ប៉ុន្មានថ្ងៃថ្មីៗនេះ សារព័ត៌មាននានាបានចុះផ្សាយថា ភពទាំង៥នឹងធ្វើដំណើរស្ថិតនៅលើអ័ក្សតែមួយ ឬស្ថិតនៅតម្រៀបជួរគ្នានៅព្រឹកថ្ងៃសុក្រម្សិលមិញនេះ។ បន្ទាប់មក រូបថតមួយសន្លឹកដែលបង្ហាញនូវដំណើរគោចរនៃភពមួយដងមានពន្លឺផងនោះ ត្រូវបានបង្ហោះនៅលើបណ្ដាញសង្គម ហើយត្រូវបានអះអាងថា ជាទិដ្ឋភាពនៃភពទាំង៥ស្ថិតនៅតម្រៀបជួរគ្នា។ រូបថត និងការអះអាងនេះ ត្រូវបានចែករំលែកបន្តរហូតដល់ជាង ២០០ដង ហើយមានអ្នកប្រើប្រាស់បណ្ដាញសង្គមជាច្រើន បានបញ្ចេញមតិ និងប្រតិកម្មនឹងការអះអាងនេះ។ ទោះជាយ៉ាងណា ក្រោយការផ្ទៀងផ្ទាត់របស់យើង យើងរកឃើញថា ការអះអាងទៅលើរូបថតនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹកនៅលើបណ្ដាញសង្គម ដែលរូបថតនោះបង្ហាញឱ្យឃើញភពមួយបញ្ចេញពន្លឺមួយចំនិតម្ដងៗស្ថិតនៅលើទីលំហរអាកាសក្នុងពេលរាត្រី។ អ្នកប្រើប្រាស់បណ្ដាញសង្គមដដែលនេះ អះអាងថា រូបថតមួយសន្លឹកនេះ គឺជាភពទាំងប្រាំដែលធ្វើដំណើរគោចរតម្រៀបគ្នាជាជួរក្នុងពេលតែមួយនៅព្រឹកថ្ងៃទី២៤ ខែមិថុនានេះ។
ការអះអាងទៅលើរូបថតនេះ ត្រូវបានចែករំលែកជាច្រើនដងពីសំណាក់អ្នកប្រើប្រាស់បណ្ដាញសង្គមហ្វេសប៊ុក ខណៈអ្នកប្រើប្រាស់ហ្វេសប៊ុកជាច្រើនទៀត បានបញ្ចេញប្រតិកម្ម និងមតិចម្រុះបែបទៅនឹងការអះអាងនេះ។
ខាងក្រោមនេះ គឺជារូបភាពផ្ដាមចេញពីសំណេរនៅលើបណ្ដាញសង្គមនៅថ្ងៃសុក្រនេះ ដែលអះអាងថា «ភពទាំង៥កោះប្រជុំម៉ោង៤ទៀបភ្លឺ ២៤.៦.២២»។
ការអះអាងដដែលនេះ ក៏ត្រូវបានចែករំលែកទៅក្នុងក្រុមបណ្ដាញសង្គមហ្វេសប៊ុកមួយផងដែរ ដែលមានគណនីហ្វេសប៊ុកដល់ជិត ៣សែនជាសមាជិកនៅក្នុងក្រុមនោះទៀតផងដែរ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះតាមរយៈ Google Reverse Image Search ដែលនាំយើងរកការពិតដូចខាងក្រោមនេះ។
តាមរយៈ Google Reverse Image Search យើងបានរកឃើញរូបថតនេះត្រូវបានបង្ហោះព្រោងព្រាតនៅលើបណ្ដាញអ៊ីនធឺណិតជាច្រើនឆ្នាំកន្លងមកហើយ ជាពិសេសបណ្ដាញសង្គម Pinterest ប៉ុន្តែ មិនមែនថ្ងៃទី២៤ ខែមិថុនា ក្នុងឆ្នាំនេះទេ។
Fact Crescendo Cambodia បានស្វែងរកប្រភពដើម និងព័ត៌មានលម្អិតនៃរូបថតនេះ ដោយបានរកឃើញរូបថតនេះនៅលើបណ្ដាញសង្គម Pinterest ដែលរៀបរាប់ថា រូបថតនេះគឺជាទិដ្ឋភាពសូរ្យគ្រាសដែលផ្ដិតបាននៅទីក្រុងតូក្យូ។
Pinterest Post | Archived Link
ការបង្ហោះរូបថតនៅលើបណ្ដាញសង្គមមួយនេះ បានបង្ហាញឱ្យឃើញថា រូបថតនេះត្រូវបានយកចេញពីគេហទំព័រ 500px ជាបណ្ដាញសង្គមចែករំលែករូបថត។
បើតាមបណ្ដាញសង្គមមួយនេះ យើងបានរកឃើញថា រូបថតមួយសន្លឹកនេះ គឺជាទិដ្ឋភាពសូរ្យគ្រាសនៅទីក្រុងតូក្យូកាលពី ១០ឆ្នាំមុន ដែលថតដោយមនុស្សម្នាក់ឈ្មោះថា Yoshi Sekey។
គេហទំព័រ Guillaume Erard បានដឹងថា ហេតុការណ៍សូរ្យគ្រាស ឬដំណើរគោចររបស់ព្រះចន្ទស្ថិតនៅចន្លោះព្រះអាទិត្យ និងផែនដីនេះ បានកើតឡើងប្រទេសជប៉ុនកាលពីថ្ងៃទី១២ ខែឧសភា ឆ្នាំ២០១២កន្លងមក។
Guillaume Erard | Archived Link
រូបថតមួយសន្លឹកនេះ ក៏ត្រូវបានក្រុមការងារត្រួតពិនិត្យការពិតនៅក្នុងប្រទេសស្រីលង្កា ផ្ទៀងផ្ទាត់រួចហើយដែរកាលពីចុងឆ្នាំ២០១៩កន្លងមក បន្ទាប់ពីមានការអះអាងនៅលើបណ្ដាញសង្គមថា រូបថតមួយសន្លឹកនេះ គឺជាទិដ្ឋភាពសូរ្យគ្រាសដែលគេមើលឃើញ និងផ្ដិតរូបភាពបាននៅក្នុងប្រទេសស្រីលង្កា និងឥណ្ឌា។
ប៉ុន្តែ ក្រុមការងារត្រួតពិនិត្យការពិតរបស់យើង បានរកឃើញថា រូបថតទិដ្ឋភាពសូរ្យគ្រាសនេះ ត្រូវបានផ្ដិតយកនៅទីក្រុងតូក្យូកាលពីឆ្នាំ២០១២កន្លងមក មិនមែនជាទិដ្ឋភាពសូរ្យគ្រាសកើតឡើងនៅស្រីលង្កា និងឥណ្ឌានោះឡើយ។
សម្រាប់សេចក្ដីលម្អិត សូមចូលទៅអានអត្ថបទមានចំណងជើងជាភាសាអង់គ្លេសថា Image From December 26 Solar Eclipse?
ទស្សនាវដ្ដី Science Focus របស់សារព័ត៌មាន BBC បានឱ្យដឹងថា ភពទាំង ៥ មានភពពុធ (Mercury) ភពសុក្រ (Venus) ភពអង្គារ (Mars) ភពព្រហស្បតិ៍ (Jupiter) និងភពសៅរ៍ (Saturn) បានធ្វើដំណើរនៅលើគន្លងរបស់ពួកគេមកដល់អ័ក្សតែមួយ ឬស្ថិតនៅតម្រៀបជួរគ្នា នៅមុនថ្ងៃរះព្រឹកថ្ងៃទី២៤ ខែមិថុនា ឆ្នាំ២០២២នេះ។
បើតាមទស្សនាវដ្ដីដដែលនេះ គេអាចមើលឃើញដោយភ្នែកទទេរនូវទិដ្ឋភាពភពទាំង៥ស្ថិតនៅតម្រៀបជួរគ្នាបាននៅម៉ោង ៤ និង ១០នាទីព្រឹក ថ្ងៃទី២៤ ខែមិថុនា ប៉ុន្តែ យើងអាចមើលឃើញក្នុងលក្ខណៈជាផ្កាយបញ្ចេញពន្លឺភ្លឺតែប៉ុណ្ណោះ ដោយសារតែភពនីមួយៗស្ថិតនៅចម្ងាយឆ្ងាយពីភពផែនដី។
សម្រាប់ព័ត៌មានលម្អិត សូមចូលទៅអានអត្ថបទរបស់គេហទំព័រ Science Focus មានចំណងជើងថា Rare five-planet alignment to dazzle the night sky ។
សន្និដ្ឋាន
Fact Crescendo Cambodia រកឃើញថា ការអះអាងខាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ រូបថតដូចដែលត្រូវបានរៀបរាប់ខាងលើនេះ មិនមែនជាទិដ្ឋភាពភពទាំង៥ស្ថិតនៅតម្រៀបគ្នា ឬស្ថិតនៅលើអ័ក្សតែមួយនោះឡើយ។ តាមការពិត រូបថតមួយសន្លឹកនេះ គឺជាទិដ្ឋភាពសូរ្យគ្រាសដែលកើតឡើងនៅទីក្រុងតូក្យូ ប្រទេសជប៉ុន កាលពី ១០ឆ្នាំមុន។
Title:តើរូបថតនេះជាទិដ្ឋភាពភពទាំងប្រាំរះឡើងតម្រៀបជួរគ្នាមែនឬទេ?
Fact Check By: Jay UdomResult: False
