $40 millions, it has just become the most expensive slap ever!!!”។ដំបូងឡើយ ការអះអាងជាភាសាអង់គ្លេសនេះ ត្រូវបានផ្សព្វផ្សាយលើបណ្ដាញសង្គមតាំងពី ២ខែមុនម៉្លេះ ហើយវាក៏ត្រូវបានចែករំលែកបន្តព្រោងព្រាតផងដែរ មុននឹងវាផ្ទុះលើបណ្ដាញសង្គមជាថ្មីម្ដងទៀតនៅដើមខែតុលានេះ។
ខាងក្រោមនេះ គឺជារូបភាពផ្ដាមចេញពីការផ្សព្វផ្សាយព័ត៌មាននេះនៅលើបណ្ដាញសង្គមកាលពីថ្ងៃទី១០ ខែសីហា ឆ្នាំ២០២៤ ហើយសំណេរជាភាសាអង់គ្លេសនាពេលនោះ ដូចគ្នាទៅនឹងសំណេរដែលទើបតែត្រូវបានបង្ហោះនៅលើបណ្ដាញសង្គមកាលពីសប្ដាហ៍មុន។ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មាននេះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកមួយទៀតនៅថ្ងៃទី០៩ ខែតុលា ឆ្នាំ២០២៤ ហើយវាត្រូវបានចែករំលែកបន្តរហូតដល់រាប់ពាន់ដង។
ខាងក្រោមនេះ គឺជារូបភាពផ្ដាមពីបណ្ដាញសង្គមដែលបង្ហាញថា ព័ត៌មាននេះកំពុងរីកផុសផុលនៅលើបណ្ដាញសង្គមហ្វេសប៊ុក ដែលបង្កការយល់ច្រឡំក្នុងចំណោមអ្នកប្រើប្រាស់បណ្ដាញសង្គមជុំវិញពិភពលោក។
ព័ត៌មាននេះ ក៏ត្រូវបានបង្ហោះព្រោងព្រាតនៅលើបណ្ដាញសង្គមដទៃទៀត ដូចជា X (Twitter) បណ្ដាញសង្គម Threads និងបណ្ដាញសង្គម TikTok ផងដែរ។
ខាងក្រោមនេះ គឺជារូបភាពផ្ដាមចេញពីការបង្ហោះព័ត៌មាននេះនៅលើបណ្ដាញសង្គម X កាលពីថ្ងៃទី១៣ ខែកញ្ញា ឆ្នាំ២០២៤ ហើយព័ត៌មាននេះទទួលបានការចាប់អារម្មណ៍ច្រើនពីអ្នកប្រើប្រាស់បណ្ដាញសង្គម X។ការត្រួតពិនិត្យការពិត
Fact Crescendo បានចាប់ផ្ដើមត្រួតពិនិត្យទៅលើការអះអាងខាងលើនេះតាមរយៈការពិនិត្យមើលព័ត៌មានចុះផ្សាយដោយប្រភពគួរឱ្យទុកចិត្ត ដែលនាំឱ្យយើងរកឃើញការពិតដូចខាងក្រោមនេះ។
ដោយស្វែងរកតាមព័ត៌មាននេះ យើងបានរកឃើញព័ត៌មានចុះផ្សាយដោយប្រភពគួរឱ្យទុកចិត្តមួយចំនួន ដែលនិយាយថា ការអះអាងនេះមិនមែនជាការពិតនោះឡើយ។
ព័ត៌មាននេះ ត្រូវបានផ្ទៀងផ្ទាត់ដោយសារព័ត៌មាន Snopes កាលពីពាក់កណ្ដាលខែសីហាកន្លងមកនេះ ដោយសារព័ត៌មានបញ្ជាក់ថា តារាកំប្លែងអាមេរិក លោក Chris Rock មិនបានដាក់ពាក្យបណ្ដឹងប្រឆាំងនឹងតារាសម្ដែងអាមេរិក លោក Will Smith នោះឡើយ ហើយក៏មិនទទួលបានសំណង ៤០លានដុល្លារពីលោក Smith នោះឡើយ។
បើតាម Snopes គ្មានសេចក្ដីរាយការណ៍ព័ត៌មានគួរឱ្យជឿជាក់ណាមួយអំពីរឿងនេះ ត្រូវបានចុះផ្សាយដោយសារព័ត៌មានធំៗនៅសហរដ្ឋអាមេរិក និងសារព័ត៌មានអន្តរជាតិផ្សេងទៀតឡើយ។
ផ្ទុយទៅវិញ សារព័ត៌មាន Snopes បានរកឃើញថា ទស្សនាវដ្ដី Hollywood Reporter បានចុះផ្សាយនូវព័ត៌មានមួយដែលនិយាយថា តារាកំប្លែង លោក Chris Rock ទទួលបានលុយរហូតដល់ ៤០លានដុល្លារអាមេរិកពីក្រុមហ៊ុនចាក់បញ្ចាំងភាពយន្តលើអនឡាញ Netflix សម្រាប់កម្មវិធីកំប្លែងពិសេសចំនួន ២ នៅក្នុងកិច្ចសន្យាមួយដែលកើតឡើងតាំងពីឆ្នាំ២០១៦មកម៉្លេះ។
អនុវត្តតាមកិច្ចសន្យាតាំងពីជិត ១០ឆ្នាំមុននោះ លោក Chris Rock ក៏បានបង្ហាញខ្លួននៅក្នុងកម្មវិធីកំប្លែង Chris Roch: Selective Outrage ផ្សាយផ្ទាល់នៅលើ Netflix កាលពីខែមីនា ឆ្នាំ២០២៣ ដោយនៅក្នុងលោកបានរំលឹកឡើងវិញពីឧប្បទ្ទវហេតុនោះ ដែលរឿងនេះត្រូវបានចុះផ្សាយដោយទស្សនាវដ្ដីកម្សាន្ត Entertainment Weekly កាលពីថ្ងៃទី០៥ ខែមីនា ឆ្នាំ២០២៣។
ទស្សនាវដ្ដីនេះ បានដកស្រង់សម្ដីរបស់លោក Chris Rock ដែលនិយាយនៅក្នុងកម្មវិធីកំប្លែងនោះថា លោកស្រឡាញ់ចូលចិត្តលោក Will Smith ពេញមួយជីវិត និងបន្តស្រឡាញ់ចូលចិត្តលោក Will Smith ពេញមួយជីវិត ហើយលោកបានទស្សនាខ្សែភាពយន្ត Emancipation ដែលសម្ដែងដោយលោក Will Smith។លោក Chris Rock ត្រូវបានលោក Will Smith ទះកំផ្លៀងនៅលើឆាកនៃពិធីប្រគល់ពានរង្វន់អូស្ការក្នុងកម្មវិធី Academy Awards កាលពីខែមីនា ឆ្នាំ២០២២ បន្ទាប់ពីលោក Rock និយាយកំប្លែងលេងអំពីភរិយារបស់លោក Smith។
សេចក្ដីរាយការណ៍របស់ទស្សនាវដ្ដី Variety ដែលបានដកស្រង់សេចក្ដីថ្លែងការណ៍របស់ស្ថាប័នប៉ូលិសនៅទីក្រុង Los Angeles បានឱ្យដឹងថា បន្ទាប់ពីហេតុការណ៍នោះ លោក Chris Rock ពុំបានដាក់ពាក្យបណ្ដឹងប្រឆាំងនឹងលោក Will Smith នៅឯស្ថាប័នប៉ូលិសនោះឡើយ។
ខាងក្រោមនេះ គឺជារូបភាពផ្ដាមចេញពីមួយផ្នែកនៃព័ត៌មានចុះផ្សាយដោយទស្សនាវដ្ដី Variety កាលពីថ្ងៃទី២៧ ខែមីនា ឆ្នាំ២០២២ ដែលបង្ហាញសេចក្ដីថ្លែងការណ៍របស់ប៉ូលិសទីក្រុង Los Angeles។សន្និដ្ឋាន
Fact Crescendo រកឃើញថា ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ លោក Chris Rock មិនបានដាក់ពាក្យបណ្ដឹងប្រឆាំងនឹងលោក Will Smith នោះឡើយ ហើយក៏គ្មានសំណង ៤០លានដុល្លារកើតឡើងឡើយ។