រូបថតលោក ពូទីន ជាប់ខ្នោះដៃ គឺជារូបភាពកាត់តតែប៉ុណ្ណោះ
រូបថត និងវីដេអូឃ្លីបនានាជាច្រើនទាក់ទងទៅនឹងសង្រ្គាមរុស្ស៊ី-អ៊ុយក្រែន ត្រូវបានបង្ហោះនៅលើបណ្ដាញសង្គមចាប់តាំងពីសង្គ្រាមបានផ្ទុះឡើងកាលពីជាង ១ឆ្នាំមុន ដោយក្នុងនោះមានទាំងរូបថត និងវីដេអូមិនត្រឹមត្រូវផងដែរ។ ទន្ទឹមនោះ រូបថតមួយសន្លឹកដែលបង្ហាញលោក ពូទីន ស្ថិតនៅក្នុងឈុតសម្លៀកបំពាក់ទាហាន និងដៃជាប់ខ្នោះនោះ ត្រូវបានបង្ហោះនៅលើគណនីហ្វេសប៊ុករបស់អ្នកប្រើប្រាស់ម្នាក់ ដោយមានការចែកចាយ និងប្រតិកម្មជាច្រើនដង។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia បានរកឃើញថា រូបថតនេះ ត្រូវបានកាត់ត។
ការអះអាងលើបណ្ដាញសង្គម
កាលពីថ្ងៃទី៣១ ខែមិថុនា ឆ្នាំ២០២៣កន្លងទៅនេះ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹកដែលបង្ហាញ ប្រធានាធិបតីរុស្ស៊ី លោក ពូទីន ក្នុងសម្លៀកបំពាក់ជាទាហាន ត្រូវបានចាប់ខ្លួន និងដៃជាប់ខ្នោះផងដែរ។
ការបង្ហោះរូបថតខាងលើនេះ ត្រូវបានអ្នកប្រើប្រាស់បណ្ដាញសង្គមចែករំលែកជាច្រើនដង រួមជាមួយការបញ្ចេញមតិ និងប្រតិកម្មចម្រុះបែបផងដែរ។
ខាងក្រោមនេះ គឺជារូបភាពផ្ដាមចេញពីគណនីហ្វេសប៊ុកអ្នកប្រើប្រាស់ខាងលើ ដែលបានសរសេររៀបរាប់ថា «ដឹងថា អានេះជាមនុស្សចង្រៃហើយ នៅមានអាភ្លើគាំទ្រទៀត»។
រូបថតដដែលនេះ ក៏ត្រូវបានបង្ហោះនៅលើបណ្ដាញសង្គមដទៃទៀតផងដែរ។ ខាងក្រោមនេះ គឺជារូបភាពផ្ដាមចេញពីការបង្ហោះរូបថតនេះនៅលើបណ្ដាញសង្គម Twitter ជាមួយការអះអាងថា មេដឹកនាំរុស្ស៊ី លោក ពូទីន ត្រូវបានគេចាប់ខ្លួននៅពេលលោកធ្វើដំណើរបំពេញទស្សនកិច្ចដ៏គួរឱ្យភ្ញាក់ផ្អើលមួយនៅទីក្រុងគៀវ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះ តាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោម។
រូបថតមួយសន្លឹកដែលបង្ហាញបុរសម្នាក់ស្ថិតក្នុងឯកសណ្ឋានយោធា និងដៃជាប់ខ្នោះនោះ ត្រូវបានរកឃើញនៅលើគេហទំព័រ Alamy ដែលបញ្ជាក់ឱ្យដឹងថា មិនមែនជាមេដឹកនាំរុស្ស៊ី លោក វ៉្លាឌីមៀរ ពូទីន ដូចការអះអាងខាងលើនោះឡើយ។
បើតាមគេហទំព័រដដែលនេះ បុរសដែលដៃជាប់ខ្នោះនោះ គឺជាលោក Viktor Medvedchuk ជាអ្នកនយោបាយអ៊ុយក្រែនមួយរូប ដែលត្រូវបានចាប់ខ្លួន និងចោទប្រកាន់ពីបទក្បត់ជាតិ ដោយសារតែលោកមានទំនោរគាំទ្រសង្គ្រាមឈ្លានពានរបស់រុស្ស៊ី។
ខាងក្រោមនេះ គឺជារូបភាពផ្ដាមចេញពីគេហទំព័រ Alamy ដែលសរសេររៀបរាប់ថា ភ្នាក់ងារសន្តិសុខជាតិអ៊ុយក្រែន បានចាប់ខ្លួន លោក Viktor Medvedchuk ដែលបានរត់គេចខ្លួននៅក្រោមការសង្ស័យថាបានក្បត់ជាតិ។
ការចាប់ខ្លួនអ្នកនយោបាយមានទំនោរទៅរករុស្ស៊ីរូបនេះ ក៏ត្រូវបានផ្សព្វផ្សាយផងដែរនៅសារព័ត៌មានអន្ដរជាតិធំៗដូចជា សារព័ត៌មានអង់គ្លេស BBC និងសារព័ត៌មានអារ៉ាប់ Al Jazeera។ សូមអានខ្លឹមសារលម្អិតនៃសេចក្ដីរាយការណ៍របស់ BBC នៅទីនេះ (Archived Link) និងសេចក្ដីរាយការណ៍របស់ Al Jazeera នៅទីនេះ (Archived Link)។
បើតាមសេចក្ដីរាយការណ៍របស់សារព័ត៌មាន Al Jazeera អ្នកនយោបាយអ៊ុយក្រែនរូបនេះ ត្រូវបានចោទប្រកាន់ដោយរដ្ឋាភិបាលក្រុងគៀវពីបទក្បត់ជាតិ លួចលក់កិច្ចការសម្ងាត់ខាងយោធាទៅឱ្យរុស្ស៊ី និងលួចធនធានធម្មជាតិនៅក្នុងឧបទ្វីបគ្រីមេ (Crimea)។ សូមអានខ្លឹមសារលម្អិតនៅទីនេះ។
ខាងក្រោមនេះ គឺជាការប្រៀបធៀបគ្នារវាងរូបថតដែលត្រូវបានកាត់ត និងរូបថតច្បាប់ដើមដែលត្រូវបានរកឃើញផ្សព្វផ្សាយនៅលើបណ្តាញសង្គម។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok
សន្និដ្ឋាន
Fact Crescendo Cambodia បានរកឃើញថា រូបថតដូចដែលបានរៀបរាប់ខាងលើនេះ គឺជារូបថតកាត់ត។ រូបថតច្បាប់ដើម បង្ហាញពីការចាប់ខ្លួនលោក Viktor Medvedchuk ពីសំណាក់កម្លាំងសន្តិសុខពិសេសអ៊ុយក្រែន។ អ្នកនយោបាយអ៊ុយក្រែនរូបនេះ ដែលមានទំនោរទៅរករុស្ស៊ីនោះ បានរត់គេចខ្លួនក្រោមការសង្ស័យថាបានក្បត់ជាតិ មុននឹងត្រូវបានចាប់ខ្លួន។
Title:រូបថតលោក ពូទីន ជាប់ខ្នោះដៃ គឺជារូបភាពកាត់តតែប៉ុណ្ណោះ
Written By: Kakada SimResult: Altered
