- >>
- Social
ជនអន្តោប្រវេសន៍ដែលប៉ូលិសថៃឃាត់ខ្លួននៅភាគខាងត្បូងមិនមែនជាជនជាតិខ្មែរទេ
ស្របពេលព័ត៌មានទាក់ទងនឹងការឃាត់ខ្លួនពលករខ្មែរដែលព្យាយាមចូលទៅកាន់ប្រទេសថៃដោយខុសច្បាប់ បានកើតឡើងជារឿយៗនោះ វីដេអូឃ្លីបមួយដែលបង្ហាញមនុស្សមួយក្រុមលាក់ខ្លួននៅក្នុងរថយន្តមួយ ត្រូវបានបង្ហោះឡើងនៅលើបណ្ដាញសង្គមជាមួយសំណេរថា មនុស្សដែលត្រូវអាជ្ញាធរថៃចាប់ខ្លួននោះ គឺជាពលរដ្ឋខ្មែរចំណាកស្រុកទៅប្រទេសថៃ។ វីដេអូឃ្លីបភ្ជាប់នឹងការអះអាងនេះ ត្រូវបានចែកចាយ និងបង្ហោះយ៉ាងផុសផុលនាពេលថ្មីៗនេះ។ ទោះជាយ៉ាងណា Fact Crescendo Cambodia បានរកឃើញថា ការអះអាងនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី២២ ខែមីនា ឆ្នាំ២០២៤កន្លងទៅថ្មីៗនេះ ទំព័រហ្វេសប៊ុកមួយ បានបង្ហោះវីដេអូឃ្លីបបង្ហាញទិដ្ឋភាពនៃការរកឃើញមនុស្សមួយក្រុមបានលាក់ខ្លួននៅក្នុងរថយន្ត។ ទំព័រហ្វេសប៊ុកដដែលនេះ បានរៀបរាប់ក្នុងន័យថា មនុស្សដែលតម្រួតថៃឃាត់ខ្លួននោះ គឺជាពលករខ្មែរដែលព្យាយាមឆ្លងដែនចូលក្នុងប្រទេសថៃដោយខុសច្បាប់។
ទំព័រហ្វេសប៊ុកខាងលើ ពុំបានបញ្ជាក់ព័ត៌មានលម្អិតនៃហេតុការណ៍ និងទីតាំងដែលបានកើតឡើងនោះឡើយ ដែលនេះធ្វើឲ្យអ្នកប្រើប្រាស់នៅតាមបណ្ដាញសង្គម បានចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជាវីដេអូឃ្លីបទាំងស្រុង ដែលបានបង្ហោះដោយទំព័រហ្វេសប៊ុកខាងលើ ដែលបានសរសេរថា «ឃើញហើយគួរអោយសង្វេគជាតិសាសន៍ខ្ញុំ😫🥺»។
វីដេអូឃ្លីបភ្ជាប់ដោយការអះអាងបែបនេះ ត្រូវបានបង្ហោះ និងរកឃើញនៅលើបណ្ដាញសង្គមហ្វេសប៊ុក ជាច្រើនទៀតផងដែរ។ សូមមើលខ្លឹមសារអះអាងទាំងស្រុង តាមរយៈតំណភ្ជាប់មាននៅទីនេះ (archived link) និងតំណភ្ជាប់មួយទៀតនៅទីនេះ (archived link)។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះ តាមរយៈការដំណើរការកម្មវិធី Google Reverse Image Search ដែលនាំយើងរកឃើញការពិតដូចខាងក្រោម។
ទិដ្ឋភាពមនុស្សមួយក្រុម ដែលត្រូវបានឃាត់ខ្លួនដោយអាជ្ញាធរប៉ូលីសថៃ ត្រូវបានរកឃើញ និងផ្សព្វផ្សាយនៅលើគេហទំព័រសារព័ត៌មាន Khaosod កាលពីថ្ងៃទី១៧ ខែធ្នូ ឆ្នាំ២០២៣កន្លងទៅ ដោយបានបញ្ជាក់នៅក្នុងអត្ថបទរបស់ខ្លួនថា ទិដ្ឋភាពនោះ គឺជាការរកឃើញ និងឃាត់ខ្លួនជនអន្ដោប្រវេសន៍មីយ៉ាន់ម៉ាខុសច្បាប់ចំនួន ៧នាក់ ដែលបានលាក់ខ្លួននៅក្នុងរថយន្តមួយគ្រឿង ដើម្បីលួចចូលមកកាន់ប្រទេសថៃ។
គេហទំព័រសារព័ត៌មានដដែលខាងលើ ពុំបានអះអាង និងបញ្ជាក់ថា គឺជាពលករខ្មែរនោះឡើយ។
ខាងក្រោមនេះ គឺជារូបភាពផ្ដាម សរសេររៀបរាប់ជាភាសាថៃ ឬប្រែសម្រួលជាភាសាខ្មែរថា «ពលករមីយ៉ាន់ម៉ាខុសច្បាប់ លាក់ខ្លួនក្នុងធុងផ្លែឈើ ត្រូវបានឆែកឆេររកឃើញដោយអាជ្ញាធរថៃ ក្នុងខេត្តតាក»។
Khaosod News Report | Archived Link
ករណីខាងលើនេះ ក៏ត្រូវបានរាយការណ៍ដោយស្ថាប័នសារព័ត៌មានក្នុងស្រុកថៃ Matichon ផងដែរ កាលពីថ្ងៃទី១៧ ខែធ្នូ ឆ្នាំ២០២៣កន្លងទៅ ដោយពុំបានបង្ហាញថា ករណីនេះ គឺជាពលករជនជាតិខ្មែរនោះទេ។
ខាងក្រោមនេះ គឺជារូបភាពផ្ដាមចេញពីគេហទំព័រសារព័ត៌មានខាងលើ បានបង្ហាញទិដ្ឋភាពអាជ្ញាធរថៃ បានរកឃើញជនអន្តោប្រវេសន៍មីយ៉ាន់ម៉ា ដែលបានលាក់ខ្លួននៅក្នុងធុងផ្លែឈើ។
Matichon News Report | Archived Link
ខាងក្រោមនេះ គឺជាវីដេអូឃ្លីបទាំងស្រុង ដែលបានបង្ហោះដោយស្ថានីយទូរទស្សន៍ថៃ PPTV HD 36 ដែលបានបញ្ជាក់ថា ពលករមីយ៉ាន់ម៉ាខុសច្បាប់ នៅតែបន្តលួចចូលក្នុងប្រទេសថៃតាមមធ្យោបាយផ្សេងៗ។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok WhatsApp
សន្និដ្ឋាន
Fact Crescendo Cambodia រកឃើញថាវីដេអូឃ្លីប និងការលើកឡើងដោយទំព័រហ្វេសប៊ុកខាងលើនោះ គឺធ្វើឲ្យមានការយល់ច្រឡំ។ ច្បាប់ដើមនៃវីដេអូឃ្លីបនេះ គឺជាទិដ្ឋភាពនៃការឃាត់ខ្លួនជនអន្តោប្រវេសន៍មីយ៉ាន់ម៉ា ពីសំណាក់អាជ្ងាធរថៃ ក្នុងភូមិសាស្ដ្រខេត្ត Tak កាលពីខែធ្នូ ឆ្នាំ២០២៣កន្លងមក។
