បន្ទាប់ពីវីដេអូកីឡាការិនីកម្ពុជា ប៊ូ សំណាង តស៊ូរត់ក្រោមដំណក់ទឹកភ្លៀងនៅក្នុងព្រឹត្តិការណ៍ប្រកួតកីឡាស៊ីហ្គេម ទទួលបានការចាប់អារម្មណ៍ខ្លាំងពីមហាជនរួចមក ការអះអាងមួយបាននិយាយថា កីឡាការិនីរូបនេះ បានទទួលមេដាយមាសយ៉ាងលំបាក។ ការអះអាងនេះ ត្រូវបានចែកចាយ និងប្រតិកម្មជាច្រើនយ៉ាងផុសផុលនាពេលថ្មីៗនេះ។ ទោះជាយ៉ាងណា Fact Crescendo Cambodia រកឃើញថា ការអះអាងខាងលើ មិនត្រឹមត្រូវនោះឡើយ។
ការអះអាងលើបណ្តាញសង្គម
ការអះអាងមួយកាលពីថ្ងៃចន្ទកន្លងមកនេះ បានលើកឡើងថា អត្តពលិករត់ប្រណាំងកម្ពុជា ប៊ូ សំណាង បានឈ្នះមេដាយមាស បន្ទាប់ពីនាងតស៊ូរត់នៅក្រោមដំណក់ទឹកភ្លៀងនៅក្នុងការប្រកួតវិញ្ញាសាររត់ចម្ងាយ ៥,០០០ម៉ែត្រ។
ការអះអាងដដែលនេះ ក៏បានបង្ហោះនូវរូបថត ៣សន្លឹក ដែលបង្ហាញអត្តពលិក ប៊ូ សំណាង រត់នៅក្រោមដំណក់ទឹកភ្លៀង និងមានទឹកមុខយំ នៅឯទីលានរត់ប្រណាំង។
ការអះអាងបែបនេះ ត្រូវបានចែករំលែកបន្តរហូតដល់ទៅជាង ១ម៉ឺនដងពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរ ហើយក៏មានការបញ្ចេញមតិចោទសួរពីភាពត្រឹមត្រូវនៃការអះអាង និងរូបថតនេះផងដែរ។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គម កាលពីថ្ងៃទី០៩ ខែឧសភា ដែលរៀបរាប់ថា «ប្អូនស្រី ប៊ូ សំណាង ទទួលបានមេដៃមាសយ៉ាងលំបាកក្នុងការរត់ប្រណាំង ៥,០០០ម៉ែត្រក្រោមដំណក់ភ្លៀង»។
ការអះអាងបែបនេះ ក៏ត្រូវបានផ្សព្វផ្សាយព្រោងព្រាតលើបណ្ដាញសង្គមហ្វេសប៊ុក ពីសំណាក់អ្នកប្រើប្រាស់បណ្ដាញសង្គមផ្សេងទៀតផងដែរ។ សូមមើលខ្លឹមសារទាំងស្រុងតាមរយៈតំណភ្ជាប់នៅទីនេះ ១ (archived), ២ (archived), ៣ (archived)។
ការត្រួតពិនិត្យការពិត
Fact Crescendo Cambodia ចាប់ផ្ដើមត្រួតពិនិត្យទៅលើរូបភាពផ្ដាម និងការអះអាងនេះតាមរយៈ Google Reverse Image Search និងព័ត៌មាននានា ដែលនាំឱ្យយើងរកឃើញការពិតដូចខាងក្រោមនេះ។
ទិដ្ឋភាពការប្រកួតលើវិញ្ញាសារត់ចម្ងាយ ៥,០០០ម៉ែត្រ នៅពហុកីឡដ្ឋានជាតិមរតកតេជោកាលពីថ្ងៃទី០៨ ខែឧសភា ឆ្នាំ២០២៣កន្លងទៅ ត្រូវបានបង្ហោះ និងផ្សព្វផ្សាយដោយសារព័ត៌មាន Channel News Asia (CNA)។
វីដេអូឃ្លីប ខាងក្រោមនេះ បានបង្ហាញទិដ្ឋភាពកីឡាការិនីវៀតណាម Nguyen Thi Oanh បានបញ្ជប់ទីក្នុងលំដាប់លេខរៀងទី១ ជាមួយនឹងថិរវេលាសរុបប្រមាណ ១៧នាទី ខណៈដែលកីឡាការិនីកម្ពុជា ប៊ូ សំណាង បានមកដល់ទីផ្ដាច់ព្រ័ត្រចុងក្រោយគេបង្អស់ស្ថិតនៅលំដាប់លេខរៀងទី១១ ដោយប្រើប្រាស់ថរិវេលាសរុបជិត ២៣នាទី។
CNA News Report | Archived Link
វីដេអូឃ្លីប ខាងក្រោម ក៏បានបង្ហាញទិដ្ឋភាពទាំងស្រុងនៃការប្រកួតវិញ្ញាសារត់ចម្ងាយ ៥,០០០ម៉ែត្រ ដែលកីឡាការិនីកម្ពុជា ប៊ូ សំណាង បានបញ្ជប់ទី ក្នុងលំដាប់លេខរៀងទី១១ ដោយម្ចាស់ជ័យលាភីមេដាយមាសបានទៅលើកីឡាការិនីវៀតណាម Nguyen Thi Oanh ដែលបានបញ្ជប់ទីក្នុងថិរវេលាប្រមាណ ១៧នាទី។
ដូចគ្នានេះដែរ ទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន សែន បានបញ្ជាក់ថា កីឡាការិនីកម្ពុជារូបនេះ មិនជាប់នៅក្នុងចំណាត់ទទួលបានមេដាយនោះឡើយ ប៉ុន្តែ លោកបានប្រកាសផ្ដល់ប្រាក់ ១ម៉ឺនដុល្លារដើម្បីលើកទឹកចិត្ត សម្រាប់ការតាំងចិត្តខ្ពស់របស់នាង។
ខាងក្រោមនេះ គឺជារូបភាពផ្ដាមចេញពីទំព័រហ្វេសប៊ុកលោក ហ៊ុន សែន ដែលរៀបរាប់ថា «រឿងដែលគួរឲ្យចាប់អារម្មណ៍ គឺកីឡាការិនី ប៊ូ សំណាង រត់ក្រោមដំណក់ទឹកភ្លៀងរហូតដល់ទីបញ្ចប់ ទោះបីជាខ្លួនមិនជាប់ចំណាត់ថ្នាក់ក៏ដោយ»។
បើទោះបីជាមិនជាប់ចំណាត់សម្រាប់មេដាយណាមួយក្ដី កីឡាការនី ប៊ូ សំណាង ទទួលបានការចាប់អារម្មណ៍ចំពោះការប្រឹងប្រឹង និងការតាំងចិត្តរបស់នាងមិនបោះបង់ការរត់ប្រណាំងនៅក្រោមដំណក់ភ្លៀងខ្យល់។
ខាងក្រោមនេះ គឺជាវីដេអូនៃការរត់របស់កីឡាការិនីកម្ពុជា ប៊ូ សំណាង នៅក្រោមដំណក់ភ្លៀង បើទោះបីជាបញ្ចប់ទីចុងក្រោយគេក៏ដោយ ហើយសកម្មភាពរបស់នាងត្រូវបានចុះផ្សាយដោយសារព័ត៌មានអាមេរិក Time។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថា ការអះអាងខាងលើ មិនត្រឹមត្រូវនោះឡើយ។ ការពិត កីឡាការិនីកម្ពុជា ប៊ូ សំណាង មិនបានទទួលមេដាយមាសក្នុងវិញ្ញាសាររត់ចម្ងាយ ៥,០០០ម៉ែត្រនៅក្នុងការប្រកួតស៊ីហ្គេមលើកទី៣២ នៅកម្ពុជា ដូចការអះអាងនោះឡើយ ដោយនាងបានបញ្ជប់ទីនៅលំដាប់លេខរៀងទី១១។
Title:កីឡាការិនីកម្ពុជា ប៊ូ សំណាង មិនបានឈ្នះមេដាយមាសដូចការអះអាងនោះឡើយ
Fact Check By: Kakada SimResult: Misleading
