- >>
- Political
រូបថតបង្ហាញលោក ហ៊ុន សែន និងភរិយា លើកដៃសំពះអតីតមេដឹកនាំវៀតណាម ជារូបថតកាត់ត
លោក ហ៊ុន សែន និងក្រុមគ្រួសាររបស់លោក តែងតែត្រូវបានអ្នកប្រើប្រាស់បណ្ដាញសង្គមយកមកជជែក និងផ្សារភ្ជាប់ជាមួយនឹងថ្នាក់ដឹកនាំនានានៃប្រទេសវៀតណាម។ ក្នុងនោះ រូបថតមួយសន្លឹកបង្ហាញទិដ្ឋភាពលោក និងភរិយា បានឈរលើកដៃសំពះអតីតមេដឹកនាំវៀតណាម ត្រូវបានបង្ហោះឡើងដោយអ្នកប្រើប្រាស់ហ្វេសប៊ុកម្នាក់ កាលពីពេលថ្មីៗនេះ។ ទោះជាយ៉ាងណា ការត្រួតពិនិត្យការពិតរបស់ Fact Crescendo Cambodia រកឃើញថា រូបថតបង្ហោះនៅលើបណ្ដាញសង្គមហ្វេសប៊ុកនោះ គឺមិនត្រឹមត្រូវនោះឡើយ។
ការអះអាងលើបណ្ដាញសង្គម
កាលពីថ្ងៃទី០៨ ខែមីនា ឆ្នាំ២០២៤កន្លងទៅនេះ អ្នកប្រើប្រាស់ហ្វេសប៊ុកម្នាក់ បានបង្ហោះរូបថតពីរសន្លឹក ដែលក្នុងមួយសន្លឹកនោះ បានបង្ហាញលោកអតីតនាយករដ្ឋមន្ត្រីកម្ពុជា ហ៊ុន សែន និងភរិយា បានលើកដៃសំពះអតីតមេដឹកនាំវៀតណាមលោក ង្វៀន តាន់យុង (Nguyen Tan Dung)។
រូបថតខាងលើនេះ ត្រូវបានចែករំលែកបន្តជាច្រើន ហើយអាចត្រូវបានអ្នកប្រើប្រាស់ហ្វេសប៊ុកមួយចំនួនជឿថាជារូបថតពិតប្រាដក។
ខាងក្រោមនេះ គឺជារូបភាពផ្ដាមចេញពីប៉ុស្តិ៍របស់អ្នកប្រើប្រាស់ ដែលបានសរសេរថា «ជាមួយខ្មែរខ្លាំងជាងស្ដេច ជាមួយយួនរួញទាំងប្ដីប្រពន្ធ»។
ការបង្ហោះរូបថតមួយសន្លឹកបែបនេះ ក៏ត្រូវបានរកឃើញនៅលើទំព័រហ្វេសប៊ុកមួយផ្សេងទៀតផងដែរ កាលពីជាង១០ឆ្នាំមុន ដែលបានបង្ហាញទិដ្ឋភាពលោក ហ៊ុន សែន និងភរិយា បានលើកដៃសំពះអតីតនាយករដ្ឋមន្ត្រីវៀតណាម។
រូបថតដូចគ្នាខាងលើនេះ ក៏ត្រូវបានរកឃើញ និងចែកចាយផងដែរ នៅលើគេហទំព័រ Khmerization ដែលបានសរសេរថា «ពូហ៊ុនសែនបណ្ដូលចិត្តអើយ»។
Khmerization Link | Archived Link
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងខាងលើនេះ តាមរយៈការដំណើរការកម្មវិធី Google Reverse Image Search ដែលនាំយើងរកឃើញការពិតដូចខាងក្រោម។
រូបថតដែលមានទម្រង់ និងសណ្ឋានដូចគ្នាមួយនេះ ត្រូវបានរកឃើញ និងផ្សព្វផ្សាយនៅលើគេហទំព័រជាភាសាចិន Sohu កាលពីថ្ងៃទី២២ ខែតុលា ឆ្នាំ២០០៨កន្លងទៅ។ គេហទំព័រដដែលនេះ បានធ្វើសេចក្តីរាយការណ៍ និងបញ្ជាក់ថានោះ គឺជាទិដ្ឋភាពលោកនាយករដ្ឋមន្រ្តីចិន វេន ជាប៉ាវ បានទទួលស្វាគមន៍លោកនាយករដ្ឋមន្ត្រីវៀតណាម ង្វៀន តាន់យុង ដែលលោកបានមកបំពេញទស្សនកិច្ចជាផ្លូវការនៅក្នុងទីក្រុងប៉េកាំង ប្រទេសចិន។
ខាងក្រោមនេះ គឺជារូបភាពផ្ដាមចេញពីគេហទំព័រខាងលើ ដែលពុំបានបង្ហាញទិដ្ឋភាពលោក ហ៊ុន សែន និងភរិយា បានលើកដៃសំពះអតីតមេដឹកនាំវៀតណាមដូចការបង្ហោះអះអាងខាងលើនោះឡើយ។
Sohu News Report | Archived Link
ខាងក្រោមនេះ គឺជាវីដេអូឃ្លីបនៃការទស្សនកិច្ចជាផ្លូវការរបស់លោក ង្វៀន តាន់យុង នាយករដ្ឋមន្រ្តីវៀតណាម ទៅកាន់ទីក្រុងប៉េកាំង ប្រទេសចិន កាលពីខែតុលា ឆ្នាំ២០០៨កន្លងទៅ។
ខាងក្រោមនេះ គឺជាការប្រៀបធៀបគ្នារវាងរូបថតដែលត្រូវបានកាត់ត និងរូបថតច្បាប់ដើមដែលត្រូវបានរកឃើញផ្សព្វផ្សាយនៅលើបណ្ដាញសង្គម។
ដើម្បីស្វែងរកព័ត៌មានពិត សូមតាមដានការផ្សាយរបស់យើងតាមរយៈប្រព័ន្ធដូចខាងក្រោម៖
Facebook Twitter Telegram Google News TikTok WhatsApp
សន្និដ្ឋាន
Fact Crescendo Cambodia បានរកឃើញថា រូបថតដែលបានបង្ហោះ និងអះអាងដោយអ្នកប្រើប្រាស់ខាងលើនេះ គឺពិតជាមិនត្រឹមត្រូវនោះឡើយ។ ច្បាប់ដើមនៃរូបថតនេះ គឺជាទិដ្ឋភាពអតីតនាយករដ្ឋមន្រ្តីវៀតណាមលោក ង្វៀន តាន់យុង និងលោក វេន ជាប៉ាវ អតីតនាយករដ្ឋមន្ត្រីចិន នៅក្នុងទីក្រុងប៉េកាំង កាលពីខែតុលា ឆ្នាំ២០០៨កន្លងទៅ។
Title:រូបថតបង្ហាញលោក ហ៊ុន សែន និងភរិយា លើកដៃសំពះអតីតមេដឹកនាំវៀតណាម ជារូបថតកាត់ត
Written By: Kakada SimResult: Altered
