- >>
- FALSE
Fact-Check: តើរូបថតនេះបង្ហាញការធ្វើទារុណកម្មរបស់វៀតណាមលើពលរដ្ឋខ្មែរកម្ពុជាក្រោមមែនទេ?
ប្រវត្តិសាស្ត្រកម្ពុជា-វៀតណាម តែងតែជាប្រធានបទនៃការជជែក និងការចែករំលែកនៅលើបណ្ដាញសង្គមជារឿយៗ។ ក្នុងនោះ រូបថតមួយសន្លឹកដែលបង្ហាញការធ្វើទារុណកម្មអ្នកជាប់ឃុំនៅក្នុងពន្ធនាគារនោះ ត្រូវបានទំព័រហ្វេសប៊ុកមួយអះអាងថា ជាការធ្វើទារុណកម្មរបស់វៀតណាមទៅលើពលរដ្ឋខ្មែរកម្ពុជា ដែលរស់នៅវៀតណាមខាងត្បូងសព្វថ្ងៃនេះ។ រូបថតជាមួយការអះអាងនេះ ត្រូវបានចែករំលែកបន្តជាច្រើនដងលើបណ្ដាញសង្គមហ្វេសប៊ុក។ ទោះជាយ៉ាងណា ការត្រួតពិនិត្យការពិត បានរកឃើញថា រូបថតជាមួយនឹងការអះអាងបែបនេះ មិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី២៥ ខែតុលាកន្លងមកនេះ ទំព័រហ្វេសប៊ុកមួយឈ្មោះថា ខ្មែរកម្ពុជាក្រោមស្រឡាញ់ទឹកដីកេរ្តិ៍ដូនតា បានបង្ហោះរូបថតមួយសន្លឹក ដែលបង្ហាញរូបស្មូនមនុស្សស្ថិតក្នុងសម្លៀកបំពាក់កងទ័ព ហើយធ្វើទារុណកម្មទៅលើមនុស្ស។
ទំព័រហ្វេសប៊ុកដដែល អះអាងថា រូបស្មូននេះ គឺបង្ហាញពីទង្វើទារុណកម្មដែលទាហានវៀតណាមបានប្រព្រឹត្តទៅលើជនជាតិដើមខ្មែរក្រោម នៅភាគត្បូងប្រទេសវៀតណាមសព្វថ្ងៃ។
រូបថតជាមួយនឹងការអះអាងបែបនេះ ត្រូវបានចែករំលែកបន្តជាច្រើនដង រួមជាមួយការបញ្ចេញមតិយោបល់ និងប្រតិកម្មជាច្រើនផងដែរ។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់ទំព័រហ្វេសប៊ុកខាងលើ ដែលសរសេររៀបរាប់ថា «ប្រវត្តិសាស្ត្រអាយួនធ្វើបាបខ្មែរ កូនចៅគ្រប់ជំនាន់ គួរស្វែងយល់ឱ្យបានច្បាស់ មួយណាជាមិត្ត មួយណាជាសត្រូវស៊ូពូ សូមយល់បានច្បាស់ កុំឱ្យប្រវត្តិសាស្ត្រកុហកយើងបានណា»។
ការត្រួតពិនិត្យការពិត
Fact Crescendo Cambodia បានចាប់ផ្ដើមត្រួតពិនិត្យទៅលើរូបថត និងការអះអាងខាងលើនេះតាមរយៈការដំណើរការកម្មវិធីផ្ទៀងផ្ទាត់រូបថត Yandex ដែលនាំឱ្យយើងបានជួបប្រទះរូបថតមួយសន្លឹកនេះ និងព័ត៌មានលម្អិតអំពីរូបថតនេះផងដែរ។
រូបថតមួយសន្លឹកនេះ ត្រូវបានរកឃើញចុះផ្សាយដោយគេហទំព័រសារព័ត៌មានវៀតណាម Zing News នៅក្នុងអត្ថបទមួយកាលពីថ្ងៃទី១៣ ខែកក្កដា ឆ្នាំ២០១៤កន្លងមក។ រូបថតមួយសន្លឹកនេះ ត្រូវបានចុះផ្សាយជាមួយរូបថតជាច្រើនសន្លឹកទៀត ដែលនិយាយអំពីការធ្វើទារុណកម្មលើអ្នកជាប់ឃុំនៅក្នុងពន្ធនាគារមួយ ដែលគេហៅថា ពន្ធនាគារដើមដូង ស្ថិតនៅលើកោះភូកុក ឬកោះត្រល់។
បើតាមអត្ថបទសារព័ត៌មាននេះ រូបថតមួយសន្លឹកនេះ គឺជារូបស្មូនដែលបង្ហាញពីទាហានម្នាក់ ចាប់ជ្រមុជអ្នកជាប់ឃុំម្នាក់នៅក្នុងទឹកនៃធុងសាំងមួយ ហើយទាហានម្នាក់ទៀតគោះធុងសាំងនោះ ដើម្បីធ្វើឱ្យអ្នកជាប់ឃុំនោះឈ្លក់ទឹក និងបែកក្រដាសត្រចៀក។ អំពើទារុណកម្មនេះ បានកើតឡើងនៅចន្លោះឆ្នាំ១៩៦៧ ដល់ឆ្នាំ១៩៧៣ អំឡុងសង្គ្រាមវៀតណាម។
ពន្ធនាគារដើមដូង
គេហទំព័រ Phu Quoc Prison បានឱ្យដឹងថា ពន្ធនាគារដើមដូង ត្រូវបានរៀបចំឱ្យក្លាយជាទីតាំងទេសចរណ៍មួយដ៏សំខាន់នៅលើកោះភូកុក ឬកោះត្រល់ ចាប់តាំងពីឆ្នាំ១៩៩៦មក ឬ ២១ឆ្នាំក្រោយពីពន្ធនាគារមួយនេះ ត្រូវបានបិទទ្វារ បន្ទាប់ពីការដួលរលំនៃរបបក្រុងសៃហ្គន ឬរដ្ឋាភិបាលវៀតណាមខាងត្បូង។
គេហទំព័រដដែលនេះ បានឱ្យដឹងទៀតថា ពន្ធនាគារនេះ ត្រូវបានសាងសង់ដំបូងដោយរដ្ឋបាលអាណានិគមបារាំងនៅចន្លោះឆ្នាំ១៩៤៩ ដល់ឆ្នាំ១៩៥០ ដើម្បីធ្វើជាកន្លែងឃុំឃាំងក្រុមអ្នកប្រឆាំងនឹងរបបអាណានិគមបារាំងនាពេលនោះ។
នៅអំឡុងសង្គ្រាមវៀតណាម រដ្ឋបាលវៀតណាមខាងត្បូងដែលគាំទ្រដោយសហរដ្ឋអាមេរិក បានប្រើប្រាស់ទីតាំងនេះធ្វើជាពន្ធនាគារសម្រាប់ឃុំខ្លួនទាហានវៀតណាមខាងជើង ឬពួកកុម្មុយនីស្ត។
ស្ថិតនៅលើកោះភូកុក ឬកោះត្រល់ ពន្ធនាគារនេះ គ្របដណ្ដប់លើផ្ទៃដីទំហំ ៤០០ហិកតា ហើយបានឃុំខ្លួនមនុស្សរហូតដល់ ៤០,០០០នាក់ ក្នុងនោះមានទាំងទាហានកុម្មុយនីស្តជាង ៣២,០០០នាក់ និងអ្នកទោសនយោបាយផងដែរ។
អ្នកជាប់ឃុំនៅពន្ធនាគារនេះ បានរងនូវទារុណកម្មជាច្រើនប្រភេទ ដូចជា ដកធ្មេញ ដកក្រចកដៃជើង ជ្រមុជទឹក ដាក់លើខ្ទះទឹកក្ដៅ ដាក់ក្នុងទ្រុងខ្លា ជាដើម។
ត្រូវបានរកឃើញនៅលើគេហទំព័រមួយឈ្មោះថា http://phuquocprison.org/ ដែលបរិយាយអំពីប្រវត្តិនៃពន្ធនាគារភូកុក ឬពន្ធនាគារស្ថិតនៅលើកោះត្រល់។ រូបថតមួយសន្លឹកនេះ ស្ថិតនៅក្នុងចំណោមរូបថតជាច្រើនសន្លឹកទៀត ដែលបង្ហាញពីរូបស្មូនឡើងវិញរំលឹកដល់ទៅទារុណកម្មទៅលើអ្នកជាប់ឃុំនៅក្នុងអតីតពន្ធនាគារមួយនេះ។
បើតាមគេហទំព័រ Phu Quoc Prison ទារុណកម្មទៅលើអ្នកជាប់ឃុំនៅក្នុងពន្ធនាគារនេះ បានកើតឡើងនៅក្រោមរដ្ឋាភិបាលវៀតណាមខាងត្បូង ដែលបានរៀបចំពន្ធនាគារនេះឡើងសម្រាប់ដាក់ឃុំអ្នកទោសនយោបាយ និងក្រុមចលនាកុម្មុយនីស្តនៃរដ្ឋាភិបាលវៀតណាមខាងជើងនៅអំឡុងសង្គ្រាមវៀតណាម។
សន្និដ្ឋាន
Fact Crescendo Cambodia បានរកឃើញថា ការអះអាងលើរូបថតដូចដែលបានរៀបរាប់ខាងលើនេះ មិនត្រឹមត្រូវនោះឡើយ។ រូបថតមួយសន្លឹកនេះ មិនមែនបង្ហាញការធ្វើទារុណកម្មរបស់វៀតណាមទៅលើពលរដ្ឋខ្មែរកម្ពុជាក្រោមនោះឡើយ។ រូបថតមួយសន្លឹកនេះ បង្ហាញរូបស្មូនដែលរំលឹកទៅដល់ការធ្វើទារុណកម្មទៅលើអ្នកជាប់ឃុំជាទាហានកុម្មុយនីស្ត និងអ្នកទោសនយោបាយ ដែលប្រព្រឹត្តឡើងដោយក្រុមសន្តិសុខពន្ធនាគារនៅក្រោមរដ្ឋាភិបាលវៀតណាមខាងត្បូង អំឡុងសង្គ្រាមវៀតណាម។
Title:តើរូបថតនេះបង្ហាញការធ្វើទារុណកម្មរបស់វៀតណាមលើពលរដ្ឋខ្មែរកម្ពុជាក្រោមមែនទេ?
Fact Check By: Jay UdomResult: False
