ខណៈដែលមានសេចក្ដីរាយការណ៍ថា កងទ័ពអ៊ុយក្រែនបានវាយដណ្ដើមបានទឹកដីពីការកាន់កាប់ដោយកងទ័ពរុស្ស៊ីមកវិញនោះ វីដេអូឃ្លីបមួយក៏ត្រូវបានបង្ហោះព្រោងព្រាតនៅលើបណ្ដាញសង្គមជាមួយការអះអាងថា ជាទិដ្ឋភាពពលរដ្ឋអ៊ុយក្រែនស្រែកហ៊ោកញ្ច្រៀវ ក្រោយកងទ័ពរំដោះបានទឹកដីពីរុស្ស៊ី។ វីដេអូនោះ ត្រូវបានចែករំលែកយ៉ាងព្រោងព្រាតលើបណ្ដាញសង្គមក្នុងរយៈពេលប៉ុន្មានថ្មីៗនេះ។ ទោះជាយ៉ាងណា ការផ្ទៀងផ្ទាត់របស់ Fact Crescendo Cambodia រកឃើញថា ការអះអាងលើវីដេអូនោះ មិនត្រឹមត្រូវនោះឡើយ។
ការអះអាងលើបណ្ដាញសង្គម
វីដេអូមួយដែលបង្ហាញក្រុមមនុស្សដ៏ច្រើនហ៊ោកញ្ចៀវនៅក្នុងហាងអាហារមួយកន្លែង ត្រូវបានបង្ហោះនៅលើបណ្ដាញសង្គមជាមួយការអះអាងថា ប្រជាពលរដ្ឋអ៊ុយក្រែនស្រែកហោរអបអរសាទរ បន្ទាប់ពីកងទ័ពអ៊ុយក្រែនរំដោះបានទឹកដីជាច្រើន ដែលកាន់កាប់ដោយកងទ័ពរុស្ស៊ី។
វីដេអូមួយនេះ កំពុងតែផ្ទុះនៅលើបណ្ដាញសង្គម ដោយទទួលបានការចូលទស្សនា ការចែករំលែកបន្ត និងការបញ្ចេញមតិយោបល់យ៉ាងភ្លូកទឹកភ្លូកដី។
ខាងក្រោមនេះ គឺជាវីដេអូដែលបង្ហោះនៅលើបណ្ដាញសង្គមជាមួយការអះអាងថា «ពលរដ្ឋអ៊ុយក្រែនកំពុងហ៊ោកញ្ជ្រៀវ ដោយដណ្តើមបានទឹកដីមកវិញ»។
វីដេអូដដែលនេះ ក៏ត្រូវបានអ្នកប្រើប្រាស់បណ្ដាញសង្គមហ្វេសប៊ុកដទៃទៀតយកទៅបង្ហោះចែកចាយទៅកាន់មិត្តភក្តិនៅលើបណ្ដាញសង្គមផងដែរ។ សូមមើលតាមរយៈតំណភ្ជាប់នៅទីនេះ ឬតំណភ្ជាប់មួយទៀតនៅទីនេះ។
វីដេអូដូចគ្នានេះ ក៏ត្រូវបានគេបង្ហោះនៅលើបណ្ដាញសង្គម Twitter ផងដែរកាលពីប៉ុន្មានថ្ងៃថ្មីៗនេះ ដែលនាំឱ្យមានការចែករំលែកបន្ត និងការបញ្ចេញមតិចម្រុះបែប។
ការត្រួតពិនិត្យការពិត
Fact Crescendo Cambodia បានផ្ទៀងផ្ទាត់ទៅលើវីដេអូមួយនេះតាមរយៈការដំណើរការកម្មវិធី Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
វីដេអូដែលបង្ហាញមនុស្សមួយក្រុមធំស្រែកហ៊ោកញ្ច្រៀវនោះ ត្រូវបានរកឃើញនៅលើបណ្ដាញ YouTube ដែលត្រូវបានបង្ហោះដោយឆាណែលមួយឈ្មោះ Heart News West Country កាលពីថ្ងៃទី១៧ ខែមិថុនា ឆ្នាំ២០១៦កន្លងមក។
ឆាណែល YouTube មួយនេះ បានសរសេរថា ក្រុមអ្នកគាំទ្របាល់កីឡាបាល់ទាត់ ទស្សនាការប្រកួតបាល់ទាត់នៅលើអេក្រង់ធំ នៅឯកីឡដ្ឋាន Ashton Gate ហើយស្រែកហ៊ោកញ្ច្រៀវ បន្ទាប់ពីខ្សែប្រយុទ្ធ Daniel Sturridge ទាត់បាល់បញ្ចូលទីនៅចុងតង់ ដែលនាំឱ្យក្រុមអង់គ្លេសឈ្នះក្រុម Wales នៅក្នុងការប្រកួតពានរង្វាន់ Euro កាលពីឆ្នាំ២០១៦។
ខាងក្រោមនេះ គឺជាទិដ្ឋភាពមួយផ្នែកទៀតនៃក្រុមអ្នកគាំទ្របាល់ទាត់ ដែលបានស្រែកហ៊ោកញ្ច្រៀវនៅឯកីឡដ្ឋាន Ashton Gate បន្ទាប់ពីក្រុមអង់គ្លេសប្រកួតឈ្នះក្រុម Wales ដើម្បីឡើងទៅវគ្គបន្ទាប់ទៀត។
វីដេអូក្រុមអ្នកគាំទ្រអង់គ្លេសស្រែកហ៊ោកញ្ច្រៀវនៅក្នុងបារនៅក្នុងកីឡដ្ឋាន Ashton Date នេះ ក៏ត្រូវបានផ្សព្វផ្សាយនៅលើបណ្ដាញសង្គមផងដែរ។
ទូរទស្សន៍អាមេរិក CBS ក៏បានចុះផ្សាយផងដែរនូវទិដ្ឋភាពហ៊ោកញ្ច្រៀវនៃក្រុមអ្នកគាំទ្របាល់ទាត់ បន្ទាប់ពីពួកគេបានទស្សនាការប្រកួតរវាងក្រុមអង់គ្លេស និងក្រុមវែលស៍ (Wales) នៅលើអេក្រង់ធំ។
សន្និដ្ឋាន
Fact Crescendo Cambodia រកឃើញថា ការអះអាងទៅលើវីដេអូដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ វីដេអូឃ្លីបមួយនេះ មិនមែនជាក្រុមពលរដ្ឋអ៊ុយក្រែនស្រែកហ៊ោសាទរ ក្រោយទាហានអ៊ុយក្រែនរំដោះបានទឹកដីពីរុស្ស៊ីនោះឡើយ។ ផ្នែកអេក្រង់ធំនៅក្នុងវីដេអូនេះ ត្រូវបានកាត់ត។ វីដេអូដើម គឺក្រុមអ្នកគាំទ្របាល់ទាត់អង់គ្លេសស្រែកហ៊ោកញ្ច្រៀវនៅឯកីឡដ្ឋាន Ashton Gate ក្រោយអង់គ្លេសឈ្នះក្រុមវែលស៍នៅក្នុងព្រឹត្តិការណ៍ Euro 2016។
Title:តើវីដេអូនេះជាពលរដ្ឋអ៊ុយក្រែនស្រែកហ៊ោកញ្ច្រៀវក្រោយទាហានរំដោះទឹកដីបានពីរុស្ស៊ីមែនឬទេ?
Fact Check By: Jay UdomResult: False
