ខណៈការបោះឆ្នោតឃុំ-សង្កាត់កាន់តែខិតចូលមកដល់នោះ លោក អ៊ុច សេរីយុទ្ធ អតីតអ្នកនយោបាយនៃគណបក្សសង្គ្រោះជាតិដែលត្រូវបានតុលាការរំលាយចោលនោះ ត្រូវបានគេអះអាងនៅលើបណ្ដាញសង្គមថា លោកបានចាប់ផ្ដើមសកម្មភាពនយោបាយឡើងវិញជាមួយគណបក្សភ្លើងទៀនទាំងដែលរូបលោកនៅជាប់បម្រាមនយោបាយនៅឡើយ។ ការអះអាងនេះ ត្រូវបានគេចែករំលែកបន្តគ្នានៅលើបណ្ដាញសង្គម។ ទោះជាយ៉ាងណា បន្ទាប់ពីការផ្ទៀងផ្ទាត់របស់យើង Fact Crescendo Cambodia រកឃើញថា ការអះអាងនេះមិនត្រឹមត្រូវនោះឡើយ។
ការអះអាងលើបណ្ដាញសង្គម
សារព័ត៌មានក្នុងស្រុកមួយបានចុះផ្សាយនៅថ្ងៃនេះថា លោក អ៊ុច សេរីយុទ្ធ អតីតតំណាងរាស្ត្រគណបក្សសង្គ្រោះជាតិ ដែលត្រូវបានហាមឃាត់ធ្វើនយោបាយរយៈពេល ៥ឆ្នាំនោះ បានធ្វើសកម្មភាពនយោបាយឡើងវិញ ខណៈកំពុងជាប់បម្រាមនៅឡើយ។
សារព័ត៌មានមួយនេះ បានបង្ហោះរូបថតលោក អ៊ុច សេរីយុទ្ធ ពាក់អាវ និងមួកមានរូបសញ្ញាគណបក្សភ្លើងទៀន នៅក្នុងកម្មវិធីជួបជុំមួយរបស់គណបក្សនយោបាយមួយនេះ។
ការផ្សព្វផ្សាយនេះ ត្រូវបានចែករំលែកជាច្រើនដងនៅលើបណ្ដាញសង្គម ហើយក៏ត្រូវបានអ្នកប្រើប្រាស់ហ្វេសប៊ុកបញ្ចេញមតិជាច្រើនផងដែរ។
ខាងក្រោមនេះ គឺជារូបភាពផ្ដាមចេញពីសេចក្ដីរាយការណ៍នៅលើទំព័រហ្វេសប៊ុកនៃសារព័ត៌មាន TN TV នៅថ្ងៃទី១៦ ខែឧសភា ឆ្នាំ២០២២ ដែលសរសេររៀបរាប់ថា៖
«តើអ្នកនយោបាយជាប់បម្រាម មានសិទ្ធិចេញធ្វើសកម្មភាពនយោបាយដោយគ្មានការសុំសិទ្ធិបានឬ?
ភ្នំពេញ៖ ពាក្យថាបម្រាម គឺហាមដាច់ខាតក្នុងការធ្វើសកម្មភាពណាមួយ ល្គឹកណាគ្មានការស្នើសុំ ឬឯកភាពពីអ្នកផ្ដល់សិទ្ធិ។
ក្នុងនោះ កាលពីព្រឹកថ្ងៃទី១៥ ខែឧសភា ឆ្នាំ២០២២ ក្នុងសមាជវិសាមញ្ញគណបក្សភ្លើងទៀន គេសង្កេតឃើញមានវត្តមានលោក អ៊ុច សេរីយុទ្ធ អតីតអ្នកតំណាងរាស្ត្រមណ្ឌលកំពង់ចាម និងជាអតីតសមាជិកគណៈកម្មាធិការនាយក នៃអតីតគណបក្សសង្គ្រោះជាតិ ដែលគេដឹងថា បាននិងកំពុងជាប់បម្រាមក្នុងបញ្ជីលេខរៀង៣៦ តែលោកបែរជាមានសិទ្ធិ និងបង្ហាញខ្លួនជាចំហក្នុងការចូលរួម និងគាំទ្រគណបក្សភ្លើងទៀន។
មតិជាច្រើនបានលើកឡើងថា តើអតីតតំណាងរាស្ត្ររូបនេះមានអ្វីជាសំអាង ឬលោកបានសិទ្ធិធ្វើនយោបាយដោយស្ងាត់ៗហើយឬយ៉ាងណា? ឬមានអ្វីនៅពីក្រោយសិទ្ធិធ្វើនយោបាយរបស់លោក។
ក្នុងនោះបើតាមអ្នកសារព័ត៌មានមួយចំនួនបានអោយដឹងថា សមាជវិសាមញ្ញរបស់គណបក្សភ្លើងទៀនកាលពីថ្ងៃម្សិលមិញនេះ ក៏មានការរឹតបន្តឹងសម្រាប់អ្នកសារព័ត៌មានចូលរួមផងដែរ ឬមួយក៏មេដឹកនាំគណបក្សមួយនេះ ខ្លាចអ្នកសារព័ត៌មានដឹងថា អតីតតំណាងរាស្ត្រគណបក្សសង្គ្រោះជាតិកូតាលោក សម រង្ស៊ី មកចូលរួមជាមួយគណបក្សភ្លើងទៀនដោយមិនទាន់ស្នើសុំសិទ្ធិឬ?
តែយ៉ាងណា ចំពោះចម្ងល់ និងបញ្ហានេះ យើងនៅមិនទាន់អាចស្នើសុំការបំភ្លឺពីអ្នកនាំពាក្យគណបក្សភ្លើងទៀន និងលោក អ៊ុច សេរីយុទ្ធ ដោយផ្ទាល់បាននៅឡើយទេ»។
ការអះអាងប្រហាក់ប្រហែលគ្នានេះ ក៏ត្រូវបានអ្នកប្រើប្រាស់ហ្វេសប៊ុកដទៃទៀតបង្ហោះ និងចែករំលែកបន្តផងដែរ។ សម្រាប់ព័ត៌មានលម្អិត សូមអានការអះអាងទាំងស្រុងតាមរយៈតំណភ្ជាប់នៅទីនេះ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងនេះតាមរយៈការពិនិត្យមើលព័ត៌មានស្ដីពីការលើកបម្រាមនយោបាយដែលផ្ដល់ទៅដល់អតីតថ្នាក់ដឹកនាំជាន់ខ្ពស់ស្ថិតនៅក្នុងគណបក្សសង្គ្រោះជាតិ និងការសម្ភាសជាមួយប្រភពពាក់ព័ន្ធ ដែលនាំឱ្យយើងរកឃើញការពិតដូចខាងក្រោមនេះ។
នៅក្រោមការអះអាងលើបណ្ដាញសង្គមនេះ យើងរកឃើញព្រះរាជក្រឹត្យមួយច្បាប់ដែលចែករំលែកដោយអ្នកប្រើប្រាស់បណ្ដាញសង្គម។ ព្រះរាជក្រឹត្យនោះ បង្ហាញឱ្យឃើញថា លោក អ៊ុច សេរីយុទ្ធ អតីតសមាជិកគណៈកម្មាធិការនាយកនៃគណបក្សសង្គ្រោះជាតិ ត្រូវបានព្រះមហាក្សត្រកម្ពុជា សម្ដេចព្រះ នរោត្ដម សីហមុនី ព្រះរាជទានសម្បទារនយោបាយឡើងវិញកាលពីថ្ងៃទី០១ ខែមេសា ឆ្នាំ២០២២។
ខាងក្រោមនេះ គឺជាព្រះរាជក្រឹត្យចេញដោយព្រះមហាក្សត្រកម្ពុជា សម្ដេចព្រះ នរោត្ដម សីហមុនី ដែលព្រះរាជទាននីតិសម្បទារនយោបាយឡើងវិញដល់លោក អ៊ុច សេរីយុទ្ធ។
ឆ្លើយតបនឹងការសាកសួររបស់ Fact Crescendo Cambodia តាមតេឡេក្រាមនៅថ្ងៃទី១៦ ខែឧសភា អ្នកនាំពាក្យក្រសួងយុត្តិធម៌ លោក ជិន ម៉ាលីន បានបញ្ជាក់ថា លោក អ៊ុច សេរីយុទ្ធ ពិតជាទទួលបានសិទ្ធិធ្វើនយោបាយឡើងវិញហើយ បន្ទាប់ពីព្រះមហាក្សត្រ សម្ដេចព្រះ នរោត្ដម សីហមុនី ប្រោសព្រះរាជទាន។
ការអះអាងនៅលើបណ្ដាញសង្គមដូចដែលរៀបរាប់ខាងលើនេះ បានឱ្យដឹងថា លោក អ៊ុច សេរីយុទ្ធ ដែលស្ថិតក្នុងសម្លៀកបំពាក់ពណ៌ស និងមានរូបសញ្ញាគណបក្សភ្លើងទៀននោះ បានចូលរួមក្នុងសាមាជវិសាមញ្ញរបស់គណបក្សនេះដែលត្រូវបានរៀបចំធ្វើឡើងកាលពីថ្ងៃទី១៥ ខែឧសភា ឆ្នាំ២០២២។
ឆ្លើយតបនឹងការសាកសួរពី Fact Crescendo Cambodia អ្នកនាំពាក្យគណបក្សភ្លើងទៀន លោក ថាច់ សេដ្ឋា បានប្រាប់ថា លោកបានមើលឃើញលោក អ៊ុច សេរីយុទ្ធ បានចូលរួមក្នុងសាមាជវិសាមញ្ញរបស់គណបក្សមែន ហើយលោកប្រាប់ថា លោក សេរីយុទ្ធ ត្រូវបានចាត់តាំងឱ្យចូលរួមក្នុងក្រុមការងារគណបក្សខេត្តកំពង់ចាម។
ទោះជាយ៉ាងណា លោក សេដ្ឋា ប្រាប់ថា គណបក្សភ្លើងទៀន មិនទាន់ផ្ដល់តួនាទីណាមួយដល់លោក សេរីយុទ្ធ នៅក្នុងជួរដឹកនាំបក្សនៅឡើយទេ ដោយលោកថា គណបក្សកំពុងផ្ដោតទៅលើការងារបោះឆ្នោតដែលខិតជិតចូលមកដល់នាខែក្រោយនេះ។
លោក អ៊ុច សេរីយុទ្ធ បានប្រាប់ Fact Crescendo Cambodia តាមទូរស័ព្ទថា លោកបានដាក់ពាក្យស្នើសុំធ្វើនយោបាយឡើងវិញកាលពីដើមខែមីនាកន្លងមក ហើយទទួលបានសិទ្ធិធ្វើនយោបាយឡើងវិញនៅដើមខែមេសាកន្លងមក។ អតីតតំណាងរាស្ត្រខេត្តកំពង់ចាមរូបនេះ បញ្ជាក់ថា លោកបានដាក់ពាក្យស្នើសុំទៅតាមក្រសួងមហាផ្ទៃ។
ឆ្លើយតបនឹងការសាកសួររបស់ Fact Crescendo Cambodia នៅថ្ងៃនេះ អ្នកនាំពាក្យក្រសួងមហាផ្ទៃ លោក ខៀវ សុភ័គ ក៏បានបញ្ជាក់ផងដែរពីការផ្ដល់សិទ្ធិធ្វើនយោបាយឡើងវិញទៅដល់លោក សេរីយុទ្ធ ផងដែរ។
បើតាមព្រះរាជក្រឹត្យដែលលោក ខៀវ សុភ័គ បញ្ជូនមកឱ្យ Fact Crescendo Cambodia យើងមើលឃើញថា ព្រះមហាក្សត្រកម្ពុជា សម្ដេចព្រះ នរោត្ដម សីហមុនី បានប្រោសប្រទាននីតិសម្បទារនយោបាយដល់លោក សេរីយុទ្ធ ឡើងវិញ ទៅតាមការទូលថ្វាយរបស់លោកនាយករដ្ឋមន្ត្រី ហ៊ុន សែន។
លោក អ៊ុច សេរីយុទ្ធ គឺជាអតីតតំណាងរាស្ត្រមណ្ឌលកំពង់ចាមមកពីគណបក្សសង្គ្រោះជាតិ បន្ទាប់ពីការបោះឆ្នោតជាតិឆ្នាំ២០១៣កន្លងមក។ បន្ទាប់ពីគណបក្សប្រឆាំងដ៏ធំមួយនេះ ត្រូវបានតុលាការកំពូលកម្ពុជាសម្រេចរំលាយចោលកាលពីឆ្នាំ២០១៧ ពាក់ព័ន្ធនឹងការចោទពីបទ«ក្បត់ជាតិ»នោះមក លោក សេរីយុទ្ធ និងថ្នាក់ដឹកនាំបក្សនេះរហូតដល់ ១១៧រូប ត្រូវបានតុលាការហាមឃាត់សិទ្ធិធ្វើនយោបាយរយៈពេល ៥ឆ្នាំ។
សន្និដ្ឋាន
Fact Crescendo Cambodia រកឃើញថា ការអះអាងដូចដែលរៀបរាប់ខាងលើនេះ មិនត្រឹមត្រូវនោះឡើយ។ លោក អ៊ុច សេរីយុទ្ធ អតីតថ្នាក់ដឹកនាំជាន់ខ្ពស់គណបក្សសង្គ្រោះជាតិដែលជាប់បម្រាមនយោបាយនោះ ត្រូវបានព្រះមហាក្សត្រកម្ពុជាប្រោសប្រទាននីតិសម្បទារនយោបាយឡើងវិញកាលពីថ្ងៃទី០២ ខែមេសាកន្លងមកនេះ។ បន្ទាប់មក លោក អ៊ុច សេរីយុទ្ធ បានចូលរួមជាមួយគណបក្សភ្លើងទៀន ដើម្បីជួយដល់ក្រុមការងារបក្សប្រចាំខេត្តកំពង់ចាម។ ដូច្នេះ លោក សេរីយុទ្ធ មិនបានធ្វើនយោបាយដោយល្មើសបម្រាមនយោបាយ ឬគ្មានការលើកលែងបម្រាមនយោបាយនោះឡើយ។
Title:តើលោក អ៊ុច សេរីយុទ្ធ ចូលរួមជាមួយបក្សភ្លើងទៀនទាំងជាប់បម្រាមនយោបាយមែនទេ?
Fact Check By: Jay UdomResult: False
