បន្ទាប់ពីការប្រកួតបាល់ទាត់វគ្គផ្ដាច់ព័ត្ររវាងក្រុមជម្រើសជាតិថៃ និងក្រុមជម្រើសជាតិឥណ្ឌូណេស៊ីដែលបញ្ចប់ទៅដោយចម្រូងចម្រាស់នោះ ការអះអាងដ៏ផុសផុលមួយនៅលើបណ្ដាញសង្គម បានលើកឡើងថា កីឡាករខ្សែការពារថៃ Jonathan Khemdee ត្រូវបានគណៈកម្មាធិការស៊ីហ្គេមសម្រេចហាមឃាត់ការប្រកួតនៅស៊ីហ្គេមអស់មួយជីវិត។ ការអះអាងនេះ ត្រូវបានចែករំលែកបន្ត និងបញ្ចេញមិតយោបល់យ៉ាងផុសផុលលើបណ្ដាញសង្គម។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងនេះ មិនត្រឹមត្រូវនោះឡើយ។
SOCIAL MEDIAL CLAIM
ការអះអាងកំពុងផ្ទុះនៅលើបណ្ដាញសង្គម បានលើកឡើងថា កីឡាករខ្សែការពារថៃ Jonathan Khemdee ត្រូវបានគណៈកម្មាធិការកីឡាស៊ីហ្គេមហាមឃាត់ចូលរួមក្នុងការប្រកួតអស់មួយជីវិត។
ការអះអាងនេះ បានកើតឡើងមួយថ្ងៃក្រោយពីការប្រកួតបាល់ទាត់ដ៏ចម្រូងចម្រាស់រវាងក្រុមបាល់ទាត់ជម្រើសជាតិថៃ និងក្រុមបាល់ទាត់ជម្រើសជាតិឥណ្ឌូណេស៊ីនៅក្នុងវគ្គផ្ដាច់ព័ត្រ ដែលក្រុមកីឡាករឥណ្ឌូណេស៊ីយកឈ្នះក្រុមកីឡាករថៃជាមួយលទ្ធផល ៥ ទល់នឹង ២។
ការអះអាងនេះ ត្រូវបានចែករំលែកយ៉ាងផុសផុលនៅលើបណ្ដាញសង្គមហ្វេសប៊ុក ហើយអ្នកប្រើប្រាស់ហ្វេសប៊ុកជាច្រើន បានបញ្ចេញមតិចម្រុះបែប និងប្រតិកម្មផ្សេងៗ។
ខាងក្រោមនេះ គឺជារូបភាពផ្ដាមចេញពីការអះអាងកាលពីថ្ងៃទី១៨ ខែឧសភា ឆ្នាំ២០២៣ ដែលរៀបរាប់ថា «គណៈកម្មាធិការ SEA Games សម្រេចបណ្ដេញចេញពីគ្រប់ការប្រកួតអស់មួយជីវិត! ពូជលួចប្លន់ជាចរឹតរបស់វា»។
ការអះអាងដដែលនេះ ក៏ត្រូវបានអ្នកប្រើប្រាស់បណ្ដាញសង្គមដទៃទៀតយកទៅបង្ហោះបន្តផងដែរ ហើយក៏ទទួលបានការចែករំលែក និងការបញ្ចេញជាច្រើនថែមទៀតដែរ។
ខាងក្រោមនេះ គឺជារូបភាពផ្ដាមចេញពីការបង្ហោះការអះអាងដោយទំព័រ EL Piset ដែលត្រូវបានចែករំលែកបន្តរហូតដល់ជាង ៤ពាន់ដង និងមានការបញ្ចេញមតិរហូតដល់ជាង ២០០ដងពីសំណាក់អ្នកប្រើប្រាស់បណ្ដាញសង្គម។
ខាងក្រោមនេះ គឺជារូបភាពផ្ដាមចេញពីការបង្ហោះការអះអាងនេះដោយទំព័រហ្វេសប៊ុក The Kun Khmer ដែលទទួលបានការបញ្ចេញមតិ និងការចែករំលែកបន្តយ៉ាងច្រើនផងដែរ។
ដើម្បីមើលខ្លឹមសារទាំងស្រុងនៃការអះអាងដដែលនេះ ដែលត្រូវបានបង្ហោះនៅលើបណ្ដាញសង្គមដោយអ្នកប្រើប្រាស់ហ្វេសប៊ុកដទៃទៀត សូមមើលតាមរយៈតំណភ្ជាប់នៅទីនេះ (archived) ឬតំណភ្ជាប់មួយទៀតនៅទីនេះ (archived)
ខាងក្រោមនេះ គឺជារូបភាពផ្ដាមពីបណ្ដាញសង្គមហ្វេសប៊ុក ដែលបង្ហាញពីការចែករំលែកយ៉ាងផុសផុលនូវការអះអាងខាងលើនេះនៅលើបណ្ដាញសង្គមក្នុងរយៈពេលប៉ុន្មានថ្ងៃចុងក្រោយនេះ។
FACT CHECK
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងនេះតាមរយៈការសម្ភាសជាមួយមន្ត្រីគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ និងការពិនិត្យមើលសេចក្ដីរាយការណ៍នានាដែលចុះផ្សាយដោយសារព័ត៌មានអន្តរជាតិ និងសេចក្ដីប្រកាសព័ត៌មានរបស់ស្ថាប័នគ្រប់គ្រងកីឡាថ្នាក់តំបន់ និងទ្វីបអាស៊ី ដែលនាំឱ្យយើងរកឃើញការពិតដូចខាងក្រោមនេះ។
ដើម្បីផ្ទៀងផ្ទាត់ទៅលើការអះអាងដែលថា គណៈកម្មាធិការស៊ីហ្គេមបានដាក់វិន័យទៅលើកីឡាករខ្សែការពារថៃនោះ Fact Crescendo Cambodia បានសម្ភាសជាមួយលោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២(CAMSOC)។
ក្នុងកិច្ចសម្ភាសនៅថ្ងៃចន្ទនេះ លោក វ៉ាត់ ចំរើន បានច្រានចោលនូវការអះអាងខាងលើ ដោយចាត់ទុកជាព័ត៌មាន«មិនពិត» ហើយលោកបញ្ជាក់បន្ថែមថា CAMSOC មិនបានដាក់វិន័យណាមួយទៅលើកីឡាករខ្សែការពារថៃ Jonathan Khemdee នោះឡើយ។
មន្ត្រី CAMSOC រូបនេះ បញ្ជាក់បន្ថែមទៀតថា ការគ្រប់គ្រងការប្រកួតបាល់ទាត់រវាងក្រុមជម្រើសជាតិថៃ និងក្រុមជម្រើសជាតិឥណ្ឌូណេស៊ីកាលពីសប្ដាហ៍មុន ស្ថិតនៅក្រោមការគ្រប់គ្រង និងចាត់ចែងដោយសហព័ន្ធបាល់ទាត់ទ្វីបអាស៊ី (Asian Football Confederation – AFC)។
សូមស្ដាប់ប្រសាសន៍លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាអាស៊ីអាគ្នេយ៍លើកទី៣២ ដែលបានបញ្ជាក់ប្រាប់ Fact Crescendo Cambodia នៅថ្ងៃទី២២ ខែឧសភា ឆ្នាំ២០២៣។
យោងតាមសេចក្ដីរាយការណ៍មួយរបស់ទីភ្នាក់ងារព័ត៌មាន Reuters ករណីសកម្មភាពហិង្សារវាងក្រុមបាល់ទាត់ជម្រើសជាតិថៃ និងក្រុមបាល់ទាត់ជម្រើសជាតិឥណ្ឌូណេស៊ី ត្រូវបានបញ្ជូនទៅសហព័ន្ធបាល់ទាត់ទ្វីបអាស៊ី(Asian Football Confederation – AFC) សម្រាប់ដោះស្រាយផ្អែកតាមក្រម និងវិន័យរបស់សហព័ន្ធ។
ទីភ្នាក់ងារព័ត៌មាន Reuters បានចុះផ្សាយបែបនេះដោយផ្អែកតាមសម្ដីរបស់អគ្គលេខាធិការសហព័ន្ធបាល់ទាត់កម្ពុជា (Football Federation of Cambodia) លោក កែវ សារ៉េត បន្ទាប់ពីមានអំពើហិង្សាបានកើតឡើងនៅក្នុងការប្រកួតវគ្គផ្ដាច់ព័ត្ររវាងក្រុមបាល់ទាត់ថៃ និងឥណ្ឌូណេស៊ីកាលពីល្ងាចថ្ងៃទី១៦ ខែឧសភា នៅក្នុងព្រឹត្តិការណ៍ស៊ីហ្គេមលើកទី៣២នៅកម្ពុជា។ សូមមើលខ្លឹមសារទាំងស្រុងនៅទីនេះ (archived)។
Fact Crescendo Cambodia ក៏បានស្វែងរកការបកស្រាយពីសហព័ន្ធបាល់ទាត់ថៃផងដែរ ប៉ុន្តែ ពុំទាន់ទទួលបានការឆ្លើយតបនៅឡើយទេរហូតមកថ្ងៃចេញផ្សាយអត្ថបទនេះ។ Fact Crescendo Cambodia នឹងផ្ដល់ព័ត៌មានបន្ថែមទៀត ប្រសិនបើសហព័ន្ធបាល់ទាត់ថៃ FA Thailand ឆ្លើយតប។
បើទោះជាពុំទាន់មានវិធានការផ្លូវការណាមួយពីសហព័ន្ធបាល់ទាត់ទ្វីបអាស៊ីក្ដី សហព័ន្ធបាល់ទាត់ថៃ កាលពីថ្ងៃទី១៧ ខែឧសភា បានសម្ដែងការសោកស្ដាយចំពោះរឿងហេតុដែលបានកើតឡើង និងបញ្ជាក់ថា នឹងស៊ើបអង្កេតល្អិតល្អន់ទៅលើបុគ្គលទាំងអស់ដែលផ្ដួចផ្ដើម ឬពាក់ព័ន្ធនឹងហេតុការណ៍នោះ។
យោងតាមការចុះផ្សាយរបស់សារព័ត៌មានថៃ PPTVHD36 កីឡាករខ្សែការពារ Jonathan Khemdee បានសម្រេចចិត្តលាឈប់ពីក្រុមជម្រើសជាតិថៃ ហើយងាកទៅផ្ដោតលើអាជីពបាល់ទាត់នៅក្លឹបវិញ។
CONCLUSION
Fact Crescendo Cambodia បានរកឃើញថា ព័ត៌មានដូចដែលត្រូវបានរៀបរាប់ខាងលើនេះ គឺព័ត៌មានក្លែងក្លាយ។ គណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ (CAMSOC) មិនបានដាក់ពិន័យណាមួយទៅលើកីឡាករថៃ Jonathan Khemdee នោះឡើយ។ ចំណែកឯស្ថាប័នគ្រប់គ្រងកីឡាបាល់ទាត់ថ្នាក់តំបន់ និងទ្វីបអាស៊ី ពុំទាន់សម្រេចនូវវិន័យណាមួយទៅលើកីឡាករណាម្នាក់នៃក្រុមបាល់ទាត់ជម្រើសជាតិថៃនៅឡើយដែរ។
Title:តើកីឡាករថៃមួយរូបត្រូវបានហាមឃាត់ចូលរួមប្រកួតស៊ីហ្គេមមួយជីវិតឬ?
Written By: Jay UdomResult: False
