មួយថ្ងៃក្រោយហេតុការណ៍អគ្គិភ័យលើកាស៊ីណូមួយនៅក្រុងប៉ោយប៉ែត ការអះអាងមួយនៅលើបណ្ដាញសង្គម បានប្រកាសថា ចំនួនមនុស្សស្លាប់ក្នុងឧបទ្ទវហេតុនេះ កើនឡើងដល់ជាង ២០០នាក់ហើយត្រឹមថ្ងៃម្សិលមិញនេះ។ ការអះអាងនេះ ត្រូវបានចែករំលែកយ៉ាងច្រើននៅលើបណ្ដាញសង្គម ហើយក៏ទទួលបានការបញ្ចេញមតិចម្រុះបែបពីអ្នកប្រើប្រាស់បណ្ដាញសង្គមនិយាយភាសាខ្មែរផងដែរ។ ទោះជាយ៉ាងណា ការផ្ទៀងផ្ទាត់របស់យើង រកឃើញថា ការអះអាងនេះមិនត្រឹមត្រូវនោះឡើយ។
ការអះអាងលើបណ្ដាញសង្គម
ទំព័រហ្វេសប៊ុកមួយ បានអះអាងកាលពីថ្ងៃម្សិលមិញថា ចំនួនអ្នកស្លាប់នៅក្នុងហេតុការណ៍អគ្គិភ័យកាស៊ីណូមួយនៅក្រុងប៉ោយប៉ែត បានកើនឡើងដល់ជាង ២០០នាក់ហើយគិតត្រឹមថ្ងៃម្សិលមិញនេះ។
ការអះអាងនេះ ទទួលបានការចែករំលែកបន្តយ៉ាងផុលផុស និងមានការបញ្ចេញមតិយ៉ាងច្រើន រួមទាំងប្រតិកម្មចម្រុះបែបពីសំណាក់អ្នកប្រើប្រាស់បណ្ដាញសង្គមនិយាយភាសាខ្មែរផងដែរ។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមកាលពីថ្ងៃម្សិលមិញ ដែលរៀបរាប់ថា «ឆេះកាស៊ីណូនៅប៉ោយប៉ែត ស្លាប់ឈានដល់២០០ជាងនាក់ ២៩/១២/២០២២»។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងនេះតាមរយៈការពិនិត្យឡើងវិញនូវចំនួនអ្នកស្លាប់នៅក្នុងហេតុការណ៍ភ្លើងឆេះកាស៊ីណូនេះ ដែលត្រូវបានចុះផ្សាយដោយសារព័ត៌មាននានា ហើយនាំឱ្យយើងរកឃើញការពិតដូចខាងក្រោមនេះ។
អគារកាស៊ីណូ Grand Diamond City ត្រូវបានភ្លើងឆាបឆេះកាលពីយប់ថ្ងៃពុធ ហើយបន្តរហូតដល់ព្រឹកថ្ងៃព្រហស្បតិ៍ម្សិលមិញនេះ ដែលបណ្ដាលឱ្យមនុស្សជាច្រើននាក់ស្លាប់ និងរងរបួស។
សារព័ត៌មានសំឡេងសហរដ្ឋអាមេរិក (VOA)ផ្សាយជាភាសាខ្មែរ បានរាយការណ៍នៅយប់ថ្ងៃម្សិលមិញថា យ៉ាងហោចណាស់មនុស្ស ១៩នាក់ បានស្លាប់នៅក្នុងឧបទ្ទវហេតុអគ្គិភ័យលើកាស៊ីណូមួយនេះ ប៉ុន្តែ បញ្ជាក់ថា ចំនួនអ្នកស្លាប់នឹងកើនឡើង។ សូមអានអត្ថបទទាំងស្រុងនៅទីនេះ។
សារព័ត៌មានអង់គ្លេស BBC បានចុះផ្សាយកាលពីថ្ងៃម្សិលមិញថា យ៉ាងហោចណាស់មនុស្ស ១៩នាក់ បានស្លាប់នៅក្នុងហេតុការណ៍ឆាបឆេះអគារកាស៊ីណូមួយនៅតំបន់ព្រំដែនកម្ពុជា-ថៃ ដែលមានបុគ្គលិកបម្រើ ៤០០នាក់ និងមានភ្ញៀវជនជាតិថៃច្រើនបានចូលលេងកម្សាន្ត។
សារព័ត៌មានអន្តរជាតិមួយនេះ បានចុះផ្សាយបែបនេះ ដោយបានដកស្រង់សម្ដីមន្ត្រីព័ត៌មានខេត្តបន្ទាយមានជ័យ លោក សេក សុខុម ដែលបានបញ្ជាក់ប្រាប់កាលពីថ្ងៃទី២៩ ខែធ្នូ។ សារព័ត៌មានដដែលនេះ បានក៏បានផ្សាយផងដែរថា ក្រុមអ្នកជួយសង្គ្រោះកំពុងបន្តស្វែងរកជនរងគ្រោះដទៃទៀតដែលជាប់នៅក្នុងអគារ។ សូមអានអត្ថបទទាំងស្រុងនៅទីនេះ។
ចំនួនអ្នកស្លាប់កើនឡើងដល់ ១៩នាក់នេះ ក៏ត្រូវបានចុះផ្សាយដោយសារព័ត៌មាន CBS News របស់សហរដ្ឋអាមេរិក ទូរទស្សន៍ Sky News របស់អង់គ្លេស និងកាសែត The Guardian របស់អង់គ្លេសផងដែរ កាលពីថ្ងៃម្សិលមិញនេះ។ សូមអានអត្ថបទទាំងស្រុងនៅទីនេះ(CBS News, Sky News, The Guardian)។
បន្ទាប់មកទៀត ទូរទស្សន៍ CNN របស់អាមេរិក ដែលផ្សាយនៅព្រឹកថ្ងៃសុក្រនេះ បានរាយការណ៍ថា ចំនួនមនុស្សស្លាប់នៅក្នុងហេតុការណ៍អគ្គិភ័យលើកាស៊ីណូនៅព្រំដែនកម្ពុជា-ថៃ បានកើនឡើងដល់ ២៤នាក់ ហើយមនុស្សយ៉ាងតិច ៧០នាក់ បានរងរបួស។
តួលេខដែលចេញផ្សាយដោយទូរទស្សន៍អាមេរិកមួយនេះ បានផ្អែកទៅលើការដកស្រង់សម្ដីមន្ត្រីព័ត៌មានខេត្តបន្ទាយមានជ័យ លោក សេក សុខុម ដដែល។
ចំណែកឯទីភ្នាក់ងារព័ត៌មាន Reuters ដែលផ្សាយនៅល្ងាចនៅថ្ងៃសុក្រនេះ បានរាយការណ៍ថា ចំនួនមនុស្សស្លាប់នៅក្នុងគ្រោះថ្នាក់ភ្លើងឆេះកាស៊ីណូនេះ បានកើនឡើងដល់ ២៧នាក់ និងថា មនុស្ស ២០នាក់ទៀត កំពុងបាត់ខ្លួននៅឡើយ។
ទីភ្នាក់ងារព័ត៌មានអង់គ្លេសមួយនេះ បានចុះផ្សាយបែបនេះដោយផ្អែកទៅតាមសម្ដីលោក សេក សុខុម ប្រធានមន្ទីរព័ត៌មានខេត្តបន្ទាយមានជ័យ ដែលបានអះអាងថា អគ្គិភ័យនេះបណ្ដាលមកពីផ្ទុះខ្សែភ្លើង។ សូមអានអត្ថបទទាំងស្រុងនៅទីនេះ ឬតាមរយៈតំណភ្ជាប់ដែលត្រូវបានរក្សាទុកនៅទីនេះ។
សារព័ត៌មានក្នុងស្រុក Fresh News បានចេញផ្សាយនៅម៉ោងខ្ទង់៦ល្ងាចថ្ងៃនេះថា ក្រុមជួយសង្គ្រោះបានបិទបញ្ចប់ប្រតិបត្តិការរុករកជនរងគ្រោះនៅក្នុងហេតុការណ៍អគ្គិភ័យនេះហើយនៅល្ងាចថ្ងៃសុក្រនេះ បន្ទាប់ពីធ្វើប្រតិបត្តិការអស់រយៈពេល ៣៩ម៉ោង។
ដោយបានដកស្រង់សម្ដីអភិបាលខេត្តបន្ទាយមានជ័យ លោក អ៊ុំ រាត្រី សារព័ត៌មាន Fresh News បានរាយការណ៍ថា មនុស្សស្លាប់ដោយសារអគ្គិភ័យនេះ មានចំនួន ២៦នាក់ និងរបួស ៥៧នាក់ ដែលសុទ្ធតែជាជនបរទេសទាំងអស់។ សូមអានអត្ថបទទាំងស្រុងនៅទីនេះ ឬតាមរយៈតំណភ្ជាប់ដែលត្រូវបានរក្សាទុកនៅទីនេះ។
ទោះជាយ៉ាងណា Fact Crescendo Cambodia នឹងធ្វើបច្ចុប្បន្នភាពតួលេខជនរងគ្រោះក្នុងហេតុការណ៍អគ្គិភ័យលើកាស៊ីណូមួយនៅក្រុងប៉ោយប៉ែត។
សន្និដ្ឋាន
Fact Crescendo Cambodia បានរកឃើញថា ការអះអាងដោយអ្នកប្រើប្រាស់បណ្ដាញសង្គមដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ សារព័ត៌មានក្នុងស្រុក និងសារព័ត៌មានអន្តរជាតិ បានរាយការណ៍ថា ចំនួនមនុស្សស្លាប់ក្នុងហេតុការណ៍អគ្គិភ័យឆេះកាស៊ីណូនៅក្រុងប៉ោយប៉ែត មានចំនួន ២៧នាក់ និងរបួស ៥៧នាក់គិតត្រឹមល្ងាចថ្ងៃនេះ។
Title:ចំនួនមនុស្សស្លាប់ក្នុងអគ្គិភ័យលើកាស៊ីណូនៅប៉ោយប៉ែតចន្លោះ២០ទៅ៣០នាក់នៅត្រឹមថ្ងៃសុក្រនេះ
Fact Check By: Jay UdomResult: False
