តើនេះគឺជាទិដ្ឋភាពអ្នកគាំទ្រវៀតណាមនៅព្រឹត្តិការណ៍ស៊ីហ្គេមនៅកម្ពុជាមែនឬទេ?

បន្ទាប់ពីការប្រកួតរវាងក្រុមបាល់ទាត់ជម្រើសជាតិឡាវ និងក្រុមបាល់ទាត់ជម្រើសជាតិវៀតណាមនៅពូល B កាលពីថ្ងៃអាទិត្យកន្លងមកនេះ រូបថតមួយសន្លឹកបង្ហាញទិដ្ឋភាពអ្នកគាំទ្រកាន់ទង់ជាតិវៀតណាមជាច្រើន ត្រូវបានបង្ហោះនៅលើបណ្ដាញសង្គមជាមួយការអះអាងថា វាជាទិដ្ឋភាពនៅក្នុងការប្រកួតនោះ។ ការបង្ហោះនេះ ត្រូវបានចែកចាយ និងប្រតិកម្មនាពេលថ្មីៗនេះ។ ទោះជាយ៉ាងណា Fact Crescendo Cambodia រកឃើញថា ការអះអាងខាងលើ មិនត្រឹមត្រូវនោះឡើយ។

ការអះអាងលើបណ្តាញសង្គម

រូបថតមួយសន្លឹក ដែលបង្ហាញទិដ្ឋភាពអ្នកគាំទ្រជាច្រើនរូប ស្ថិតក្នុងសម្លៀកបំពាក់ឈុតពណ៌ក្រហម និងកាន់ទង់ជាតិវៀតណាម ត្រូវបានបង្ហោះនៅលើបណ្ដាញសង្គម កាលពីថ្មីៗនេះ ដោយមានការអះអាងថា ទិដ្ឋភាពនោះ គឺជាទិដ្ឋភាពអ្នកគាំទ្រវៀតណាម នាព្រឹត្តិការណ៍ស៊ីហ្គេម នៅកីឡដ្ឋានមួយ ក្នុងប្រទេសកម្ពុជា។

រូបថតជាមួយនឹងការអះអាងបែបនេះ ត្រូវបានចែករំលែកបន្តរហូតដល់ទៅជិត ៣ពាន់ដងពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ ហើយក៏មានការបញ្ចេញមតិចោទសួរពីភាពត្រឹមត្រូវនៃការអះអាង និងរូបថតនេះផងដែរ។

ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមកាលពីថ្ងៃទី០៣ ខែឧសភា ដែលរៀបរាប់ថា «គួរអោយព្រួយបារម្ភស៊ីហ្គេមស្រុកខ្មែរ តែសំបូរទង់ជាតិយួនច្រើនណាស់ ឃើញហើយដេកមិនលក់ទេលោកអើយ»។

Facebook Post | Archived Link

រូបភាពជាមួយការអះអាងបែបនេះ ក៏ត្រូវបានផ្សព្វផ្សាយព្រោងព្រាតលើបណ្ដាញសង្គមហ្វេសប៊ុកពីសំណាក់អ្នកប្រើប្រាស់បណ្ដាញសង្គមផ្សេងទៀតផងដែរ។ សូមមើលខ្លឹមសារទាំងស្រុងតាមរយៈតំណភ្ជាប់នៅទីនេះ ១ (archived), ២ (archived), ៣ (archived)។

ការត្រួតពិនិត្យការពិត

Fact Crescendo Cambodia ចាប់ផ្ដើមត្រួតពិនិត្យទៅលើរូបភាព និងការអះអាងនេះ តាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោម។

រូបថតមួយសន្លឹក ដែលមានទម្រង់ និងសណ្ឋានដូចគ្នាទាំងស្រុង គឺត្រូវបានរកឃើញ និងផ្សព្វផ្សាយនៅលើគេហទំព័រសារព័ត៌មានក្នុងស្រុកវៀតណាមមួយ VN Express កាលពីថ្ងៃទី២៥ ខែឧសភា ឆ្នាំ២០២២កន្លងទៅ។ នៅក្នុងអត្ថបទសារព័ត៌មានខាងលើនេះ បានបញ្ជាក់ថា ទិដ្ឋភាពនោះ គឺជាទិដ្ឋភាពបង្ហាញការអបអរសាទរពីសំណាក់អ្នកគាំទ្រវៀតណាម ក្រោយពេលប្រទេសវៀតណាម បានឈ្នះមេដាយមាស ក្នុងការប្រកួតបាល់ទាត់នារី ទល់នឹងប្រទេសថៃ នៅកីឡដ្ឋាន Cam Pha ក្នុងខេត្ត Quang Ninh កាលពីថ្ងៃទី២១ ខែឧសភា ឆ្នាំ២០២២កន្លងទៅ។

ខាងក្រោមនេះ គឺជារូបភាពផ្ដាមចេញពីគេហទំព័រខាងលើ ដែលបានបង្ហាញទិដ្ឋភាពអ្នកគាំទ្រវៀតណាមអបអរសាទរ នៅកីឡដ្ឋាន Cam Pha ក្នុងខេត្ត Quang Ninh ប្រទេសវៀតណាម។

VN Express Link | Archived Link

រូបថត បង្ហាញការអបអរសាទរពីសំណាក់អ្នកគាំទ្រវៀតណាម ក្រោយពេលវៀតណាមឈ្នះមេដាយមាសក្នុងការប្រកួតបាល់ទាត់នារី នៃការប្រកួតកីឡាស៊ីហ្គេមលើកទី៣១ ទល់នឹងប្រទេសថៃ កាលឆ្នាំ២០២២កន្លងទៅ ក៏ត្រូវបានផ្សព្វផ្សាយ និងបង្ហោះនៅតាមបណ្ដាគេហទំព័រសារព័ត៌មាននានាផងដែរ។ សូមអានព័ត៌មានលម្អិតនៅទីនេះ ឬនៅទីនេះ។

ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖

Facebook Twitter Telegram Google News TikTok

សន្និដ្ឋាន

Fact Crescendo Cambodia បានរកឃើញថារូបថតបង្ហោះភ្ជាប់ជាមួយនឹងការអះអាងខាងលើ គឺមិនត្រឹមត្រូវនោះឡើយ។ ការពិត ច្បាប់ដើមនៃរូបថតនេះ គឺជាទិដ្ឋភាពបង្ហាញការអបអរសាទរពីសំណាក់អ្នកគាំទ្រវៀតណាម ក្រោយពេលវៀតណាមឈ្នះមេដាយមាសក្នុងការប្រកួតបាល់ទាត់នារី ទល់នឹងប្រទេសថៃ នៅកីឡដ្ឋាន Cam Pha ក្នុងខេត្ត Quang Ninh កាលពីថ្ងៃទី២១ ខែឧសភា ឆ្នាំ២០២២កន្លងទៅ។