បន្ទាប់ពីផ្នែកមួយចំនួននៃដីធ្លី និងព្រៃឈើនៅតំបន់ការពារគិរិរម្យ ត្រូវបានរាជរដ្ឋាភិបាលកាត់ទៅឱ្យក្រុមហ៊ុនឯកជនមក រូបថតមួយសន្លឹកដែលបង្ហាញវិនាសកម្មព្រៃឈើនោះ ត្រូវបានបង្ហោះលើបណ្ដាញសង្គមជាមួយសំណេរក្នុងន័យថា ជារូបថតវិនាសកម្មព្រៃឈើនៅកម្ពុជា។ រូបថតនេះ ត្រូវបានចែករំលែកបន្តយ៉ាងព្រោងព្រាតពីសំណាក់អ្នកប្រើប្រាស់បណ្ដាញសង្គម។ ទោះជាយ៉ាងណា Fact Crescendo Cambodia រកឃើញថា រូបថតនេះ ត្រូវបានបង្ហោះជាមួយខ្លឹមសារមិនត្រឹមត្រូវ។
ការអះអាងលើបណ្ដាញសង្គម
រូបថត ១សន្លឹកនៅក្នុងចំណោមរូបថត ២សន្លឹកទៀតដែលបង្ហាញពីការការបំផ្លាញព្រៃឈើ ត្រូវបានបង្ហោះនៅលើបណ្ដាញសង្គមជាមួយសំណេរ«ស្រឡាញ់អ្វីដែលខ្មែរមាន» ដែលបង្ហាញពីវិនាសកម្មព្រៃឈើនៅក្នុងប្រទេសកម្ពុជា។
ការអះអាងនេះ ទទួលបានការចែករំលែកដល់ទៅជិត ៨០០ដង និងមានការបញ្ចេញមតិយោបល់ចម្រុះយ៉ាងច្រើនផងដែរ បន្ទាប់រូបថតទាំងនេះ ត្រូវបានបង្ហោះលើបណ្ដាញសង្គម។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមនៅថ្ងៃទី១២ ខែឧសភា ឆ្នាំ២០២៣ ដែលរៀបរាប់ថា «ស្រឡាញ់អ្វីដែលខ្មែរមាន»។
រូបថតដដែលនេះ ក៏ត្រូវបានបង្ហោះនៅលើបណ្ដាញសង្គមហ្វេសប៊ុកដោយទំព័រហ្វេសប៊ុកមួយទៀតឈ្មោះ សម្ព័ន្ធអ្នកប្រជាធិបតេយ្យ នៅថ្ងៃសៅរ៍នេះផងដែរ ហើយក៏ទទួលបានការចែករំលែកបន្តជាច្រើន។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកមួយទៀតដែលទទួលបានការចែករំលែកបន្តរហូតដល់ជាង ៣៥០ដងនៅក្នុងរយៈពេលមិនដល់ ២៤ម៉ោងផង។
ខាងក្រោមនេះ គឺជារូបភាពផ្ដាមចេញពីការបង្ហោះរបស់ទំព័រហ្វេសប៊ុកមួយទៀតនៅថ្ងៃទី១៣ ខែឧសភា ឆ្នាំ២០២៣នេះ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើរូបថតមួយសន្លឹកនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
រូបថតមួយសន្លឹកនេះ ត្រូវបានចុះផ្សាយព្រោងព្រាតនៅលើបណ្ដាញអ៊ិនធឺណិត។ ក្នុងចំណោមនោះ យើងបានរកឃើញរូបថតនេះនៅក្នុងអត្ថបទមួយរបស់គេហទំព័រមួយឈ្មោះថា Clean Malaysia ចុះផ្សាយកាលពីឆ្នាំ២០១៦កន្លងមក។
បើតាមគេហទំព័រមួយនេះ រូបថតមួយសន្លឹកនេះ បង្ហាញឱ្យឃើញការឈូសឆាយព្រៃឈើដោយខុសច្បាប់នៅក្នុងដែនដីនៃរដ្ឋសារ៉ាវ៉ាក់ (Sarawak)របស់ប្រទេសម៉ាឡេស៊ី ដើម្បីកាន់កាប់ជាកម្មសិទ្ធិ។
ខាងក្រោមនេះ គឺជារូបភាពផ្ដាមចេញពីអត្ថបទមួយរបស់គេហទំព័រ Clean Malaysia ជាមួយរូបថតមួយសន្លឹកដែលគេហទំព័រមួយនេះបញ្ជាក់ថាជារូបថតយកពីប្រព័ន្ធផ្សព្វផ្សាយ NAT GEO ហើយខ្លឹមសាររូបថតរៀបរាប់ថា «វិនាសកម្មព្រៃឈើបានបន្សល់ទុកនូវលំហរផ្ទៃដីយ៉ាងធំធេង។ ព្រៃឈើនៅរដ្ឋសារ៉ាវ៉ាក់ កំពុងបាត់បង់ក្នុងអត្រាមួយដ៏គួរឱ្យបារម្ភ។ រូបថត៖ National Geographic Creative»។
Clean Malaysia | Archived Link
យើងក៏ស្វែងរករូបថតមួយសន្លឹកនេះនៅលើគេហទំព័រសារព័ត៌មាន National Geographic ផងដែរ ហើយបានក៏ជួបប្រទះនឹងរូបថតដូចគ្នានេះ ដែលត្រូវបានចុះផ្សាយនៅក្នុងអត្ថបទមួយកាលពីដើមឆ្នាំ២០១៥កន្លងមក។
សារព័ត៌មានដដែល បានបញ្ជាក់ថា រូបថតនេះបង្ហាញពីព្រៃឈើរងទឹកភ្លៀង ត្រូវបានគេឈូសឆាយដើម្បីយកដីធ្វើជាចម្ការដូងប្រេង និងធ្វើផ្លូវឆ្លងកាត់រដ្ឋសារ៉ាវ៉ាក់ នៅលើដែនដីកោះ Borneo របស់ប្រទេសម៉ាឡេស៊ី។
របាយការណ៍របស់អង្គការឃ្លាំមើលព្រៃឈើសកល (Global Forest Watch) បានឱ្យដឹងថា កាលពីឆ្នាំ២០១០ រដ្ឋសារ៉ាវ៉ាក់គ្រប់ដណ្ដប់ទៅដោយព្រៃឈើធម្មជាតិរហូតទៅដល់ ៩.៥៧លានហិកតា ឬស្មើនឹង ៩១ភាគរយនៃផ្ទៃរបស់រដ្ឋនេះទាំងមូល។ ប៉ុន្តែ មកដល់ឆ្នាំ២០២១ គម្រប់ព្រៃឈើធម្មជាតិនៅរដ្ឋមួយនេះ បានបាត់បង់អស់រហូតដល់ទៅ ៥៦.៧គីឡូម៉ែត្រការ៉េនៃគម្រប់ព្រៃឈើធម្មជាតិសរុប។ សូមមើលអត្ថបទទាំងស្រុងនៅទីនេះ។
សន្និដ្ឋាន
Fact Crescendo Cambodia រកឃើញថា រូបថតមួយសន្លឹកដូចដែលត្រូវបានរៀបរាប់ខាងលើនេះ ត្រូវបានបង្ហោះជាមួយខ្លឹមសារមិនត្រឹមត្រូវនៅលើបណ្ដាញសង្គមហ្វេសប៊ុក។ រូបថតមួយសន្លឹកនេះ មិនមែនជាវិនាសកម្មព្រៃឈើកើតឡើងនៅកម្ពុជានោះឡើយ។ រូបថតនេះ គឺជាវិនាសកម្មព្រៃឈើនៅកាលពីជិត ១០ឆ្នាំមុន នៅរដ្ឋសារ៉ាវ៉ាក់ ប្រទេសម៉ាឡេស៊ី។
Title:រូបថតវិនាសកម្មព្រៃឈើនៅម៉ាឡេស៊ីត្រូវបានបង្ហោះលើបណ្ដាញសង្គមនាំឱ្យយល់ច្រឡំ
Fact Check By: Jay UdomResult: Misleading
