គណបក្ស​ភ្លើងទៀន​ទទួល​បាន​សន្លឹក​ឆ្នោត​ជាង ១.៦​លាន​សំឡេង​ប៉ុណ្ណោះ​ក្នុង​ការ​បោះ​ឆ្នោត​ឆ្នាំ​នេះ

False Political

ការ​បោះ​ឆ្នោត​ឃុំ​សង្កាត់​ឆ្នាំ​២០២២​នេះ បាន​បញ្ចប់​ទៅ​ហើយ ហើយ​លទ្ធផល​បណ្ដោះ​អាសន្ន ក៏​ត្រូវ​បាន​ប្រកាស​ឱ្យ​ដឹង​ផង​ដែរ។ ប៉ុន្តែ ការ​អះ​អាង​មួយ​នៅ​លើ​បណ្ដាញ​សង្គម បាន​លើក​ឡើង​ថា គណបក្ស​ភ្លើងទៀន​បាន​ទទួល​សន្លឹក​ឆ្នោត​គាំ​ទ្រ​ដល់​ទៅជាង ៤.៣៤​លាន​សំឡេង ឬ​ស្មើ​នឹង ៥៦​ភាគរយ ដែល​មាន​ន័យ​ថា គណបក្ស​ប្រឆាំង​មួយ​នេះ​ឈ្នះ​ការ​បោះ​ឆ្នោត​ថ្នាក់​ក្រោម​ជាតិ​មួយ​នេះ។ ទោះជាយ៉ាងណា បន្ទាប់​ពី​ត្រួត​ពិនិត្យ​លើ​លទ្ធផល​បណ្ដោះ​អាសន្ន​ចេញ​ដោយ​គ.ជ.ប. យើង​រក​ឃើញ​ថា ការ​អះ​អាង​នេះ​មិន​ត្រឹម​ត្រូវនោះ​ឡើយ។

ការ​អះ​អាង​លើ​បណ្ដាញ​សង្គម

​ការ​អះ​អាង​មួយ​នៅ​លើ​បណ្ដាញ​សង្គម​ និយាយ​ថា គណបក្ស​ភ្លើងទៀន ទទួល​បាន​សន្លឹក​ឆ្នោត​គាំ​ទ្រ​ពី​ប្រជា​ពលរដ្ឋ​រហូត​ដល់​ជាង ៤.៣៤​លាន​សំឡេង ឬ​ដល់​ទៅ ៥៦​ភាគរយ​នៃ​ចំនួន​ពលរដ្ឋ​ចេញ​ទៅ​បោះ​ឆ្នោត​សរុប។

ការ​អះ​អាង​នេះ ត្រូវ​បាន​ចែក​រំលែក​បន្ត​រហូត​ដល់​ ១៥២​ដង ហើយ​មាន​ការ​បញ្ចេញ​មតិ​ និង​ប្រតិកម្ម​ជាច្រើន​ផង​ដែរ​ទៅ​នឹង​ការ​អះ​អាង​នេះ។

ខាង​ក្រោម​នេះ គឺ​ជា​រូបភាព​ផ្ដាម​ចេញ​ពី​ការ​អះ​អាង​នៅ​លើ​បណ្ដាញ​សង្គម​កាល​ពី​ថ្ងៃ​ទី០៧ ខែ​មិថុនា ដែល​រៀបរាប់​ថា «[…]ចុះ​សន្លឹក​ឆ្នោត​បក្ស​ភ្លើងទៀន​មាន​ចំនួន ៥៦​%=​៤,៣៤៧,៦០០​សំឡេង​នៅ​ឯណា? សូម​ឯកឧត្ដម​គណៈកម្មាធិការ​ គ.ជ.ប. លោក ប្រាជ្ញ ច័ន្ទ មេត្តា​ជួយ​យក​សន្លឹក​ឆ្នោត ៥៦%​នៃ​សំឡេង​មេ​ឃុំ​ ចៅ​សង្កាត់ បាន​ចំនួន ៩០៤​នាក់ យក​មក​សង​ប្រជា​ពលរដ្ឋ​ផង​ទាន!»។

Facebook Post | Archived Link

ការ​ត្រួត​ពិនិត្យ​ការ​ពិត

Fact Crescendo Cambodia​ បាន​ត្រួត​ពិនិត្យ និង​ផ្ទៀង​ផ្ទាត់​ការ​អះ​អាង​ខាង​លើ​នេះ​តាម​រយៈ​ការ​ពិនិត្យ​មើល​លទ្ធផល​បឋម​នៃ​ការ​បោះ​ឆ្នោត​ជ្រើស​រើស​ប្រឹក្សា​ឃុំ​សង្កាត់​ឆ្នាំ​២០២២ ដែល​ត្រូវ​បាន​ផ្សព្វផ្សាយ​ដោយ​ស្ថាប័ន​រៀបចំ​ការ​បោះ​ឆ្នោត សម្រង់​លទ្ធផល​បឋម​ដែល​ធ្វើ​ឡើង​ដោយ​គណបក្ស​កាន់​អំណាច និង​កិច្ច​សម្ភាស​ជាមួយ​មន្ត្រី​ពាក់​ព័ន្ធ ដែល​នាំ​ឱ្យ​យើង​រក​ឃើញ​ការ​ពិត​ដូច​ខាង​ក្រោម​នេះ។

Fact Crescendo Cambodia បាន​រក​ឃើញ​របាយការណ៍​លទ្ធផល​នៃ​ការ​បោះ​ឆ្នោត​ឃុំ​សង្កាត់​ឆ្នាំ​២០២២ ដែល​ត្រូវ​បាន​ធ្វើ​ឡើង​ដោយ​គណបក្ស​ប្រជាជន​កម្ពុជា ១​ថ្ងៃ​ក្រោយ​ការ​បោះ​ឆ្នោត​ថ្នាក់​មូលដ្ឋាន​នេះ។

អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន បាន​ទទួល​ស្គាល់​របាយការណ៍​នេះ បញ្ជាក់​ថា របាយការណ៍​នេះ ត្រូវ​បាន​​ធ្វើ​ឡើង​ក្រៅ​ផ្លូវ​ការ​ដោយ​មន្ត្រី​គណបក្ស​កាន់​អំណាច​។

របាយការណ៍​នេះ បង្ហាញ​ថា គណបក្ស​ប្រជាជន​កម្ពុជា​របស់​លោក​នាយករដ្ឋ​មន្ត្រី ហ៊ុន សែន ទទួល​បាន​សន្លឹក​ឆ្នោត​​គាំ​ទ្រ​ទូទាំង​ប្រទេស​រហូត​ដល់​ជាង ៥.៣៥​លាន​សំឡេង ឬ​ស្មើ​នឹង​ ៧៤.៤០​ភាគរយ។

របាយការណ៍​នេះ ក៏​បង្ហាញ​ឱ្យ​ឃើញ​ផង​ដែរ​ថា គណបក្ស​ភ្លើងទៀន ទទួល​បាន​សន្លឹក​ឆ្នោត​គាំ​ទ្រ​ជិត ១.៦​លាន​សំឡេង​នៅ​ក្នុងការ​បោះ​ឆ្នោត​ឃុំ​សង្កាត់​ឆ្នាំ​២០២២​នេះ ឬ​ស្មើ​នឹង ២២.២៣​ភាគរយ។

Facebook Post | Archived Link

Facebook Post | Archived Link

អ្នក​នាំ​ពាក្យ​គណបក្ស​ភ្លើងទៀន លោក ថាច់ សេដ្ឋា បាន​ប្រាប់​តាម​តេឡេក្រាម​ថា របាយការណ៍​នេះ គ្រាន់​តែ​ជា​សម្រង់​ធ្វើ​ឡើង​ដោយ​គណបក្ស​កាន់​អំណាច ហើយ​គណបក្ស​របស់​លោក​ក៏​មាន​សម្រង់​របាយការណ៍​បែប​នេះ​ផង​ដែរ។

ប៉ុន្តែ លោក ថាច់ សេដ្ឋា ​មិន​បាន​បង្ហាញ​របាយការណ៍​នោះ​ឱ្យ Fact Crescendo Cambodia បាន​ឃើញ​នោះ​ឡើយ ដោយ​ប្រាប់​ថា ឱ្យ​រង់​ចាំ​ការ​ប្រកាស​លទ្ធផល​ផ្លូវការ​ធ្វើ​ឡើង​ដោយ​គណៈកម្មាធិការ​ជាតិ​រៀបចំ​ការ​បោះ​ឆ្នោត។

អ្នក​នាំ​ពាក្យ​ គ.ជ.ប. លោក ហង្ស ពុទ្ធា បាន​បញ្ជាក់​ថា សម្រង់​លទ្ធផល​នៃ​ការបោះ​ឆ្នោត​ឃុំ​សង្កាត់​ខាង​លើ​នេះ គ្រាន់​តែ​ជា​របាយការណ៍​ផ្ទាល់​របស់​គណបក្ស​មួយ​តែ​ប៉ុណ្ណោះ ប៉ុន្តែ លទ្ធផល​ផ្លូវការ​នឹង​ត្រូវ​ប្រកាស​ឱ្យ​ដឹង​ដោយ​ គ.ជ.ប.​នា​ពេល​ខាង​មុខ។

គ.ជ.ប. គ្រោង​នឹង​ប្រកាស​លទ្ធផល​ផ្លូវការ​នៃ​ការបោះ​ឆ្នោត​ឃុំ​សង្កាត់​ឆ្នាំ​២០២២​នេះ នៅ​ថ្ងៃ​ទី​២៦ ខែ​មិថុនា​នេះ ឬ​ត្រូវ​នឹង​ថ្ងៃ​អាទិត្យ​ខាង​មុខ​នេះ។

ប៉ុន្តែ គ.ជ.ប. បាន​ប្រកាស​លទ្ធផល​បឋម​​នៃ​ការ​បោះ​ឆ្នោត​នេះ​តាំង​ពី​ល្ងាច​ថ្ងៃ​បោះ​ឆ្នោត​មក​ម៉្លេះ ហើយ​​លទ្ធផល​បឋម​ក៏​ដូច​ជា​លទ្ធផល​បណ្ដោះ​អាសន្ន​​​នៃ​ការ​បោះ​ឆ្នោត​នេះ ក៏​ត្រូវ​បាន​ដាក់​បង្ហាញ​សាធារណជន​នៅ​លើ​គេហទំព័រ​របស់​ គ.ជ.ប.​ផង​ដែរ។

សាធារណជន​អាច​ចូល​ទៅ​មើល​​លទ្ធផល​បឋម និង​លទ្ធផល​បណ្ដោះ​អាសន្ន​​នៃ​ការ​បោះ​ឆ្នោត​ឃុំ​សង្កាត់​ឆ្នាំ​២០២២​នៅ​តាម​ឃុំ​សង្កាត់​នានា​នៅ​ទូទាំង​ប្រទេស​តាម​រយៈ​តំណ​ភ្ជាប់​នៅ​ទីនេះ

Fact Crescendo Cambodia បាន​បូក​ស្រង់​លទ្ធផល​បណ្ដោះ​អាសន្ន​នៃ​ការ​បោះ​ឆ្នោត​សង្កាត់​ឆ្នាំ​២០២២ដែល​បង្ហាញ​ដោយ គ.ជ.ប. ហើយ​រក​ឃើញ​ថា គណបក្ស​ប្រជាជន​កម្ពុជា ទទួល​បាន​សន្លឹក​ឆ្នោត​គាំ​ទ្រ ៥,៣៥៥,០៣៥​សំឡេង ខណៈ​ដែល​គណបក្ស​ភ្លើងទៀន ទទួល​បាន​សន្លឹក​ឆ្នោត​គាំ​ទ្រ ១,៦០៤,៩៦២​សំឡេង។

សូម​ពិនិត្យ​មើល​សម្រង់​លទ្ធផល​បណ្ដោះ​អាសន្ន​នៃ​ការបោះ​ឆ្នោត​ឃុំ​សង្កាត់​ឆ្នាំ​២០២២ ដែល​ធ្វើ​ឡើង​ដោយ Fact Crescendo Cambodia តាម​រយៈ​តំណ​ភ្ជាប់​នៅ​ទីនេះ

Fact Crescendo Cambodia នឹង​​ធ្វើ​បច្ចុប្បន្នភាព​បន្ថែម​ទៀត​អំពី​លទ្ធផល​នៃ​ការ​បោះ​ឆ្នោត​របស់​គណបក្ស​នយោបាយ​ទាំង​ពីរ​នេះ បន្ទាប់​ពី គ.ជ.ប. ប្រកាស​លទ្ធផល​ផ្លូវការ​នៅ​ថ្ងៃ​អាទិត្យ​ខាង​មុខ​នេះ។

សន្និដ្ឋាន

Fact Crescendo Cambodia រក​ឃើញ​ថា ការ​អះ​អាង​ដូច​ដែល​ត្រូវ​បាន​រៀបរាប់​ខាង​លើ​នេះ មិន​ត្រឹម​ត្រូវ​នោះ​ឡើយ។ លទ្ធផល​បណ្ដោះ​អាសន្ន​ចេញ​ដោយ គ.ជ.ប. បង្ហាញ​ថា គណបក្ស​ភ្លើងទៀន ទទួល​បាន​សន្លឹក​ឆ្នោត​គាំ​ទ្រ​ជាង ១.៦​លាន​សំឡេង ខណៈ​គណបក្ស​ប្រជាជន​កម្ពុជា ទទួល​បាន​សន្លឹក​ឆ្នោត​គាំ​ទ្រ ៥.៣៥​លាន​សំឡេង នៅ​ក្នុង​ការ​បោះ​ឆ្នោត​ឃុំ​សង្កាត់​ឆ្នាំ​២០២២​នេះ។

Avatar

Title:គណបក្ស​ភ្លើងទៀន​ទទួល​បាន​សន្លឹក​ឆ្នោត​ជាង ១.៦​លាន​សំឡេង​ប៉ុណ្ណោះ​ក្នុង​ការ​បោះ​ឆ្នោត​ឆ្នាំ​នេះ

Fact Check By: Jay Udom 

Result: False

Leave a Reply

Your email address will not be published.