តើលោក សម រង្ស៊ី ពិតជាបានស្លាប់ដូចគេអះអាងមែនឬ?

អតីតប្រធានគណបក្សប្រឆាំងដ៏ធំមួយនៅក្នុងប្រទេសកម្ពុជា លោក សម រង្ស៊ី ដែលបានទទួលបានសម្លេងគាំទ្រប្រមាណជាង ៥៥អាសនៈនៅក្នុងចំណោមអាសនៈសរុបទាំង១២៣នោះ បច្ចុប្បន្ន កំពុងរស់នៅនិរទេសខ្លួនចាប់តាំងពីឆ្នាំ២០១៥មក និងត្រូវបានគេរិះគន់ និងប្រតិកម្មជារឿយៗពីសំណាក់អ្នកគាំទ្រ និងថ្នាក់ដឹកនាំគណបក្សប្រជាជនកម្ពុជា។

ក្នុងចំណោមនោះ រូបថតមួយសន្លឹកបង្ហាញអំពីទិដ្ឋភាពរបស់លោកក្នុងសភាពដេកស្តូកស្តឹង ត្រូវបានបង្ហោះឡើងនៅក្នុងបណ្តាញសង្គមជាមួយនឹងការអះអាងថាលោកបានទទួលមរណភាពដោយបាតុភូតធម្មជាតិរន្ទះបាញ់នៅក្នុងប្រទេសបារាំង។

ទោះជាយ៉ាងណា ការត្រួតពិនិត្យការពិត និងផ្ទៀងផ្ទាត់របស់ក្រុមការងារ Fact Crescendo Cambodia បានរកឃើញថា រូបថត និងការអះអាងដែលអ្នកប្រើប្រាស់បានបង្ហោះនៅលើបណ្តាញសង្គមនោះ គឺមិនត្រឹមត្រូវនោះឡើយ។

ការអះអាងលើបណ្តាញសង្គម

កាលពីថ្ងៃទី០៩ ខែតុលា ឆ្នាំ២០២១កន្លងទៅថ្មីៗនេះ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតមួយសន្លឹក និងបានចែកចាយទៅក្នុងក្រុមហ្វេសប៊ុកដែលមានឈ្មោះថា «TV Sorn Dara» ដោយបានបង្ហាញនូវទិដ្ឋភាពរូបថតរបស់លោក សម រង្ស៊ី និងសំណេររៀបរាប់ថា រូបលោកបានទទួលមរណភាពបាត់ទៅហើយដោយសារតែបាតុភូតធម្មជាតិ។

រូបថតជាមួយនឹងសំណេរនេះ ត្រូវបានចែកចាយតៗគ្នាជាច្រើនដង រួមជាមួយនឹងប្រតិកម្ម និងការបញ្ចេញមតិចម្រុះពីសំណាក់អ្នកប្រើប្រាស់បណ្តាញសង្គមហ្វេសប៊ុកនិយាយភាសាខ្មែរផងដែរ។

រូបភាពផ្តាមចេញពីប៉ុស្តិ៍របស់អ្នកប្រើប្រាស់ដែលបានសរសេររៀបរាប់ថា «ព័ត៌មានទាន់ហេតុការណ៍ មុននេះបន្តិច អន្ទិតឡុងដែលជាដៃឆ្វេងរបស់លោកប៉ាធាន [ប្រធាន] សម រង្សុី បានប្រាប់ខ្ញុំអាស្ដេចខ្លាថា ភ្លៀងមួយមេនៅប្រទេសបារាំង ល្ងាចមិញនេះ លោក សម រង្ស៊ី ត្រូវបានរន្ទះបាញ់ស្លាប់បាត់បង់អាយុជីវិតហើយ..»។

Facebook Post | Archived Link

ការត្រួតពិនិត្យការពិត

Fact Crescendo Cambodia បានចាប់ផ្ដើមត្រួតពិនិត្យ និងផ្ទៀងផ្ទាត់លើរូបថតមួយសន្លឹកនេះ តាមរយៈការដំណើរការកម្មវិធីស្វែងរករូបថតរបស់ក្រុមហ៊ុន Google ដែលនាំឱ្យយើងជួបប្រទះនូវប្រភព និងខ្លឹមសាររូបថតនៃច្បាប់ដើមមួយចំនួន។

ដំណឹងមរណភាពរបស់មេដឹកនាំប្រឆាំងកំពូលម្នាក់នេះ គួរតែត្រូវបានប្រកាសជាផ្លូវការ និងផ្សព្វផ្សាយដោយប្រព័ន្ធផ្សព្វផ្សាយព័ត៌មាននានា ឬតាមរយៈគណបក្សរបស់ខ្លួនផ្ទាល់។

តាមរយៈគេហទំព័រ Getty Images ដែលជាគេហទំព័រសោតទស្សន៍ដ៏ធំមួយ បានបង្ហោះនូវរូបថតរបស់អតីតមេដឹកនាំខ្មែរក្រហម ប៉ុលពត ពេលដែលលោកទទួលមរណភាពនៅក្នុងតំបន់អន្លង់វែង ក្បែរព្រំប្រទល់ប្រទេសថៃ។ រូបថតនេះ ត្រូវបានបញ្ចូលឡើងកាលពីថ្ងៃទី១៦ ខែមេសា ឆ្នាំ១៩៩៨ និងត្រូវបានថតដោយលោក ជេសុន ព្លែបទ្រឺ (Jason Bleibtreu)។

ខាងក្រោមនេះ គឺជារូបភាពផ្តាមចេញពីគេហទំព័រដែលបានសរសេររៀបរាប់ជាភាសាអង់គ្លេសថា « The supposed remains of the Khmer Rouge dictator on show, near the Thai border» ឬប្រែសម្រួលជាភាសាខ្មែរថា «ទិដ្ឋភាពសាកសពមេដឹកនាំផ្តាច់ការខ្មែរក្រហម ក្បែរព្រំដែននៃប្រទេសថៃ»។

Getty Stock Images | Archived Link

ដូចគ្នានេះដែរ យោងទៅតាមទំព័រហ្វេសប៊ុកផ្លូវការរបស់លោក សម រង្ស៊ី ដែលបានធ្វើការផ្សាយផ្ទាល់នូវ វេទិការសម្លេងសង្រ្គោះជាតិ កាលពីថ្ងៃទី០៩ ខែតុលា ឆ្នាំ២០២១ថ្មីៗនេះ ក៏បានបង្ហាញលោក សម រង្ស៊ី មានវត្តមានជាវាគ្មិនក្នុងកិច្ចពិភាក្សាស្តីពី មេដឹកនាំខ្មែរសញ្ជាតិមួយ ឬសញ្ជាតិពីរ ដែលការពារជាតិខ្មែរផងដែរ។

ខាងក្រោមនេះ គឺជារូបភាពផ្តាមចេញពីទំព័រហ្វេសប៊ុកផ្លូវការរបស់លោក សម រង្ស៊ី ដែលបានសរសេររៀបរាប់ថា «វេទិកាសំឡេងសង្គ្រោះជាតិ ស្តីពី មេដឹកនាំខ្មែរសញ្ជាតិមួយ ឬសញ្ជាតិពីរ ដែលការពារជាតិខ្មែរ»។

Facebook Post | Archived Link

ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖

Facebook Twitter Telegram Google News

សន្និដ្ឋាន

Fact Crescendo Cambodia បានរកឃើញថា រូបថតដែលបានបង្ហោះដោយអ្នកប្រើប្រាស់ខាងលើនោះ គឺពិតជាមិនត្រឹមត្រូវនោះឡើយ។ រូបថតមួយសន្លឹកនេះ ត្រូវបានកាត់តមុននឹងបង្ហោះនៅលើបណ្តាញសង្គម។ ការពិត ច្បាប់ដើមនៃរូបថតនេះ គឺជារូបរបស់មេដឹកនាំខ្មែរក្រហម ប៉ុលពត ដែលបានទទួលមរណភាពកាលពីថ្ងៃទី១៥ ខែមេសា ឆ្នាំ១៩៩៨ នៅក្នុងស្រុកអន្លង់វែង ខេត្តឧត្តរមានជ័យ។ ចំណែកលោក សម រង្ស៊ី នៅរស់រានមានជីវិតដូចធម្មតានៅឡើយទេ ហើយលោកទើបតែបង្ហាញវត្តមាននៅក្នុងវេទិកាសំឡេងសង្គ្រោះជាតិកាលពីថ្ងៃទី០៩ ខែតុលា ឆ្នាំ២០២១កាលពីពេលថ្មីៗនេះ។