លោក សម រង្ស៊ី ដែលជាអតីតប្រធានគណបក្សសង្រ្គោះជាតិដែលធ្លាប់ទទួលបានអាសនៈចំនួន៥៥ នៅក្នុងចំណោមអាសនៈរដ្ឋសភាសរុបទាំង១២៣ ក្នុងការបោះឆ្នោតជាតិឆ្នាំ២០១៣ នោះ បានកំពុងរស់នៅនិរទេសខ្លួនចាប់តាំងពីឆ្នាំ២០១៥មក ដោយតែងតែត្រូវបានគេរិះគន់ និងវាយបកជារឿយៗពីសំណាក់ថ្នាក់ដឹកនាំរដ្ឋាភិបាល និងអ្នកគាំទ្រគណបក្សប្រជាជនកម្ពុជា។
ក្នុងចំណោមនោះ រូបថតមួយសន្លឹកដែលបានបង្ហាញអំពីទិដ្ឋភាពរូបលោកអតីតប្រធានគណបក្សសង្គ្រោះជាតិ លោក សម រង្ស៊ី កំពុងអង្គុយកាន់ដៃក្បែរនឹងសត្វឆ្កែ និងបុរសម្នាក់កំពុងតែដេកនៅលើដី ត្រូវបានអ្នកប្រើប្រាស់ម្នាក់យកមកបង្ហោះ និងចែកចាយយ៉ាងផុសផុលនៅលើបណ្តាញសង្គមហ្វេសប៊ុក។
ទោះជាយ៉ាងណា ការត្រួតពិនិត្យការពិត និងផ្ទៀងផ្ទាត់របស់ក្រុមការងារ Fact Crescendo Cambodia បានរកឃើញថា រូបថតដែលអ្នកប្រើប្រាស់បានបង្ហោះនៅលើបណ្តាញសង្គមនោះ គឺជារូបថតកែច្នៃ។
ការអះអាងលើបណ្តាញសង្គម
កាលពីថ្ងៃ១៧ ខែកញ្ញា ឆ្នាំ២០២១កន្លងទៅថ្មីៗនេះ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹកដែលបានបង្ហាញអំពីទិដ្ឋភាពរូបលោកអតីតប្រធានគណបក្សសង្គ្រោះជាតិ លោក សម រង្ស៊ី កំពុងអង្គុយកាន់ដៃក្បែរនឹងសត្វឆ្កែ និងបុរសកំពុងតែដេកម្នាក់។ រូបថតនេះ ត្រូវបានបញ្ចេញប្រតិកម្មចម្រុះ និងចែកចាយតៗគ្នាជាច្រើនដងផងដែរ ពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ។
ខាងក្រោមនេះ គឺជារូបភាពផ្តាមចេញពីប៉ុស្តិ៍របស់អ្នកប្រើប្រាស់ដែលបានសរសេររៀបរាប់ថា «ផ្តាំអោយ[ឲ្យ]ហើយវើយ ចាប់ពីពេលនេះតទៅ មុននិងធ្វើអ្វីមួយ ដែលជាទង្វើក្បត់ជាតិតពូជរបស់អាឯង ឯងត្រូវតែចេះគិតពី តម្លៃខ្លួនឯងផង ថាតើវាបច្ចុប្បន្ននេះ តម្លៃខ្លួនអាវាថោកជាងសត្វឆ្កែ ឬក៏មានតម្លៃប្រហាក់ប្រហែលនឹងសត្វឆ្កែ បានជាឃើញចេះតែព្រុសៗ ម្តងធ្វើនេះម្តងធ្វើនោះ តែទីបញ្ចប់ក្រុមនៃចលនាក្បត់ជាតិ របស់ពពួកអាអស់ឯង គឺច្បាប់ត្រូវតែចាត់ការដោយគ្មានការលើកលែងឡើយ #ងើបមួយចាប់មួយ ព្រោះគ្រប់ប្រទេសលើលោកនេះ គ្មានប្រទេសណាមួយ គេទុកអោយ[ឲ្យ]ក្រុមឧទ្ទាមក្បត់ជាតិ រស់ក្រៅសំណាញ់ច្បាប់ឡើយ»។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាល់លើរូបថតមួយសន្លឹកនេះ តាមរយៈការដំណើរការកម្មវិធីស្វែងរករូបថតរបស់ក្រុមហ៊ុន Google ដែលនាំឱ្យយើងជួបប្រទះនូវប្រភព និងខ្លឹមសាររូបថតនៃច្បាប់ដើមមួយចំនួន។
កាលពីថ្ងៃទី១៥ ខែកញ្ញា ឆ្នាំ២០១៥កន្លងទៅនេះ តាមរយៈគេហទំព័រសារព័ត៌មាន Khmer Load បានធ្វើការចុះផ្សាយនូវព័ត៌មានមួយដែលមានចំណងជើងថា «ហួសចិត្ត! ឆ្កែដេកលើប៉ៅអ៊ី ឯម្ចាស់ស្រវឹង ដេកនៅលើដី»។ រូបថតមួយសន្លឹកនេះ ក៏ត្រូវបានយកមកបង្ហាញនៅក្នុងកម្មវិធីព័ត៌មានពេលព្រឹករបស់ប៉ុស្តិ៍ទូរទស្សន៍ហង្សមាសផងដែរ កាលពីថ្ងៃទី១៥ ខែកញ្ញា ឆ្នាំ២០១៥កន្លងទៅ។
ខាងក្រោមនេះ គឺជារូបភាពផ្តាមចេញពីគេហទំព័រដែលពុំបានបង្ហាញនូវទិដ្ឋភាពរូបរបស់លោក សម រង្ស៊ី កំពុងអង្គុយនោះឡើយ។
Khmer Load News Report | Archived Link
តើបច្ចុប្បន្នលោក សម រង្ស៊ី កំពុងស្ថិតនៅទីណា?
អតីតប្រធានគណបក្សសង្គ្រោះជាតិលោក សម រង្ស៊ី បច្ចុប្បន្ននេះកំពុងស្ថិតនៅលើទឹកដីសហរដ្ឋអាមេរិក ដោយលោកបានចាកចេញពីប្រទេសបារាំងឆ្ពោះទៅសហរដ្ឋអាមេរិកដើម្បីជួបមន្ត្រីសហរដ្ឋអាមេរិក និងក្រុមអ្នកគាំទ្រគណបក្សរបស់ខ្លួនកាលពីខែសីហាកន្លងទៅនេះ។
ថ្មីៗនេះ លោកក៏បានបង្ហោះនូវរូបថតមួយសន្លឹកជាមួយនឹងមន្ត្រីសហរដ្ឋអាមេរិក ដោយភ្ជាប់ជាមួយនឹង ការសរសេររៀបរាប់ថា «សកម្មភាពលោក សម រង្សុី នៅរដ្ឋធានី វ៉ាស៊ីនតោន សហរដ្ឋអាមេរិក ថ្ងៃ២៨ កញ្ញា ២០២១នេះ»។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News
សន្និដ្ឋាន
Fact Crescendo Cambodia បានរកឃើញថា រូបថតដែលបានបង្ហោះដោយអ្នកប្រើប្រាស់ខាងលើនោះ គឺពិតជាមិនត្រឹមត្រូវនោះឡើយ។ រូបថតមួយសន្លឹកនេះ ត្រូវបានកាត់តមុននឹងបង្ហោះនៅលើបណ្តាញសង្គម។ ការពិត ច្បាប់ដើមនៃរូបថតនេះ គឺជាទិដ្ឋភាពបុរសម្នាក់ដែលស្រវឹងដេកនៅលើដី ខណ:ដែលសត្វឆ្កែមួយក្បាលកំពុងតែដេកនៅលើប៉ៅអ៊ី។ រូបថតនេះពុំបានបង្ហាញនូវរូបរបស់លោក សម រង្ស៊ី កំពុងអង្គុយនោះទេ។
Title:រូបថតមេដឹកនាំបក្សប្រឆាំង លោក សម រង្ស៊ី អង្គុយក្បែរសត្វឆ្កែដេកលើកៅអី គឺជារូបថតកាត់ត
Fact Check By: Kakada SimResult: Altered
