ការអះអាងដ៏ផុលផុសមួយនៅលើបណ្ដាញសង្គម បានលើកឡើងថា បុរសម្នាក់ត្រូវបានសមត្ថកិច្ចស្រុកចំការលើ ឃាត់ខ្លួនកាលពីចុងខែវិច្ឆិកាកន្លងមកនេះ បន្ទាប់ពីជិះម៉ូតូបុកមាន់មួយក្បាលបណ្ដាលឱ្យងាប់។ ការអះអាងនេះ ត្រូវបានចែករំលែកយ៉ាងព្រោងព្រាតនៅលើបណ្ដាញសង្គមពីសំណាក់អ្នកប្រើប្រាស់ហ្វេសប៊ុក ព្រមទាំងមានការបញ្ចេញមតិជាច្រើនផងដែរ។ ទោះជាយ៉ាងណា ការផ្ទៀងផ្ទាត់របស់យើងរកឃើញថា បុរសម្នាក់នោះត្រូវបានសមត្ថកិច្ចឃាត់ខ្លួនពាក់ព័ន្ធនឹងករណីបង្ក្រាបសង្វៀនជល់មាន់ភ្នាល់ដាក់លុយខុសច្បាប់។
ការអះអាងលើបណ្ដាញសង្គម
ការអះអាងដ៏ផុសផុលមួយនៅលើបណ្ដាញសង្គម បានលើកឡើងថា បុរសម្នាក់ត្រូវបានសមត្ថកិច្ចស្រុកចំការលើ ខេត្តកំពង់ចាម ឃាត់ខ្លួនកាលពីថ្ងៃទី៣០ ខែវិច្ឆិកាកន្លងមកនេះ បន្ទាប់ពីការបានបើកបរម៉ូតូបុកមាន់មួយក្បាលបណ្ដាលឱ្យស្លាប់នៅឯឃុំស្ពឺ។
ការអះអាងនេះ ក៏បានភ្ជាប់មកជាមួយនូវរូបថតបុរសម្នាក់ឈរនៅមុខកន្លែងវាស់កម្ពស់របស់អធិការដ្ឋាននគរបាលស្រុកចំការលើ និងរូបថតមាន់មួយក្បាលស្ថិតនៅមុខម៉ូតូមួយគ្រឿងផងដែរ។
ការអះអាងនេះ ត្រូវបានអ្នកប្រើប្រាស់បណ្ដាញសង្គមហ្វេសប៊ុកនិយាយភាសាខ្មែរចែករំលែកបន្តដល់ទៅរាប់ពាន់ដង ហើយក៏មានការបញ្ចេញមតិយ៉ាងច្រើន និងប្រតិកម្មចម្រុះបែបទៅលើការអះអាងនេះផងដែរ។
ខាងក្រោមនេះ គឺជារូបភាពផ្ដាមចេញពីការអះអាងលើបណ្ដាញសង្គមកាលពីថ្ងៃទី០១ ខែធ្នូ ដែលរៀបរាប់ថា «គ្រោះថ្នាក់ចរាចរណ៍នៅថ្ងៃទី៣០ ខែវិច្ឆិកា ឆ្នាំ២០២២ វេលាម៉ោង១៣:១០នាទី កម្លាំងជំនាញព្រហ្មទណ្ឌ សហការ[ជាមួយ]កម្លាំងប៉ុស្តិ៍រដ្ឋបាលស្ពឺ នៃអធិការដ្ឋាននគរបាលស្រុកចំការលើ បានចុះចាប់អ្នកជិះម៉ូតូបង្ករ[បង្ក]បុកមាន់ងាប់(មាន់រងគ្រោះបាក់កងាប់)នៅចំណុចលើផ្លូវលំក្នុងភូមិពែងមាសត្បូង ឃុំស្ពឺ ស្រុកចំការលើ រួមទាំងវត្ថុតាងមួយចំនួន។ បច្ចុប្បន្ន ជនសង្ស័យត្រូវបានឃាត់ខ្លួនជាបណ្ដោះអាសន្ននៅអធិការដ្ឋាននគរបាលស្រុកចំការលើ ដើម្បីកសាងសំណុំរឿងតាមនីតិវិធី»។
ការអះអាងដដែលនេះ ក៏ត្រូវបានអ្នកប្រើប្រាស់បណ្ដាញសង្គមដទៃទៀតយកទៅបង្ហោះបន្ត និងប្រៀបធៀបនឹងករណីគ្រោះថ្នាក់ចរាចរណ៍មួយនៅលើស្ពានជ្រោយចង្វាកាលពីរាត្រីថ្ងៃចន្ទដើមសប្ដាហ៍នេះ។
ការចែករំលែកនូវការអះអាងខាងលើនេះ ទទួលបានការចែករំលែកបន្តដល់ទៅរាប់រយដងថែមទៀត ហើយក៏ទទួលបានការបញ្ចេញមតិ និងប្រតិកម្មយ៉ាងច្រើនផងដែរ។
ការត្រួតពិនិត្យការពិត
Fact Crescendo Cambodia បានត្រួតពិនិត្យ និងផ្ទៀងផ្ទាត់ទៅលើការអះអាងនេះតាមរយៈ Google Reverse Image Search ដែលនាំឱ្យយើងរកឃើញការពិតដូចខាងក្រោមនេះ។
តាមរយៈការដំណើរការ Google Reverse Image Search យើងបានរកឃើញព័ត៌មានជុំវិញការចាប់ខ្លួនបុរសនៅក្នុងរូបថតនេះ ដែលផ្សព្វផ្សាយដោយទំព័រហ្វេសប៊ុកផ្លូវការរបស់រដ្ឋបាលខេត្តកំពង់ចាមកាលពីថ្ងៃព្រហស្បតិ៍សប្ដាហ៍មុន។
ទំព័រហ្វេសប៊ុករដ្ឋបាលខេត្តកំពង់ចាម បានរៀបរាប់ថា បុរសនៅក្នុងរូបថតនេះ ត្រូវបានសមត្ថកិច្ចនៅស្រុកចំការលើ ឃាត់ខ្លួនកាលពីរសៀលថ្ងៃទី៣០ ខែវិច្ឆិកាកន្លងមកនេះ នៅក្នុងប្រតិបត្តិការបង្ក្រាបសង្វៀនជល់មាន់ភ្នាល់ដាក់ប្រាក់ ដែលអាជ្ញាធរចាត់ទុកជាល្បែងស៊ីសងខុសច្បាប់។
Fact Crescendo Cambodia បានសាកសួរទៅអធិការនគរបាលស្រុកចំការលើ លោក ប៉ែន ទៀងចំរើន ហើយលោកប្រាប់ថា ប្រសិនបើជាគ្រោះថ្នាក់ចរាចរណ៍ទៅលើសត្វមាន់មួយក្បាល វាមិនដល់ថ្នាក់សមត្ថកិច្ចឃាត់ខ្លួនអ្នកបើកបរនោះឡើយ ព្រោះវាមិនមែនបទល្មើសព្រហ្មទណ្ឌ។
មន្ត្រីនគរបាលរូបនេះ ក៏បានប្រាប់ឱ្យមើលទៅលើការផ្សព្វផ្សាយរបស់ទំព័រហ្វេសប៊ុករដ្ឋបាលខេត្តកំពង់ចាមផងដែរ ដែលបានផ្សព្វផ្សាយរួចមកហើយនូវព័ត៌មាននេះ។
សន្និដ្ឋាន
Fact Crescendo Cambodia ការអះអាងដូចដែលត្រូវបានរៀបរាប់ខាងលើនេះ មិនត្រឹមត្រូវនោះឡើយ។ ទំព័ហ្វេសប៊ុករដ្ឋបាលខេត្តកំពង់ចាម និងមន្ត្រីនគរបាលស្រុកចំការលើ បញ្ជាក់ថា បុរសម្នាក់នៅក្នុងរូបថតនោះ ត្រូវបានសមត្ថកិច្ចឃាត់ខ្លួនពាក់ព័ន្ធនឹងការបង្ក្រាបសង្វៀនជល់មាន់ខុសច្បាប់នៅក្នុងឃុំស្ពឺ មិនមែនជារឿងគ្រោះថ្នាក់ចរាចរណ៍បុកមាន់ងាប់ដូចការអះអាងទេ។
Title: តើការឃាត់ខ្លួនបុរសម្នាក់នេះពាក់ព័ន្ធនឹងករណីជិះម៉ូតូបុកមាន់មែនឬទេ?
Fact Check By: Jay UdomResult: Misleading
