តើ​តុ​ប្រជុំ​លោក​ ពូ​ ទីន​ មាន​ទម្រង់​វែង​ដូច​អ្នក​ប្រើ​បណ្ដាញ​សង្គម​ចែក​ចាយ​មែន​ដែរ​ឬ​ទេ​?​

Altered International

បន្ទាប់​ពី​​ប្រធានាធិបតី​​រុស្ស៊ី​លោក​ វ៉្លាឌីមៀរ​ ពូទីន​ (Vladimir Putin) បញ្ជា​ឱ្យ​មាន​ការ​បើក​ប្រតិបត្តិការ​សឹក​វាយលុក​លើ​ប្រទេស​អ៊ុយក្រែន​ចាប់​តាំង​ពី​ចុង​ខែ​កុម្ភៈ​មក​ រូប​ថត​ជា​ច្រើន​ពាក់​ព័ន្ធ​ទៅ​នឹង​ប្រទេស​រុស្ស៊ី​ និង​ព័ត៌មាន​រិះ​គន់​ទៅ​លើ​លោក​ ពូ​ទីន​ ត្រូវ​បាន​ចែក​រំលែក​លើ​បណ្តាញ​សង្គម​ជា​ហូរ​ហែរ​។​ ក្នុង​ចំណោម​នោះ​ រូប​ថត​មួយ​សន្លឹក​ បង្ហាញ​អំពី​ទិដ្ឋ​ភាព​តុ​ប្រជុំ​របស់​លោក​ មាន​សភាព​វែង​ខុស​ពី​ធម្មតា​ ត្រូវ​បាន​បង្ហោះ​ដោយ​អ្នក​ប្រើ​ប្រាស់​ម្នាក់​។​ ការ​បង្ហោះ​នេះ​ ត្រូវ​បាន​ចែក​ចាយ​ត​ៗ​គ្នា​ជា​ច្រើន​ពី​សំណាក់​អ្នក​ប្រើ​ប្រាស់​ហ្វេស​ប៊ុក​និយាយ​ភាសា​ខ្មែរ​។​

ទោះ​ជា​យ៉ាង​ណា​ ការ​ផ្ទៀង​ផ្ទាត់​ការ​ពិត​របស់​ក្រុម​ការងារ​ Fact Crescendo Cambodia រក​ឃើញ​ថា​ រូបថត​មួយ​សន្លឹក​ខាង​លើ​នោះ​ គឺ​ត្រូវ​បាន​កាត់​ត​។​

ការ​អះ​អាង​លើ​បណ្តាញសង្គម

កាល​ពី​ថ្ងៃ​ទី​១៣​ ខែ​មេសា​ ឆ្នាំ​២០២២​កន្លង​ទៅ​ថ្មី​ៗ​នេះ​ អ្នក​ប្រើ​ប្រាស់​ហ្វេស​ប៊ុក​ម្នាក់​ បាន​ចែក​ចាយ​រូប​ថត​មួយ​សន្លឹក​ បង្ហាញ​ទិដ្ឋ​ភាព​ប្រធានាធិបតី​រុស្ស៊ី​លោក​ ពូ​ទីន​ អង្គុយ​ក្នុង​បន្ទប់​ប្រជុំ​ ដោយ​មាន​តុ​ដ៏​វែង​មួយ​។​ រូប​ថត​នេះ​ ត្រូវ​បាន​ភ្ជាប់​ជាមួយ​នឹង​សំណេរ​ថា​ តែ​មួយ​ពព្រិច​ភ្នែក​សោះ​ បាត់​បង់​ទំនុក​ចិត្ត​ជា​មិត្តភាព​ទាំង​ស្រុង​។​ ការ​អះ​អាង​ភ្ជាប់​ជាមួយ​នឹង​រូប​ថត​នេះ​ ត្រូវ​បាន​ចែក​ចាយ​ជា​ច្រើន​ដង​ពី​សំណាក់​អ្នក​ប្រើ​ប្រាស់​បណ្តាញ​សង្គម​ហ្វេស​ប៊ុក​នា​ពេល​ថ្មី​ៗ​នេះ​។​

ខាង​ក្រោម​នេះ​ គឺ​ជា​រូប​ភាព​ផ្តាម​ចេញ​ប៉ុស្តិ៍​របស់​អ្នក​ប្រើ​ប្រាស់​ខាង​លើ​ បាន​បង្ហាញ​ទិដ្ឋ​ភាព​លោក​ពូទីន​ និង​តុ​ប្រជុំ​របស់​លោក​។​

Facebook Post | Archived Link

ការត្រួត​ពិនិត្យ​ការ​ពិត

Fact Crescendo Cambodia ចាប់​ផ្ដើម​ផ្ទៀង​ផ្ទាត់​ទៅ​លើ​រូបថត​ដែល​ត្រូវ​បាន​ចែក​ចាយ​ខាង​លើ​នេះ​ តាម​រយៈ​ Google Reverse Image Search នាំ​ឱ្យ​យើង​រក​ឃើញ​ការពិត​ដូច​ខាង​ក្រោម​នេះ។

រូប​ថត​ដែល​មាន​ទម្រង់​ និង​សណ្ឋាន​ដូច​គ្នា​ ត្រូវ​បាន​រក​ឃើញ​នៅ​លើ​គេហទំព័រ​ Getty Image ដែល​ជា​គេហ​ទំព័រ​សោត​ទស្សន៍​ដ៏ធំ​មួយ​។​ គេហ​ទំព័រ​ដដែល​នេះ​ ពុំ​បាន​បង្ហាញ​ទិដ្ឋភាព​តុ​ប្រជុំ​របស់​លោក​ ពូ​ទីន​ មាន​ទម្រង់​ទ្រវែង​ខុស​ពី​ធម្មតា​នោះ​ឡើយ​។​ រូប​ភាព​ផ្តាម​ចេញ​ពី​គេហ​ទំព័រ​ខាង​លើ​ សរសេរ​រៀប​រាប់​ជា​ភាសា​អង់​គ្លេស​ថា​ «Russian President Vladimir Putin chairs a meeting on economic issues at the Kremlin in Moscow on February 28, 2022»​ ឬ​ប្រែ​សម្រួល​ជា​ភាសា​ខ្មែរ​ថា​ «ប្រធានាធិបតី​រុស្ស៊ី​ លោក ពូទីន​ ធ្វើ​ជា​ប្រធាន​កិច្ច​ប្រជុំ​ស្តី​ពី​បញ្ហា​សេដ្ឋកិច្ច​ នៅ​វិមាន​ក្រឹមឡាំង​ ក្នុង​ទីក្រុង​មូស្គូ​ កាល​ពី​ថ្ងៃ​ទី​២៨​ ខែ​កុម្ភៈ​ ឆ្នាំ​២០២២​​»។​

Getty Image Link | Archived Link

រូប​ថត​មួយ​សន្លឹក​នេះ​ ក៏​ត្រូវ​បាន​រក​ឃើញ​នៅ​ក្នុង​គេហ​ទំព័រ​សារព័ត៌មាន​ VOA ផ្សព្វ​ផ្សាយ​កាល​ពី​ថ្ងៃ​ទី​២៨​ ខែ​កុម្ភៈ​​ ឆ្នាំ​២០២២​កន្លង​ទៅ​ផង​ដែរ​។​ គេហ​ទំព័រ​ខាង​លើ​នេះ​ បាន​បញ្ជាក់​បន្ថែម​ថាលោក​ប្រធានាធិបតី​​រុស្ស៊ី​ ពូ​ទីន​ បាន​ដឹកនាំ​​កិច្ច​ប្រជុំ​​ស្តី​ពី​​បញ្ហា​​សេដ្ឋកិច្ច​​ នៅ​​ទីក្រុង​មូ​ស្គូ​ កាល​ពី​ថ្ងៃ​ទី​២៨​ ខែ​កុម្ភៈ​ ឆ្នាំ​២០២២​កន្លង​ទៅ​នេះ​»។​

VOA News Report | Archived Link

ដើម្បី​ស្វែង​រក​ព័ត៌​មាន​ពិត​ សូម​តាម​ដាន​ការ​ផ្សាយ​របស់​យើង​តាម​រយៈ​ប្រព័ន្ធ​ដូច​ខាង​ក្រោម​៖

Facebook Twitter  Telegram Google News

សន្និដ្ឋាន

Fact Crescendo Cambodia រក​​ឃើញ​​ថា រូប​ថត​ចែក​ចាយ​ដោយ​អ្នក​ប្រើ​ប្រាស់​ហ្វេស​ប៊ុក​ខាង​លើ​ គឺ​ពិត​ជា​មិន​ត្រឹម​ត្រូវ​នោះ​ទេ​។​ ការ​ពិតរូប​ថត​មួយ​សន្លឹក​នេះ​ ​ត្រូវ​បាន​កាត់​ត​ មុន​នឹង​បង្ហោះ​នៅ​លើ​បណ្តាញ​សង្គម​។​ រូប​ថត​នេះ​​​ គឺ​ត្រូវ​បាន​រក​ឃើញ​ក្នុង​អំឡុង​ពេល​លោក​ ពូទីន​ បាន​ដឹក​នាំ​ប្រជុំ​ស្ដី​អំពី​បញ្ហា​សេដ្ឋកិច្ច​ កាល​ពី​ថ្ងៃ​ទី​២៨​ ខែ​កុម្ភៈ​ ឆ្នាំ​២០២២​កន្លង​ទៅ​។​ ច្បាប់​ដើម​នៃ​រូប​ថត​តុ​ប្រជុំ​មួយ​នេះ​ ពុំ​បាន​បង្ហាញ​សណ្ឋាន​វែង​ខុស​ប្លែក​ពី​ធម្មតា​នោះ​ឡើយ​។

Avatar

Title:តើ​តុ​ប្រជុំ​លោក​ ពូ​ ទីន​ មាន​ទម្រង់​វែង​ដូច​អ្នក​ប្រើ​បណ្ដាញ​សង្គម​ចែក​ចាយ​មែន​ដែរ​ឬ​ទេ​?​

Fact Check By: Kakada Sim 

Result: Altered

Leave a Reply

Your email address will not be published.