Fact-Check: តើ​លោក ស ខេង និង​លោក សម រង្ស៊ី ជួប​គ្នា​នៅ​ប្រទេស​បារាំង​មែន​ឬទេ?

Misleading Political

ថ្មីៗ​នេះ ក្រសួង​មហាផ្ទៃ​បាន​ជូន​ដំណឹង​ថា រដ្ឋ​មន្ត្រី​មហាផ្ទៃ លោក ស ខេង បាន​ធ្វើ​ដំណើរ​ទៅ​ប្រទេស​បារាំង​រយៈ​ពេល​ពីរ​សប្ដាហ៍​សម្រាប់​«ធុរៈ​ផ្ទាល់​ខ្លួន»។ ដំណើរ​របស់​រដ្ឋ​មន្ត្រី​មហា​ផ្ទៃ​រូប​នេះ​ទៅ​ប្រទេស​បារាំង នាំ​ឱ្យ​មាន​ការ​អះ​អាង​លើ​បណ្ដាញ​សង្គម​ថា លោក ស ខេង និង​លោក សម រង្ស៊ី មេដឹកនាំ​បក្ស​ប្រឆាំង​ដែល​កំពុង​រស់​នៅ​ឯ​ប្រទេស​បារាំង​ផង​ដែរ​នោះ បាន​ជួប​ពិភាក្សា​គ្នា។ អ្នក​ប្រើ​ប្រាស់​បណ្ដាញ​សង្គម ថែម​ទាំង​បង្ហោះ​រូបថត​មួយ​សន្លឹក ដែល​បង្ហាញ​លោក ស ខេង ចាប់​ដៃ​គ្នា​ជាមួយ​លោក សម រង្ស៊ី ផង​ដែរ។ រូបថត​ជាមួយ​នឹង​ការ​អះ​អាង​បែប​នេះ ត្រូវ​បាន​ចែក​រំលែក​តៗ​គ្នា​​ជាច្រើន​ដង​​ពី​សំណាក់​អ្នក​ប្រើ​ប្រាស់​បណ្ដាញ​សង្គម​និយាយ​ភាសា​ខ្មែរ ក្នុង​នោះ​មាន​អ្នក​ប្រើ​ប្រាស់​បណ្ដាញ​សង្គម​មួយ​ចំនួន​ជឿ​ថា មេដឹកនាំ​ទាំង​ពីរ​រូប​នេះ បាន​ជួប​គ្នា​មែន។ ទោះជាយ៉ាងណា ការ​ត្រួត​ពិនិត្យ​ការ​ពិត​ រក​ឃើញ​ថា ការ​អះ​អាង​នេះ មិន​ត្រឹម​ត្រូវ​នោះ​ឡើយ។

ការ​អះ​អាង​លើ​បណ្ដាញ​សង្គម

កាល​ពី​ថ្ងៃ​ទី​២៥ ខែ​សីហា​កន្លង​មក​ថ្មីៗ​នេះ អ្នក​ប្រើ​ប្រាស់​បណ្ដាញ​សង្គម​ហ្វេសប៊ុក​ម្នាក់ បាន​បង្ហោះ​រូបថត​មួយ​សន្លឹក​ដែល​បង្ហាញ​រដ្ឋ​មន្ត្រី​ក្រសួង​មហាផ្ទៃ លោក ស ខេង ដែល​ជា​អនុ​ប្រធាន​គណបក្ស​ប្រជាជ​ន​កម្ពុជា​កំពុង​កាន់​អំណាច​ផង​នោះ ចាប់​ដៃ​គ្នា​ជាមួយ​លោក សម រង្ស៊ី មេដឹកនាំ​គណបក្ស​សង្គ្រោះ​ជាតិ​ដែល​កំពុង​រស់នៅ​និរទេស​ខ្លួន​ឯង​នៅ​ឯ​ក្រៅ​ប្រទេស។

អ្នក​ប្រើ​ប្រាស់​ហ្វេសប៊ុក​ដដែល​ អះ​អាង​ថា លោក ស ខេង និង​លោក សម រង្ស៊ី បាន​ជួប​គ្នា​ និង​សម្រេច​បង្កើត​រដ្ឋាភិបាល​បណ្ដោះ​អាសន្ន​មួយ ដោយ​លោក ស ខេង ទទួល​ខុស​ត្រូវ​លើ​ការ​បង្វឹក​កង​ទ័ព ហើយ​លោក សម រង្ស៊ី ទទួល​ខុស​ត្រូវ​លើ​ការ​ស្វែងរក​ហិរញ្ញវត្ថុ។

រូបថត​ជាមួយ​នឹង​ការ​អះ​អាង​បែប​នេះ ត្រូវ​បាន​ចែក​រំលែក​ជាច្រើន​ដង ហើយ​មាន​អ្នក​ប្រើ​ប្រាស់​បណ្ដាញ​សង្គម​ជាច្រើន​នាក់​បាន​បញ្ចេញ​មតិ​ចម្រុះ​បែប​ផង​ដែរ ក្នុង​នោះ​មាន​អ្នក​ប្រើ​ប្រាស់​ហ្វេសប៊ុក​មួយ​ចំនួន​ជឿ​ជាក់​ថា មេដឹកនាំ​គណបក្ស​នយោបាយ​ទាំង​ពីរ​រូប​នេះ ពិត​ជា​បាន​ជួប​គ្នា​នៅ​ឯ​ក្រៅ​ប្រទេស​មែន។

ខាង​ក្រោម​នេះ គឺ​ជា​រូបភាព​ផ្ដាម​ចេញ​ពី​ប៉ុស្តិ៍​របស់​អ្នក​ប្រើប្រាស់​ហ្វេសប៊ុក​នោះ ដែល​សរសេរ​រៀប​រាប់​ថា «ជំនួប​រវាង​សម្ដេច ស ខេង និង​ឯកឧត្ដម សម រង្ស៊ី ថ្ងៃ​នេះ សម្រេច​ថា និង[នឹង]​បង្កើត​រដ្ឋាភិបាល​បណ្ដោះ​អាសន្ន​មួយ ដោយ​សម្ដេច ស ខេង ត្រូវទទួល​បន្ទុក​ក្នុង​ការ​បង្វឹក​កង​ទ័ព ចំណែក​​ឯឧត្ដម សម រង្ស៊ី ទទួល​ខុស​ត្រូវ​ក្នុង​ការ​ស្វែង​រក​ហិរញ្ញវត្ថុ។ ហើយ​ពលករ​ចំណាក​ស្រុក​មក​ធ្វើ​ការ​នៅ​ប្រទេស​ថៃ​រាប់​សែន​នាក់ ត្រៀម​ខ្លួន​រួច​ជាស្រេច​ក្នុង​ការ​ចូល​ធ្វើ​ជា​កង​ទ័ព​ស្ម័គ្រ​ចិត្ត​ក្នុង​រដ្ឋាភិបាល​បណ្ដោះ​​អាសន្ន​មួយ​នេះ ដើម្បី​ផ្ដួល​រំលំ​របប​ផ្ដាច់​ការ​អាយ៉ង់​យួន ហ៊ុន សែន»។

Facebook Post | Archived Link

ការ​ត្រួត​ពិនិត្យ​ការ​ពិត

Fact Crescendo Cambodia បាន​ចាប់​ផ្ដើម​ត្រួត​ពិនិត្យ​ទៅ​លើ​រូបថត និង​ការ​អះ​អាង​នេះ​តាម​រយៈ​ការ​ដំណើរការ​កម្មវិធី​​ស្វែង​រក​រូបថត​នៅ​លើ Google និង​ការបក​ស្រាយ​ពី​ខុទ្ទកាល័យ​របស់​លោក ស ខេង ដែល​នាំ​ឱ្យ​យើង​បាន​ជួប​រូបថត និង​ព័ត៌មាន​លម្អិត​ទាំង​ស្រុង។

រូបថត​មួយ​សន្លឹក​នេះ ត្រូវ​បាន​រក​ឃើញ​ចុះ​ផ្សាយ​ជាច្រើន​ដង​ដោយ​គេហ​ទំព័រ​នៃ​វិទ្យុ​បារាំង​អន្តរជាតិ​ជា​ភាសា​ខ្មែរ​​(RFI)​កាល​ពី​ឆ្នាំ​២០១៥​កន្លង​មក។ នៅ​ក្នុង​អត្ថបទ​មួយ​របស់​ខ្លួន វិទ្យុ​បារាំង​អន្តរជាតិ RFI បាន​សរសេរ​ព័ត៌មាន​រូបថត​ថា លោក ស ខេង និង​លោក សម រង្ស៊ី ជួប​ជជែក​គ្នា​កាល​ពី​ថ្ងៃ​ទី​២៣ ខែ​កញ្ញា ឆ្នាំ​២០២១៥ ហើយ​រូបថត​នោះ ត្រូវ​បាន​ថត​ដោយ​អ្នក​ថត​រូប​សារព័ត៌មាន​ លោក ស៊ីវ ចាន់ណា។

បើ​តាម​ខ្លឹមសារ​នៃ​អត្ថបទ​នេះ លោក ស ខេង និង​លោក សម រង្ស៊ី បាន​ជួប​ជជែក​គ្នា​នា​ពេល​នោះ ដើម្បី​ពិភាក្សា​អំពី​កំណែ​ទម្រង់​ការ​បោះ​ឆ្នោត បន្ទាប់​ពី​ការ​បោះ​ឆ្នោត​ដ៏​ចម្រូង​ចម្រាស់​កាល​ពី​ឆ្នាំ​២០១៣ ដែលឈាន​ទៅ​ដល់​ការ​តវ៉ា​យ៉ាង​ធំ​ធេង​ជុំ​វិញ​លទ្ធផល​បោះ​ឆ្នោត​នា​ពេល​នោះ។

RFI’s Report | Archived Link

ការ​អះអាង​ខាង​លើ​នេះ បាន​កើត​ឡើង​ចំ​ពេល​ដែល​លោក ស ខេង បាន​ស្ថិត​ក្នុង​ដំណើរ​ទៅ​កាន់​ប្រទេស​បារាំង​រយៈ​ពេល ២​សប្ដាហ៍​ ដែល​លោក​បញ្ជាក់​ក្នុង​សេចក្ដី​ជូន​ដំណឹង​​កាល​ពី​ថ្ងៃ​ទី​២២ ខែ​សីហា​​ថា លោក​មាន​«ធុរៈ​ផ្ទាល់​ខ្លួន»។

ខាង​ក្រោម​នេះ គឺ​ជា​រូបភាព​ផ្ដាម​ចេញ​ពី​ប៉ុស្តិ៍​មួយ​របស់​ទំព័រ​ហ្វេសប៊ុក​ផ្លូវការ​របស់​លោក ស ខេង ដែល​ភ្ជាប់មក​ជាមួយ​នូវ​សេចក្ដី​ជូន​ដំណឹង​មួយ​ដែល​បញ្ជាក់​ថា អនុ​ប្រធាន​គណបក្ស​​កាន់​អំណាច​រូបនេះ នឹង​ធ្វើ​ដំណើរ​ទៅ​កាន់​ប្រទេស​បារាំង​ចាប់​ពី​ថ្ងៃ​ទី​២២ ខែ​សីហា រហូត​ដល់​ថ្ងៃ​ទី​០៥ ខែ​កញ្ញា ឆ្នាំ​២០២១។

Facebook Post | Archived Link

សេចក្ដី​ជូន​ដំណឹង​នោះ មិន​បាន​បញ្ជាក់​មូល​​ហេតុ​​ច្បាស់​លាស់​នោះ​ឡើុយ ដែល​នាំ​ឱ្យ​មាន​មន្ទិល​សង្ស័យ និង​ការ​ចោទ​សួរ​ថា តើ​លោក ស ខេង អាច​នឹង​មាន​ជំនួប​ជា​សម្ងាត់​ណា​មួយ​ជាមួយ​លោក សម រង្ស៊ី ដែល​កំពុង​រស់​នៅ​ឯ​ប្រទេស​បារាំង​ដែរ ឬ​យ៉ាងណា។

ទោះជាយ៉ាងណា លោក ស សុខា រដ្ឋ​លេខាធិការ​ក្រសួង​អប់រំ យុវជន និង​កីឡា និង​ជា​កូន​ប្រុស​បង្កើត​របស់​លោក ស ខេង បាន​ច្រាន​ចោល​នូវ​ការ​អះ​អាង​អំពី​ជំនួប​នេះ ដោយ​ថា ឪពុក​របស់​លោក​ធ្វើ​ដំណើរ​ទៅ​ប្រទេស​បារាំង ដើម្បី​ពិនិត្យ​សុខភាព​សុទ្ធ​សាធ និង​«ពុំ​មាន​ជួប​អ្នក​នយោបាយ​ណា​ម្នាក់​ឡើយ»។

ខាង​ក្រោម​នេះ គឺ​ជា​រូបភាព​ផ្ដាម​ចេញ​ពី​ប៉ុស្តិ៍​របស់​លោក ស សុខា ដែល​បាន​បក​ស្រាយ​ឆ្លើយ​តប​ទៅ​នឹង​ការ​អះ​អាង​ថា ឪពុក​របស់​លោក​បាន​ជួប​ជាមួយ​មេដឹកនាំ​បក្ស​ប្រឆាំង លោក សម រង្ស៊ី នៅ​ប្រទេស​បារាំង។

Facebook Post | Archived Link

មួយ​ថ្ងៃ​ក្រោយ​​លោក ស ខេង ចាក​ចេញ​ពី​កម្ពុជា​ទៅ​កាន់​ប្រទេស​បារាំង អ្នក​នាំ​ពាក្យ​ក្រសួង​មហាផ្ទៃ លោក ផាត សុផានិត បាន​ប្រាប់​សារព័ត៌មាន​ VOD ថា រដ្ឋ​មន្ត្រី​ក្រសួង​មហាផ្ទៃ​រូប​នេះ មិន​មាន​ជំនួប​ណា​មួយ​ជាមួយ​មេដឹកនាំ​បក្ស​ប្រឆាំង​នោះ​ឡើយ។

នៅ​ក្នុង​អត្ថបទ​សារព័ត៌មាន​ VOD ដដែល លោក ម៉ែន សុថាវរិន្ទ្រ ដែល​ជា​អតីត​តំណាង​រាស្ត្រ​គណបក្ស​សង្គ្រោះ​ជាតិ​ប្រចាំ​ខេត្ត​កំពង់ធំ និង​សៀមរាប បាន​បញ្ជាក់​​ពី​បំណង​ចង់​ឱ្យ​មាន​ជំនួប​រវាង​លោក ស ខេង និង​លោក សម រង្ស៊ី ប៉ុន្តែ លោក​បញ្ជាក់​ថា លោក សម រង្ស៊ី កំពុង​ស្ថិត​ក្នុង​ដំណើរ​នៅ​លើទឹក​ដី​សហរដ្ឋ​អាមេរិក​អំឡុង​ពេល​ដំណាល​គ្នា​នេះ។

VOD’s Report | Archived Link

នៅ​ចន្លោះ​ពី​ថ្ងៃ​ទី​២២ រហូត​ដល់​ថ្ងៃ​ទី​២៧ ខែ​សីហា លោក សម រង្ស៊ី បាន​បង្ហោះ​នៅ​លើ​ទំព័រ​ហ្វេសប៊ុក​ផ្លូវការ​របស់​លោក​ជា​បន្ត​ថា លោក​កំពុង​ស្ថិត​នៅ​លើ​ទឹក​ដី​សហ​រដ្ឋ​អាមេរិក និង​ជួប​ជាមួយ​ក្រុម​អ្នក​គាំ​ទ្រគណបក្ស​ប្រឆាំង​នៅ​ទីនោះ។

Sam Rainsy Facebook Post | Archived Link

អនុ​ប្រធាន​គណបក្ស​សង្គ្រោះ​ជាតិ អ្នកស្រី មូរ សុខហួរ ដែល​កំពុង​រស់នៅ​​ឯ​សហរដ្ឋ​អាមេរិក​ដែរនោះ បាន​បញ្ជាក់​នៅ​ថ្ងៃ​នេះ​​ថា លោក សម រង្ស៊ី កំពុង​ស្ថិត​នៅ​លើ​ទឹក​ដី​សហរដ្ឋ​អាមេរិក ហើយ​មិន​បាន​ជួប​ជាមួយ​លោក ស ខេង នោះ​ឡើយ។

អ្នកស្រី មូរ សុខហួរ បាន​ឱ្យ​ដឹង​ទៀត​ថា លោក សម រង្ស៊ី កំពុង​​បំពេញ​​ដំណើរ​ទស្សនកិច្ច​រយៈពេល​ ២​ខែ​នៅ​ទីនោះ​ចន្លោះ​ពី​ថ្ងៃ​ទី​១៨ ខែ​សីហា រហូត​ដល់​ថ្ងៃ​ទី​១១ ខែ​តុលា​ខាង​មុខ​នេះ។

សន្និដ្ឋាន

Fact Crescendo Cambodia បាន​រក​ឃើញ​ថា ការ​អះ​អាង​ដូច​បាន​រៀប​រាប់​ខាង​លើ​នេះ មិន​ត្រឹម​ត្រូវ​នោះ​ឡើយ។ គ្មាន​ការ​ជួប​គ្នា​រវាង​លោក សម រង្ស៊ី និង​លោក ស ខេង នោះ​ឡើយ​នៅ​ថ្ងៃ​​ទី​២៥ ខែ​សីហា​កន្លង​មក​ថ្មីៗ​នេះ។ រូបថត​មួយ​សន្លឹក​នោះ គឺ​ជា​ជំនួប​លោក ស ខេង និង​លោក សម រង្ស៊ី កាល​ពី​ឆ្នាំ​២០១៥​កន្លង​មក។ ខណៈ​លោក ស ខេង កំពុង​ស្ថិត​ក្នុង​ដំណើរ​នៅ​ក្នុង​ប្រទេស​បារាំង​នៅ​ចន្លោះ​ថ្ងៃ​ទី​២២ ខែ​សីហា រហូត​ដល់​ថ្ងៃ​ទី​០៥ ខែ​កញ្ញា​នោះ លោក សម រង្ស៊ី កំពុង​ស្ថិត​លើ​ទឹក​ដី​សហ​រដ្ឋ​អាមេរិក​ចន្លោះ​ពី​ថ្ងៃ​ទី​១៨ ខែ​សីហា ដល់​ថ្ងៃ​ទី​១១ ខែ​តុលា​ខាង​មុខ។

Avatar

Title:តើ​លោក ស ខេង និង​លោក សម រង្ស៊ី ជួប​គ្នា​នៅ​ប្រទេស​បារាំង​មែន​ឬទេ?

Fact Check By: Jay Udom 

Result: Misleading

Leave a Reply

Your email address will not be published.