ខណៈដែលការឈ្លានពានរបស់រុស្ស៊ីទៅលើប្រទេសអ៊ុយក្រែនបានអូសបន្លាយពេលអស់រយៈពេល ១ខែហើយនោះ រឿងរ៉ាវនៃការឈ្លានពានរបស់រុស្ស៊ី ត្រូវបានផ្សព្វផ្សាយ និងចែករំលែកយ៉ាងផុសផុលនៅលើបណ្ដាញសង្គម។ ក្នុងចំណោមនោះ មានរូបថតមួយសន្លឹកដែលបង្ហាញមេដឹកនាំអ៊ុយក្រែនធ្វើសញ្ញាអក្សរ V ពីក្រោយមេដឹកនាំរុស្ស៊ី ត្រូវបានគេបង្ហោះ និងចែករំលែកតៗគ្នានៅលើបណ្ដាញសង្គម។ រូបថតមួយសន្លឹកនេះ ត្រូវបានគេសរសេររៀបរាប់ថា ជាមូលហេតុនៃសង្គ្រាមឈ្លានពានលើប្រទេសអ៊ុយក្រែន។ ទោះជាយ៉ាងណា យើងរកឃើញថា រូបថតនេះ ត្រូវបានកាត់ត។
ការអះអាងលើបណ្ដាញសង្គម
រូបថតមួយសន្លឹកដែលបង្ហាញប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី (Volodymyr Zelenskyy)លើកម្រាមដៃពីរនៅពីក្រោយប្រធានាធិបតីរុស្ស៊ី លោក វ៉្លាឌីមៀរ ពូទីន (Vladimir Putin) ត្រូវបានអ្នកប្រើប្រាស់បណ្ដាញសង្គមកម្ពុជាចែករំលែកបន្ត ដោយសរសេររៀបរាប់ថា «មូលហេតុពីក្រោយនៃការផ្ទុះសង្គ្រាមនៅអ៊ុយក្រែន»។
ខាងក្រោមនេះ គឺជារូបភាពផ្ដាមចេញពីបណ្ដាញសង្គមហ្វេសប៊ុក ដែលបង្ហាញនូវការចែករំលែករូបថតមួយសន្លឹកនេះនៅលើបណ្ដាញសង្គមកាលពីថ្ងៃទី២២ ខែមីនា ឆ្នាំ២០២២ ពីសំណាក់អ្នកប្រើប្រាស់ហ្វេសប៊ុកនិយាយភាសាខ្មែរ។
រូបថតមួយសន្លឹកនេះ ត្រូវបានចែករំលែកព្រោងព្រាតលើបណ្ដាញសង្គមពីសំណាក់អ្នកប្រើប្រាស់ហ្វេសប៊ុកនៅតាមបណ្ដាប្រទេសដទៃទៀតផងដែរ ដោយមានការសរសេររៀបរាប់ជាភាសាអង់គ្លេសថា «Here is the real reason behind the war»។ រូបថតមួយសន្លឹកនេះ អាចរកមើលបានតាមរយៈតំណភ្ជាប់នៅទីនេះ ឬតំណភ្ជាប់ផ្សេងទៀតមាននៅទីនេះផងដែរ។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យទៅលើការអះអាងនេះតាមរយៈការដំណើរការ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមការពិត រូបថតមួយសន្លឹកនេះ ត្រូវបានកាត់តដោយដាក់បញ្ចូលរូបថតពីរសន្លឹកចូលគ្នា ដែលរូបថតទាំងពីរសន្លឹកនោះ ត្រូវបានរកឃើញនៅលើគេហទំព័រ ALAMY ដែលជាទីភ្នាក់ងារស្តុករូបថតមានមូលដ្ឋាននៅក្នុងប្រទេសអង់គ្លេស។
តាមរយៈគេហទំព័រ ALAMY យើងបានរកឃើញរូបថតមួយសន្លឹក ដែលបង្ហាញប្រធានាធិបតីរុស្ស៊ី លោក វ៉្លាឌីមៀរ ពូទីន ថតរូបរួមគ្នាជាមួយប្រធានាធិបតីបារាំង លោក អេម៉ានុយអ៊ែល ម៉ាក្រុង។
បើតាមគេហទំព័រ ALAMY មេដឹកនាំបារាំង និងរុស្ស៊ី បានឈរលើកដៃជាសញ្ញាស្វាគមន៍ និងថតរូបរួមគ្នាកាលពីថ្ងៃទី០៩ ខែធ្នូ ឆ្នាំ២០១៩កន្លងមក នៅឯទីក្រុងប៉ារីស នៅមុនជំនួបកំពូលមួយ Normandy Four ដែលជាកិច្ចប្រជុំខ្ពស់បំផុតនៃមេដឹកនាំបារាំង អាល្លឺម៉ង់ រុស្ស៊ី និងអ៊ុយក្រែន ដើម្បីពិភាក្សារកដំណោះស្រាយជម្លោះនៅភាគខាងកើតប្រទេសអ៊ុយក្រែន។
តាមរយៈគេហទំព័រ ALAMY ដដែល យើងក៏បានរកឃើញរូបថតមួយសន្លឹកទៀត ដែលបង្ហាញប្រធានាធិបតីអ៊ុយក្រែន លោក ហ្សេឡេនស្គី ថតរូបជាមួយប្រធានាធិបតីបារាំង លោក ម៉ាក្រុង ផងដែរ។ រូបថតមួយសន្លឹកនេះ បង្ហាញលោក ហ្សេឡេនស្គី លើកម្រាមដៃពីរធ្វើជាសញ្ញាអក្សរ V។
បើតាមគេហទំព័រ ALAMY មេដឹកនាំអ៊ុយក្រែនរូបនេះ បានថតរូបជាមួយមេដឹកនាំបារាំង នៅឯទីក្រុងប៉ារីស នៅមុនជំនួបកំពូល Normandy Four ដែលជាកិច្ចប្រជុំជាន់ខ្ពស់នៃមេដឹកនាំអ៊ុយក្រែន អាល្លឺម៉ង់ បារាំង និងរុស្ស៊ី ដើម្បីដោះស្រាយជម្លោះនៅភាគខាងកើតអ៊ុយក្រែន។ រូបថតមួយសន្លឹកនេះ ត្រូវបានថតកាលពីថ្ងៃទី០៩ ខែធ្នូ ឆ្នាំ២០១៩ផងដែរ។
សន្និដ្ឋាន
Fact Crescendo Cambodia បានរកឃើញថា រូបថតដែលត្រូវបានចែករំលែកនៅលើបណ្ដាញសង្គមដូចដែលរៀបរាប់ខាងលើនេះ គឺជារូភាពកាត់ត។ រូបថតច្បាប់ដើម មិនបានបង្ហាញឱ្យឃើញប្រធានាធិបតីអ៊ុយក្រែន លោក ហ្សេឡេនស្គី លើកដៃធ្វើជាសញ្ញាអក្សរ V ដាក់នៅលើក្បាលមេដឹកនាំរុស្ស៊ី លោក ពូទីន នោះឡើយ។ រូបថតច្បាប់ដើមមួយសន្លឹក បង្ហាញលោក ហ្សេឡេនស្គី ថតរូបជាមួយប្រធានាធិបតីបារាំង លោក ម៉ាក្រុង ហើយរូបថតច្បាប់ដើមមួយសន្លឹកទៀត បង្ហាញលោក ពូទីន ថតរូបថតជាមួយលោក ម៉ាក្រុង កាលពីចុងឆ្នាំ២០១៩កន្លង។
Title:រូបថតបង្ហាញមេដឹកនាំអ៊ុយក្រែនធ្វើសញ្ញាអក្សរ V ពីក្រោយលោក ពូទីន គឺជារូបភាពកាត់
Fact Check By: Jay UdomResult: Altered
